Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 40: Pagronot sa Payo kan Halas
Bisyon 14—Kapahayagan 20:1-10
Tema: An pagholog ki Satanas sa bungaw, an Milenyal na Paghade, an ultimong pagbalo sa katawohan, asin paglaglag ki Satanas
Panahon nin kaotoban: Poon sa katapusan kan dakulang kahorasaan sagkod sa paglaglag ki Satanas
An Huring Pagbalo
19. Ano an magigin kamugtakan kan daga asin kan katawohan sa katapusan kan Sangribong Taon na Paghade, asin ano an ginigibo ngonyan ni Jesus?
19 Sa katapusan kan Sangribong Taon na Paghade, an bilog na daga magigin kaagid kan orihinal na Eden. Iyan magigin aktuwal na paraiso. An sangkap na katawohan dai na mangangaipo nin halangkaw na saserdote tanganing mangoltanan kaiyan sa atubangan nin Dios, mantang an gabos na gira kan Adanikong kasalan nawara na asin an huring kaiwal, an kagadanan, napara na. An Kahadean ni Cristo nakagibo kan katuyohan nin Dios na maglalang nin sarong kinaban na may sarong gobyerno. Sa puntong ini, “itatao [ni Jesus] an kahadean sa saiyang Dios asin Ama.”—1 Corinto 15:22-26; Roma 15:12.
20. Ano an sinasabi sato ni Juan na mangyayari kun panahon na para sa huring pagbalo?
20 Panahon na ngonyan para sa huring pagbalo. Iyan daw na sangkap nang kinaban nin katawohan, bilang kabaliktaran kan enot na mga tawo sa Eden, maninindogan nin marigon sa integridad kaiyan? Sinasabi sato ni Juan kun ano an mangyayari: “Ngonyan pakatapos tolos kan sangribong taon, si Satanas paluluwason sa saiyang bilanggoan, asin sia maluwas tanganing mandaya sa mga nasyon sa apat na kanto kan daga, ki Gog asin Magog, tanganing tiriponon sinda para sa ralaban. An kabilangan kan mga ini siring kadakol kan mga baybay kan dagat. Asin sinda nagturukad sa kahiwasan kan daga asin pinalibotan ninda an kampo kan mga banal asin an mahal na siudad.”—Kapahayagan 20:7-9a.
21. Sa saiyang huring pagmamaigot, ano an gigibohon ni Satanas, asin taano ta dai kita magngangalas kun an iba sumunod ki Satanas maski pakatapos kan Sangribong Taon na Paghade?
21 Ano an magigin resulta kan huring pagmamaigot ni Satanas? Nakadaya sia “sa mga nasyon sa apat na kanto kan daga, ki Gog asin Magog,” asin giniyahan sinda “sa ralaban.” Sairisay daw an posibleng makikiiba ki Satanas pakatapos kan sangribong taon nin magayagaya, nakakapakosog na teokratikong pamamahala? Bueno, dai niato paglingawan na nahimo ni Satanas na dayaon an sangkap na si Adan asin Eva mantang naoogma sinda sa buhay sa Paraiso. Asin nahimo niang dayaon an langitnon na mga anghel na nakaheling kan maraot na mga bunga kan enot na rebelyon. (2 Pedro 2:4; Judas 6) Kaya dai kita dapat magngalas na an ibang sangkap na tawo masugotan na sumunod ki Satanas maski ngani pakatapos kan magayagayang sangribong taon nin pamamahala kan Kahadean nin Dios.
22. (a) Ano an ipinaririsa kan ekspresyon na “mga nasyon sa apat na kanto kan daga”? (b) Taano an mga rebelde ta inapod na “Gog asin Magog”?
22 Inapod kan Biblia an mga rebeldeng ini na “mga nasyon sa apat na kanto kan daga.” Ini dai nangangahulogan na an katawohan mababanga liwat sa esklusibong nasyonal na kamugtakan. Iyan nagpapaheling sana na an mga ini nagsiblag kan saindang sadiri sa mga matanos, maimbod ki Jehova asin nagpaparisa kan iyo man sanang maraot na espiritu na ipinaheheling ngonyan kan mga nasyon. Sinda “makakaisip nin maraot na mukna,” siring kan ginibo ni Gog kan Magog sa hula ni Ezequiel, na may pasohan na laglagon an teokratikong gobyerno sa daga. (Ezequiel 38:3, 10-12) Kaya, inapod sinda na “Gog asin Magog.”
23. Ano an ipinaririsa kan katunayan na an bilang kan mga rebelde “siring kadakol kan mga baybay kan dagat”?
23 An bilang kan mga nakiiba ki Satanas sa saiyang pagrebelde magigin “siring kadakol kan mga baybay kan dagat.” Gurano iyan kadakol? Mayo nin itinalagang bilang. (Ikomparar an Josue 11:4; Hokom 7:12.) An magigin bilang nin mga rebelde madepende sa kun ano an reaksion kan kada indibiduwal sa mapandayang pakana ni Satanas. Alagad, daing duwa-duwa na iyan magigin awad-awad na bilang, mantang sinda makakamateng makosog tanganing madaog an “kampo kan mga banal asin an mahal na siudad.”
24. (a) Ano an “mahal na siudad,” asin paano iyan mapalilibotan? (b) Ano an irenerepresentar kan “kampo kan mga banal”?
24 “An mahal na siudad” siertong an siudad na sinambit kan pinamuraway na si Jesu-Cristo sa saiyang mga parasunod sa Kapahayagan 3:12 asin iyan inapod niang “siudad nin sakong Dios, an bagong Jerusalem na naghihilig hale sa langit hale sa sakong Dios.” Mantang ini sarong langitnon na organisasyon, paano an daganon na mga puwersang idto ‘pinalibotan’ iyan? Iyan sa puntong pinalibotan ninda an “kampo kan mga banal.” An kampo nasa luwas kan siudad; kaya, “an kampo kan mga banal” siertong nagrepresentar sa mga nasa daga sa luwas kan langitnon na namumugtakan kan Bagong Jerusalem na maimbod na nagsusuportar sa areglo nin gobyerno ni Jehova. Kun salakayon na kan mga rebelde sa irarom ni Satanas an mga maimbod na idto, ibibilang iyan kan Kagurangnan na si Jesus bilang pagsalakay saiya. (Mateo 25:40, 45) An “mga nasyon” magmamaigot na paraon an gabos na nagibo kan langitnon na Bagong Jerusalem sa paggibo kan daga na paraiso. Kaya sa pagsalakay “sa kampo kan mga banal,” sinasalakay man ninda “an mahal na siudad.”
An Danaw nin Kalayo Asin Asupre
25. Paano ilinadawan ni Juan an resulta kan pagsalakay kan mga rebelde sa “kampo kan mga banal,” asin ano an kahulogan kaini ki Satanas?
25 An huring pagmamaigot daw na ini ni Satanas magigin mapanggana? Siertong dai—kun paanong an pagsalakay na gigibohon ni Gog kan Magog sa espirituwal na Israel dai magigin mapanggana! (Ezequiel 38:18-23) Maliwanag na ilinadawan ni Juan an resulta: “Alagad an kalayo naholog hale sa langit asin tinunaw sinda. Asin an Diablo na nandadaya sa sainda iinapon sa danaw nin kalayo asin asupre, na namumugtakan na kan mabangis na hayop asin kan falsong propeta.” (Kapahayagan 20:9b-10a) Imbes na nakabilanggo sana, ngonyan si Satanas, an enot na halas, aktuwal na roronoton, pupolboson, biyong lalaglagon na siring kan sa kalayo.
26. Taano an “danaw nin kalayo asin asupre” ta bakong literal na lugar nin pagpasakit?
26 Narisa na niato na “an danaw nin kalayo asin asupre” bakong literal na lugar sa pagpadusa. (Kapahayagan 19:20) Tanganing si Satanas magsakit nin labi-labi kakolog na padusa sagkod lamang, kaipuhan na papagdanayon sia ni Jehova na buhay. Alagad, an buhay sarong regalo, bakong padusa. An kagadanan padusa para sa kasalan, asin sono sa Biblia, an mga gadan dai nakokolgan. (Roma 6:23; Eclesiastes 9:5, 10) Saro pa, nabasa niato na pakatapos an kagadanan mismo, kaiba an Hades, iaapon sa iyo man sanang danaw nin kalayo asin asupre. Sierto nanggad, an kagadanan asin Hades dai puwedeng makamate nin kolog!—Kapahayagan 20:14.
27. Paano an nangyari sa Sodoma asin Gomorra makatatabang sato na masabotan an terminong danaw nin kalayo asin asupre?
27 Ini gabos nagdodoon kan punto-de-vista na an danaw nin kalayo asin asupre simboliko. Orog pa, an pagsambit sa kalayo asin asupre nagpapagirumdom sa nangyari sa suanoy na Sodoma asin Gomorra, na linaglag nin Dios huli sa saindang grabeng karatan. Kan nagdatong an panahon ninda, “pinaoranan ni Jehova nin asupre asin kalayo hale ki Jehova, gikan sa langit, an Sodoma asin Gomorra.” (Genesis 19:24) An nangyari sa duwang siudad inapod na “silot na kalayong daing katapusan.” (Judas 7) Alagad, an duwang siudad na idto dai nagsakit nin daing sagkod na padusa. Imbes, iyan pinara, biyong linaglag, kairiba an bikong mga nag-eerok dian. An mga siudad na idto dai na nag-eeksister ngonyan, asin daing makasasabi nin sierto kun saen an dating lugar kaiyan.
28. Ano an danaw nin kalayo asin asupre, asin paano iyan bakong arog sa kagadanan, Hades asin bungaw?
28 Kaoyon kaini, an Biblia mismo nagpaliwanag kan kahulogan kan danaw nin kalayo asin asupre: “Ini iyo an ikaduwang kagadanan, an danaw nin kalayo.” (Kapahayagan 20:14) Malinaw na ini kaagid kan Gehenna na sinambit ni Jesus, an lugar na dian nagdadanay na laglag an mga maraot, bakong pinadudusahan sagkod lamang. (Mateo 10:28) Iyan lubos, biyong kalaglagan na daing paglaom nin pagkabuhay liwat. Kaya, mantang may mga liyabe nin kagadanan, Hades, asin kan bungaw, daing sinambit na liyabe sa pagbukas kan danaw nin kalayo asin asupre. (Kapahayagan 1:18; 20:1) Nungkang butasan kaiyan an mga bihag dian.—Ikomparar an Marcos 9:43-47.
Pasasakitan Aldaw-Banggi Sagkod Lamang
29, 30. Ano an sinabi ni Juan manongod sa Diablo siring man sa mabangis na hayop asin sa falsong propeta, asin paano ini maninigong saboton?
29 Sa pagsambit sa Diablo siring man sa mabangis na hayop asin sa falsong propeta, sinasabi sato ngonyan ni Juan: “Asin sinda pasasakitan aldaw-banggi sagkod lamang.” (Kapahayagan 20:10b) Ano an kahulogan kaini? Siring kan nasambit na, bakong rasonableng isipon na an mga simbolo, arog kan mabangis na hayop asin falsong propeta, siring man an kagadanan asin Hades, puwedeng magsakit nin padusa sa literal na paagi. Kaya, mayo kitang rason na magtubod na si Satanas magsasakit sagkod lamang. Sia lalaglagon.
30 An Griegong tataramon na ginamit para sa “pasakit,” ba·sa·niʹzo, nangorognang nangangahulogan “sa pagbalo (sa mga metal) paagi sa gapong pangilatis.” “Sa paghapot paagi sa pagpadusa” an ikaduwang kahulogan. (The New Thayer’s Greek-English Lexicon of the New Testament) Sa konteksto, an paggamit kaining Griegong tataramon nagpaparisa na an mangyayari ki Satanas magseserbi, sa gabos na panahon, bilang gapong pangilatis sa isyu nin pagigin tama asin pagigin makatanosan kan pamamahala ni Jehova. An isyung iyan nin soberanong pamamahala lubos na mahuhusay. Nungka liwat na an angat sa soberaniya ni Jehova kaipuhan na baloon sa halawig na panahon tanganing mapatunayan na sala.—Ikomparar an Salmo 92:1, 15.
31. Paano an duwang Griegong tataramon na konektado sa sarong nangangahulogan “pasakit” nakatabang sato na masabotan an padusa na maeeksperyensiahan ni Satanas na Diablo?
31 Dugang pa, an konektadong tataramon na ba·sa·nistesʹ, “parapasakit,” ginamit sa Biblia na nangangahulogan “parabilanggo.” (Mateo 18:34, Kingdom Interlinear) Kaoyon kaini, si Satanas ibibilanggo sa danaw nin kalayo sagkod lamang; dai sia nanggad bubutasan. Ultimo, sa Griegong Septuagint, na pamilyar ki Juan, an konektadong tataramon na baʹsa·nos ginamit manongod sa kasopganan na masagkod sa kagadanan. (Ezequiel 32:24, 30) Ini nakatatabang sato na masabotan na an padusa na mangyayari ki Satanas makasosopog, daing sagkod na kagadanan sa danaw nin kalayo asin asupre. An saiyang mga gibo magagadan kaiba nia.—1 Juan 3:8.
32. Anong padusa an maeeksperyensiahan kan mga demonyo, asin paano niato naaraman?
32 Liwat, an mga demonyo dai nasambit sa bersikulong ini. Bubutasan daw sinda kairiba ni Satanas sa katapusan kan sangribong taon dangan magsasakit kan padusa na daing sagkod na kagadanan kaiba nia? An ebidensia minasimbag nin iyo. Sa parabola kan mga karnero asin kanding, sinabi ni Jesus na an mga kanding pasiring “sa daing katapusan na kalayo na inandam para sa Diablo asin sa saiyang mga anghel.” (Mateo 25:41) An ekspresyon na “daing katapusan na kalayo” siertong nanonongod sa danaw nin kalayo asin asupre na dian iaapon si Satanas. An mga anghel kan Diablo ihinolog hale sa langit kairiba nia. Maliwanag, nasa bungaw sinda kairiba nia sa pagpoon kan Sangribong Taon na Paghade. Kaoyon kaini, kun siring, lalaglagon man sinda kaiba nia sa danaw nin kalayo asin asupre.—Mateo 8:29.
33. Anong ultimong detalye kan Genesis 3:15 an maootob sa panahon na iyan, asin sa anong bagay dinadara ngonyan kan espiritu ni Jehova an atension ni Juan?
33 Sa paaging ini, an ultimong detalye kan hula na nasusurat sa Genesis 3:15 maootob. Kun iapon na si Satanas sa danaw nin kalayo, sia magigin gadan siring sa halas na an payo rinonot sa irarom nin batbat na bool. Sia asin an saiyang mga demonyo mawawara na sagkod lamang. Mayo na nin dugang pang pagsambit sainda sa libro nin Kapahayagan. Ngonyan, mantang natapos na an mga ini sa makahulang paagi, an espiritu ni Jehova nagdadara nin atension sa bagay na napakahalaga sa mga nagmamawot kan daganon na paglaom: Ano an magigin resulta sa katawohan kan langitnon na pamamahala kan “Hade nin mga hade” asin “kaidtong mga inapod asin pinili asin maimbod sa kaibanan nia”? (Kapahayagan 17:14) Sa pagsimbag, dinadara kita liwat ni Juan sa kapinonan kan Sangribong Taon na Paghade.