Pagmidbid sa “Tawo nin Katampalasanan”

“An tampalasan mabubuyagyag, na gagadanon kan Kagurangnan na Jesus.”​—2 TESALONICA 2:8.

1, 2. Taano ta mahalagang mamidbid niato an tawo nin katampalasanan?

NABUBUHAY kita sa panahon nin katampalasanan. Ini sarong panbilog na kinaban na pangyayari. Saen man igwa nin takot sa tampalasan na mga tulisan asin sa huma ninda sa satong pagkatawo asin rogaring. Alagad, igwa nin mas tusong gayong tampalasan na elemento na naghihiro sa laog nin dakol na siglo. Sa Biblia inaapod ining “an tawo nin katampalasanan.”

² Mahalaga na mamidbid niato ining tawo nin katampalasanan. Taano? Huli ta intension niang paluyahon an satong marahay na kamugtakan sa atubang nin Dios asin an satong paglaom sa buhay na daing katapusan. Paano? Paagi sa paggiya sato na bayaan an katotoohan asin karibay kaini patubodon sa falso, sa siring irinarayo kita sa pagsamba sa Dios “sa espiritu asin katotoohan.” (Juan 4:23) Maliwanag sa saiyang mga aksion na an partikular na tampalasan na elementong ini nagtutumang sa Dios asin sa saiyang mga katuyohan, siring man sa saiyang nagdusay na banwaan.

3. Paano inapod kan Biblia an satong atension sa tampalasan?

³ An Biblia nagsasabi sato dapit sa tawo nin katampalasanan na ini sa 2 Tesalonica 2:3. Pinasabngan kan banal na espiritu, si apostol Pablo nagsurat: “Dai kamo magpadaya sa kiisay man sa ano man na paagi, huli ta [an aldaw ni Jehova sa paglaglag sa maraot na sistemang ini] dai maabot kun dai nguna mangyari an apostasiya asin mahayag an tawo nin katampalasanan.” Digdi ihinula ni Pablo na an apostasiya malataw asin an tawo nin katampalasanan mahahayag bago an katapusan kan sistemang ini. Sa katunayan, sinabi ni Pablo sa 2Tes 2 bersikulo 7: “Naghihiro na ngonyan an misteryo kan katampalasanan na ini.” Kaya kan enot na siglo, an tampalasan na ini nagpoon nang mahayag.

An Ginikanan kan Tawo nin Katampalasanan

4. Siisay an pinaghalean asin parasuportar kan tawo nin katampalasanan?

⁴ Siisay an ginikanan asin nagsusuportar sa tawo nin katampalasanan na ini? Si Pablo nagsimbag: “An presensia kan tampalasan sono sa paghiro ni Satanas paagi sa lambang makapangyarihan na gibo asin putik na mga tanda asin mga ngangalasan asin paagi sa lambang bikong pandadaya sa mga napapahamak, bilang pamalos huli ta dai ninda inako an pagkamoot kan katotoohan tangani sindang maligtas.” (2 Tesalonica 2:9, 10) Kaya si Satanas an ama asin parasuportar kan tawo nin katampalasanan. Asin mantang si Satanas tumang ki Jehova, sa Saiyang mga katuyohan, asin sa Saiyang banwaan, siring man an tawo nin katampalasanan, narerealisar man nia ini o dai.

5. Anong kaaabtan an naghahalat sa tampalasan asin sa mga nagsusunod saiya?

⁵ An mga kairiba kan tawo nin katampalasanan magsasakit man nin kaagid na kaaabtan siring saiya—kalaglagan: “An tampalasan mabubuyagyag, na gagadanon kan Kagurangnan na Jesus . . . asin tutunawon paagi sa kapahayagan kan saiyang presensia.” (2 Tesalonica 2:8) An panahon na iyan nin kalaglagan kan tawo nin katampalasanan asin kan saiyang mga parasuportar (“idtong mga malalaglag“) maabot sa dai mahahaloy “sa kapahayagan kan Kagurangnan na Jesus hale sa langit kaiba an saiyang makapangyarihan na mga anghel sa naglalaad na kalayo, kun sia mamalos na sa mga dai nakakamidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus. An mga ini mismo magtitios kan silot nin daing sagkod na pagkalaglag.”​—2 Tesalonica 1:6-9.

6. Anong dugang na impormasyon an itinao ni Pablo dapit sa tampalasan?

⁶ Orog pang ilinadawan ni Pablo an tampalasan na ini, sa pagsasabing: “Sia minatumang asin ilinalangkaw an saiyang sadiri sa gabos na inaapod ‘dios’ o bagay na sinasamba, kaya sia minatukaw sa templo kan An Dios, na nagpapaheling sa publiko na sia sarong dios.” (2 Tesalonica 2:4) Kaya nagpatanid si Pablo na magpapalataw si Satanas nin tampalasan, sarong falsong sasambahon, na maglalangkaw saiya mismo maski sa ibabaw kan pagboot nin Dios.

Pagmidbid sa Tampalasan

7. Taano ta konklusyon niato na dai nagtataram Si Pablo dapit saniti katampalasanan? ano an irenepresentar kan tawo nin tampalasan?

⁷ Nagtataram daw si Pablo dapit sa sarong indibiduwal? Dai, huli ta sinabi niang an “tawong” ini naglataw na sa panahon ni Pablo asin magpapadagos sa pag-eksister sagkod na laglagon sia ni Jehova sa katapusan kan sistemang ini. Kaya, nag-eksister na sia sa laog nin dakol na siglo. Maliwanag, na mayong literal na tawong nabuhay na siring kaiyan kalawig. Kaya an mga tataramon na “tawo nin katampalasanan” dapat na magrepresentar sa grupo, o klase, nin mga tawo.

8. Siisay an tawo nin katampalasanan, asin ano an nagkapirang nagpapamidbid na kabtang?

⁸ Sairisay sinda? An ebidensia nagpapaheling na sinda an grupo nin mapalangkaw, ambisyosong mga klero kan Kakristianohan, na sa laog nin dakol na siglo naglangkaw kan saindang sadiri bilang an pagboot sa sainda. Maheheling ini sa katunayan na igwa nin rinibong manlaenlaen na relihiyon asin mga sekta sa Kakristianohan, na an kada saro igwa nin klero kaini, alagad an kada saro nagkakakontra sa iba sa nagkapirang kabtang nin doktrina o paggawe. An nababangang kamugtakan na ini malinaw na ebidensia na dai ninda sinusunod an mga pagboot nin Dios. Bako sindang hale sa Dios. (Ikomparar an Miqueas 2:12; Marcos 3:24; Roma 16:17; 1 Corinto 1:10.) An pinagkasararoan kan gabos na ining relihiyon iyo an dai ninda pagdanay sa mga katokdoan kan Biblia, na binalga an reglamentong: “Dai kamo maglihis sa mga bagay na nasusurat.”​—1 Corinto 4:6; helingon man an Mateo 15:3, 9, 14.

9. Anong bakong makakasuratan na mga paniniwala an irinibay kan tampalasan sa mga katotoohan kan Biblia?

⁹ Kaya, an tampalasan na ini sarong kompositong persona: an relihiyosong klero kan Kakristianohan. Sinda gabos, magsalang mga papa, kapadian, patriarka, o mga parahulit kan Protestante, may paninimbagan man sa relihiyosong mga kasalan kan Kakristianohan. Irinibay ninda an mga katotoohan nin Dios sa paganong mga kaputikan, nagtotokdo nin bakong makakasuratan na mga doktrina siring kan inmortalidad kan kalag nin tawo, impiyerno, purgatoryo, asin Trinidad. Siring sinda kan relihiyosong mga lider na sinabihan ni Jesus: “Gikan kamo sa saindong ama na Diablo, asin boot nindo na gibohon an mga horot kan saindong ama. . . . Sia sarong putikon asin iyo an ama kan kaputikan.” (Juan 8:44) An saindang mga gibo man naghayag sainda bilang tampalasan, huli ta nakikikabtang sinda sa mga gibohon na nagbabalga sa mga pagboot nin Dios. Sa mga siring sinabi ni Jesus: “Humarayo kamo sa sako, kamong mga paragibo nin katampalasanan.”​—Mateo 7:21-23.

Paglangkaw kan Saindang Sadiri

10. Ano an relasyon kan tampalasan sa politikal na mga namamahala?

¹⁰ An kasaysayan nagpapaheling na idtong mga kabilang sa grupong ini kan tawo nin katampalasanan nagpaheling nin siring na kapalangkawan asin kahambogan kaya aktuwal nindang diniktahan an mga namamahala sa kinaban. Sa irarom kan sarahotan na doktrina nin ’banal na katanosan kan mga hade,’ an klero naghingako bilang an kaipuhan na tagapag-oltanan kan mga namamahala asin nin Dios. Kinoronahan ninda asin hinale sa trono an mga hade asin mga emperador asin pinagin posibleng an mga tawo magin apabor o tumang sa mga namamahala. Sa kaagid na kahulogan, sinabi ninda, an siring kan sinabi kan Judiong halangkaw na mga saserdote na nagsikwal ki Jesus: “Mayo kaming hade kundi si Cesar.” (Juan 19:15) Alagad, malinaw na nagtokdo si Jesus: “An sakong kahadean bakong kabtang kan kinaban na ini.”​—Juan 18:36.

11. Paano ilinangkaw kan klero an saindang sadiri?

¹¹ Sa paglangkaw kan saindang sadiri sa ordinaryong mga tawo, an tampalasan na grupong ini nagsulot nin laen na kasulotan, na parateng itom. Dugang pa, inadornohan ninda an saindang sadiri nin gabos na klaseng kahangahangang simbolo, kaiba an mga korona, krus, asin mga mitra. (Ikomparar an Mateo 23:5, 6.) Alagad si Jesus asin an saiyang mga parasunod mayo nin siring na mga kasulotan; naggubing sinda siring kan ordinaryong mga tawo. An klero nagkua man nin mga titulo para sa sainda man sana siring kan “Padre,” “Banal na Ama,” “Reberendo,” “Kagalanggalang na Reberendo,” “An Saiyang Kamahalan,” asin “An Saiyang Kadakulaan,” na nagdugang sa saindang ‘paglangkaw kan saindang sadiri sa kiisay man.’ Alagad, nagtokdo si Jesus dapit sa relihiyosong mga titulo: “Dai kamo mag-apod nin ama sa kiisay man sa daga.” (Mateo 23:9) Siring man si Elihu, sa pangangatanosan sa mapagsaginsagin na mga pararanga ni Job, nagsabi: “Dai man logod ako, tabi, magpaheling nin pagpaorog sa tawo; asin sa daganon na tawo dai ako magtatao nin titulo.”​—Job 32:21.

12. Siisay an sinabi ni Pablo na aktuwal na pinaglilingkodan kan klero?

¹² Kan si Pablo sa panahon nia nagsabing an tawo nin katampalasanan nagpoon na kan saiyang gibohon, nagsabi man sia dapit sa mga nagpapaheling nin tampalasan na kaisipan: “Hull ta an siring na mga tawo mga falsong apostol, madayang mga trabahador, na nagmamalemale na mga apostol ni Cristo. Asin iyan bakong makangangalas, hull ta minsan si Satanas nagmamalemale na anghel nin liwanag. Kaya bako man na dakulang bagay kun an saiyang mga ministro nagmamalemale na mga ministro nin katanosan. Alagad an saindang masasagkodan sono sa saindang mga gibo.”​—2 Corinto 11:13-15.

Rebeliyon Tumang sa Tunay na Pagsamba

13. Ano an apostasiyang ihinula ni Pablo?

¹³ SSinabi ni Pablo na an tawo nin katampalasanan na ini malataw kaiba kan apostasiya. Sa katunayan, an enot na giyang itinao ni Pablo bilang midbidan kaining grupong tampalasan iyo na “an aldaw ni Jehova [kun laglagon na ni Jehova ining maraot na sistema nin mga bagay] . .. dai maabot kun dai nguna mangyari an apostasiya.” (2 Tesalonica 2:2, 3) Alagad ano an kahulogan kan “apostasiya“? Sa kontekstong ini, dai ini nangangahulogan nin pagkawara o pagkahulog hull sa kaluyahan sa espirituwal. An Griegong tataramon na ginamit digdi para sa “apostasiya” nangangahulogan, orog sa ibang bagay, nin “pagtalikod” o sarong “rebeliyon.” An nagkapirang traduksion itrinadusir ining “rebeliyon.” An bersion ni William Barclay nagsasabi: “An aldaw na iyan dai maabot sagkod na mangyari an Dakulang Rebeliyon.” An The Jerusalem Bible inaapod ining “an Dakulang Rebeliyon.” Kaya, sa konteksto kan kinokonsiderar ni Pablo, an “apostasiya” nangangahulogan nin rebeliyon tumang sa tunay na pagsamba.

14. Kasuarin nagpoon na mag-oswag nin maigot apostasiya?

¹⁴ Paano an apostasiyang ini, an rebeliyon na ini, naglataw? Sa 2 Tesalonica 2:6, nagsurat si Pablo, manongod sa panahon nia, dapit “sa bagay na nagseserbing pan-olang” sa tampalasan. Ano iyan? Idto an nag-oolang na puwersa kan mga apostol. An saindang presensia, kaiba an saindang makapangyarihan na mga balaog na itinao kan banal na espiritu, nag-olang sa apostasiya kaidto na magin sarong epidemiya. (Gibo 2:1-4; 1 Corinto 12:28) Alagad kan nagadan na an mga apostol, kan mga katapusan kan enot na siglo, an nagoolang na puwersa nahale na.

Nag-oswag an Bakong Makakasuratan na Grupong Klero

15. Ano an areglong inestablisar ni Jesus para Kristianong kongregasyon?

¹⁵ An kongregasyon na inestablisar ni Jesus nag-oswag kan enot na siglo sa irarom kan paggiya kan kamagurangan (mga paraataman) asin ministeryal na mga lingkod. (Mateo 20: 25-27; 1 Timoteo 3:1-13; Tito 1:5-9) Pinili an mga ini sa kongregasyon. Sinda may kakayahan na espirituwal na mga lalaking dai nin espesyal na teolohikal na pagpatood, siring ki Jesus na dai nin siring na pagpatood. Iyo nanggad, an saiyang mga paratumang nagngaralas: “Taano ta may kaaraman an tawong ini sa mga letra mantang dai man sia nag-adal sa mga paadalan?” (Juan 7:15) Asin dapit sa mga apostol, an relihiyosong mga namamahala nakarisa man nin siring: “Ngonyan kan maheling ninda an daing pag-alangan na pagtaram ni Pedro asin Juan, asin namidbid ninda na sinda mga tawong daing inadalan asin mangmang, sinda nagngaralas. Asin namidbid ninda na sinda dating mga kaiba ni Jesus.”​—Gibo 4:13.

16. Paano an apostasiya nagin dahelan kan pagtalikod sa enot na siglong Kristianong areglo para sa organisasyon kan kongregasyon?

¹⁶ Alagad, an apostasiya nagdara nin mga opinyon na kinua sa klerong Judio asin pakatapos hale sa relihiyosong areglo kan paganong Roma. Sa pag-agi nin panahon asin kan nangyari an pagtalikod sa tunay na pagtubod, an bakong makakasuratan na grupo nin klero nag-oswag. Sarong kinoronahan na papa an nagpoon nang mamahala sa grupo nin mga kardinal, na pinili gikan sa ginatos na obispo asin arsobispo, na ilinangkaw hale sa nag-adal sa seminaryong mga kapadian. Kaya, dai naghaloy pakatapos kan enot na siglo, an gibo-gibong grupo nin klero namahala sa Kakristianohan. An grupong ini bakong inarog sa enot na siglong Kristianong kamagurangan asin ministeryal na mga lingkod kundi inarog sa paganong relihiyosong mga sistema.

17. Kasuarin, nangongorogna, naparigon an kapangyarihan kan tampalasan?

¹⁷ Kaidto pang ikatolong siglo C.E., an ordinaryong mga paratubod ibinaba sa ikaduwang klaseng kamugtakan na lego. An apostatang tawo nin katampalasanan luway-luway na nagkapot kan renda nin kapangyarihan. An kapangyarihan na ini pinarigon durante kan pamamahala kan Romanong emperador na si Constantino, nangorogna pakatapos kan Konsilyo kan Nicea kan 325 C.E. Dangan an Iglesya asin Estado pinagsaro. Kaya, an tawo nin katampalasanan—an klero nin Kakristianohan—nagin an linya nin mga apostata sa laog nin mga siglo na nagrebelde tumang sa tunay na Dios, si Jehova. An mga pagboot asin mga areglong sinunod ninda sainda sana asin bakong sa Dios.

Paganong mga Katokdoan

18. Anong naglalanghad na paganong mga katokdoan an madaptar kan tampalasan?

¹⁸ An nag-ooswag na tawo nin katampalasanan nagsubli man nin paganong mga katokdoan. Bilang halimbawa, an misteryoso, dai masabotan na Trinitaryong dios irinibay sa Saro na nagsasabing: “Ako si Jehova. Iyan an sakong ngaran; asin dai ko itatao sa iba an sakong kamurawayan.” “Ako si Jehova, asin mayo na nin iba. Apuwera sa sako mayo nin Dios.” (Isaias 42:8; 45:5) An pagribay na ini nin makatawo, pagano pa nganing, mga opinyon sa mga katotoohan sa Biblia pinahiwas tanganing iiba an dugang pang paglanghad: an pagsamba sa simpleng si Maria kan Biblia bilang an “Ina nin Dios” kan Kakristianohan. Kaya, an mga promotor kan siring na paganong mga katokdoan, an grupo nin klero, nagin an pinakadakula sa “mga doot” na isinabwag ni Satanas tanganing lamoson an marahay na banhing isinabwag ni Cristo.​—Mateo 13:36-39.

19. Paano an Kakristianohan nagkabaranga sa nakaaging mga siglo, alagad ano an pinagdanay?

¹⁹ Mantang nangyayari an mga pagkabaranga asin dai pagkasinabotan, an Kakristianohan nagkabaranga sa ginatos na relihiyon asin sekta. Alagad an kada saro kan bagong relihiyon o sekta, na may dikit na dai kabilang, nagpadanay kan klero-legong pagkabaranga. Kaya, an grupo kan tawo nin katampalasanan pinagdanay sagkod sa panahon na ini. Asin nagpapadagos ining ilangkaw an sadiri kaini sa ordinaryong mga tawo paagi sa nalalaen na kasulotan asin halangkaw pagdangogon na mga titulo. Malinaw nanggad, bakong sobra an pagtaram ni Pablo kan sinabi nia na an grupo kan tawo nin katampalasanan magpapamuraway kan sadiri kaini asin maglalangkaw kaini sa arog sa dios na kamugtakan.

An Papa

20. Paano ilinadawan nin sarong Katolikong reperensia an papa?

²⁰ An halimbawa kan siring na pagpamuraway iyo an papa kan Roma. Sarong eklesiastikal na diksionaryo ni Lucio Ferraris, na ipinublikar sa Italia, an nagladawan sa papa bilang “igwa nin siring na dignidad asin kalangkawan kaya sia bako sanang ordinaryong tawo kundi, puwedeng sabihon, na Dios, asin an Bikaryo nin Dios.” An saiyang korona tripleng korona “siring sa hade kan langit, kan daga asin kan impiyerno.” An iyo man sanang diksionaryo nagpapadagos: “An papa, na puwedeng sabihon, an Dios kan daga, an solamenteng prinsipe kan maimbod ki Cristo, an pinakadakulang hade kan gabos na hade.” Idinagdag kaini: “An papa puwedeng tumangon kun minsan an banal na pagboot.” Siring man, an The New Catholic Dictionary nagsasabi dapit sa papa: “An saiyang mga embahador may halangkaw na posisyon sa ibang miembro kan diplomatikong grupo.”

21. Ikomparar an mga gibo kan papa sa ginibo ni Pedro asin kan anghel.

²¹ Bakong siring kan mga disipulo ni Jesus, an papa parateng nagsusulot nin maluhong kasulotan asin nag-aako nin sobrang pag-omaw sa mga tawo. Itinotogot kan papa na maghurohod saiya an mga tawo, hadokan an saiyang singsing, asin buhaton sia sa saindang mga abaga sa espesyal na tukawan. Kanigoan na kapalangkawan an ipinaheling kan mga papa sa nakaaging mga siglo! Nalalaen nanggad sa mapakumbabang pagigin simple ni Pedro, na nagsabi ki Cornelio, an opisyal kan armada kan Roma na nagluhod sa pamitisan ni Pedro tanganing sambahon sia: “Tumindog ka, . . . ako tawo man”! (Gibo 10:25, 26, an Katolikong Jerusalem Bible) Asin kanigoan na pagkakalaen sa anghel na nagtao ki apostol Juan kan Kapahayagan! Prinobaran ni Juan na may pagsambang maghurohod sa anghel na iyan, alagad nagpahayag an anghel: “Mag-ingat ka! Dai mo iyan paggibohon! Ako kapwa oripon mo asin kan saimong mga tugang na propeta asin kan mga nag-ootob kan tataramon kan balumbon na ini. Sambahon mo an Dios.”—Kapahayagan 22:8, 9.

22. Paagi kan anong Makakasuratan na reglamento puwedeng mamidbid an tampalasan?

²² An balwasyon daw na ini sa grupong klero makuring gayo? Madedeterminar niato ini paagi sa pagaplikar kan reglamento na itinao ni Jesus tanganing ipamidbid an falsong mga propeta: “Paagi sa saindang mga bunga mamimidbid nindo sinda.” (Mateo 7:15, 16) Ano kun siring an nagin bunga kan klero sa nakaaging mga siglo asin sa sato mismong ika-20 siglo? Ano an kaaabtan kaining tawo nin katampalasanan, asin siisay an makikihiras sa kaaabtan na iyan? Ano an paninimbagan kaidtong mga tunay na natatakot sa Dios manongod sa tampalasan na ini? An minasunod na mga artikulo an magkokonsiderar kan mga puntong ini.

Mga Hapot sa Repaso:

◻ Ano an tawo nin katampalasanan, asin kasuarin ini nahayag?

◻ Paano ipinamidbid kan Biblia an autor kaining grupong tampalasan?

◻ Paano ilinangkaw kan klero an saindang sadiri sa mga tawo?

◻ Anong apostatang mga katokdoan asin gibohon an pinaoswag kan klero?

◻ Paano an kaisipan kan mga papa nalalaen ki Pedro asin sa anghel?

[Ritrato sa pahina 14]

Si apostol Pedro, bakong siring kan mga papa, dai nagtogot na sambahon sia nin tawo