“An Siisay Man na Makadangog Magsabi: ‘Madia!’”

Sa bilog na taon na maabot, an mga Saksi ni Jehova sa labing 200 na kadagaan sa bilog na kinaban maghihingoa kaoyon sa saindang teksto sa taon 1991: “AN SIISAY MAN NA MAKADANGOG MAGSABI: ‘MADIA!’”

“An espiritu asin an nobya padagos na nagsasabi: ‘Madia!’ Asin an siisay man na makadangog magsabi: ‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.”—KAPAHAYAGAN 22:17.

1. Sa anong “tubig” kita imbitadong “dumolok!”?

IMBITADO kamong “dumolok!” Dumolok para sa ano? Tara, dumolok tanganing mawara an saindong pagkapaha sa tubig. Ini bakong ordinaryong tubig kundi an tubig na sinasabi ni Jesu-Cristo kan sia magsabi sa Samaritana sa may bobon: “An siisay man na uminom sa tubig na itatao ko sa saiya dai na nanggayod mapapaha, kundi an tubig na itatao ko sa saiya magigin burabod nin tubig na nagbuburokbusok tanganing magtao nin buhay na daing katapusan.” (Juan 4:14) Saen kinua ni Jesus an “tubig” na ini?

2. Ano an burabod kan “tubig,” asin pakalihis sana nin anong pangyayari na iyan mabolos?

² Si apostol Juan nagkapribilehiyo na maheling sa bisyon an burabod na pinaghahalean kan “tubig” na ini, arog kan sinabi nia sa Kapahayagan 22:1: “Ipinaheling nia sa sako an salog kan tubig nin buhay, na malinaw siring sa kristal, na nagbobolos hale sa trono nin Dios asin kan Kordero.” Iyo, an burabod kan arog kalinaw sa kristal na tubig na ini na may nagtataong-buhay na mga elemento mayong iba kundi an Paratao nin Buhay, si Jehova mismo, na nagtatao kaiyan paagi sa Kordero, si Jesu-Cristo. (Ikomparar an Kapahayagan 21:6.) Mantang nasasambitan an “trono nin Dios asin kan Kordero,” segurado na pakapatindoga kan Mesiyanikong Kahadean kan 1914, an boot sabihon, pakapoon kan aldaw kan Kagurangnan, na nagpoon na bumolos an tubig nin buhay.—Kapahayagan 1:10.

3, 4. Sa ano nagrerepresentar an “tubig,” asin iyan makukua niisay?

³ Ano an isinisimbolo kan tubig nin buhay na ini? Iyan naglaladawan sa probisyon nin Dios para sa pagbabalik kan sangkap na buhay nin tawo, buhay na daing katapusan na may pagkasangkap sa sarong daga na ginibong paraiso. An tubig nin buhay nagrerepresentar sa gabos na probisyon para sa buhay paagi ki Jesu-Cristo. Ini daw gabos makukua na ngonyan? Dai, bakong gabos, ta kaipuhan ngunang haleon nin Dios an presenteng maraot na palakaw nin mga bagay kaiba an dai naheheling na poon kaiyan, si Satanas na Diablo. Alagad puwede na niatong makua an “tubig” na yaon ngonyan paagi sa pagdangog asin pagkuyog sa maogmang bareta kan Kahadean asin pag-oyon kan satong buhay dian.—Juan 3:16; Roma 12:2.

⁴ Kaya, pakapahelingan ki Juan kan ‘tubig nin buhay,’ si Jesus nagtaram ki Juan manongod sa Saiyang katuyohan na isugo an Saiyang anghel dara an bisyon. Dangan nadangog ni Juan an proklamasyon na: “An espiritu asin an nobya padagos na nagsasabi: ‘Madia!’ Asin an siisay man na makadangog magsabi: ‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kapahayagan 22:17) Kaya, an mga lingkod nin Dios nagtatao kan imbitasyon sa mga napapaha na pumoon nang uminom kan mga probisyon nin Dios para sa pagkakamit nin buhay na daing sagkod sa ibabaw nin daga paagi sa Kordero nin Dios.—Juan 1:29.

Naglataw an Pangangaipo Para sa Tubig nin Buhay

5. Paano an katawohan nangaipo kan banal na probisyon na ini?

⁵ Makamomondo, an enot na mga magurang kan pamilya nin tawo dai nagdanay sa dalan nin buhay na nagtao kutana sa saindang mga gikan kan oportunidad na magkamit nin sangkap na buhay bilang tawo sagkod lamang sa sarong erokan na paraiso. An buhay na daing katapusan para sa katawohan naghagad na si Adan gumibo kan intelihenteng pagpili na makinuyog na maglingkod sa saiyang Kaglalang. Sa impluwensia nin rebeldeng espiritung linalang, pinonan ni Eva an mobimiento na nagbunga nin kagadanan sa katawohan, asin si Adan, an saiyang sangkap na agom, pinili na umiba saiya sa nakagagadan na dalan na iyan. Kaya, bilang an paratao nin natural na buhay sa minasunod na mga kapag-arakian nin katawohan, si Adan sa katotoohan an nag-introdusir kan kagadanan sa bilog na pamilya nin tawo. Kaya arog kan sinasabi sa Biblia: “Paagi sa sarong tawo an kasalan naglaog sa kinaban asin an kagadanan huli sa kasalan, asin kaya an kagadanan nakalakop sa gabos na tawo huli ta sinda gabos nagkasala.” (Roma 5:12) Pagkaholog ni Adan asin Eva sa kasalan na pinonan nindang dagdagan nin bagong mga miembro an pamilya nin tawo.—Salmo 51:5.

6. Taano ta iinareglo ni Jehova na magkaigwa kan “tubig”?

⁶ Sagkod lamang daw na maoolang an Dios sa pag-otob kan saiyang katuyohan na paraisong daga na pano nin sangkap na mga tawo? Siyempre, an simbag kan Biblia dai! Minsan siring, tanganing maotob an saiyang katuyohan, si Jehova guminibo nin mamomoton na probisyon na makontra sa kapahapahamak na pagkukulang ni Adan pero lubos na kaoyon sa hustisya asin katanosan, na Sia an kompleto asin pinakasangkap na kapahayagan. Ginigibo nia ini paagi sa “salog kan tubig nin buhay.” Paagi kaiyan, ibabalik nia an sangkap na buhay nin tawo sa makinuyog na katawohan, na nawaran kan libertad na dumolok sa Burabod nin buhay. An salog na ini mabolos sa pinakalubos na sentido sa Sangribong Taon na Paghade ni Jesu-Cristo. Kaya, sa bilog na Milenyal na Paghade ni Cristo, an mga tawo, pati an mga binuhay liwat hale sa mga gadan, kaipuhan na uminom sa “salog kan tubig nin buhay.”—Ikomparar an Ezequiel 47:1-10; Gibo 24:15.

7. Sa anong pasisikadan ginibo an probisyon na “tubig”?

⁷ Si Jehova naoogma sa sadiri niang buhay, asin naoogma man siang itao an pribilehiyo sa intelihenteng buhay sa nagkapira sa saiyang mga linalang. An pasisikadan kan nagtataong-buhay na mga probisyon ni Jehova iyo an pantubos na atang ni Jesus. (Marcos 10:45; 1 Juan 4:9, 10) Kalabot man an Tataramon nin Dios, na kun beses inaapod kan Biblia na “tubig.” (Efeso 5:26) Si Jehova Dios libreng magsabi, “Madia!” sa mga tawong linalang, na nawaran kan orihinal na mga probisyon na ginibo nin Dios para sa sangkap na mag-agom na tawo, si Adan asin Eva.

An Grupong Nobya Nag-iimbitar, “Madia!”

8. Kiisay asin kasuarin enot na itinao an “tubig” na ini?

⁸ An enot na nag-iimbitar nin “madia!” iyo an mga minakompuwesto sa piguratibong nobya kan Kordero, an panganay na espirituwal na Aki ni Jehova. (Kapahayagan 14:1, 3, 4; 21:9) An espirituwal na nobya ni Cristo dai nagsasabi nin, “Madia!” sa saiyang sadiri, an boot sabihon, sa mga titiponon pa ni Jehova Dios bilang kabtang kan grupong nobya tanganing gibohon iyan na 144,000 gabos. An imbitasyon na iyan itinatao sa mga tawo na naglalaom na magkamit nin sangkap na buhay bilang tawo digdi sa daga pakalihis kan Armagedon. (Kapahayagan 16:14, 16) Sa pagtatapos na ini kan palakaw nin mga bagay poon 1914, nadangog niato an imbitasyon na itinatao kan “nobya,” sa tabang kan banal na espiritu nin Dios.

9. Paano niato naaaraman na iyan bako sanang para sa sadit na grupo?

⁹ Makaoogma, an huring libro kan Biblia nagpapaheling na “sarong dakulang kadaklan, na dai nin siisay man na makabibilang,” an maghihimate sa proklamasyon kan maogmang bareta manongod sa Kahadean nin Dios asin marigon na maninindogan sa lado kan makahadeng gobyernong iyan. (Kapahayagan 7:9, 10, 16, 17) Saro daw kamo sa dakulang kadaklan na iyan? Kun siring, “an siisay man na makadangog magsabi: ‘Madia!’”

An Espiritu Asin an Nobya Nagsasabi, “Madia!”

10. Saen seguradong guminikan an simbolikong tubig, asin taano?

¹⁰ Alagad taano an Dios asin an piguratibong Nobyo ta dai nasasambitan sa Kapahayagan 22:17? Enot, mangnoha na dai sinasabi kan bersikulo kun sa paggiya niisay na minahiro an espiritu. Pero, an pagkasambit sa espiritu nagtotokdo kan satong atension ki Jehova Dios mismo. An Ama dai ipinagigilid, ta sia an mismong Burabod kan banal na espiritu. Ikaduwa, an Aki lubos na nagkokooperar sa saiyang Ama, arog kan sabi nia mismo: “An Aki dai makagigibo nin ano man sa saiyang sadiring boot, kundi an saiya sanang naheheling na ginigibo kan Ama.” (Juan 5:19) Dugang pa, minsan ngani an imbitasyon na ini ipinasabong na mga tataramon na an pinakaburabod iyo si Jehova Dios, an mga tawo puwedeng mag-ako nin banal na paggiya, o “ipinasabong na mga tataramon,” paagi ki Jesu-Cristo, “an Tataramon.” (Kapahayagan 22:6; siring man an 22:17, Reference Bible, nota sa ibaba; Juan 1:1) Kun siring, tama sana, iinaasosyar niato si Cristo, an Nobyo, sa imbitasyon na ini. Iyo, makasisierto kita na kapwa si Jehova Dios, an Ama kan Nobyo, asin si Jesu-Cristo, an Nobyo, kaiba kan “nobya” paagi sa banal na espiritu sa pagsabing, “Madia!”

11, 12. (a) Ano an amay na nagparisa na an imbitasyon na uminom pahihiwason? (b) Paano nag-orog na luminaw an bagay sa pag-agi nin mga taon?

¹¹ Sa dakol na dekada an imbitasyon na ini na “dumolok!” itinatao sa mga tawo na napapaha sa “tubig nin buhay.” Kaidto pang 1918, an grupong nobya nagpoon na maghulit nin mensahe na sa partikular may labot sa mga tibaad mabuhay sa ibabaw kan daga. Idto an pahayag-publiko na may titulong “An Minilyon na Nabubuhay Ngonyan Tibaad Dai Na Noarin Man Magadan.” Ini nagtao kan paglaom na dakol an makaliligtas sa Armagedon asin magkakamit nin buhay na daing sagkod sa Paraisong daga sakop kan Mesiyanikong Kahadean nin Dios. Pero an mensaheng iyan dai depinidong nagtokdo kan dalan para sa pribilehiyong ini na makaligtas, apuwera sa katanosan sa pankagabsan.

¹² Tanganing maabot an mas dakol kan imbitasyon na, “Madia!” kan 1922 an mensahe nakaabot sa gabos na interesadong maglingkod sa Dios: “Ipaisi an Hade asin an Kahadean.” Kan 1923 an grupong nobya nakasabot na an “karnero” asin “kanding” sa parabola ni Jesus sa Mateo 25:31-46 mahahayag bago an Armagedon. Dangan, kan 1929, ilinuwas kan The Watch Tower na Marso 15 an artikulong “Maboot na Imbitasyon.” An pinakatemang teksto kaiyan Kapahayagan 22:17, asin itinampok kaiyan an paninimbagan kan grupong nobya na itao an imbitasyon na, “Madia!”—Pahina 87-9.a

An Ibang Karnero Minaiba sa Pagsabing, “Madia!”

13, 14. Kan mga taon nin 1930, anong dugang pang pagpaliwanag an itinao na may iba na mainom sa simbolikong tubig?

¹³ Dugang pa, kaidto pang 1932, sinabi na kan The Watchtower an paninimbagan man kan “ibang karnero” na magsabing, “Madia!” (Juan 10:16) Sa luwas kaiyan na Agosto 1, pahina 232, an parapo 29 nagsabi: “An mga saksi ni Jehova ngonyan may kaigotan na kapareho kaidto ki Jehu asin maninigo nindang dagkahon an grupong Jonadab [ibang karnero] na umiba sa sainda asin makikabtang sa pagbalangibog sa iba na an kahadean nin Dios harani na.” Dangan, pakakotara kan Kapahayagan 22:17, an parapo nagsabi: “Dagkahon logod kan linahidan an gabos na boot na makikabtang sa pagpahayag kan maogmang bareta kan kahadean. Dai sinda kaipuhan na magin linahidan kan Kagurangnan tanganing makapagpahayag kan mensahe kan Kagurangnan. Dakulang karangahan sa mga saksi ni Jehova na maaraman ngonyan na sinda tinotogotan na magdara kan tubig nin buhay sa sarong grupo nin mga tawo na tibaad iligtas sa Armagedon asin tawan nin buhay na daing katapusan digdi sa daga huli sa nagsosopay na karahayan ni Jehova.”b

¹⁴ Poon 1934, idinoon kan linahidan na natatada na an mga ibang karnerong ini kaipuhan na ngonyan na idusay an saindang sadiri sa Dios asin simbolisaran an pagdusay na ini nin bautismo sa tubig dangan umiba sa grupong nobya sa pagsabing, “Madia!” sa iba pang napapaha. Kaya, igwa na ngonyan nin depinidong imbitasyon na itinatao kan grupong nobya para sa pagtipon sa napapahang ibang karnero pasiring sa “sarong aripompon” sakop kan “sarong pastor,” si Jesu-Cristo. (Juan 10:16) Kan 1935 an linahidan na natatada naogmang maaraman sa saindang kombension heneral kan taon na idto na an arog-karnerong grupo nin mga tawo na inaagda nindang, “Madia!” sa katunayan iyo an “dakulang kadaklan” sa Kapahayagan 7:9-17. Ini nagtao sainda nin makosogon na pampahiro sa gibong pag-imbitar.

15. Paano kalabot “an espiritu” sa imbitasyon na, “Madia”?

¹⁵ Sa pagsabing, “Madia!” an grupong nobya kaoyon kan espiritu nin Dios. Paagi sa saiyang espiritu sa pagbubukas kan kahulogan kan mga hula sa saiyang nasusurat na Tataramon, pinapangyari nia na an natatada sa grupong nobya magtao kan imbitasyon. An mga hulang ini na pinagbasaran kan saindang imbitasyon ipinasabong kan espiritu nin Dios. Kaya garo man sana an espiritu nin Dios na nagbobolos paagi ki Cristo asin sa saiyang nobya iyo an nagsasabi sa dakulang kadaklan nin mga arog-karnero, “Madia!”—Kapahayagan 19:10.

16. Paano an espiritu asin an nobya konektado sa imbitasyon ngonyan?

¹⁶ Sagkod sa aldaw na ini an espiritu asin an nobya, na irinirepresentar kan natatada, “padagos na nagsasabi: ‘Madia!’” An natatada sinasabihan an ibang karnero na imbitaran pa an iba na “dumolok!” Dai ninda sasadirihon na sana an “tubig nin buhay” na yaon ngonyan. Kaipuhan na kuyogon ninda an pagboot kan “espiritu asin [kan] nobya,” na: “An siisay man na makadangog magsabi: ‘Madia!’” An gabos na nahahalean nin pagkapaha kaipuhan na ilakop an imbitasyon. Kaipuhan na ipaabot ninda iyan sa gabos na dai iniintindi an rasa, nasyonalidad, tataramon, o presenteng relihiyon—an gabos saen man! Kun ano an “tubig nin buhay” na yaon sa presenteng panahon iyo an ipinangangagda nin mga Saksi ni Jehova asin tinatabangan an gabos na uminom dian, na daing bayad!

17. Anong klaseng “tubig” an yaon ngonyan?

¹⁷ Sa bilog na daga, an Kordero, si Jesu-Cristo, tunay na ginigiyahan an dakulang kadaklan “sa mga burabod kan tubig nin buhay.” (Kapahayagan 7:17) Ini bakong maating tubig, kundi malinaw, presko, marahay sa lawas na tubig hale sa mismong Burabod. An simbolikong tubig na ini bako sanang tubig sa sentido nin pakasabot sa katotoohan kan Biblia an kahulogan; iyan nangangahulogan kan gabos na probisyon nin Dios paagi ki Jesu-Cristo na ngonyan pa nagpopoon nang ibugtak an dakulang kadaklan sa dalan pasiring sa pagkakamit nin daing katapusan na sangkap na buhay na may kaogmahan.

Umiba Na Ngonyan sa Pagbalangibog

18. Gurano kahiwas an imbitasyon sa satong panahon?

¹⁸ Ngonyan, nagkapirang milyon na an kabilangan kan dakulang kadaklan na ini. Sinda maigot na nagpapadagos na ibalangibog an maogmang bareta kan Kahadean sa bilog na ineerokan na daga. Regular nindang irinireport an saindang mga aktibidad sa langtad sa paghuhulit kan maogmang bareta kan Kahadean, na ngonyan nakaabot na sa 212 kadagaan. Sagkod sa itinotogot kan panahon sa pagtatapos na ini kan palakaw nin mga bagay, an pag-imbitar magpapadagos sono sa pasensia asin pakatios ni Jehova Dios, an Dakulang Paratalaan nin Panahon. Aram nia kun noarin tapos na an panahon asin kun noarin kritikal na panahon para sa saiya na ipamidbid an saiyang sadiri sa gabos bilang si Jehova, arog kan ipinanuga niang gibohon sono sa paorootrong sinasabi sa hula kan Biblia.—Ezequiel 36:23; 38:21-23; 39:7.

19. Taano ta masasabi niato na an “tubig” na ini iinaalok na daing bayad?

¹⁹ Kun siring, mantang may panahon pa, an mga kabilang sa dakulang kadaklan magayagayang nakikiiba sa natatada kan grupong nobya sa pagsabi: ‘Madia asin uminom sa tubig nin buhay na daing bayad!’ An mga parabalangibog kan nagliligtas-buhay na maogmang baretang ini nagbabalangibog nin daing bayad, na dai nagpapabayad sa saindang paglilingkod mantang saindang ilinalakop an mensahe kan Kahadean sa bilog na kinaban.

20. Ano an ibubunga ta yaon an “tubig” na ini?

²⁰ An tubig nin buhay makukua na ngonyan sa bilog na kinaban, tangani na an boot na uminom dian makainom sagkod na makontento nin lubos na may nagliligtas-buhay na mga resulta. An binalukat na katawohan magkakamit nin buhay na daing sagkod digdi mismo sa dagang ini, na gigibohon na paraiso, na nagbibindikar sa napakahalagang katuyohan ni Jehova. An satong Kaglalang dai ginibo nin basang sana an daga kundi tanganing magin lakop sa kinaban na tatamnan nin Eden, o Paraiso nin kaogmahan, na inierokan nin sangkap na mga tawong linalang na kaagid asin kaladawan nin Dios.

21. Paano maootob an katuyohan nin Dios para sa daga?

²¹ Tunay nanggad, magigin dai masabing pribilehiyo asin kagayagayahan na mamugtak sa siring na bagong kinaban! Dangan an isinugo nin Dios sa enot na tawong mag-agom sa Genesis 1:27, 28 maootob nin abunda. Salamat sa ekspertong pag-asikaso ni Jehova sa kalamidad na uminabot sa pamilya nin tawo, an daga masasakop sagkod na iyan magin paraiso asin mapapano nin sangkap na rasa nin tawo. Iyo, maheheling nin Dios an gabos na ginibo nia, asin, uya, iyan marahayon nanggad. Yaon daw kamo duman? Kun iyo, kaipuhan na kamo may pag-apresyar na pumoon nang uminom kan tubig nin buhay na daing bayad. “Madia!” asin inom sagkod na mabasog patin halea an saindong pagkapaha paagi sa tubig nin buhay na nagpoon nang bumolos ngonyan asin biyong mabolos sa Milenyong maabot. Asin an siisay man na nakakadangog sa mahamis na imbitasyon na ini magsabi: “Madia!”

[Mga Nota sa Ibaba]

Ano an Simbag Nindo?

◻ Anong “tubig” an sinasabi sa Kapahayagan 22:17?

◻ Ano an burabod kan “tubig”?

◻ Taano ta kaipuhan an “tubig,” asin noarin sana iyan makapopoon na bumolos?

◻ Sa teksto niato, ano an ipinaririsa kan pagkasambit sa “espiritu,” asin paano napapalabot an “nobya”?

◻ Siisay an puwedeng uminom sa “tubig,” asin may anong resulta?