Kita daw Talagang Nabubuhay Na sa “Huring mga Aldaw”?

DUWANG klase nin mga pangyayari an matabang sa sato na maaraman kun ano an inaapod kan Biblia na huring mga aldaw. Ihinula kan Kasuratan an mga pangyayari durante kan panahon kan “pagtatapos kan sistema nin mga bagay.” (Mateo 24:3) An Biblia nagtataram man manongod sa mga pagbabago sa aktitud asin paggawe nin mga tawo na nabubuhay sa “huring mga aldaw.”—2 Timoteo 3:1.

An mga pangyayari sa kinaban kaiba na an mga gawe-gawe asin ugale nin mga tawo nagpapatunay na kita nabubuhay na sa huring mga aldaw asin na dai na mahahaloy an Kahadean nin Dios magdadara nin daing katapusan na mga bendisyon sa mga namomoot sa Dios. Ponan niato paagi sa pagsiyasat sa tolong bagay na sinabi ni Jesus na magigin tanda kan huring mga aldaw.

“Kapinonan kan mga Kolog nin Kasakitan”

“An nasyon matindog tumang sa nasyon asin an kahadean tumang sa kahadean,” an sabi ni Jesus, “asin magkakaigwa nin mga kakulangan nin kakanon asin mga linog sa surunodsunod na lugar.” Idinugang nia: “An gabos na bagay na ini kapinonan kan mga kolog nin kasakitan.” (Mateo 24:7, 8) Saro-saro niatong siyasaton an ‘mga bagay na ini.’

Kadakol na tawo an ginadan sa mga guerra asin etnikong mga iriwal durante kan nakaaging siglo. “Mas dakol nin tolong doble an nagin biktima kan guerra kan [ika-20] siglo kisa sa gabos na guerra kan enot na siglo AD sagkod 1899,” an sabi nin sarong report nin mga eksperto sa Institusyon nin Pagmasid sa Kinaban. Sa saiyang librong Humanity—A Moral History of the Twentieth Century, si Jonathan Glover nagsurat: “Kinakarkulo na 86 milyones katawo an ginadan nin guerra poon 1900 sagkod 1989. . . . An kadakolan kan nagadan sa guerra kan ikabeinteng siglo depisil na maimahinar. Bakong aktuwal an ano man na sinasabing promedyong kabilangan nin mga nagadan, ta mga dos-tersio (58 milyones) an nagadan sa duwang guerra mundial. Alagad, kun an mga pagkagadan na ini nangyari sa regular na mga lagwat sa bilog na peryodong iyan, an guerra guminadan kutana nin mga 2,500 katawo kada aldaw, an boot sabihon labing 100 katawo kada oras, na daing pondo, sa laog nin nobentang taon.” Naiimahinar daw nindo an kamondoan asin kolog na siertong namatean kan minilyon na paryente asin katood kan mga nagadan?

Sa ibong kan katunayan na an kinaban nagpoprodusir nin kadakol na pagkakan, kaiba sa mga bagay na nagpapamidbid kan huring mga aldaw an mga kakulangan nin kakanon. An mga parasiyasat nagsasabi na durante kan nakaaging 30 taon, mas marikas an paglangkaw kan produksion nin kakanon kisa sa pagdakol kan populasyon. Minsan siring, an mga kakulangan nin kakanon nangyayari sa darakulang lugar kan kinaban huling dakol na tawo an mayo nin supisyenteng daga tanganing tanoman nin pagkakan o igong kuarta tanganing bumakal nin kakanon. Sa nagpoprogreso pa sanang mga nasyon, mga 1.2 bilyones katawo an pinapagkanigo sa sarong aldaw an sarong dolyar (Estados Unidos) o mayo pa. Sa mga ini, mga 780 milyones an nagtitios nin grabeng pagkagutom. Oyon sa World Health Organization, may dakulang kabtang an malnutrisyon sa pagkagadan kan labing limang milyon na aki kada taon.

Ano an masasabi manongod sa ihinulang mga linog? Segun sa Geolohikong Pagsurbey sa Estados Unidos, an kabilangan kan mga linog na igo an puersa tanganing rumaot nin mga edipisyo may promedyong 17 kada taon poon kan 1990 sana. Sa promedyo, an mga linog na igo an kosog tanganing haros biyong gumaba nin mga edipisyo nangyayari sarong beses kada taon. “Mananggatos na ribong tawo an nagadan huli sa mga linog kan nakaaging 100 na taon,” an sabi nin saro pang reperensia. An sarong dahelan kaini iyo na poon kan 1914 nagkaigwa nin dakol na darakulang sentro nin populasyon sa mga lugar na parateng may linog.

Iba Pang Makahulogan na mga Pangyayari

‘Magkakaigwa sa surunodsunod na lugar nin mga peste,’ an sabi ni Jesus. (Lucas 21:11) An siensia medikal ngonyan mas maoswag kisa kasuarin man. Pero, an dati sagkod bagong mga helang padagos na nagpapasakit nin makuri sa katawohan. An sarong dokumento kan U.S. National Intelligence Council nagsabi: “Beinteng midbid na marhay na helang—kaiba na an tisis (TB), malaria, asin kolera—an nagbalik giraray o nagpoon na maglakop sa mas dakol na lugar poon kan 1973, na parateng mas peligrosong gayo asin dai na kaya nin mga antibiotiko. Kisuerra 30 dai midbid kaidto na causa nin helang an naaraman poon kan 1973, kaiba na an HIV, Ebola, hepatitis C, asin Nipah virus, na mayo pa nin bolong.” Segun sa report kan Red Cross kan Hunyo 28, 2000, durante kan sinundan na taon an kabilangan kan tawo na nagadan sa nakakaolakit na mga helang mas dakol nin mga 160 beses kisa sa kabilangan kan nagadan sa natural na mga kalamidad.

An “pag-orog nin katampalasanan” saro pang risang gayong bagay na nagpapamidbid kan huring mga aldaw. (Mateo 24:12) Sa kadaklan na lugar sa bilog na daga ngonyan, binabaratan kan mga tawo an saindang mga pinto asin namamatean ninda na bako sindang ligtas sa kalye sa banggi. Asin kumusta an nangyayaring polusyon sa aire, tubig, asin daga, na parateng huli sa ilegal na mga gibo? Ini kaotoban man kan ihinula sa Biblia. An libro nin Kapahayagan nagtataram manongod sa itinalaan na panahon nin Dios na “paglaglag sa mga nagraraot sa daga.”—Kapahayagan 11:18.

Kun Ano an Karakteristiko kan mga Tawo sa Huring mga Aldaw

Buksan tabi nindo an saindong Biblia sa 2 Timoteo 3:1-5 asin basahon iyan. Si apostol Pablo nagsurat: “Sa huring mga aldaw maabot an delikadong mga panahon na masakit pakibagayan.” Dangan sinarosaro nia an 20 personalidad na magpapamidbid kan bakong diosnon na mga tawo. Naobserbaran na daw nindo an nagkapira sa mga karakteristikong ini sa mga nakaistar sa saindong komunidad? Isipon nindo kun ano an mga sinasabi kasuarin pa sana manongod sa mga tawo sa ngonyan.

“Mga mamomoton sa sainda man sana.” (2 Timoteo 3:2) “Pinipirit [kan mga tawo] na gibohon an gusto ninda nin orog kisa kasuarin man. [Sinda] nagigin mga dios, asin nag-aasang tatrataron nin siring.”—Financial Times, peryodiko, Inglaterra.

“Mga mamomoton sa kuarta.” (2 Timoteo 3:2) Kasuarin pa sana, an maimot na espiritu nin materyalismo nangibabaw sa espiritu nin kababaan nin boot. An saindong buhay mayong pakinabang apuera sana kun kamo minamansay na mayaman sa sosyedad.”—Jakarta Post, peryodiko, Indonesia.

“Mga masumbikal sa mga magurang.” (2 Timoteo 3:2) “An mga magurang napapangalas na an saindang 4 anyos na aki sinusugo sinda maski saen na garo sia an [Pranses na Hade] na si Luis XIV o an saindang 8 anyos na aki na nagkukuragrit nin, ‘Ikinakaongis ko kamo!’”—American Educator, magasin, Estados Unidos.

“Mga bakong maimbod.” (2 Timoteo 3:2) “An nag-oorog na marhay na pagigin andam kan kalalakihan na bayaan an saindang agom asin mga aki iyo an tibaad pinakadakulang pagbabago sa moral na mga prinsipyo sa buhay durante kan [nakaaging 40 taon].”—Wilson Quarterly, magasin, Estados Unidos.

“Mga dai nin natural na kapadangatan.” (2 Timoteo 3:3) “An kadahasan sa pamilya iyo an nangingibabaw na bagay sa aroaldaw na buhay nin mga komunidad sa bilog na kinaban.”—Journal of the American Medical Association, magasin, Estados Unidos.

“Mga mayong pagpopogol sa sadiri.” (2 Timoteo 3:3) “Dakol na estorya na nasa enotan na pahina kan mga peryodiko kada aga an nagpapaheling nin mga isip na mayo nin pagpopogol sa sadiri, moral na ugale asin pagkaherak sa saindang kapwa asin dawa sa saindang sadiri. . . . Kun an satong sosyedad padagos na papaboran an karingisan na siring kan nangyayari ngonyan, dai mahahaloy an satong sosyedad maabot sa kamugtakan nin pagkapara nin moral.”—Bangkok Post, peryodiko, Tailandia.

“Mga maringis.” (2 Timoteo 3:3) “An bakong sono sa rason na kaanggotan asin daing kontrol na kabangisan maheheling sa tinampo, sa pang-aabuso sa laog nin mga pamilya, . . . asin [sa] garo baga mayong basehan asin dai kaipuhan na kadahasan na parateng kabale sa krimen. An kadahasan daing pili asin dai maaraman antes pa saka an mga tawo nakakamate nin pagigin mayong kakampi asin madaling mabiktima.”—Business Day, peryodiko, Aprika del Sur.

“Mga mamomoton sa kasingawan imbes na mga mamomoton sa Dios.” (2 Timoteo 3:4) “An liberasyon sa sekso nagin sarong moral na krusada, na Kristianong moralidad an kalaban.”—Boundless, sarong magasin sa Internet.

“May porma nin diosnon na debosyon alagad nagpapainda sa kapangyarihan kaiyan.” (2 Timoteo 3:5) “[An sarong dating patotot sa Netherlands] nag-aadmitir na an pagkontra sa paglegalisar [sa prostitusyon] naggigikan sa pangenot sa mga grupong relihioso. Sia nagpondo nguna, dangan nakahuyom na nagsabi na kan sia patotot pa, nagkapirang ministro [nin relihion] an kabilang sa regular na kliyente nia. ‘Pirmeng sinasabi kan mga patotot na gikan sa komunidad nin relihion an saindang pinakamarahay na mga kliyente, an sabi nia asin napangisi.”—National Catholic Reporter, peryodiko, Estados Unidos.

Ano an Nakatagama sa Ngapit?

An kinaban ngonyan pano-pano nin problema, siring kan ihinula sa Biblia. Minsan siring, an propesiya manongod sa ‘tanda kan presensia ni Cristo asin kan pagtatapos kan sistema nin mga bagay’ igwa nin positibong kabtang. “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon,” an sabi ni Jesus. (Mateo 24:3, 14) An maogmang bareta kan Kahadean nin Dios ihinuhulit na sa labing 230 kadagaan. Labing anom na milyon katawo gikan sa “gabos na nasyon asin tribo asin banwaan patin tataramon” an aktibong nakikikabtang sa pagbalangibog kan Kahadean. (Kapahayagan 7:9) Ano an nagibo kan saindang maigot na aktibidad? Ini: An mensahe na kun ano an Kahadean, kun ano an gigibohon kaiyan, asin kun paano mag-aako kan mga bendisyon kaiyan puedeng maaraman kan haros lambang tawo sa daga. Tunay nanggad, ‘an tunay na kaaraman nagin abunda sa panahon kan katapusan.’—Daniel 12:4.

May marahay kamong dahelan na aprobetsaran an kaaraman na ini. Pensaron kun ano an mangyayari pagkatapos na ihulit an maogmang bareta sa paaging kontento na si Jehova. Si Jesus nagsabi: “Dangan madatong an katapusan.” (Mateo 24:14) Iyan an magigin panahon nin Dios tanganing haleon an gabos na karigsokan sa daga. An Talinhaga 2:22 nagsasabi: “Kun dapit sa mga marigsok, sinda popohoon sa mismong daga; asin kun manongod sa mga madaya, sinda hahaleon dian.” Kumusta man si Satanas asin an saiyang mga demonyo? Sinda ihuhulog sa bungaw, na duman nungka na nindang ikakalagalag an mga nasyon. (Kapahayagan 20:1-3) Dangan an “mga tanos . . . asin an mga daing katuyawan iyo an matatada” sa daga. Asin makakamtan ninda an marahayon na mga bendisyon kan Kahadean.—Talinhaga 2:21; Kapahayagan 21:3-5.

Ano an Magigibo Nindo?

Daing duda manongod dian. An katapusan kan sistema ni Satanas harani na. An mga dai nag-iintindi kan ebidensia na kita nabubuhay na sa huring mga aldaw magigin bakong andam kun dumatong na an katapusan. (Mateo 24:37-39; 1 Tesalonica 5:2) Kun siring, sinabi ni Jesus sa mga naghihinanyog sa saiya: “Tawan nin atension an saindong sadiri na an saindong mga puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay, asin sa panale an aldaw na iyan mag-abot sa saindo na siring sa sarong siod. Huli ta madatong iyan sa gabos na nag-eerok sa ibabaw kan bilog na daga. Magpuka kamo, kun siring, na sa gabos na panahon nagngangayongayo na magin kamong mapanggana sa pagdulag sa gabos na ining bagay na nakatalagang mangyari, asin sa pagtindog sa atubangan kan Aki nin tawo.”—Lucas 21:34-36.

Solamenteng an mga igwa nin inooyonan na kamugtakan sa atubangan kan Aki nin tawo, si Jesus, an magkakaigwa nin oportunidad na makaligtas sa katapusan kan sistemang ini nin mga bagay. Mahalaga nanggad na gamiton niato an natatadang panahon na hingoahon na kamtan an pag-oyon ni Jehova Dios asin ni Jesu-Cristo! Sa pagpamibi sa Dios, si Jesus nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Kun siring, madonong nanggad na kamo makanood nin orog pa manongod ki Jehova Dios asin sa saiyang mga kahagadan. Maoogma an mga Saksi ni Jehova sa saindong lugar na tabangan kamo na masabotan kun ano an itinotokdo kan Biblia. Maogma niamo kamong iniimbitaran na kontakon sinda o sumurat sa mga kagpublikar kan magasin na ini.

[Kahon/​Mga Ritrato sa pahina 7]

MGA BAGAY NA NAGPAPAMIDBID KAN HURING MGA ALDAW

DAKULANG MGA PANGYAYARI:

▪ Mga guerra.—Mateo 24:6, 7.

▪ Mga kakulangan nin kakanon.—Mateo 24:7.

▪ Mga linog.—Mateo 24:7.

▪ Mga peste.—Lucas 21:11.

▪ Pag-orog nin katampalasanan.—Mateo 24:12.

▪ Pagraot sa daga.—Kapahayagan 11:18.

MGA TAWO:

▪ Mga mamomoton sa sainda man sana.—2 Timoteo 3:2.

▪ Mga mamomoton sa kuarta.—2 Timoteo 3:2.

▪ Mga maabhaw.—2 Timoteo 3:2.

▪ Mga masumbikal sa mga magurang.—2 Timoteo 3:2.

▪ Mga daing utang na boot.—2 Timoteo 3:2.

▪ Mga bakong maimbod.—2 Timoteo 3:2.

▪ Mga dai nin natural na kapadangatan.—2 Timoteo 3:3.

▪ Mga mayong pagpopogol sa sadiri.—2 Timoteo 3:3.

▪ Mga maringis.—2 Timoteo 3:3.

▪ Mga mamomoton sa kasingawan.—2 Timoteo 3:4.

▪ Mga parasaginsagin sa relihion.— 2 Timoteo 3:5.

TUNAY NA MGA PARASAMBA:

▪ Igwa nin abundang kaaraman.—Daniel 12:4.

▪ Ihinuhulit an maogmang bareta sa bilog na kinaban.—Mateo 24:14.

[Credit Line]

UNITED NATIONS/Rinetrato ni F. GRIFFING