Ano an Tanda kan “Huring mga Aldaw,” o ‘Katapusan kan Panahon’?

An simbag kan Bibliya

Ilinaladawan kan Bibliya an mga pangyayari, kamugtakan, asin ugali kan mga tawo na magigin tanda kan “pagtatapos kan [presenteng] sistema nin mga bagay,” o “katapusan nin kinaban.” (Mateo 24:3; Magna Banal na Kasuratan) Inaapod kan Bibliya an panahon na ini na “huring mga aldaw” asin “panahon kan katapusan,” o ‘katapusan.’—2 Timoteo 3:1; Daniel 8:19; An Banal na Biblia.

Ano an nagkapirang propesiya sa Bibliya manungod sa “huring mga aldaw”?

Ihinula kan Bibliya an dakul na bagay na mangyayari nin sarabay, na iyo an magigin “tanda” kan huring mga aldaw. (Lucas 21:7) Pag-isipan an nagkapirang halimbawa:

Mga giyera sa bilog na kinaban. Ihinula ni Jesus: “An nasyon makikilaban sa nasyon asin an kahadian makikilaban sa kahadian.” (Mateo 24:7) Ihinula man sa Kapahayagan 6:4 an manungod sa simbolikong parakabayo na naglaladawan sa pakikigiyera na ‘mahali kan katuninungan sa daga.’

Tiggutom. Ihinula ni Jesus: “Magkakaigwa nin sunod-sunod na kakulangan nin kakanon.” (Mateo 24:7) Ihinula sa libro nin Kapahayagan an saro pang simbolikong parakabayo, na madara nin grabeng tiggutom sa dakul na lugar.—Kapahayagan 6:5, 6.

Makusog na mga linog. Sinabi ni Jesus na magkakaigwa nin “mga linog sa manlain-lain na lugar.” (Mateo 24:7; Lucas 21:11) An makusog na mga linog na ini sa bilog na kinaban magigin kawsa nin pagsakit asin pagkagadan nin dakul na tawo na mas urog kisa kasuarin man.

Hilang. Uyon ki Jesus, magkakaigwa nin mga epidemya nin “grabeng mga hilang.”—Lucas 21:11, Contemporary English Version.

Krimen. Dawa ginatos na taon nang may nangyayaring mga krimen, ihinula ni Jesus na sa huring mga aldaw, magkakaigwa nin “pag-urog nin karatan.”—Mateo 24:12.

Pagraot kan mga tawo sa daga. Ihinula kan Kapahayagan 11:18 na an mga tawo ‘rarauton an daga.’ Gigibuhon ninda iyan sa dakul na paagi, bako lang paagi sa madahas asin maraot na mga gibo kundi paagi man sa pagraot sa kapalibutan.

Mas lalong nagraraot na ugali nin mga tawo. Ihinula kan Bibliya sa 2 Timoteo 3:1-4 na an kadaklan sa mga tawo magigin “dai tataong magpasalamat, bakong maimbod, . . . habo nin ano man na kasunduan, parapakaraot, daing pagpupugol sa sadiri, maringis, daing pagkamuot sa karahayan, traydor, matagas an payo, orgulyoso.” Arog kaiyan karaot an magigin ugali kan mga tawo kun kaya tama sanang apudon an panahon na iyan na “delikado asin masakit na mga panahon.”

Pagkaraot nin pamilya. Ihinula kan Bibliya sa 2 Timoteo 3:2, 3, na dakul na tawo an mawawaran nin “natural na kapadangatan” sa mga kapamilya asin na an mga aki magigin “masinuway sa mga magurang.”

Pagluya kan pagkamuot sa Diyos. Ihinula ni Jesus: “Magigin malipot an pagkamuot kan kadaklan.” (Mateo 24:12) An buot sabihon ni Jesus iyo na magigin malipot an pagkamuot sa Diyos kan kadaklan na tawo. Sinabi man sa 2 Timoteo 3:4 na sa huring mga aldaw, an mga tawong arog kaiyan magigin “mahilig magpasiram-siram imbes na magpahiling nin pagkamuot sa Diyos.”

Pagsagin-sagin na relihiyoso. Ihinula kan Bibliya sa 2 Timoteo 3:5 na an mga tawo maghihingakong nagsasamba sa Diyos pero dai man talaga namumuhay kauyon kan mga pamantayan niya.

Mas malinaw na pakasabot sa mga propesiya sa Bibliya. Ihinula kan libro nin Daniel na sa “panahon kan katapusan,” dakul an madadagdagan an kaaraman sa mga katotoohan sa Bibliya, kaiba na an tamang pakasabot sa mga propesiyang ini.—Daniel 12:4, nota.

Sarong gibuhon na paghuhulit sa bilog na kinaban. Ihinula ni Jesus: “An maugmang baretang ini kan Kahadian ihuhulit sa bilog na kinaban.”—Mateo 24:14.

Dakul an mabaliwala asin magtutuya-tuya. Ihinula ni Jesus na babaliwalaon kan kadaklan na tawo an dai maninigaran na mga ebidensiya na harani na an katapusan. (Mateo 24:37-39) Sinabi pa sa 2 Pedro 3:3, 4 na may mga magtutuya-tuya asin dai talaga matubod maski nahihiling na ninda an mga ebidensiya.

Pagkautob kan gabos na propesiya. Sinabi ni Jesus na sa huring mga aldaw, sarabay na mauutob an gabos na propesiyang ini, bako lang pipira o kadaklan pa ngani sa mga ini.—Mateo 24:33.

Nabubuhay na daw kita sa “huring mga aldaw”?

Iyo. Ipinaparisa kan mga nangyayari sa kinaban pati na kan kronolohiya sa Bibliya na an huring mga aldaw nagpuon kan 1914, an taon kun nuarin nagpuon an Giyera Mundiyal I. Para maaraman kun paanong an mga nangyayari sa kinaban nagpapahiling na nabubuhay na kita sa huring mga aldaw, hilingon an minasunod na video:

Kan 1914, nagpuon na mamahala sa langit an Kahadian nin Diyos. An saro sa inot na mga ginibo kaiyan iyo an pagpalayas sa langit ki Satanas na Diyablo saka sa mga demonyo. Huli kaiyan, sa daga na sana ninda nagigibo an mga aktibidad ninda. (Kapahayagan 12:7-12) An impluwensiya ni Satanas sa katawuhan mahihiling sa dakul na maraot na ugali asin gibo-gibo na nagigin dahilan kaya an huring mga aldaw “delikado asin masakit na mga panahon.”—2 Timoteo 3:1.

Dakul na tawo an nahahadit na marhay sa delikadong mga panahon na ini. Iniisip ninda na tibaad dai na talaga magkakasararo an mga tawo. Natatakot pa ngani an iba sa kun ano an puwedeng mangyari sa mga tawo sa maabot na panahon.

Pero may mga tawo man na dawa nahahadit sa mga nangyayari sa kinaban, marahay an pananaw sa maabot. Kumbinsido sinda na madali nang halion kan Kahadian nin Diyos an mga problema sa kinaban. (Daniel 2:44; Kapahayagan 21:3, 4) Mapasensiya nindang hinahalat na utubon nin Diyos an saiyang mga panuga, asin nararanga sinda kan mga tataramon ni Jesus: “An makatagal sagkod sa katapusan maliligtas.”—Mateo 24:13; Mikas 7:7