‘Maogma Idtong mga Nakatagal’
1. Magpoon kan 1914, anong kamugtakan sa daga an nag-otob kan Mateo 24:3-8, asin anong paghihingako para sa Liga de Naciones asin sa Naciones Unidas an nasudya?
SA SAIYANG librong The Present Age, si Robert Nisbet nagsabi manongod sa “an Setenta y Singkong Taon nin Guerra na nagpadagos, na bihirang nagkaigwa nin pag-oltanan, magpoon kan 1914.” Iyo, “an mga ralaban asin mga bareta nin ralaban,” kairiba na an mga guerra mundial—iyan an ihinula ni Jesu-Cristo para sa panahon na ini nin katapusan. (Mateo 24:3-8) An Liga de Naciones ipinatindog kan 1920 “tanganing mag-olang sa guerra sagkod lamang.” Miserable nanggad na nasudya iyan! An Naciones Unidas inorganisar kan 1945 “tanganing iligtas an masurunod na kapag-arakian sa padusa nin guerra.” Alagad an libro ni Max Harrelson na Fires All Around the Horizon nagsasaysay: “Bihirang aldaw magpoon sa katapusan kan Guerra Mundial II an daing ralaban saen man.”
2. Ano an ihinahapot nin ibang tawo dapit sa mga kamugtakan sa kinaban, alagad anong mga hapot an maninigo niatong ihapot?
2 An terorismo asin kadahasan, karatan asin pagtios, mga droga asin peste—ini gabos nakadugang sa mamondong kamugtakan. An ibang tawo tibaad maghapot: ’Nano padagos na matatagalan kan katawohan an siring na nakapupurisaw na mga kamugtakan?’ Alagad, mas mahalaga, maninigo niatong ihapot: ’Nano natatagalan nin Dios an pagraot kan saiyang daganon na linalang? Gurano pa kahaloy na totogotan nia an maraot na mga tawo na laglagon an daga asin magdara nin paglanghad sa saiyang mahalagang ngaran?’
3. (a) Anong hapot an ihinapot ni propeta Isaias, asin taano? (b) Anong simbag an itinao ni Jehova, asin ano an ipinaheheling kaini para sa satong panahon?
3 Si propeta Isaias nagpalataw nin kaagid na hapot. Inasignar sia na ipahayag sa saiyang mga kahimanwa an mensahe hale ki Jehova. Alagad patienot na siang pinatanidan na dai sinda mahinanyog sa saiya man o sa Dios na nagsugo saiya. Kaya naghapot si Isaias: “Sagkod noarin, 0 Jehova?” Iyo, sagkod noarin kaipuhan na maghulit si Isaias sa masumbikal na banwaan na ini, asin sagkod noarin magtatagal si Jehova kan saindang nakaiinsultong pagsayuma na kuyugon an saiyang mensahe? Nagsimbag si Jehova: “Sagkod na an mga siudad magkagaraba, na mayo na nin nag-eerok, asin an mga harong mayo na nin tawo, asin an daga mismo mawaran nin laog.” (Isaias 6:8-11) Siring man ngonyan, nagtatagal si Jehova kan siring na mga paglanghad sagkod sa saiyang itinalaan na panahon tanganing isagibo an saiyang paghokom sa kinaban na an pangenot na parakasala iyo an bakong maimbod na Kakristianohan.
4. Ano an nagin bunga kan pakatagal ni Job, asin anong paneneguro an itinatao kaini sa sato ngonyan?
4 Si Jehova haloy nang nagtatagal kan mga pagtuya ni Satanas. Mga 3,600 na taon na an nakaagi, an maimbod na si Job nagtagal man, na pinatunayan na falso an angat ni Satanas na dai sia magdadanay sa integridad sa irarom nin pagbalo. Nagin dahelan nanggad ini na maogma an puso ni Jehova! (Job 2:6-10; 27:5; Talinhaga 27:11) Siring kan sinabi pakatapos kan tugang sa ina ni Jesus na si Santiago: “Uya! Inaapod tang maogma idtong mga nakatagal. Nadangog nindo an dapit sa pakatagal ni Job asin naheling an bunga na itinao ni Jehova, na si Jehova malomoy na gayo sa pagkamoot asin maheherakon.” Siring man, idtong mga nakatagal kairiba ni Jehova ngonyan nakasisierto nin maogmang kaaabtan.—Santiago 5:11.
5. Paano ipinaheling ni Jesus na an pakatagal hinahagad sa banwaan nin Dios ngonyan, asin mantang ginigibo an anong gibohon maninigo sindang magtagal?
5 Malinaw na ipinaheling ni Jesus na an pakatagal hinahagad sa banwaan nin Dios sa panahon niato. Sa paghula sa tanda kan “pagtatapos kan palakaw nin mga bagay,” sinabi nia: “An makatagal sagkod sa katapusan iyo an maliligtas.” Makatagal mantang ginigibo an ano? An kasunod mismong mga tataramon ni Jesus an nagsisimbag: “Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon.” (Mateo 24:3, 13, 14) Solamente sa siring ‵madatong an katapusan.’—Helingon man an Marcos 13:10, 13; Lucas 21:17-19.
Kun Taano ta Nagtatagal si Jehova
6. Taano ta si Jehova an nangongorog na halimbawa sa pakatagal, asin ano an sarong rason na nagtagal sia nin siring?
6 Si apostol Pablo nagpaliwanag na “an Dios, minsan ngani boot nang ipaheling an saiyang kaanggotan asin ipamidbid an saiyang kapangyarihan, nagtogot na may dakulang pakatios sa mga lalagan nin kaanggotan na angay sa kalaglagan.” (Roma 9:22) Taano ta nagtagal an Dios sa padagos na pag-eksister kan mga maraot, an mga lalagan na ini nin kaanggotan? An sarong rason iyo ini: tanganing ipaheling na an pamamahala nin tawo, na bulag sa Kaglalang nin tawo, siertong masusudya. (Jeremias 10:23) Dai na mahahaloy, an soberaniya nin Dios ibibindikar mantang pinatutunayan nia na sia sana an makapangyayari nin katoninongan, pagkaoroyon, asin kaogmahan sa pamilya nin tawo, paagi sa pamamahala kan Kahadean ni Jesus.—Salmo 37:9-11; 45:1, 6, 7.
7. Sa ano pang ibang rason nagtagal si Jehova, asin anong pakinabang an dinara kaini sa minilyon magpoon kan mga 1930?
7 Orog pa, nagtagal an Dios “tanganing ipaaram nia an kayamanan kan saiyang kamurawayan sa mga lalagan nin pagkaherak.” (Roma 9:23) An mga lalagan nin pagkaherak na ini iyo an nagdadanay sa integridad na mga linahidan na “binakal hale sa katawohan” tanganing mamahala kairiba ni Cristo Jesus sa saiyang langitnon na Kahadean. An pagtatak sa 144,000 nagpadagos magpoon kan panahon kan mga apostol. Nagdadangadang na ini ngonyan sa katapusan. (Kapahayagan 7:3; 14:1, 4) Asin uya! Magpoon kan mga taon nin 1930 an nagpapadagos na pakatagal ni Jehova nagtogot sa pagtipon sa minilyon pang iba, “sarong dakulang kadaklan . . . hale sa gabos na nasyon,” na naggagayagaya sa paglaom na makaligtas sa pangultimong kahorasaan tanganing magmana nin buhay na daing katapusan sa paraisong daga. (Kapahayagan 7:4, 9, 10, 13-17) Saro daw kamo sa dakulang kadaklan na iyan? Kun iyo, dai daw kamo naoogma na nagtagal si Jehova sa presensia kan mga lalagan nin kaanggotan sagkod ngonyan? Alagad, kaipuhan na magpadagos kamong magtagal, siring ki Jehova na nagtagal.
Binalosan an Pakatagal
8. Taano ta kita gabos nangangaipo nin pakatagal, asin anong halimbawa nin pakatagal an maninigo niatong konsideraron nin maingat?
8 Kita gabos nangangaipo nin pakatagal tanganing maako niato an mga panuga. Pakatapos na sambiton an pangenot na katotoohan na ini sa Hebreo 10:36, ilinadawan ni apostol Pablo sa detalye an ekselenteng pagtubod asin pakatagal kan dakulang “panganoron nin mga saksi” kan suanoy na mga panahon. Dangan sinadol nia kita na “dumalagan na may pakatios sa paurombasan na nasa atubang ta, mantang kita nagheheling nin maingat sa Poon na Ahente asin Parasangkap kan satong pagtubod, si Jesus. Hull kan kaogmahan na ibinugtak sa atubangan nia,” si Jesus nagtagal sa bilog na pusong paglilingkod, na nungka nawaran nin pagmansay sa balos. Nakakapakosog nanggad sato an saiyang halimbawa tanganing makatagal man!—Hebreo 12:1, 2.
9. Ano an ibinunga kan modernong panahon na mga halimbawa sa pakatagal?
9 Kadakol man an modernong panahon na mga halimbawa sa pakatagal. Tibaad aram nindo, o naaraman nindo, an mga tugang na lalaki asin babae na nagin nangongorog sa saindang pakatagal. Nakapahiro nanggad an saindang kaimbodan sa sato! Asin lambang taon, mantang ibinabareta kan mga Saksi ni Jehova an saindang panbilog na kinaban na gibohon sa Watch Tower Society, orog pang nakapupukaw sa boot na mga bareta nin pakatagal asin pagdadanay nin integridad an naaako. An tsart sa minasunod na apat na pahina nagsusumaryo kan dakulang gibohon na nagibo durante kan 1989 mantang an mga Saksing ini ‵nagdagdag sa saindang pagtubod nin pakatagal.’-2 Pedro 1:5, 6.
An Satong Pinakadakulang Taon
10. (a) Pirang kadagaan asin mga grupo nin isla an nakikabtang sa paghuhulit kan maogmang bareta nin Kahadean kan 1989, asin pira an nakikabtang sa gibohon na ini? (b) Pirang payunir an nagreport sa peak na bulan, asin ano an kagabsan na bilang nin oras na ginamit sa paglilingkod sa langtad?
10 Siring kan ipinaheheling kan naenot na tsart, 212 kadagaan asin mga grupo nin isla an nakikabtang sa paghuhulit kan nagdadangadang na Kahadean ni Jehova. Namomotan na parabasa kan Torrengbantayan, nagkapribilehiyo daw kamo na magin saro sa 3,787,188 nakikabtang sa dakulang gibohon na ini? Saro daw kamo sa 808,184 nagreport bilang mga payunir sa peak na bulan sa paglilingkod na iyan? Ano man an ikinontribuwir nindo sa 1989 panglobong total na bilang na 835,426,538 oras na ginamit sa paglilingkod sa langtad, igwa kamo nin dahelan tanganing maggayagaya.—Salmo 104:33, 34; Filipos 4:4.
11. (a) Pira an nag-atender sa Memorial kan nakaaging Marso 22 na sarong dahelan para sa paggayagaya, asin taano? (b) Pira an nabautismohan, asin anong mga kadagaan sa tsart an nangongorog sa bagay na ini?
11 Maggayagaya man, sa magayonon na total na iyan na 9,479,064 nag-atender, kan Marso 22, sa panbilog na kinaban na pagselebrar kan Memorial kan kagadanan ni Jesus! Nagpapaheling ini nin potensial na 5,691,876 na dugang na parabalangibog kan Kahadean, kun ini sanang mga interesadong arog karnerong mga tawo mamomoton na mapastoran pasiring sa toril, tanganing magkaigwa nin regular na kabtang sa paglilingkod ki Jehova. Puwede daw niatong tabangan sinda sa bagay na ini? (Juan 10:16; Kapahayagan 7:9, 15) Dakol na an naghihimate, siring sa ipinaheheling kan kagabsan na total na 263,855 bagong mga Saksi na nabautismohan kan 1989 taon nin paglilingkod.
12. Ano an nagkapirang kabtang na dai ihinahayag kan tsart (a)manongod sa mga pabrika kan Watch Tower Society? (b) manongod sa ikinawaras na mga magasin asin suskripsion?
12 May ibang kabtang na dai ipinaheheling kan tsart na iyan. An pagkapaha para sa mga publikasyon—mga Biblia, libro, brochure, magasin—daing sagkod. Bilang resulta, an mga pabrika kan Watchtower sa Nueva York naggamit nin 25,999 tonelada nin papel sa pag-imprinta nin 35,811,000 Biblia, libro, asin mga brochure, sarong 101 porsientong pag-oswag kisa sa 1988. An ibang darakulang pabrika kan Watch Tower Society, risang gayo sa Alemania, Italia, asin Hapon, nagtrabaho nin ekstrang relyibo, na nagsuportar sa “maimbod asin madonong na oripon” sa pagtatao nin espirituwal na “kakanon sa igong panahon.” (Mateo 24:45) Durante kan Abril asin Mayo, pambihirang marhay na pagwaras nin mga magasin asin suskripsion an ireneport sa dakol na kadagaan, na may espesyal na pagdodoon sa pagwaras kan mga isyu kan Torrengbantayan dapit sa “Dakulang Babilonya.” (Kapahayagan 17:5) Mayong duwa-duwa, sa maabot na Abril, an mga auxiliary payunir asin ibang Saksi mapano sa langtad kan kinaban sa dapat na magpatunay bilang an satong pinakamarahay na kampanya sa pagpatotoo sa 1990 taon nin paglilingkod.—Ikomparar an Isaias 40:31; Roma 12:11, 12.
13. Anong mga nasyon an nakalista sa tsart na dai nakalista kan nakaaging taon? Ipaliwanag.
13 Helingon liwat an tsart. Naheheling daw nindo an ibang nasyon na dai nakalista sa ngaran kan nakaaging taon? Tara, iyo! An Hungaria asin Polandia, kun saen an satong gibohon nalegalisar dai pa nahahaloy. Nagpapasalamat kita sa mga autoridad sa mga kadagaan na ini na nagpaheling sinda ngonyan nin siring na konsiderasyon para sa mga Saksi ni Jehova. Sa bagay na ini, sinimbag an mga pamibi kan panbilog na kinaban na magturugang, “tangani kitang makapamuhay nin tiwasay asin toninong na may lubos na diosnon na debosyon asin kahusayan.”—1 Timoteo 2:1, 2. 14
14. Itao an nagkapirang tampok na kabtang kan mos non na Debosyon” na Pandistritong mga Kombension sa Polandia.
14 “Diosnon na debosyon“! Tara, an “Diosnon na Debosyon” na Pandistritong mga Kombension puwede man na isagibo maski sa Polandia, sa tolong lokasyon, kan Agosto! Napatunayan na makangangalas nanggad na mga kagimbitar an satong 91,024 tugang na taga-Polandia! (Hebreo 13:1, 2, 16) Garo paagi sa milagro, manampulong ribong tugang—mga Czech, Aleman, Ruso, asin iba pa—nagkua nin mga visa tanganing magbiyahe paagi sa bus, tren, asin maski ngani sa paglakaw. Rinibo pang iba an nag-eroplano hale sa Amerika, Solnopan nin Europa, asin kasin rayo kan mga isla sa Pasipiko asin Hapon. An dakulang mga istadyum, na daing digtang lininig kan satong mga tugang, igo sana kadakula tanganing magkaigo an 65,710 sa Chorzow, 40,442 sa Poznan, asin 60,366 sa Warsaw—na 166,518 an kagabsan na nag-atender! Sa lambang sentro, an pagheling sa bautismo nagin dahelan nin mga luha nin rnagayagayang emosyon. Sa Poznan sarong 9 anyos an edad asin sarong 90 anyos an edad an nabautismohan, asin kairiba sa total na 6,093 na nabautismohan an kadakol na tin-edyer, na an kadaklan sainda hale sa mga kadagaan kun saen sinasabi na an relihiyon magagadan kairiba kan mga gurang na. Bakong siring sa tunay na relihiyon na basado sa Tataramon nin Dios! (Ikomparar an Salmo 148:12, 13; Gibo 2:41; 4:4) Makangangalas nanggad na binalos an pakatagal kan satong mga tugang sa Sirangan nin Europa!
Padagos na Kaimbodan sa Irarom nin Pagbalo
15. Paano an mga Saksi Lebanon nagpaheling nin pakatagal asin karigonan, asin igwa nin anong marahay na mga resulta?
15 Siring ki apostol Pablo, an mga Saksi ni Jehova hinahagad na magpaheling nin pakatagal sa irarom nin dakol asin manlaenlaen na tamugtakan. (2 Corinto 11:24-27) Sa Lebanon nagpapadagos an guerrang sibil. Paano naghimate an satong mga tugang? May karigonan asin determinasyon. An taon na 1989 nakaheling kan grabe nanggad na purutukan asin pagbomba, alagad maski sa mga lugar na pinakagrabe ini, an mga tugang determinado na dai manluya. Sarong kongregasyon sa Beirut an nagbareta: “An regular na mga grupo para sa paglilingkod sa langtad inareglo sa gabos na banggi kan semana. Sa ibong nin masakit na mga kamugtakan sa seguridad, an mga tugang dai nanluluya. Nakokobrehan niamo an mas dakol na teritoryo kisa kan enot. Kan Abril nagkaigwa kami nin peak sa bilang nin mga payunir. Naponan an mga bagong pag-adal sa asin orog na magasin asin libro an ikinawaras.”
16. Paano an satong mga tugang sa Colombia nagpaheling nin pakatagal paagi sa pagpaabot kan maogmang bareta sa mga banwaan na mayong Saksi?
16 Nababareta an Colombia huli sa negosyo sa droga asin kadahasan. Alagad an maimbod na pakatagal kan mga Kristiano duman bareta man. Dai pa nahahaloy, mga temporaryong espesyal payunir an ipinadara sa 31 banwaan na may manampulong ribo o labi pang mga nag-eerok na mayong mga Saksi. Sa sarong banwaan, kan maaraman kan bagong interesadong mga tawo na an mga payunir magdadanay duman sa laog nin pirang bulan sana, nakimaherak sinda sa mga payunir na magdanay. Sa saro pa, 18 katawong mga interesado an nagpirma nin surat sa pag-apresyar huli sa espirituwal na tabang na itinao durante kan tolong bulan na pag-ontok kan mga payunir asin naghagad nin dugang na tabang. “Ini seryosong bagay,” an sabi ninda. Dai na kaipuhan pang sabihon, sa duwang kamugtakan ginibo an mga areglo tanganing kultibaron an interes. An pagpaoswag sa siring na harayong teritoryo nangangaipo nin pakatagal, alagad an mahigos na gibohon kan mga payunir na naggibo nin siring mayaman nanggad na binendisyonan.
17, 18. (a) Sa irarom nin anong mga kamugtakan nagtagal an raga Saksi ni Jehova sa Italia? (b) Paano nakapanggana an mga Saksi sa ibong nin pagpalakop nin mga kaputikan manongod sainda?
17 Sa Italia, an mga Saksi ni Jehova nakaatubang nin makuring pagtumang nin klero, alagad sa kapangyarihan ni Jehova nakatagal sinda. Sa manlaenlaen na parokya, an mga klero nagdistribuwir nin mga paisi tanganing idokot sa mga pinto kan harong kan saindang mga parasimba na nagsasabing an mga Saksi ni Jehova dai magtimbre. Dakol na padi an nagkua nin hoben na mga lalaki tanganing idokot an mga paising ini sa gabos na pinto sa sarong partikular na lugar—maski ngani sa mga harong nin mga pamilyang Saksi! Alagad, an mga Saksi bakong madaling matakot, asin parateng ginagamit ninda an mga paisi tanganing magpoon nin pag-orolay. Dugang pa, an diaryo asin nasyonal na telebisyon nagtao nin mahiwas na pagkobre sa bagay na ini, na kinokondenar an ipinaheling na relihiyosong pagkapanatiko asin idinoon na an mga taktikang siring kaini tunay na tanda nin kaluyahan sa kabtang kan iglesya. Sarong propesor sa unibersidad an nakolgan na gayo kan kontrobersial na tumang sa Saksing mga paisi kaya nagsuskribe sia sa The Watchtower asin Awake!
18 An Iglesya Katolika sa Italia naggagamit pa ngani nin mga apostata tanganing ilakop an mga kaputikan dapit sa banwaan ni Jehova, alagad dai ini nagin epektibo magsalang huh ta an 172,382 na parahayag midbid na gayo asin iginagalang. Sarong lalaki an nagsabi sa nagsosongkong mga Saksi na nabasa nia an maraot na mga bagay manongod sato sa literaturang isinurat nin dating mga Saksi. Kaya, tumang na gayo sia kan an saiyang tugang na lalaki nagin saro sa mga Saksi ni Jehova. Alagad, pakatapos nin dikit na panahon, narisa nia na nagkaigwa nin marahay na epekto an pagbago nin relihiyon kan saiyang tugang sa saiya. Nagngalas sia: ’Paano nagin posible na an sarong bagay na maraot na gayo nagkaigwa nin siring na marahay na mga resulta?’ Kaya, naghagad sia nin pag-adal sa Biblia sa nagsosongkong mga Saksi.—Ikomparar an Colosas 3:8-10.
Pag-atubang sa Pagkaindiperente
19, 20. (a) Anong kamugtakan an nangaipo nin pakatagal sa kabtang kan mga Saksi sa Finland, asin ano an tunay na mahalaga dapit sa surbey kan iglesya? (b) Anong eksperyensia an nag-iilustrar kan importansia nin pakatagal sa paghuhulit kan maogmang bareta?
19 Sa mga kadagaan na an mga Saksi perming nagsosongko, parateng igwa nin lakop na gayong pagkaindiperente sa maogmang bareta. Ini nanggad an kamugtakan sa Finland. An iglesya sa kadagaan na iyan nagkondukta nin surbey asin nanompongan na 70 porsiento kan populasyon habo sa pagsongko kan mga Saksi sa saindang mga harong. Alagad, an 30 porsiento bakong gayong tumang, asin sa mga ini, 4 porsiento an nagsabi na sa katotoohan gusto ninda an mga Saksi ni Jehova. Mahalagang bilang ini. An apat na porsiento kan populasyon sa Finland nagrerepresentar sa 200,000 katawo. Ikomparar iyan sa presenteng bilang nin parahayag na 17,303!
20 Sarong parahayag na nagluwas sa paglilingkod an inapod an saiyang atension sa surbey na ini asin hinapot: “Dai daw nindo aram na 70 porsiento samuya an habo saindo? Taano ta padagos pa kamong nagdidigdi sa samuyang mga pinto?” An parahayag nagsimbag: “Iyo, pero an iyo man sanang pag-adal nagpaheling na 4 porsiento saindo an gusto samuya. Pinagmamaigotan niamong manompongan an mga tawong idto. Maski pa kun 1 porsiento sana sinda, padagos kaming maghaharongharong sa pagmamaigot na manompongan sinda.” Nag-isip nguna an kagharong asin nagsabi: “An saindong mensahe daw siring kaiyan kahalaga sainda?” An parahayag nagsimbag paagi sa paghapot: “Mawot daw nindong madangog ini?” Dai naghaloy an kagharong na ini nagpaheling nin interes sa maogmang bareta.
Kun Ano an Malalaoman sa Ngapit
21. (a) Anong klase nin pakilaban an maninigo niatong ipakilaban sa sistemang ini, asin taano? (b) Ano an tibaad kaipuhan niatong tioson, asin sa ano kita sinisierto kan hula ni Habakuk?
21 Kumusta kita gabos ngonyan? Determinado daw kitang magtagal kairiba ni Jehova asin ni Cristo Jesus sagkod sa katapusan? Tibaad dai na gayong maghahaloy, alagad maninigo kitang magtagal! Sa sistema ni Satanas, maninigo kitang makipaglaban nin maigot para sa pagtubod, siring sa inmoralidad kan kinaban, karatan, asin pagkaongis na nakapalibot sato sa gabos na lado. (Judas 3, 20, 21) Tibaad kaipuhan kitang magtagal nin sarong kiaseng paglamag o nin iba. Maski ngonyan, rinibo kan” satong mga tugang an nagsasakit sa mga bilanggoan, asin an iba maringis na kinokolgan. Nagpapasalamt sinda huli sa satong mga pamibi. (2 Tesalonica 3:1, 2 ) Dai na nanggad mahahaloy, an presenteng sistema mawawara na! Siring kan sinasabi ni Habakuk: “An bisyon para sa itinalaan na panahon pa, asin padagos iyan na maghihidali sagkod sa katapusan, asin dai iyan magpuputik. Minsan pa iyan maatraso, padagos iyan na halaton; huli ta sierto nanggad na iyan maootob. Dai iyan mahuhuri.”—Habakuk 2:3.
22. Anong resulta an puwede niatong may pananarig na laomon kun ginigibo niato an pakatios kan mga propeta asin an pakatagal ni Job?
22 Si disipulo Santiago mamomoton na nagsasabi sato: “Mga tugang, gibohon na halimbawa sa pagtios nin karatan asin sa pagpaheling nin pakatagal an mga propeta, na nagtaram sa ngaran ni Jehova.” Kita ngonyan na nagtataram sa ngaran ni Jehova puwedeng magin mga nagdadanay sa integridad durante kan mapait na mga pagbalo, siring ki Isaias, Jeremias, Daniel, asin iba pa. Siring ki Job, puwede kitang makatagal. Makangangalas nanggad na binalosan sia huh kan saiyang pakatagal! An pagkaherak asin mamomoton na kabootan ni Jehova magtatao sato nin kaagid na mga halos—kun kita makatagal sagkod sa katapusan. Asin logod maotob sa lambang saro sa sato an mga tataramon ni Santiago: “Uya! Inaapod tang maogma idtong mga nakatagal.”—Santiago 5:10, 11; Job 42:10-13.
Paano Kamo Masimbag?
◻ Anong pangangaipo para sa pakatagal an idinoon ni Jesus?
◻ Huli sa anong mga rason nagtagal si Jehova?
◻ Ano an nagkapirang tampok na kabtang kan dakulang gibohon na nagibo kan 1989?
◻ Paano binalosan an pakatagal kan satong mga tugang sa Polandia?
◻ Paano an mga Saksi sa Lebanon, Colombia, asin Italia nagpaheling nin kaimbodan sa irarom nin pagbalo?
[Tsart sa pahina 20-23]
REPORT KAN 1989 TAON NIN PAGLILINGKOD KAN MGA SAKSI NI JEHOVA SA BILOG NAN KINABAN
(Hilingon an bound volume)