Pagliligtas kan Daga sa Pagkalaglag
SARONG beses kaidto sa kasaysayan nin tawo, an daga ilinigtas nin Dios sa pagkalaglag sa kamot nin mga tawo. Ginibo nia iyan paagi sa sarong panglobong baha kan kaaldawan ni Noe. Mayo kita nin rekord na linalaglag kaidto nin mga tawo an pisikal na palibot. Alagad an daga nalaglag nin grabe sa ibang paagi kaya nakamate an Dios kan pangangaipo na humiro nin estrikto nanggad.
An Biblia nagbabareta: “An daga nagin laglag sa pagheling kan tunay na Dios asin an daga napano nin kadahasan. Kaya hineling nin Dios an daga asin, uya! iyan laglag, huli ta linaglag nin gabos na laman an daga.” (Genesis 6:4, 11, 12) Iyo, kan aldaw ni Noe pinagheling nin Dios an daga na laglag huli sa kadahasan asin karatan nin katawohan.
Siring man, kan an suanoy na Israel magpoon na sadirihon an Dagang Panuga, an Dios nagpatanid: “Dai nindo maninigong pagdigtaan an daga na saindong namumugtakan; huli ta dugo an nakakadigta sa daga . . . Asin dai nindo maninigong pagdigtaan an daga.” (Bilang 35:33, 34) Kaya, an Canaan nalaglag huli sa kasalan sa dugo kan mga nag-iistar dian. An maraoton na halimbawa kaini iyo an ugale ninda na pag-atang nin saradit na aki sa saindang mga dios.
An mga Cananeo inmoral man nin labi-labi, asin ini nakaapektar man sa pagheling nin Dios sa daga. Pinatanidan nia an Israel: “Dai kamo magpadigta sa arin man sa mga bagay na ini [inmoral na mga gibo], huli ta paagi sa gabos na bagay na ini nagpadigta an mga nasyon na aalawon ko hale sa atubangan nindo. Kaya an daga nadigtaan, asin . . . isusuka kan daga an mga nag-eerok dian.” (Levitico 18:24, 25) An inmoralidad asin pagpabolos nin dugo nakalaglag na gayo sa Canaan na linaglag nin Dios an mga nasyon na Cananeo.
An Paglaglag kan Daga
Ano man ngonyan? Bako daw na kita nabubuhay man sa panahon nin daing kontrol na kadahasan, pagpabolos nin dugo, asin inmoralidad? Ano man an gibohon nin tawo sa pagprobar na remedyohan an danyos na ginibo nia sa pisikal na daga, noarin man dai nia mabubuhay liwat an kinakarkulong sanggatos na milyon na nagadan sa saiyang mga guerra sa siglong ini; ni mabubuhay man nia liwat an minilyon na ginadan nin mga kriminal o an daing kabilangan na biktima na nagadan sa gutom. Tunay nanggad, dai nia ikasusulit an kinakarkulong 40 sagkod 60 milyones na omboy na an buhay tinatapos paagi sa aborsion kada taon. Mapagdududahan daw niato na an daga linalaglag sa pagheling nin Dios huli sa siring na mga bagay—dai na baga sambiton an inmoralidad na lakop na gayo ngonyan?
Sinasabi sato nin pangangatanosan na an Dios kaipuhan na humiro na sa madali tanganing iligtas an daga sa nakalalaglag na mga aktibidad nin tawo, asin ini pinatutunayan kan hula sa Biblia. Alagad ta ano an gigibohon nia? Sinasabi kan Biblia na saiyang ‘lalaglagon idtong mga naglalaglag kan daga.’ (Kapahayagan 11:18; ikomparar an Mateo 24:3-14.) Kun paanong pinahahale nin sarong kagsadiri nin harong an mapanraot na nag-iistar, “pahahaleon” man nin Dios an mga naglalaglag sa saiyang magayon na linalang, an daga.
An Biblia nagsasabi: “Kun manongod sa mga maraot, sinda popohoon sa daga; asin kun manongod sa mga madaya, sinda hahaleon dian.” (Talinhaga 2:22) An nagdadangadang na paghirong ini nin Dios inaapod kan Biblia na Armagedon. (Kapahayagan 16:16) Inapod man iyan ni Jesus na “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mateo 24:21) Iyan magigin mas dakula pa sa Baha.
Ini daw sobra man o bakong makatanosan na solusyon? Bako, an Dios, bilang an Kaglalang sa daga, igwa kan diretsong magdesisyon kun siisay an mag-iistar dian. May diretso man siang papanimbagon an tawo sa saiyang mga ginibo. Saro pa, kun totogotan nin Dios an tawo na ipagpadagos an saiyang gibo, an daga malalaglag para sa gabos, asin magigin imposible an buhay. Sa ibong na lado, paagi sa ‘paglaglag sa mga naglalaglag kan daga,’ iingatan nin Dios an satong daga para sa mga may pag-apresyar. An Biblia nanunuga: “Huli ta an mga matanos iyo an mag-eerok sa daga, asin an mga daing kanawayan iyo an matatada dian.”—Talinhaga 2:21.
Sa tabang nin Dios, minilyon an nakanompong nin kosog na ipaheling na sinda daing kanawayan huli ta boot nindang matada tanganing mag-ogma sa linalang nin Dios. Sinda nagkukuyog man sa halangkaw na mga pamantayan nin Dios sa moral asin naglilikay sa kadahasan asin kasalan sa dugo minsan sa bakong direktang paagi. Kaya, sinda bakong mga paralaglag kan daga sa mahalagang sentidong ini.
Sarong Daga na Ikinaligtas sa Pagkalaglag
An mga ini igwa ngonyan kan makaoogmang paglaom na maheling an daga na maliwat hale sa laglag na kamugtakan kaiyan sa presente pasiring sa sarong malinig na paraiso. Tara, pati an saindang hawak lilinigan, hahalean kan nakararaot na mga epekto nin kasalan. Ilinaladawan kan huring libro sa Biblia an probisyon nin Dios sa pagpangyari kan gabos na ini bilang simbolikong “salog kan tubig nin buhay.” Sa man-ibong-ibong na pangpang kan salog, “igwa nin mga kahoy nin buhay na nagbubunga nin kagduwang gusi nin bunga, na nagbubunga bulan-bulan. Asin an mga dahon kan mga kahoy para sa pagpaomay sa mga nasyon.”—Kapahayagan 22:1, 2.
An ipinasabong na bisyon na ini garantiya na ililigtas nin Dios sa pagkalaglag an daga asin an mga tawo dian. An ibang hula nagtatao nin patienot na pagkatanaw sa binagong dagang iyan. Halimbawa, horophoropa an poetikong bisyon ni Isaias: “An kapatagan asin an alang na lugar mag-oogma, asin an disyerto maggagayagaya patin mamumurak arog kan azafran. Daing duwa-duwa na iyan mamumurak, asin iyan nanggad magigin maogmahon na may kurahaw nin kaogmahan asin kagayagayahan.” (Isaias 35:1, 2) Sa panahon na iyan mayo na nin maating kadagatan, naraot na daga, o nakaiilong atmospera.
Orog na mahalaga, an daga dai na lalaglagon nin kadahasan, pagpabolos nin dugo, o inmoralidad. Idto na sanang mga may paggalang sa Dios, sa saiyang mga pamantayan, asin sa saiyang mga linalang an yaon duman. (Kapahayagan 21:7, 8) Hinanyoga ngonyan an mamuraway na mga resulta kan gabos na ini: “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na. . . . ‘Uya! ginigibo kong bago an gabos na bagay.’”—Kapahayagan 21:4, 5.
Kanigoan kamakaoogmang resulta! Maogmahon nanggad kita na sa dai na mahahaloy an Dios ‘lalaglagon idtong mga naglalaglag kan daga’! Asin an ipinasabong na mga panugang ini nagpapahiro nanggad sato na magmawot na maglingkod sa Dios na magliligtas kan daga sa pagkalaglag asin gigibohon iyan na paraisong istaran para sa may matanos na pusong katawohan!
[Blurb sa pahina 6]
Sinasabi kan Biblia na an Dios ‘lalaglagon idtong mga naglalaglag kan daga.’—Kapahayagan 11:18