Pag-urog nin Karatan sa Bilog na Kinaban—Ano an Sinasabi kan Bibliya?

Grabeng kadahasan an nangyayari sa Haiti dahil sa mga gang. Lakop an madahas na mga krimen sa South Africa asin Mexico pati man sa ibang mga nasyon sa Latin America. Maski sa mga lugar na nagdikit na an nangyayaring kadahasan, nahahadit pa man giraray an mga tawo huli sa nangyayaring iba pang krimen arog nin panghahabon, bandalismo, asin panunulo.

Ano an sinasabi kan Bibliya manungod sa nangyayaring karatan sa bilog na kinaban?

Kun ano an ihinula kan Bibliya manungod sa karatan

Ihinula kan Bibliya na an karatan magigin kabtang kan tanda “kan pagtatapos kan sistema nin mga bagay.” (Mateo 24:3) Kan ilinaladawan ni Jesu-Cristo an mga pangyayari na magigin kabtang kan tanda, sinabi niya:

• “Dahil sa pag-urog nin karatan, magigin malipot an pagkamuot kan kadaklan.”—Mateo 24:12.

Ihinula man kan Bibliya na “sa huring mga aldaw” an mga tawo magigin “daing pagpupugol sa sadiri, maringis, daing pagkamuot sa karahayan.” (2 Timoteo 3:1-5) Dahil sa mga ugaling iyan, nahihiling ta na an mga tawo ngunyan garo baga mayo nang sinusunod na pamantayan.

Pero dai kita mawaran nin paglaom. Nangangako an Bibliya na madali nang mawara an mga nangyayaring karatan.

• “Dikit na sanang panahon, asin an mga maraot mawawara na; hihilingon mo an dati nindang kinamumugtakan, asin mayo na sinda diyan. Alagad magigin pagsadiri kan mga mahuyo an daga, asin makakanumpong sinda nin labi-labing kaugmahan huli sa abundang katuninungan.”—Salmo 37:10, 11.

Aramon pa an manungod sa mensahe nin paglaom sa Bibliya asin kun taano ta makakapagtiwala kita na an mga pangyayaring nahihiling ta ngunyan kautuban kan propesiya sa Bibliya. Hilingon an minasunod na mga artikulo.

“Makakaasa Ka sa Isang Magandang Kinabukasan”

“Ano an Tanda kan ‘Huring mga Aldaw,’ o kan ‘Panahon kan Katapusan’?”

“Inihula Ba ng Bibliya na Magiging Ganito ang Ugali ng mga Tao sa Ngayon?”