Taano ta Haloyon Bago Mahusay an Isyu?
KAIDTONG mga 6,000 na taon na an nakaagi, daing isyu manongod sa soberaniya nin Dios. Kan matapos an saiyang makangangalas na mga paglalang, “naheling nin Dios an gabos niang ginibo asin, uya! idto marahayon.” (Genesis 1:31) Dangan naglaog sia sa halawig na panahon nin “pahingalo”; siyempre, bakong huli ta sia napapagal sa pisikal. Imbes, sia nagpahingalo sa sentido na sia nagpondo sa saiyang paglalang digdi sa daga, na nagsasarig na an saiyang marahay na katuyohan manongod sa mga ini magigin biyong mapanggana.—Genesis 2:1-3; Isaias 55:11.
Ano an katuyohan na iyan? Ibinugtak ni Jehova an enot na mag-agom na tawo sa sarong lugar na inaapod tatamnan nin Eden. An enot nindang paninimbagan atamanon an saindang erokan na paraiso, kaiba an kadakol na hayop dian. Saro pa, sinda magpapaluwas asin magpapadakula nin mga aki. Pag-abot nin panahon, mantang nagdadakula an saindang pamilya, pahihiwason ninda an Paraiso sagkod sa kaporoporohi kan daga bilang pagkuyog sa pagboot nin Dios na ‘sakopon an daga.’ Kaya, sa huri an daga magigin magayonon na erokan, pano nin maogma, sararong pamilya na naglilingkod sa saindang langitnon na Ama. Iyan an orihinal na katuyohan nin Dios.—Genesis 1:27, 28; 2:8, 15, 20-22.
Makikikabtang daw si Adan asin Eva sa pag-otob sa makangangalas na katuyohan na ini sagkod na iyan matapos? Iyan depende sa saindang padagos na pagkooperar dian paagi sa pagkuyog sa saindang Kaglalang. An saindang pagkuyog dai magigin buta, daing pag-isip. Tinawan sinda nin libreng kabotan, ta boot nin Dios na sinda maglingkod sa saiya gikan sa pusong may pag-apresyar. Bilang naheheling na pagirumdom sa saiyang may diretsong soberaniya, sia nagtao nin simpleng pagbalo. Puwede sindang kumakan sa arin man na itinaong kakanon sa tatamnan apuwera sa saro. Igwa nin kahoy na namumunga na manongod dian an Dios nagsabi: “Sa aldaw na kumakan ka kaiyan ika siertong magagadan.”—Genesis 2:16, 17.
Sinasabi sato kan mga tataramon na ini na si Adan asin Eva dai linalang tanganing maggurang asin magadan. Maabot sana an kagadanan kun saindang lapason an simpleng pagboot na ini. Kun si Adan asin Eva nagmaimbod sa Dios, sinda kutana buhay pa sa daga sagkod ngonyan bilang mga magurang nin lakop sa kinaban na pamilya nin sangkap na mga aki.—Helingon an prinsipyong sinasabi sa Salmo 37:29.
Minsan siring, an saro sa mga anghel na linalang nin Dios, na ngonyan inaapod Satanas, nagin mapagtatsar sa paagi nin Dios sa paghade. Sinadol nia si Eva na kumakan sa ipinangangalad na bunga, na madayang isinusuherir na sa pagigin indipendiente sa soberaniya nin Dios, magigin mas marahay an saiyang kamugtakan. Alagad, an tunay na motibo ni Satanas iyo an pagmawot na magin dios kan magigin pamilya nin tawo.—Genesis 3:1-5; Mateo 4:8, 9; Juan 8:44.
Mantang itinao ni Jehova sa enot na mag-agom an gabos na kaipuhan ninda, maninigo kutanang suportaran ni Eva an saiyang soberaniya asin isikwal an putik na suhestion ni Satanas. Alagad ta makamomondo, sia naglapas sa pagboot nin Dios. Dangan, pinili ni Adan na umiba sa saiyang agom sa saiyang mangmang na dalan. Kaya an may matagas na payong mag-agom, saka si Satanas, nagrebelde tumang sa Dios, asin luminataw an isyu nin banal na soberaniya.—Genesis 3:6.
Kaipuhan an Panahon Tanganing Mahusay an Mahahalagang Isyu
Puwede kutanang ginadan na ni Jehova kaidto mismo an tolong rebelde. Alagad ta iyan dai kutana nakahusay nin dai na mapagdududahan sa mga hapot na pinalataw kan saindang pagrebelde. Kaya daw nin tawo na mapangganang pamahalaan an sadiri na siblag sa Dios? Hustisya daw sa kabtang nin Dios na hagadon an pagpasakop sa saiyang soberaniya? Dugang pa, huli sa iginawe kan enot na mag-agom, igwa daw nin tawo na daing kapasloan na pipilion an paglilingkod sa Dios gikan sa saindang sadiring kabotan—dawa kun baloon ni Satanas? (Job 1:7-11; 2:4) Kaipuhan an panahon tanganing masimbag an mga hapot na ini. Kaipuhan man an panahon tanganing madaog an mga epekto kan enot na pagrebeldeng idto asin maotob an katuyohan nin Dios na gibohon na paraiso an daga na ineerokan nin daing kasalan na rasa nin tawo. Sagkod ngonyan hinahalat niato an ultimong pagkahusay sa mga isyung ini.
Kaoyon sa saiyang pagboot, hinale nin Dios ki Adan asin Eva an pribilehiyong mabuhay sagkod lamang. Dai na sinda maninigong makikabtang sa pag-otob sa saiyang dakulang katuyohan. Minsan siring, bago sinda nagadan, sinda tinogotan na mangaki asin padakulaon an mga aki. Totoo, dai na ikapamamana ni Adan asin Eva an mabagsik, daing kasalan na buhay. (Roma 5:12) Alagad dawa ngani an suminunod na mga kapag-arakian namundag na bakong sangkap asin magagadan, an dakol na indibiduwal nagkaoportunidad na ipaheling kun saen sinda naninindogan manongod sa dakulang isyu nin soberaniya.
Pagresolber sa Isyu
Paano reresolberan nin Dios an mga bagay na ini manongod sa saiyang soberaniya? Sa sarong sentido an mga hapot na pinalataw duman sa Eden nasimbag na. An rinibong taon na kasaysayan nin tawo ipinarisa sa makolog na paagi na an paghihingako ni Satanas na magigin mas marahay an kamugtakan ni Eva kun independiente sa Dios sarong kaputikan. An pamamahala nin tawo na dai nag-iintindi sa Dios nagin nagpapadagos na pagkasudya. Arog kan sinasabi kan Biblia: “An tawo nagsakop sa tawo sa saiyang ikararaot.”—Eclesiastes 8:9.
Sa ibong na lado, kadakol na marahay na mga bagay an dokumentado sa laog kan dakol na taon poon kan magkasala si Adan asin Eva. An dakol sa katawohan nagpaheling nin dai mababaring kaimbodan sa soberaniya ni Jehova, na an pinakapambihirang halimbawa iyo “an Aki nin tawo,” si Jesu-Cristo mismo. (Mateo 20:18; Hebreo 11:1–12:3) An mga nagkuyog sa mga pagboot nin Dios asin nagmidbid sa saiyang soberaniya nakadiskobre na iyo ini sa katotoohan an pinakamarahay na dalan. Naeksperyensiahan ninda an katotoohan kan talinhaga: “An bendisyon ni Jehova—iyan an nakapayayaman, asin dai nia iyan dinadagdagan nin kakologan.” (Talinhaga 10:22) Dugang pa, salamat sa probisyon na pagkabuhay liwat, sa huri sinda makakapakikabtang sa kaotoban kan makangangalas na katuyohan nin Dios.—Juan 5:28, 29.
Dai nalilingawan ni Jehova an saiyang orihinal na katuyohan. An mga nagsisikwal sa saiyang soberaniya dai totogotan na magdominar sa daga sa gabos na panahon, asin an Biblia nagpapatanid na sa dai na mahahaloy an Dios mahiro tumang sa sainda. Mababasa niato: “An kaanggotan nin Dios nahahayag hale sa langit tumang sa gabos na karatan.” (Roma 1:18) An nagdadangadang na kapahayagan na ini kan kaanggotan nin Dios, na inaapod kan Biblia na Armagedon, daing duwa-duwa na magpapaheling na sia talagang nag-eeksister. Solamente an mga nag-ako sa saiyang soberaniya an makaliligtas sa pangyayaring iyan. “An mga matanos iyo an mag-eerok sa daga, asin an mga daing kanawayan iyo an matatada dian. Kun manongod sa mga maraot, sinda popohoon sa daga.”—Talinhaga 2:21, 22.
An Dakulang Isyu Asin Kamo
Huli sa mga bagay na ini, an kada saro sa sato—arog ni Adan asin Eva—dapat na pumili. Kita daw magpoprobar na mamuhay nin independiente sa Dios? O kita daw mapasakop sa saiyang soberaniya? Girumdoma, ini an pinakamahalagang isyu na napapaatubang sa saindo ngonyan. An ibang isyu, minsan garo baga mahalaga, may koneksion sa saindong presenteng buhay. Ini may koneksion sa buhay na daing katapusan. An desisyon nindo makakaapektar sa saindong daing sagkod na ngapit.
Paano nindo ikapaheheling na inaako nindo an soberaniya nin Dios? Paagi sa maigot na pag-adal sa saiyang Tataramon, an Biblia, asin paghihingoa na kuyogon an saiyang kabotan kaiba nin ibang tunay na mga Kristiano. (Sofonias 2:2, 3) Kun iyan gibohon nindo, magkakaigwa kamo kan maogmang paglaom na maheling an kaotoban kan makangangalas na katuyohan nin Dios. Maheheling nindo an kaotoban kan makangangalas na panugang ini: “Dai na mahahaloy, asin ta an maraot mawawara na . . . Alagad an mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.” (Salmo 37:10, 11) Kanigoan karahay na kaaabtan para sa gabos na nagpasakop sa soberaniya nin Dios! Kanigoan kakosog na dahelan na magdesisyon nin madonong sa pinakamahalagang bagay na ini!
Kun si Adan asin Eva nagkuyog sa Dios, buhay pa kutana sinda sa daga ngonyan
Paagi sa pagpapasakop sa soberaniya ni Jehova, an dakol babalosan nin buhay na daing katapusan sa sarong daganon na paraiso