An Bulawan na Reglamento sa Paggawe—Iyan Praktikal
Mantang an kadaklan na tawo minamansay an Bulawan na Reglamento sa Paggawe bilang sarong katokdoan sa moral na isinabi ni Jesus, sia mismo nagsabi: “An sakong itinotokdo bako ko, kundi kaidtong nagsugo sa sako.”—Juan 7:16.
IYO, an Kagtugdas kan itinokdo ni Jesus, kaiba an inaapod na Bulawan na Reglamento sa Paggawe, iyo an saro na nagsugo ki Jesus, iyo na ngani, an Kaglalang, si Jehova Dios.
Sa kapoonpooni katuyohan nin Dios na trataron kan bilog na katawohan an lambang saro sa paagi na gusto nindang trataron man sinda. Itinao nia an pinakamarahay na halimbawa nin pagpaheling nin pagmakolog sa ikararahay nin iba sa paagi kan paglalang nia sa mga tawo: “Linalang nin Dios an tawo sa saiyang ladawan, sa ladawan nin Dios linalang nia sia; linalang nia sindang lalaki asin babae.” (Genesis 1:27) Nangangahulogan ini na mamomoton na tinawan nin Dios an mga tawo nin sarong sokol kan saiya mismong marahayon na mga kualidad tanganing makamtan ninda an buhay na may katoninongan, kaogmahan, asin pagkasararo—na may posibilidad na sagkod lamang. An saindang tao nin Dios na konsensia, kun tama an pagkasanay, gigiyahan sinda na trataron an iba sa paagi na gusto nindang trataron man sinda.
Nangingibabaw an Kaimotan
Mantang an katawohan nagkaigwa nin marahayon na pagpopoon, anong nangyari? Sa simpleng pagtaram, an kaimotan luminataw. An kadaklan pamilyar sa pagkasaysay sa Biblia manongod sa ginibo kan enot na tawong mag-agom, na nakarekord sa Genesis kapitulo 3. Sa sutsut ni Satanas, saro na tinutumang an gabos na pamantayan nin Dios, may kaimotan na hinaboan ni Adan asin Eva an pamamahala nin Dios na pinili an independensia asin pakapili kan gusto. An saindang maimot asin rebelyosong gawe-gawe nagbunga bako sana nin dakulaon na kawaran sa sainda mismo kundi siring man nin makaturotristeng epekto sa gabos na maarabot nindang gikan. Iyan malinaw na patunay kan kapahapahamak na resulta nin dai pag-intindi sa katokdoan na inapod na Bulawan na Reglamento sa Paggawe. Bilang resulta, “paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.”—Roma 5:12.
Minsan ngani an katawohan sa pankagabsan tuminalikod sa mamomoton na mga dalan ni Jehova Dios, dai nia sinda binayaan. Halimbawa, itinao ni Jehova sa nasyon nin Israel an saiyang Ley tanganing giyahan sinda. Tinokdoan sinda kaiyan na trataron an iba sa paagi na gusto nindang trataron man sinda. An Ley nagtao nin instruksion sa pagtratar sa mga oripon, aking lalaki na daing ama, asin babaeng balo. Sinabi kaiyan kun paano aaksionan an pangongolog, pagkidnap, asin paghabon. An mga ley manongod sa salud nagpapaheling nin pagmakolog sa salud nin iba. Igwa ngani nin mga ley manongod sa seksuwal na mga bagay. Sinumaryo ni Jehova an saiyang Ley paagi sa pagsabi sa mga tawo: “Kamotan mo an saimong kapwa nin siring sa saimo man sana,” sarong deklarasyon na kinotar ni Jesus kan huri. (Levitico 19:18; Mateo 22:39, 40) An Ley igwa man nin sinasabi manongod sa pagtratar sa mga nakikihimanwa sa mga Israelita. An Ley nagboboot: “Dai mo pag-apihon an nakikihimanwa, ta kamo mismo nakakaisi kan buhay kan nakikihimanwa, huli ta nagin kamo nakikihimanwa sa daga kan Egipto.” Sa ibang pagtaram, an mga Israelita kaipuhan na magpaheling nin may pakikidamay na kabootan sa mga daing sukat.—Exodo 23:9; Levitico 19:34; Deuteronomio 10:19.
Sagkod na fiel na sinusunod kan Israel an Ley, binebendisyonan ni Jehova an nasyon. Sa paghade ni David asin Salomon, an nasyon nag-oswag asin an mga tawo maogma asin kontento. Sarong historikong pagkasaysay an nagsasabi sa sato: “Kadakoldakol kan Juda asin Israel, siring kadakol kan mga baybay na yaon sa gilid nin dagat, na nagkakarakan asin nag-iirinom patin naggagayagaya. Asin an Juda asin Israel padagos na nag-erok na may seguridad, an lambang saro sa sirong kan saiyang ubasan asin sa sirong kan saiyang higuerra.”—1 Hade 4:20, 25.
Makamomondo, an katoninongan asin katiwasayan kan nasyon dai naghaloy. Minsan ngani igwa kan Ley nin Dios, dai iyan sinunod kan mga Israelita; tinogotan ninda an kaimotan na mapogolan an pagmakolog ninda sa iba. Ini, kaiba nin apostasiya, nagbunga nin kasakitan sa sainda bilang indibiduwal asin bilang sarong nasyon. Sa katapustapusi, kan taon 607 B.C.E., tinogotan ni Jehova an mga Babilonyo na raoton an kahadean nin Juda, an siudad nin Jerusalem, asin dawa an kahangahangang templo duman. Sa anong dahelan? “‘Sa dahelan na dai nindo kinuyog an sakong mga tataramon, uya masugo ako asin kukuanon ko an gabos na pamilya sa amihanan,’ an sabi ni Jehova, ‘masugo pa ngani ako ki Nabucodonosor na hade sa Babilonya, na sakong lingkod, asin dadarahon ko sinda tumang sa dagang ini asin tumang sa mga nag-eerok dian patin tumang sa gabos na ining nasyon sa palibot; asin itatao ko sinda sa kalaglagan asin gigibohon sindang magin bagay na pinagngangalasan asin sarong bagay na pinagtataghoyan patin mga lugar na gaba sagkod sa panahon na daing talaan.’” (Jeremias 25:8, 9) Kanigoan na kabayadan sa pagbaya sa dalisay na pagsamba ki Jehova!
Sarong Halimbawa na Dapat Arogon
Sa ibong na lado, bako sanang itinokdo ni Jesu-Cristo an Bulawan na Reglamento sa Paggawe kundi ipinaheling man an pinakamarahay na halimbawa sa pagsunod kaiyan. Tunay na may pagmakolog sia sa ikararahay nin iba. (Mateo 9:36; 14:14; Lucas 5:12, 13) Sarong beses, harani sa siudad nin Nain, naheling ni Jesus an sarong laglag an puso na babaeng balo sa sarong prosisyon sa gadan para sa solo niang aki. An pagkasaysay kan Biblia nagsasabi: “Kan maheling sia kan Kagurangnan, sia napahiro nin pagkaherak sa saiya.” (Lucas 7:11-15) An mga tataramon na “napahiro nin pagkaherak,” oyon sa Vine’s Expository Dictionary of Old and New Testament Words, nangangahulogan nin “mapahiro na garo sagkod sa kairairaromi.” Namatean nia an kolog sa puso kan babae, asin iyan an nagpahiro sa saiya na gumibo nin positibong aksion tanganing paginhawahon an kolog nia. Kanigoan an itinaong kagayagayahan kaiyan sa babaeng balo kan binuhay ni Jesus an solterito asin “itinao nia sia sa saiyang ina”!
Sa katapustapusi, kaoyon kan katuyohan nin Dios, si Jesus gikan sa boot na nagdusa asin itinao an saiyang buhay bilang pantubos tanganing an katawohan makatalingkas sa kaoripnan nin kasalan asin kagadanan. Ini an kadarudakulaing halimbawa nin pamumuhay na kaoyon kan Bulawan na Reglamento sa Paggawe.—Mateo 20:28; Juan 15:13; Hebreo 4:15.
Mga Tawo na Iinaaplikar an Bulawan na Reglamento sa Paggawe
May mga tawo daw sa satong panahon na totoong namumuhay kaoyon kan Bulawan na Reglamento sa Paggawe? Iyo, asin bako sanang kun iyan kombenyente. Halimbawa, durante kan Guerra Mundial II sa Nazing Alemania, pinagdanay kan mga Saksi ni Jehova an saindang pagtubod sa Dios asin pagkamoot sa kataed patin nagsayumang ikompromiso an Bulawan na Reglamento sa Paggawe. Mantang ipinaotob kan Estado an kampanya nin pagkaongis asin diskriminasyon tumang sa gabos na Judio, an mga Saksi padagos na nagkuyog sa Bulawan na Reglamento sa Paggawe. Dawa sa mga kampo de konsentrasyon, padagos sindang nagmakolog sa saindang kapwa tawo, na ihinihiras an saindang kakanon, minsan ngani kakadikit, sa nagugutom na mga Judio sagkod bakong Judio. Apuera kaini, minsan ngani pinagbotan kan Estado na kumapot nin armas tanganing gadanon an iba, nagsayuma sindang gibohon iyan, kun paanong habo man nindang gadanon sinda kan iba. Paano ninda mahihimong gadanon an kaipuhan nindang mamotan nin siring sa sainda man sana? Huli sa pagsayuma ninda, dakol sa sainda an ipinadara bako sanang sa mga kampo de konsentrasyon kundi sa saindang kagadanan.—Mateo 5:43-48.
Mantang binabasa nindo an artikulong ini, nakikinabang kamo sa saro pang halimbawa kan Bulawan na Reglamento sa Paggawe na isinasagibo. Biyong naaaraman kan Mga Saksi ni Jehova na ngonyan dakol na tawo an nagdudusa nin grabe asin daing maginibo. Huli kaini, an mga Saksi boluntaryong naggigibo nin positibong aksion tanganing tabangan an iba na manodan an manongod sa paglaom asin sa praktikal na giya na manonompongan sa Biblia. Iyan gabos kabtang kan lakop sa globong pagtotokdo na isinasagibo ngonyan sa daing kaagid na sokol. An resulta? Siring sa ihinula sa Isaias 2:2-4, “dakol na banwaan,” sa katunayan labing anom na milyon na indibiduwal sa bilog na kinaban, an ‘tinokdoan sa mga dalan ni Jehova asin naglalakaw sa saiyang mga dana.’ Sa piguratibong paagi, nanodan nindang ‘pulpogon an saindang mga espada na magin tarom nin arado asin an saindang mga budyak na magin mga gunting na pan-awan.’ Nakanompong sinda nin katoninongan asin katiwasayan sa masakit na mga panahon na ini.
Kumusta Man Kamo?
Horophoropon nin halipot an labi-labing kasakitan asin pagdusa na ibinunga sa katawohan kan dai pag-intindi sa Bulawan na Reglamento sa Paggawe poon kan rebelyon sa Eden, na isinutsut ni Satanas na Diablo. Katuyohan ni Jehova na baliktadon an situwasyon sa dai na mahahaloy. Paano? “Sa katuyohan na ini an Aki nin Dios ipinahayag, na iyo, tanganing laglagon an mga gibo kan Diablo.” (1 Juan 3:8) Mangyayari ini sa pareynar kan Kahadean nin Dios, sa madonong asin may kakayahan na mga kamot ni Jesu-Cristo, an saro na nagtokdo asin namuhay sono sa Bulawan na Reglamento sa Paggawe.—Salmo 37:9-11; Daniel 2:44.
Si Hadeng David kan suanoy na Israel nagkomento: “Ako dati hoben na lalaki, naggurang man ako, alagad ta dai ako nakaheling nin siisay man na matanos na lubos na pinabayaan, ni an saiyang mga aki na nakikilimos nin tinapay. Sa bilog na aldaw sia nagpapaheling nin kabootan asin nagpapasubli, kun kaya an saiyang mga aki mag-aako nin bendisyon.” (Salmo 37:25, 26) Dai daw kamo maoyon na an kadaklan sa mga tawo ngonyan nangungua asin nangangamkam imbes na “nagpapaheling nin kabootan asin nagpapasubli”? Malinaw nanggad, an pagsunod sa Bulawan na Reglamento sa Paggawe puedeng magbunga nin tunay na katoninongan asin katiwasayan huli ta pinapangyayari kaini na an saro magkamit nin mga bendisyon ngonyan asin sa ngapit sa pagsakop kan Kahadean nin Dios. Hahaleon kan Kahadean nin Dios an gabos na gira nin kaimotan asin karatan sa daga asin sasalidahan an presenteng sistema nin maraot na gibo nin tawong pamamahala nin bagong sistema na gigibohon nin Dios. Dangan, ikaoogma kan gabos na tawo an pamumuhay kaoyon kan Bulawan na Reglamento sa Paggawe.—Salmo 29:11; 2 Pedro 3:13.
[Mga ritrato sa pahina 4, 5]
Bako sanang itinokdo ni Jesus an Bulawan na Reglamento sa Paggawe kundi ipinaheling man an pinakamarahay na halimbawa sa pag-otob kaiyan
[Mga ritrato sa pahina 7]
An pagsunod sa Bulawan na Reglamento sa Paggawe puedeng magbunga nin tunay na katoninongan asin katiwasayan