An Tataramon nin Dios Katotoohan

“Pakangbanala sinda paagi sa saimong katotoohan; an saimong tataramon katotoohan.”—JUAN 17:17.

1. Ano an pagheling sa Biblia kan salmistang Hebreo, alagad ano an pagheling dian kan dakol ngonyan?

^“AN SAIMONG tataramon ilawan sa sakong bitis, asin liwanag sa sakong dalan.” (Salmo 119:105) Iyan an sabi kan salmistang Hebreo. Minoriya na sana ngonyan an may siring na paggalang sa Tataramon nin Dios. Sa ika-20 siglong ini, an Tataramon nin Dios nasa nasusurat na porma bilang an Banal na Biblia. Iyan itrinadusir sa mas dakol na tataramon asin iwinaras nin mas mahiwas kisa arin pa man na libro sa kasaysayan. Pero, an kadaklan sinasayumahan iyan bilang ilawan sa saindang bitis. Minsan an mga naghihingakong Kristiano, sa kadaklan, mas gustong sundon an sadiri nindang mga ideya kisa pabayaan an Biblia na ilawan an saindang dalan.—2 Timoteo 3:5.

2, 3. Ano an pagheling sa Biblia kan mga Saksi ni Jehova, asin anong mga pakinabang an itinao kaini sa sainda?

² Kabaliktaran nanggad, kita na mga Saksi ni Jehova minaoyon sa salmista. Para sa sato, an Biblia giya na itinao nin Dios. Aram niato na “an gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan.” (2 Timoteo 3:16) Bakong arog kan dakol ngonyan, habo niatong mag-eksperimento kun manongod sa moralidad asin gawe. Aram niato kun ano an tama ta sinasabi iyan sato kan Biblia.

³ Nagtao ini sato nin dakulang mga pakinabang. Namidbid niato si Jehova, asin naaraman niato an saiyang makangangalas na mga katuyohan para sa daga asin sa katawohan, kaya kompiado kita na posible an sarong maliwanag na ngapit para sa sato asin sa satong pamilya. Bilog na puso kitang oyon sa salmista na nagsabi: “Kanigoan an sakong pagkamoot sa saimong pagboot! Sa bilog na aldaw iyan sakong pinaghohorophorop. Ginigibo akong orog na madonong sa sakong mga kaiwal kan saimong pagboot, huli ta sagkod lamang iyan sakuya.”—Salmo 119:97, 98.

Paghuhulit Paagi sa Gawe

4. An pagmidbid sa Biblia bilang Tataramon nin Dios nagtatao nin anong obligasyon sa sato?

⁴ Kun siring, nasa sato an gabos na dahelan na umoyon sa mga tataramon ni Jesus na ipinanongod sa saiyang Ama: “An saimong tataramon katotoohan.” (Juan 17:17) Alagad an pagmidbid sa bagay na ini nagtatao nin obligasyon sa sato. Kaipuhan na tabangan niato an iba na makarealisar na an Tataramon nin Dios iyo an katotoohan. Sa siring kakamtan man ninda an mga bendisyon na inaako niato. Paano daw niato sinda matatabangan sa paaging iyan? Enot, kaipuhan na gibohon niato an gabos na paghihingoa na iaplikar an mga prinsipyo kan Biblia sa satong pamumuhay sa aroaldaw. Sa paaging iyan, maheheling nin mga may matanos na puso na an dalan kan Biblia tunay na iyo an pinakamarahay.

5. Anong hatol an itinao ni Pedro manongod sa paghuhulit paagi sa satong gawe?

⁵ Ini an pinakasustansia kan hatol ni Pedro sa mga Kristiana na an agom dai nin pagtubod. Sia nagsabi sa sainda: “Kamong mga agom na babae, magpasakop kamo sa saindong agom, tanganing, kun an siisay man dai nagkukuyog sa tataramon, sinda madara minsan daing tataramon paagi sa gawe kan saindang agom na babae.” (1 Pedro 3:1) Iyan man an prinsipyo na nasa likod kan saiyang hatol sa gabos na Kristiano—lalaki, babae, asin aki—kan sia magsabi: “Papagdanayon na marahay an saindong ugale sa tahaw nin mga nasyon, tanganing, sa mga bagay na ipinagtataram ninda kontra saindo na garo baga kamo naggibo nin maraot, tibaad huli sa saindong marahay na mga gibo na saindang naheheling pamurawayon ninda an Dios sa aldaw kan saiyang pagsiyasat.”—1 Pedro 2:12; 3:16.

An Superyor na Kadonongan kan Biblia

6. Paano kita tinatabangan ni Pedro na marealisar na maninigo niatong tabangan an iba na apresyaron an Biblia?

⁶ Dugang pa, matatabangan nin mga Kristiano an iba na maapresyar an Biblia kun gigibohon ninda an ihinahatol man ni Pedro: “Pakangbanalon nindo an Cristo bilang Kagurangnan sa saindong puso, na perming andam na sumimbag sa lambang naghahagad saindo nin rason para sa saindong paglaom, alagad ginigibo iyan sa mahoyong boot asin hararom na paggalang.” (1 Pedro 3:15) An mga ministrong Kristiano maninigong ikadepensa an Biblia asin ikapaliwanag sa iba na iyan Tataramon nin Dios. Paano ninda magigibo iyan?

7. Anong bagay manongod sa Biblia an nagpapaheling na iyan seguradong Tataramon nin Dios?

⁷ An sarong nakakokombensir na pangangatanosan yaon sa libro nin Mga Talinhaga. Dian satong mababasa: “Aki ko, kun akoon mo an sakong mga kasabihan asin pahalagahan mo an sakong mga pagboot, na magtao nin atension sa kadonongan . . . , makukua mo an mismong kaaraman dapit sa Dios. Huli ta si Jehova nagtatao nin kadonongan; gikan sa saiyang ngoso an kaaraman asin pakamansay.” (Talinhaga 2:1-6) An mismong kadonongan nin Dios manonompongan sa mga pahina kan Biblia. Kun naheheling nin sinserong tawo an hararom na kadonongan na iyan, seguradong marerealisar nia na an Biblia bako sanang tataramon nin tawo.

8, 9. Paano an hatol kan Biblia manongod sa pagpadanay sa timbang na punto-de-vista manongod sa paghanap nin kayamanan napatunayan na tama?

⁸ Horophoropa an pirang halimbawa. Ngonyan, an kapangganahan sa buhay parateng sinosokol sa kuwarta. Mientras na mas dakula an nakukua nin saro, pinaghohona na sia mas mapanggana. Alagad, an Biblia nagpapatanid tumang sa pagtao nin sobrang halaga sa materyal na mga bagay. Si apostol Pablo nagsurat: “Idtong mga nag-iisip na magyaman nahoholog sa sugot asin sa siod asin sa dakol na rungaw asin nakararaot na horot, na nagdadara sa mga tawo sa kalaglagan asin kapahamakan. Huli ta an pagkamoot sa pirak gamot nin gabos na klase nin karatan, asin sa pag-aabot sa pagkamoot na ini an nagkapira nagkaralagalag sa pagtubod asin sinaksak an bilog nindang sadiri nin dakol na kakologan.”—1 Timoteo 6:9, 10; ikomparar an Mateo 6:24.

⁹ Ipinaheheling nin eksperyensia kun gurano kaangay kan patanid na ini. An sarong klinikal na sikologo nagkomento: “An pagigin Num. 1 asin mayaman dai nagtatao kan pagmate nin kaogmahan, pagkakontento, asin pagigin tunay na iginagalang o namomotan.” Iyo, an mga inuubos an saindang kosog sa paghanap nin kayamanan parateng an nasasagkodan kapaitan asin pagkabigo. An Kasuratan, minsan ngani minimidbid an halaga nin kuwarta, may itinotokdong mas mahalaga: “An kadonongan para sa proteksion kun paanong an kuwarta para sa proteksion; alagad an bentaha nin kaaraman iyo na an kadonongan mismo nagpapadanay na buhay sa mga nakasasadiri kaiyan.”—Eclesiastes 7:12.

10. Taano ta maninigo niatong kuyogon an hatol kan Biblia na bantayan an satong kairiba?

¹⁰ An Biblia igwa nin dakol na preseptong arog kaiyan. An saro pa: “Sia na naglalakaw na kaiba nin mga madonong magigin madonong, alagad sia na nakikiiba sa mga mangmang maraot an aabotan.” (Talinhaga 13:20) Ini napatunayan man sa eksperyensia. An impluwensia nin mga kaedad nagdara sa mga hobenes sa pagbuburat, pag-abuso sa droga, asin inmoralidad. An siisay man na nakikiiba sa mga nagtataram nin usmak sa huri makakarisa na sinda mismo naggagamit naman nin usmak na pagtaram. An dakol naghahabon sa saindang among ta ‘ginigibo iyan nin gabos.’ Tunay nanggad, arog kan sabi man kan Biblia: “An maraot na pag-iriba nakararaot sa marahay na mga ugale.”—1 Corinto 15:33.

11. Paano ipinaheling nin sarong sikolohikong pagsiyasat an kadonongan kan pagkuyog sa Golden Rule?

¹¹ An saro sa pinakabantog na hatol sa Biblia iyo an inaapod na Golden Rule: “Kaya an gabos na boot nindong gibohon sa saindo nin mga tawo, gibohon man nindo sa sainda.” (Mateo 7:12) Kun kukuyogon nin katawohan an reglamentong ini, malinaw na an kinaban magigin mas marahay na lugar. Alagad dawa kun an kadaklan na tawo dai nagkukuyog sa reglamentong iyan, mas marahay na gibohon nindo iyan bilang indibiduwal. Taano? Huli ta kita ginibo na mag-asikaso sa iba asin magmakolog sa sainda. (Gibo 20:35) An sarong sikolohikong pagsiyasat na ginibo sa Estados Unidos tanganing aramon kun ano an reaksion nin mga tawo kun sinda nagtatabang sa iba nakaabot sa konklusyon na ini: “Kaya minalataw na an pagmakolog sa iba kabtang kan naturalesa nin tawo na arog kan pagmakolog sa satong sadiri.”—Mateo 22:39.

An Hatol kan Biblia—May Napapalaen na Kadonongan

12. Ano an sarong bagay na nagpapalaen sa Biblia?

¹² Siyempre, ngonyan kadakol kan pinaghahalean nin hatol sa luwas kan Biblia. An mga peryodiko may mga kolumna sa pagtao nin hatol, asin an mga tindahan nin libro pano nin mga libro sa pagtabang sa sadiri. Dugang pa, may mga sikologo, propesyonal na mga parahatol, asin iba pa na nagtatao nin hatol sa laen man na mga langtad. Pero an Biblia napapalaen sa kisuerra tolong bagay. Enot, an hatol kaiyan perming kapakipakinabang. Noarin man iyan bakong teoriya sana, asin dai iyan noarin man nakadadanyar sa sato. An siisay man na nagkukuyog sa hatol kan Biblia napipiritan na umoyon sa salmista kan sia magsabi sa Dios sa pamibi: “An saimong mga pagirumdom napatunayan na masasarigan nanggad.”—Salmo 93:5.

13. Ano an nagpapaheling na an Biblia superyor nanggad sa mga tawong pinaghahalean nin kadonongan?

¹³ Ikaduwa, an Biblia probado na sa lawig nin panahon. (1 Pedro 1:25; Isaias 40:8) An hatol hale sa mga tawo paliwatliwat, asin an uso sa sarong taon parateng tinatatsaran sa masunod. Minsan siring, minsan ngani an Biblia natapos haros 2,000 na taon na an nakaagi, iyan sagkod ngonyan naglalaman kan pinakamadonong na hatol na makukua, asin an mga tataramon kaiyan aplikado sa bilog na kinaban. Iyan aplikado na may parehong epekto baga man kita nag-iistar sa Aprika, sa Asia, sa South o North America, sa Europa, o sa mga isla kan kadagatan.

14. Sa anong paagi na mas marahay an hatol kan Tataramon nin Dios?

¹⁴ Ultimo, daing kapareho an mahiwas na pagkalaenlaen kan hatol kan Biblia. An sarong talinhaga sa Biblia nagsasabi: “Si Jehova nagtatao nin kadonongan,” asin ano man na problema o desisyon an inaatubang niato, may kadonongan sa Biblia na nakatatabang sato na maresolberan iyan. (Talinhaga 2:6) An mga aki, tin-edyer, magurang, gurang, empleyado, among, mga nasa katongdan, gabos nakakadiskobre na aplikado sa sainda an kadonongan na nasa Biblia. (Talinhaga 4:11) Minsan kun kita napapaatubang sa mga situwasyon na mayo pa kan panahon ni Jesus asin kan mga apostol, an Biblia nagtatao sato nin hatol na epektibo. Halimbawa, kaidtong enot na siglo, an pananabako dai pa aram sa Tahaw na Sirangan. Ngonyan, iyan lakop. Minsan siring, an siisay man na nagtatao nin atension sa hatol kan Biblia na likayan an “mapasairarom kan kapangyarihan [o makontrol] nin ano man” asin magin malinig sa “lambang ramog nin laman asin espiritu” malikay sa bisyong ini, na kapwa nakaaadikto asin nakararaot sa salud.—1 Corinto 6:12; 2 Corinto 7:1.

Para sa Satong Ikararahay sa Halawig na Panahon

15. Taano ta sinasabi nin dakol na an Biblia lipas na sa panahon?

¹⁵ Totoo, dakol an nagsasabi na an Biblia lipas na sa panahon asin dai na nin koneksion sa ika-20 siglong ini. Minsan siring, posible na an dahelan dai sinasabi kan Biblia an gusto nindang madangog. An pagkuyog sa hatol kan Kasuratan nagbubunga kan satong ikararahay sa halawig na panahon, alagad sa parate ini nagkakaipo nin pagpapasensia, disiplina, asin pagpogol sa sadiring horot—mga ugale na bakong popular sa kinaban na nagsasadol sato na hanapon an pagpanigo ora mismo.—Talinhaga 1:1-3.

16, 17. Anong halangkaw na mga pamantayan sa moralidad sa sekso an ibinubugtak kan Biblia, asin paano iyan dai iniintindi sa modernong mga panahon?

¹⁶ Halimbawa an seksuwal na moralidad. Estrikto nanggad an mga pamantayan kan Kasuratan. An solamenteng lugar para sa pagdodorog sa laog nin pag-inagoman, asin an gabos na siring na pagdodorog sa luwas nin pag-inagoman bawal. Mababasa niato: “Ni an mga parapakisaro, ni an mga parasamba sa ladawan, ni an mga parasambay, ni an mga binabae, ni an mga lalaki na minadurog sa kapwa lalaki . . . dai magmamana kan kahadean nin Dios.” (1 Corinto 6:9, 10) Dugang pa, para sa mga Kristiano hinahagad kan Biblia an monogamiya, sarong agom na lalaki para sa sarong agom na babae. (1 Timoteo 3:2) Asin minsan ngani may pambihirang mga kaso na tibaad itogot an diborsio o pagbubulag, sinasabi kan Biblia na sa kagabsan an bogkos nin pag-agom parasiyempre. Si Jesus mismo nagsabi: “Sia na naglalang sainda sa kapinonan ginibo sindang lalaki asin babae asin nagsabi, ‘Huli kaini babayaan nin lalaki an saiyang ama asin ina asin magdadanay sa saiyang agom, asin an duwa magigin sarong laman’ . . . Kaya bako na sindang duwa, kundi sarong laman. Kaya, an pinagsaro nin Dios dai puwedeng pagsuwayon nin siisay man.”—Mateo 19:4-6, 9; 1 Corinto 7:12-16.

¹⁷ Ngonyan, an mga pamantayan na ini dai iniintindi nin kadaklan. An malaswang mga gibo sa sekso kinokonsinte. An pagdodorog nin nagdi-“date” na mga tin-edyer ibinibilang na normal. Inaako na an pagsasaro na dai kasal. Sa tahaw nin mag-aragom, bakong pambihira an bawal na pagsambay kan man-ibong-ibong na lado. Asin an diborsio lakop na epidemya sa modernong kinaban na ini. Alagad, an mas hababang mga pamantayan na ini dai nagtao nin kaogmahan. An maraot na mga resulta nagpatunay na tama man nanggad an Biblia sa pag-insistir sa estriktong mga pamantayan sa moral.

18, 19. Ano an ibinunga kan lakop na dai pag-intindi sa mga pamantayan ni Jehova sa moralidad?

¹⁸ An Ladies’ Home Journal nagsabi: “An pagtatampok sa sekso kan mga taon nin sisenta asin setenta nagdara bakong nin labi-labing kaogmahan nin tawo kundi nin grabeng pagsakit nin tawo.” An “grabeng pagsakit nin tawo” na sinasabi digdi kabilang an sa mga aki na naapektaran sa isip kan pagdidiborsio kan saindang mga magurang asin kan sa mga nasa edad nang nagtitios nin makuring kolog sa boot. Kaiba man dian an pagdakol nin mga pamilyang sasaro an magurang asin an epidemya nin hoben na mga babae na nangaki mantang sinda mismo aki pa man. Dugang pa, kaiba kaiyan an lakop na mga helang na ikinakaolakit sa pagdodorog, arog baga kan genital herpes, gonorrea, sipilis, chlamydia, asin AIDS.

¹⁹ Huli sa gabos na ini, an sarong propesor nin sosyolohiya nagkomento: “Seguro kita nasa tama nang edad tanganing horophoropon kun baga dai niato ikararahay gabos na suportaran an dai pagdodorog kun dai pa kasal bilang palakaw na pinakaangay sa mga pangangaipo kan satong mga siudadano asin kan saindang diretso sa katalingkasan: katalingkasan sa helang, katalingkasan sa hinahaboan na mga pagbabados.” Tama an sinasabi kan Biblia: “Maogma an makosog na tawo na ibinugtak si Jehova bilang saiyang kasarigan asin dai isinalingoy an saiyang lalauogon sa mga tawong pangahas, ni sa mga nahoholog sa mga kaputikan.” (Salmo 40:4) An mga nagsasarig sa kadonongan kan Biblia dai nadadaya kan mga kaputikan kan mga linalabanan an Biblia asin nagsasabi na an mas hababang pamantayan sa moral nagtatao nin kaogmahan. An madonong, dawa estrikto, na mga pamantayan kan Biblia pinakamarahay.

Masakit na mga Problema sa Buhay

20. Anong mga prinsipyo sa Biblia an napatunayan na nakatatabang sa mga kaipuhan na umatubang sa makuring pagtios sa saindang buhay?

²⁰ An kadonongan kan Biblia nakatatabang man sato na atubangon an masakit na mga problema na inaatubang niato sa buhay. Halimbawa, sa nagkapirang nasyon, may mga Kristiano na nasa grabe, makuring pagtios. Pero tinitios ninda an saindang kadukhaan asin nakakanompong pa man giraray nin kaogmahan. Paano? Paagi sa pagkuyog sa ipinasabong na Tataramon nin Dios. Isinasaboot ninda an nakararangang mga tataramon kan Salmo 55:22: “Bugtakan an saimong pasan ki Jehova mismo, asin sia matabang sa saimo.” Nagsasarig sinda sa Dios para sa kosog na makatagal. Dangan iinaaplikar ninda an mga prinsipyo sa Biblia asin linilikayan an nakadadanyar, nanrarawraw nin kuwartang mga bisyo, arog baga kan pagsisigarilyo asin pagbuburat. Sinda mahigos, arog kan irenerekomendar kan Biblia, kaya sa parate naririsa ninda na may ikinakatao sindang pagkakan sa saindang pamilya mantang nasusudya an mga hugakon o an mga minasuko sa pagkadesesperar. (Talinhaga 6:6-11; 10:26) Dugang pa, kinuyog ninda an patanid kan Biblia: “Dai ka mauri sa mga naggigibo nin karatan.” (Salmo 37:1) Dai sinda nagsusugal o naggigibo nin krimen, arog baga kan pagpabakal nin droga. An mga bagay na ini tibaad nag-aalok nin madaling “solusyon” sa saindang mga problema, pero mapait an haloyan na bunga.

21, 22. (a) Paano an sarong Kristiana nakakua nin tabang asin panranga sa Biblia? (b) Ano pang dugang na bagay manongod sa Biblia an nakatatabang sato na marealisar na iyan Tataramon nin Dios?

²¹ An pagkuyog daw sa Biblia talagang nakatatabang sa mga nasa makuring pagtios? Iyo, arog kan pinatutunayan nin kadakoldakol na eksperyensia. An sarong balong Kristiana sa Asia nagsurat: “Minsan ako nabubuhay na harani na sa linya kan mga pinakadukha, dai man ako nakakamate nin pagsentir o kapaitan. An katotoohan kan Biblia nakapapano sako nin positibong punto-de-vista.” Sia nagbabareta na an sarong bantog na panuga na itinao ni Jesus naotob sa saiya. Si Jesus nagsabi: “Kaya padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.” (Mateo 6:33) Sia nagpapatotoo na paagi sa pag-enot sa saiyang buhay kan saiyang paglilingkod sa Dios, permi niang inaako, sa manlaenlaen na paagi, an materyal na mga pangangaipo sa buhay. Asin an saiyang Kristianong paglilingkod nagtatao sa saiya nin dignidad asin nin pasohan sa buhay na nagpapangyaring matagalan an saiyang pagtios.

²² Tunay nanggad, an rarom kan kadonongan kaiyan nagpapaheling na an Biblia talagang Tataramon nin Dios. Mayo nin libro na mga tawo sana an kaggibo na makapagpapaliwanag manongod sa siring kadakol na kabtang nin buhay asin magin mapagmansay nanggad patin perming tama. Alagad igwa nin saro pang bagay manongod sa Biblia na nagpapaheling na iyan gikan sa Dios. Iyan may puwersa na papagbakleon an mga tawo. Pag-oolayan niato ini sa masunod na luwas.

Ikapaliliwanag daw Nindo?

◻ Sa anong paagi na binibendisyonan an mga Saksi ni Jehova huli sa saindang pag-ako sa Biblia bilang Tataramon nin Dios?

◻ Bilang mga nagtutubod sa Tataramon nin Dios, ano an obligasyon niato, asin paano makatatabang sato an satong gawe na maotob an obligasyon na ini?

◻ Ano an minagibo sa madonong na hatol kan Biblia na mas marahay kisa hatol sana nin tawo?

◻ Ano an nagkapirang halimbawa na nagpapaheling kan rarom kan kadonongan nin Dios?