Mga Hapot Hale sa mga Parabasa

◼ Kasuarin nagpoon na tumanog an pitong tanog nin trumpeta nin mga anghel sa Kapahayagan?

Sa Kapahayagan kapitulo 8, 9, asin 11, babasa niato an manongod sa pitong anghel na nagpatanog sa pitong trumpeta, na nagpapaisi nin makuring mga damat sa mga kabtang nin katawohan. An mga ini nagrerepresentar sa mga kapahayagan kan mga paghokom ni Jehova na ipinahayag kan banwaan ni Jehova sa bilog na panahon kan katapusan magpoon nangorogna kan kombension sa Cedar Point kan 1922.​—Helingon an Revelation​—Its Grand Climax At Hand!, kapitulo 21 sagkod 23 asin kapitulo 26.

An enot na apat na tanog nin trumpeta nagbubuyagyag kan gadan sa espirituwal na kamugtakan kan kabtang kan Kakristianohan sa “daga” asin sa “dagat,” saka kan pagigin bagsak kan klero asin kan espirituwal na kadikloman nin Kakristianohan.​—Kapahayagan 8:​7-12.

Ipinaheheling nin kasaysayan na an pagbuyagyag sa publiko kan mga katotoohan na ini sa aktuwal nagpoon bago kan 1922. Halimbawa, an pahayag na “Millions Now Living May Never Die,” na enot na itinao kan 1918 asin ipinublikar bilang pulyeto kan 1920, nagsabi manongod sa pagkasudya kan Kakristianohan asin sa nagdadangadang na katapusan kan kinaban na ini. An The Golden Age kan Setyembre 29, 1920, malinaw na nagbuyagyag kan Kakristianohan bilang parapakisaro, putikon na palsipikado, asin paradaya sa mga tawo.

Kun siring, taano ta sinasabi kan librong Revelation Climax na an apat na trumpetang ini nagpoon sanang patanogon sa kombension sa Cedar Point kan 1922? Huli ta kaidto luminuwas an pagboot na “ipaisi, ipaisi, ipaisi an Hade asin an Kahadean,” na tinatawan nin makosog na pampahiro an gibong paghuhulit. An luwas na Nobyembre 1, 1922 kan The Watch Tower, nagsasabi: “An mga katood . . . sinabot na an tema kan kombension iyo na sarong tunay na pribilehiyo asin obligasyon kan mga konsagrado digdi sa daga ngonyan an pagpaisi kan presensia kan Kagurangnan, an dakulang Hade nin mga hade, asin na an saiyang kahadean yaon, asin na ini an pinakamahalaga na gibohon ninda.”

Maninigo man na mangnohon na minsan ngani an apat na mensahe nin paghokom na ini ipinublikar kan mga Saksi ni Jehova poon kan 1922, an kada saro nag-ako nin makosog na puwersa gikan sa pag-aprobar sa apat na resolusyon sa mga kombension na ginibo sa pag-oltanan nin 1922 asin 1925. An manampulong milyon na kopya kan mga resolusyon na ini kan huri iwinaras na imprentado na, na epektibong ibinubuyagyag an pagigin gadan sa espirituwal kan Kakristianohan.​—Helingon an librong Revelation Climax, pahina 133, parapo 15.

An ultimong tolong tanog nin trumpeta may labot sa “herak man.” (Kapahayagan 8:13) Iyan laen sa enot na apat na tanog nin trumpeta ta iyan konektado sa espisipikong mga okasyon. An ikalimang tanog nin trumpeta konektado sa pagkakalda kan banwaan nin Dios sa “bungaw” kan 1919. An ikaanom may koneksion sa “hukbo nin mga parakabayo” asin sa mahiwas na internasyonal na paghuhulit na nagpoon kan 1922. An ikapito konektado sa pagkamundag kan Kahadean nin Dios kan 1914.​—Kapahayagan 9:​1-19; 11:​15-19.

An kada saro sa mga okasyon na ini nagdara nin kasakitan ki Satanas asin sa saiyang kinaban. An pakaluwas kan linahidan kan 1919 sa bungaw nin inaktibidad suminogod sa klero nin Kakristianohan asin ipinaheling an biyong pagsikwal sa saiya ni Jehova. Poon 1922 sagkod ngonyan, ginadan kan dakulang hukbo nin mga parakabayo an Kakristianohan, sa espirituwal na pagtaram, na ibinubuyagyag an pagigin gadan nia asin nagpapatanid manongod sa saiyang nagdadangadang na kalaglagan. Asin pagkamundag kan Kahadean kan 1914, si Satanas ihinolog sa langit, na nagsusutsut nin kapahapahamak na karibokan sa katawohan. Sa dai na mahahaloy hahaleon kan Kahadean an garo baga marigon na sosyedad nin tawo na tinogdok ni Satanas (an daga), na pinapara an rebeldeng katawohan (an dagat) sa Armagedon.​—Kapahayagan 11:​17–​12:​12; 21:1.

Sa kombension sa Cedar Point kan 1922, an tolong “herak man” gabos nahayag sa kinaban bilang pankagabsan. Liniwanag kan kampanya nin paghuhulit na pinonan kaidto na “an mga doron” nakaluwas na sa “bungaw” asin nagpopoon na an pagsalakay kan “hukbo nin mga parakabayo.” Asin an nakapahihirong pag-apod na ipaisi an Hade asin an Kahadean biyong kaoyon kan ikapitong tanog nin trumpeta. An luwas na Marso 1, 1925 kan The Watch Tower nagpaliwanag na an mga pangyayari kan 1914, 1919, asin 1922 ihinula sa Kapahayagan kapitulo 12. Ini mas hararom na pakasabot sa pagkamundag kan Kahadean, asin idto maimbod na ipinaisi kan mga Saksi ni Jehova. Dugang pa, an pagpaisi kan nandadamat na impormasyon na ini nag-ako nin dakulang puwersa huli sa pag-aprobar asin sa suminunod na pagwaras kan mapuwersang mga resolusyon sa panahon nin mga kombension na ginibo poon 1926 sagkod 1928.​—Helingon an Revelation​—Its Grand Climax At Hand!, pahina 147, 149, 172.

Kaya, an pagpatanog sa pitong trumpeta nagpoon kan 1922 asin nagpadagos kan mga taon nin 1920. Poon kaidto, an banwaan ni Jehova daing takot na nakikooperar sa mga anghel sa pagsabi sa gabos na tawo na an Kakristianohan gadan sa espirituwal, an saiyang klero bagsak na mga namomoon, asin sa dai na mahahaloy sia asin an iba pa sa kinaban ni Satanas lalaglagon.