Magkasararo Paagi sa Malinig na Tataramon
“Sa panahon na iyan itatao ko sa mga banwaan an pagbago sa malinig na tataramon, tanganing sinda gabos mag-apod sa ngaran ni Jehova, tanganing daramay na maglingkod sa saiya.”—SOFONIAS 3:9.
1. Nadangog na daw nin mga tawo na nagtaram si Jehova Dios?
AN TATARAMON ni Jehova Dios malinig. Alagad ta nadangog na daw siang nagtaram nin mga tawo? Iyo nanggad! Iyan nangyari kan an saiyang Aki, si Jesu-Cristo, yaon digdi sa daga kaidtong 19 siglo na an nakaagi. Halimbawa, kan si Jesus bautismohan, an Dios nadangog na nagsabi: “Ini an sakong Aki, an namomotan, na sakong inooyonan.” (Mateo 3:13-17) Idto kapahayagan nin malinig na katotoohan, na nadangog ni Jesus asin ni Juan Bautista sa tataramon nin tawo.
2. Ano an ipinaririsa kan sambiton ni apostol Pablo an “dila . . . nin mga anghel”?
2 Pakalihis nin pirang taon an Kristianong apostol na si Pablo nagsabi manongod sa “dila nin mga tawo asin nin mga anghel.” (1 Corinto 13:1) Ano an ipinaririsa kaini? Tara, ipinaheheling kaiyan na bako sanang mga tawo kundi pati an espiritung mga persona may lenguahe asin nakakataram! Siyempre, an Dios asin an mga anghel dai nagkokomunikar sa lambang saro paagi sa paggamit nin mga tingog asin lenguahe na nadadangog asin nasasabotan niato. Taano ta dai? Huli ta kaipuhan an atmospera na arog kan nakapalibot sa daga tanganing ikalakop an tanog na madadangog asin masasabotan nin mga tawo.
3. Paano nagpoon an tataramon nin tawo?
3 Paano nagpoon an tataramon nin tawo? May mga nagsasabi na an satong mga apoon naghingoang makikomunikar sa lambang saro paagi sa mga ungol asin agrutong. Sabi kan librong Evolution (Life Nature Library): “An tawong kabalang kaidtong mga sarong milyon na taon na an nakaagi . . . posibleng nakanood nin pirang tanog nin tataramon.” Alagad an bantog na leksikograpo na si Ludwig Koehler nagsabi: “An tataramon nin tawo sarong hilom; iyan banal na regalo, sarong milagro.” Iyo, an tataramon nin tawo banal na regalo, huli ta tinawan nin Dios an enot na tawo, si Adan, nin tataramon. Minalataw na iyan an sa huri inapod na Hebreo. An tataramon na iyan ginamit kan Israelitang mga gikan ni “Abram na Hebreo,” sarong maimbod na patriarka na an apoon na si Sem aki kan naggibo kan dahong na si Noe. (Genesis 11:10-26; 14:13; 17:3-6) Huli sa makahulang bendisyon nin Dios ki Sem, makatanosan na isipon na an saiyang tataramon dai naapektaran kan milagrosong ginibo ni Jehova Dios kaidtong 43 na siglo na an nakaagi.—Genesis 9:26.
4. Siisay si Nimrod, asin paano sia ginamit ni Satanas na Diablo?
4 Kan panahon na idto ‘an bilog na daga saro sana an lenguahe asin saro sana an tataramon.’ (Genesis 11:1) Nabubuhay kaidto an sarong tawong si Nimrod, “makosog na paraayam tumang ki Jehova.” (Genesis 10:8, 9) An dai naheheling na numero unong kaiwal nin katawohan, si Satanas, espesyalmenteng ginamit si Nimrod tanganing magpatindog kan daganon na kabtang kan organisasyon kan Diablo. Boot ni Nimrod na gumibo nin dakulang ngaran para sa saiya man sana, asin an mapaabaw-abaw na kaisipan na iyan nakalakop sa saiyang mga parasunod, na pinonan an espesyal na proyekto nin pagtotogdok sa daga nin Sinar. Sono sa Genesis kapitulo 11, bersikulo 4, sinda nagsarabi: “Madia kamo! Magtogdok kita nin sarong siudad asin siring man nin torre na an alitoktok sukdo sa kalangitan, asin gumibo kita nin bantog na ngaran para sa sato man sana, ta tibaad kita magkawararak sa ibabaw kan bilog na daga.” An proyektong idto na tumang sa pagboot nin Dios na “panoa nindo an daga” natapos kan ribarawon ni Jehova an tataramon kan mga rebelde. “Sa paaging iyan,” sabi kan tala kan Biblia, “iwinarak sinda ni Jehova hale duman pasiring sa ibabaw kan bilog na daga, asin binayaan ninda an pagtogdok kan siudad.” (Genesis 9:1; 11:2-9) An siudad na idto inapod na Babel, o Babilonya (na an boot sabihon, “Karibarawan”), “huli ta duman rinibaraw ni Jehova an tataramon kan bilog na daga.”—Byington.
5. (a) Ano an naolang kan rinibaraw nin Dios an tataramon kan katawohan? (b) Ano an magigin konklusyon niato manongod sa tataramon ni Noe asin ni Sem?
5 An milagrong idto—an pagribaraw kan sasarong tataramon nin tawo—nagpangyari kan pagpano sa daga siring kan ipinagboot nin Dios ki Noe, asin idto nag-olang sa ano man na plano ni Satanas na patindogon an sararong marigsok na pagsamba sa saiya nin mga tawong rebelde tumang sa Soberanong Kagurangnan kan langit asin daga. Totoo, paagi sa paggibo nin falsong relihiyon sa ano man na porma, an mga tawo nagin biktima kan Diablo, asin naglilingkod sinda sa mga demonyo kan sinda gumibo nin mga dios asin diosa, tinawan iyan nin ngaran sa saindang laen-laen na tataramon, asin sinamba iyan. (1 Corinto 10:20) Alagad an ginibo kan solamenteng tunay na Dios sa Babel nakaolang sa Diablo na pormahon an sarong nagkakasararong falsong relihiyon na magtatao sa Diablo kan pagsambang hinihimuyawot nia. Siyempre, an matanos na si Noe asin an saiyang aking si Sem dai napalabot sa grabeng pagkadaog na idto sa daga nin Sinar. Kaya rasonableng isipon na an saindang tataramon nagdanay na iyo an tataramon kan maimbod na si Abram (o Abraham)—an tataramon na ginamit nin Dios sa pakikipag-olay sa tawong si Adan sa tatamnan nin Eden.
6. Kan aldaw nin Pentecostes 33 C.E., paano ipinaheling ni Jehova na puwede man siang magtao nin kakayahan na magtaram sa laen-laen na tataramon?
6 Si Jehova, na rinibaraw an orihinal na tataramon nin tawo, makatatao man nin kakayahan na magtaram sa laen-laen na tataramon. Tara, ginibo nia mismo iyan kan aldaw nin Pentecostes kan taon 33 kan satong Komon na Kapanahonan! Sono sa Gibo 2:1-11, mga 120 parasunod ni Jesu-Cristo an tiripon sa sarong kuwarto sa itaas sa Jerusalem. (Gibo 1:13, 15) Bigla na sana, may ribok hale sa langit “na siring sa hagobohob nin makosog na doros.” An “mga dila na garo kalayo” naheling asin iwinaras. Dangan an mga disipulo “nagkaparano nin banal na espiritu asin nagpoon na magtaram nin manlaenlaen na tataramon, siring sa ipinataram sainda kan espiritu.” Sa itinao nin Dios na mga tataramon na idto, sinda nagtaram “manongod sa makangangalas na mga bagay nin Dios.” Asin kanigoan nanggad kadakulang milagro iyan, mantang an mga Judio asin proselito na laen-laen an tataramon, hale sa hararayong lugar na arog kan Mesopotamia, Egipto, Libya, asin Roma, nakasabot sa mensaheng nagtatao nin buhay!
An Itinao nin Dios na Tataramon Ngonyan!
7. Ano an malalaoman kun saro na sanang tataramon an itataram asin masasabotan sa bilog na kinaban?
7 Mantang an Dios nakatatao nin laen-laen na tataramon sa milagrosong paagi, bako daw na makangangalas kun pangyarihon nia na saro na sanang tataramon an gamiton asin masabotan sa bilog na kinaban? Iyan mapaoswag sa pagkasinabotan sa laog kan pamilya nin tawo. Arog kan sabi kan The World Book Encyclopedia: “Kun sasaro sana an tataramon nin gabos na tawo, an mga relasyon sa kultura asin ekonomiya magigin mas dayupot, asin maorog an marahay na boot sa pag-oltanan nin mga nasyon.” Bueno, kisuerra 600 na unibersal na tataramon an isinuherir sa nag-aging mga taon. Sa mga ini, an may pinakadakulang epekto iyo an Esperanto ta mga 10,000,000 katawo na an nakanood kaiyan poon kan iyan gibohon kan taon 1887. Alagad ta, mayo nin mga paghihingoa nin tawo na pagsararoon an katawohan paagi sa sarong unibersal na tataramon an nagin mapanggana. An totoo, paorog nang paorog na mga problema an ginigikanan nin pagkabaranga sa kinaban na ini mantang ‘an mga maraot orog na nagraraot.’—2 Timoteo 3:13.
8. Dawa kun sarong unibersal na tataramon an gamiton sa kinaban ngonyan, ano pa man giraray an mag-eeksister, asin taano?
8 Sa relihiyosong pagtaram, grabe an karibarawan. Pero bako daw na ini maninigo niatong laoman, mantang inaapod kan libro sa Biblia na Kapahayagan na “Dakulang Babilonya” an pankinaban na imperyo nin falsong relihiyon? (Kapahayagan 18:2) Iyo, ta an “Babilonya” nangangahulogan “Karibarawan.” Dawa kun an sarong artipisyal na tataramon o natural na tataramon arog baga kan Ingles, Pranses, Aleman, o Ruso gamiton bilang unibersal na tataramon sa kinaban ngonyan, magkakaigwa pa man giraray nin pagkabaranga sa relihiyoso asin iba pang paagi. Taano? Huli ta “an bilog na kinaban namumugtak sa kapangyarihan kan maraot,” si Satanas na Diablo. (1 Juan 5:19) Sia an mismong personipikasyon nin kapasloan, asin sia paslong nagmamawot na sambahon nin bilog na katawohan, arog kan ginibo nia kan kaaldawan ni Nimrod asin kan Torre nin Babel. Tara, an unibersal na tataramon na itinataram nin makasalan na mga tawo tibaad magtao pa ngani ki Satanas kan oportunidad na establisaron an sararong pagsamba sa Diablo! Alagad ta noarin man dai iyan itotogot ni Jehova; iyo nanggad, sa dai mahahaloy paparaon nia an gabos na falso, ipinasabong nin Diablong relihiyon.
9. Paano an mga tawo sa gabos na nasyon asin rasa nagkakasararo ngonyan?
9 Pero, an makangangalas na bagay iyo na an marahay na mga tawo sa gabos na nasyon asin rasa pinagsasararo mismo ngonyan. Ini nangyayari sa mga kondisyon nin Dios asin para sa pagsamba sa saiya. Ngonyan, pinangyayari nin Dios na magin posible sa mga tawo an pakanood asin pagtaram kan solamenteng malinig na tataramon sa ibabaw kan daga. Asin iyan talagang unibersal na tataramon. Iyo nanggad, itinotokdo ni Jehova Dios an malinig na tataramon na ini sa dakol na tawo sa gabos na nasyon kan daga ngonyan. Ini sa kaotoban kan makahulang panuga nin Dios paagi sa saiyang propeta asin saksing si Sofonias: “Huli ta sa panahon na iyan itatao ko sa mga banwaan an pagbago sa malinig na tataramon [sa literal, “malinig na ngabil”], tanganing sinda gabos mag-apod sa ngaran ni Jehova, tanganing daramay na maglingkod sa saiya.” (Sofonias 3:9) Ano an malinig na tataramon na ini?
An Malinig na Tataramon Tinawan nin Kahulogan
10. Ano an malinig na tataramon?
10 An malinig na tataramon iyo an katotoohan nin Dios na yaon sa saiyang sadiring Tataramon, an Banal na Kasuratan. Partikularmente na iyan an katotoohan manongod sa Kahadean nin Dios, na magtatao nin katoninongan asin iba pang bendisyon sa katawohan. Hinahale kan malinig na tataramon an relihiyosong sala asin falsong pagsamba. Pinagsasaro kaiyan an gabos na nagtataram kaiyan sa puro, malinig, marahay na pagsamba sa nabubuhay asin tunay na Dios, si Jehova. Ngonyan, mga 3,000 na tataramon an nagseserbing olang sa pagsabot, asin an ginatos na falsong relihiyon riniribaraw an katawohan. Kaya kanigoan an satong kaogmahan na an Dios nagtatao sa mga tawo nin pagbago sa makangangalas, malinig na tataramon!
11. Ano an nagibo kan malinig na tataramon sa mga tawo kan gabos na nasyon asin rasa?
11 Iyo, an malinig na tataramon nanonodan nin mga tawo hale sa gabos na nasyon asin rasa. Bilang an solamenteng tunay na malinig na tataramon digdi sa daga, iyan nagseserbing makosog na puwersa sa pagkasararo. Pinapangyayari kaiyan an gabos na nagtataram kaiyan na “mag-apod sa ngaran ni Jehova, tanganing daramay na maglingkod sa saiya,” o sa literal, “may sarong abaga.” Sa siring pinaglilingkodan ninda an Dios “na may sarong pag-oyon,” “may sarong biyong nagkakasararong pag-oyon asin sarong abaga.” (The New English Bible; The Amplified Bible) An traduksion ni Steven T. Byington nagsasabi: “Dangan gigibohon kong [an boot sabihon, si Jehova Dios] malinig an ngabil kan gabos na banwaan, tangani na sinda gabos mag-apod sa ngaran ni Jehova asin magkooperar sa paglilingkod sa saiya.” An siring na lakop sa kinaban na may laen-laen na tataramon na kooperasyon sa paglilingkod sa Dios solamenteng manonompongan sa tahaw kan mga Saksi ni Jehova. Sa 212 nasyon ngonyan, an labing apat na milyon na mga parabalangibog kan Kahadean naghuhulit kan maogmang bareta sa dakol na tataramon nin tawo. Alagad, an mga Saksi “nagtataram na may pagkaoroyon” asin “dayupot na magkasararo sa saro sanang pag-isip asin sa saro sanang paghonahona.” (1 Corinto 1:10) Ini totoo huli ta, saen man sinda sa ibabaw nin daga, an gabos na Saksi ni Jehova nagtataram kan sarong malinig na tataramon, sa ikaoomaw asin ikamumuraway kan saindang langitnon na Ama.
Pag-adalan an Malinig na Tataramon Ngonyan!
12, 13. (a) Taano ta maninigo kamong magmalasakit manongod sa pagtaram kan malinig na tataramon? (b) Taano an mga tataramon sa Sofonias 3:8, 9 ta mahalagang marhay ngonyan?
12 Taano ta maninigo kamong magmalasakit manongod sa malinig na tataramon? Enot, huli ta an saindong buhay nasasarig sa pakanood asin pagtaram kaiyan. Bago nanuga an Dios na “itatao sa mga banwaan an pagbago sa malinig na tataramon,” sia nagpatanid: “‘Halata nindo ako,’ an sabi ni Jehova, ‘sagkod sa aldaw na ako mabuhat sa samsam, huli ta an sakuyang paghokom iyo na tiriponon an mga nasyon, sararoon an mga kahadean, tanganing ibubo sa sainda an sakong kabangisan, an gabos kong naglalaad na kaanggotan; huli ta mauubos an bilog na daga kan kalayo nin sakuyang kaigotan.’”—Sofonias 3:8.
13 An mga tataramon na iyan kan Soberanong Kagurangnan na Jehova enot na isinabi 26 na siglo na an nakaagi sa Juda, na an kabesera iyo an Jerusalem. Pero an mga tataramon na iyan espesyalmenteng ipinanongod sa satong kaaldawan ta an Jerusalem nanganino sa Kakristianohan. Asin an satong mga panahon, poon kan patindogon an langitnon na kahadean nin Dios kan 1914, iyo an aldaw ni Jehova para sa pagtiripon sa mga nasyon asin pagsararo sa mga kahadean. Sinda gabos dinara nia sa irarom kan saiyang atension paagi sa sarong mahiwas na patotoo. Ini man nakapukaw sa sainda sa pagtumang sa saiyang katuyohan. Minsan siring, si Jehova Dios maheherakon na pinapangyayari an mga tawo hale sa gabos na nasyon na magsararo sa pagtaram kan malinig na tataramon. Paagi kaiyan, an gabos na naghahanap nin buhay sa saiyang ipinanugang bagong kinaban puwedeng maglingkod sa saiya nin sararo bago an gabos na nasyon masolo sa malaad na kapahayagan nin banal na kabangisan sa “ralaban kan dakulang aldaw nin Dios na Makakamhan sa gabos,” na inaapod nin dakol na Armagedon. (Kapahayagan 16:14, 16; 2 Pedro 3:13) Makaoogma, an mga nagtataram kan malinig na tataramon asin nag-aapod sa ngaran ni Jehova na may pagtubod bilang sararong tunay na mga parasamba magkakamit nin banal na proteksion sa panahon kan init kan kalamidad na iyan kan kinaban. Sinda dadarahon nin Dios na ligtas sa bagong kinaban, na duman sa katapustapusi solamente an malinig na tataramon an mamumugtak sa ngabil nin gabos na tawo.
14. Paagi ki Sofonias, paano ipinaheling nin Dios na an pakaligtas sa katapusan kan palakaw na ini nin mga bagay nangangaipo nin paghiro tolos?
14 Paagi sa saiyang propetang si Sofonias, liniwanag ni Jehova na an mga naglalaom na makaligtas sa katapusan kan presenteng maraot na palakaw nin mga bagay kaipuhan na humiro tolos. Sono sa Sofonias 2:1-3, an Dios nagsasabi: “Pagsararay kamo, iyo, pagsararay kamo, O nasyon na daing kasopganan. Bago mangaki nin ano man an pagboot, bago mag-agi an aldaw na garo nasosolong dagami, bago umabot sa saindo an naglalaad na kaanggotan ni Jehova, bago umabot sa saindo an aldaw kan kaanggotan ni Jehova, hanapa nindo si Jehova, kamo gabos na mahoyo sa daga, na naggibo kan Saiyang hatol. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.”
15. (a) Ano an enot na kaotoban kan Sofonias 2:1-3? (b) Sairisay an nakaligtas kan ginibo nin Dios an paghokom sa Juda, asin ano an magigin katimbang kan kaligtasan na ini sa satong panahon?
15 An mga tataramon na iyan enot na naotob sa suanoy na Juda asin Jerusalem. An makasalan na mga taga-Juda dai naghimate sa pakiolay nin Dios, siring kan ipinaheheling kan saiyang paghokom sa sainda sa kamot kan mga Babilonyo kan taon 607 B.C.E. Kun paanong an Juda iyo an “nasyon na daing kasopganan” sa atubang nin Dios, siring man an Kakristianohan nagin daing kasopganan na “nasyon” sa atubangan ni Jehova. Minsan siring, huli sa paghinanyog sa tataramon nin Dios, an pirang Judio asin iba pa nakaligtas, kabilang na sa sainda an maimbod na propeta ni Jehova na si Jeremias. An iba pang nakaligtas iyo an sarong Etiope na an ngaran Ebed-melec asin an mga gikan ni Jonadab. (Jeremias 35:18, 19; 39:11, 12, 16-18) Siring man ngonyan, an “sarong dakulang kadaklan” kan “ibang karnero” ni Jesus na tinipon hale sa gabos na nasyon makaliligtas sa Armagedon pasiring sa bagong kinaban nin Dios. (Kapahayagan 7:9; Juan 10:14-16) Solamente an mga nag-aadal asin nagtataram kan malinig na tataramon an magigin magayagayang mga nakaligtas.
16. Ano an maninigong gibohon nin saro tanganing matago “sa aldaw kan kaanggotan ni Jehova”?
16 Kun paanong pagboot ni Jehova na an Juda asin Jerusalem paraon, siring man kaipuhan na mapara an Kakristianohan. Iyo nanggad, harani na an kalaglagan kan gabos na falsong relihiyon, asin an mga boot makaligtas kaipuhan na humiro na tolos. Iyan kaipuhan na gibohon ninda “bago mag-agi an aldaw na garo nasosolong dagami,” na madaling ipinapadpad kan doros, arog kun an paroy iinuulanto sa doros sa ginikan. Tanganing makaligtas sa kabangisan nin Dios, kaipuhan na kita magtaram kan malinig na tataramon asin maghimate sa saiyang patanid bago umabot sa sato an aldaw kan naglalaad na kaanggotan ni Jehova. Kan kaaldawan ni Sofonias asin ngonyan, an mga mahoyo hinahanap si Jehova, kabilang an katanosan asin kahoyoan. An paghanap ki Jehova nangangahulogan nin pagkamoot sa saiya sa bilog na puso, kalag, isip, asin kosog. (Marcos 12:29, 30) “Tibaad [an mga naggigibo nin siring] matago sa aldaw kan kaanggotan ni Jehova.” Alagad taano ta an sinasabi kan hula “tibaad”? Huli ta an kaligtasan depende sa kaimbodan asin pakatagal. (Mateo 24:13) An mga namumuhay oyon sa matanos na mga pamantayan nin Dios asin padagos na nagtataram kan malinig na tataramon matatago sa aldaw kan kaanggotan ni Jehova.
17. Anong mga hapot an nagdadanay para sa pagkonsiderar niato?
17 Mantang an aldaw kan kaanggotan ni Jehova harani na asin an kaligtasan depende sa pakanood asin paggamit sa malinig na tataramon, ngonyan na an panahon na maghingoang marhay na pag-adalan asin ikataram iyan. Alagad ta paano manonodan nin saro an malinig na tataramon? Asin paano kamo makikinabang sa pagtaram kaiyan?
Paano Kamo Masimbag?
◻ Paano nagpoon an tataramon nin tawo?
◻ Ano an malinig na tataramon?
◻ Taano an mga tataramon sa Sofonias 3:8, 9 ta mahalagang marhay ngonyan?
◻ Ano an maninigo niatong gibohon tanganing matago “sa aldaw kan kaanggotan ni Jehova?”
[Retrato para sa pahina 20]
Sa Babel, iwinarak nin Dios an katawohan paagi sa pagribaraw sa saindang tataramon