Kapahayagan—An Mamuraway na Kulminasyon Kaiyan Harani Na

Kapitulo 41: An Aldaw nin Paghokom nin Dios—An Magayagayang Resulta Kaiyan!

Bisyon 15—Kapahayagan 20:11–21:8

Tema: An pankagabsan na pagkabuhay liwat, an Aldaw nin Paghokom, asin an mga bendisyon kan bagong langit asin sarong bagong daga

Panahon nin kaotoban: Sa Sangribong Taon na Paghade

1. (a) Ano an nawara sa katawohan kan nagkasala si Adan asin si Eva? (b) Anong katuyohan nin Dios an dai nagliwat, asin paano niato naaraman?

Bilang mga tawo, kita linalang tanganing mabuhay sagkod lamang. Kun nagkuyog kutana si Adan asin Eva sa mga pagboot nin Dios, dai kutana sinda nagadan. (Genesis 1:28; 2:8, 16, 17; Eclesiastes 3:10, 11) Alagad kan magkasala sinda, iwinara ninda an pagkasangkap asin buhay kapwa para sainda asin sa mga gikan ninda, asin an kagadanan naghade sa katawohan bilang daing herak na kaiwal. (Roma 5:12, 14; 1 Corinto 15:26) Minsan siring, dai naliwat an katuyohan nin Dios na an sangkap na mga tawo mabuhay na daing sagkod sa paraiso. Huli sa saiyang dakulang pagkamoot sa katawohan, isinugo nia an saiyang bugtong na Aki, si Jesus, na nagtao kan saiyang sangkap na buhay-tawo bilang pantubos para sa “dakol” na gikan ni Adan. (Mateo 20:28; Juan 3:16) Magagamit na ngonyan ni Jesus an legal na meritong ini kan saiyang atang tanganing ibalik an nagtutubod na mga tawo sa sangkap na buhay sa paraisong daga. (1 Pedro 3:18; 1 Juan 2:2) Kanigoan kadakulang rason para sa katawohan na “mag-orogma asin maggayagaya!”—Isaias 25:8, 9.

2. Ano an ibinareta ni Juan sa Kapahayagan 20:11, asin ano an “dakulang puting trono”?

² Sa pagkabilanggo ni Satanas sa bungaw, mapoon an mamuraway na Sangribong Taon na Paghade ni Jesus. Iyan ngonyan an “aldaw” na dian an Dios “katuyohan [na] hokoman an ineerokan na daga sa katanosan paagi sa sarong lalaki na saiyang ninombrahan.” (Gibo 17:31; 2 Pedro 3:8) Ipinahayag ni Juan: “Asin nakaheling ako nin sarong dakulang puting trono asin an saro na nakatukaw dian. Hale sa saiyang atubangan an daga asin an langit nagdulag, asin mayo na nin lugar para sa sainda.” (Kapahayagan 20:11) Ano ining “dakulang puting trono”? Iyan mayong iba kundi an tukawan sa paghokom nin “Dios na Hokom sa gabos.” (Hebreo 12:23) Ngonyan hohokoman nia an katawohan kun siisay an makikinabang sa pantubos na atang ni Jesus.—Marcos 10:45.

3. (a) Ano an ipinaririsa kan katunayan na an trono nin Dios sinasabing “dakula” asin “puti”? (b) Siisay an magibo kan paghokom sa Aldaw nin Paghokom, asin sa anong basihan?

³ An trono nin Dios “dakula,” na nagdodoon kan kamurawayan ni Jehova bilang an Soberanong Kagurangnan, asin iyan “puti,” na nag-aapod nin atension sa saiyang daing depektong katanosan. Sia an ultimong Hokom kan katawohan. (Salmo 19:7-11; Isaias 33:22; 51:5, 8) Alagad, saiyang itinao an gibong paghokom ki Jesu-Cristo: “An Ama dai naghohokom sa siisay pa man, kundi itinao nia an gabos na paghokom sa Aki.” (Juan 5:22) Kaiba ni Jesus an saiyang 144,000 na kairiba, na sinda an “tinawan nin kapangyarihan nin paghokom . . . sa laog nin sangribong taon.” (Kapahayagan 20:4) Minsan siring, an mga pamantayan ni Jehova an nagdidesisyon kun ano an mangyayari sa kada indibiduwal durante kan Aldaw nin Paghokom.

4. Ano an kahulogan na “an daga asin an langit nagdulag”?

⁴ Paanong “an daga asin an langit nagdulag”? Ini an iyo man sanang langit na naghale bilang balumbon sa pagbukas kan ikaanom na tatak—an mga kapangyarihan na namamahala nin mga tawo na “inaandam sa aldaw nin paghokom asin kalaglagan kan maraot na mga tawo.” (Kapahayagan 6:14; 2 Pedro 3:7) An daga iyo an organisadong palakaw nin mga bagay na nag-eeksister sa irarom kan pamamahalang ini. (Kapahayagan 8:7) An kalaglagan kan mabangis na hayop asin kan mga hade sa daga patin kan mga hukbo ninda, kairiba an mga nag-ako kan tanda kan mabangis na hayop asin nagsasamba sa ladawan kaiyan, nagtanda kan pagdulag kan langit asin dagang ini. (Kapahayagan 19:19-21) Mantang nahokoman na an daga asin langit ni Satanas, an Dakulang Hokom nagboot nin saro pang Aldaw nin Paghokom.

An Sangribong Taon na Aldaw nin Paghokom

5. Pakatapos na an daan na daga asin daan na langit nagdulag, sairisay pa an hohokoman?

⁵ Sairisay pa an hohokoman pakatapos magdulag an daan na daga asin daan na langit? Bakong an linahidan na natada kan 144,000, huli ta sinda nahokoman asin natatakan na. An mga buhay pa sa daga pakatapos kan Armagedon kaipuhan na sa dai mahaloy pakatapos kaiyan magadan asin mag-ako kan saindang langitnon na balos paagi sa pagkabuhay liwat. (1 Pedro 4:17; Kapahayagan 7:2-4) Alagad, an minilyon sa dakulang kadaklan na nagruluwas na ngonyan sa dakulang kahorasaan risang gayong nagtitindog “sa atubang kan trono.” Sinda ibinilang nang matanos para sa kaligtasan huli sa saindang pagtubod sa pinabolos na dugo ni Jesus, alagad an saindang paghokom maninigong magpadagos sa sangribong taon mantang si Jesus padagos na ginigiyahan sinda “sa mga burabod kan tubig nin buhay.” Dangan, pakatapos na ibalik sa pagkasangkap bilang tawo asin pakatapos na baloon, sinda ipahahayag na matanos sa pinakalubos na sentido. (Kapahayagan 7:9, 10, 14, 17) An mga aking makaliligtas asin an arin man na aking mamundag sa dakulang kadaklan durante kan Milenyo mangangaipo man na hokoman durante kan sangribong taon.—Ikomparar an Genesis 1:28; 9:7; 1 Corinto 7:14.

6. (a) Anong kadaklan an naheling ni Juan, asin ano an ipinaririsa kan mga tataramon na “an darakula asin saradit”? (b) Paano an dai mabilang na minilyon sa memorya nin Dios daing duwa-duwang maruluwas?

⁶ Alagad, nakaheling si Juan nin kadaklan na labi pa kadakol kisa sa nakaligtas na dakulang kadaklan. Iyan may bilang na rinibong milyon! “Asin naheling ko an mga gadan, an darakula asin saradit, na nagtitindog sa atubang kan trono, asin an mga balumbon biniriklad.” (Kapahayagan 20:12a) “An darakula asin saradit” binibilog kan mga prominente siring man bakong prominenteng mga tawo na nabuhay asin nagadan sa daga durante kan nakaaging 6,000 na taon. Sa Ebanghelyo na isinurat ni apostol Juan dai nahaloy pakatapos kan Kapahayagan, sinabi ni Jesus manongod sa Ama: “Tinawan nia sia [si Jesus] nin kapangyarihan na maghokom, huli ta sia Aki nin tawo. Dai kamo magngalas kaini, huli ta an oras maabot na an gabos na nasa mga lolobngan nin girumdoman makadadangog kan saiyang tingog asin maruluwas.” (Juan 5:27-29) Kanigoan kadakulang proyekto—an paghale sa kagadanan asin paglobong sa bilog na kasaysayan! Mayong duwa-duwa na an dai mabilang na minilyon sa memorya nin Dios luway-luway na paluluwason tanganing an dakulang kadaklan—na kadikiton kun ikokomparar—mahimong mapangatamanan an mga problema na puwedeng lumataw huli sa mga binuhay liwat na tibaad may tendensia sa enot na sunudon an saindang dating estilo nin buhay, kairiba an makalaman na kaluyahan asin kaisipan kaiyan.

Sairisay an Ibabangon Asin Hohokoman?

7, 8. (a) Anong balumbon an binuksan, asin ano an nangyari pakatapos? (b) Para kiisay dai nang pagkabuhay liwat?

⁷ Idinugang ni Juan: “Alagad saro pang balumbon an biniklad; iyan an balumbon nin buhay. Asin hinokoman an mga gadan sono sa mga bagay na nasusurat sa mga balumbon oyon sa saindang mga gibo. Asin itinao kan dagat an mga gadan na yaon dian, asin itinao kan kagadanan asin kan Hades an mga gadan na yaon dian, asin an lambang saro hinokoman oyon sa saindang mga gibo.” (Kapahayagan 20:12b, 13) Kanigoan kapambihirang ngangalasan nanggad! ‘An dagat, kagadanan, asin Hades’ may kabtang, alagad mangnohon na an mga terminong ini bakong magkakalaen an kahulogan.a Si Jonas, kan nasa tulak kan sira asin kun siring nasa tahaw nin kadagatan, nagsabi manongod sa saiya man sana bilang nasa Sheol, o Hades. (Jonas 2:2) Kun an sarong tawo napopogolan kan Adanikong kagadanan, kun siring posible na sia man nasa Hades. An makahulang mga tataramon na ini nagtatao nin marigon na kasegurohan na dai nin siisay man na malilingawan.

⁸ Siyempre, igwa nin dai aram na bilang kan dai bubuhayon liwat. Kabilang sa mga ini an dai nagsolsol na mga eskriba asin Fariseo na nagsikwal ki Jesus asin sa saiyang mga apostol, an relihiyosong “tawo nin katampalasanan,” asin an linahidan na mga Kristiano na “nangaholog.” (2 Tesalonica 2:3; Hebreo 6:4-6; Mateo 23:29-33) Nagtaram man si Jesus manongod sa arog-kanding na mga tawo sa katapusan kan kinaban na mapasiring sa “daing katapusan na kalayo na inandam para sa Diablo asin sa saiyang mga anghel,” an boot sabihon, “pagkaparang daing katapusan.” (Mateo 25:41, 46) Mayong pagkabuhay liwat para sa mga ini!

9. Paano ipinarisa ni apostol Pablo na an iba nangorognang ooyonan sa pagkabuhay liwat, asin sairisay an kabilang digdi?

⁹ Sa ibong na lado, an iba magigin nangorognang inoyonan sa pagkabuhay liwat. Ini ipinarisa ni apostol Pablo kan sabihon nia: “May paglaom ako sa Dios . . . na magkakaigwa nin pagkabuhay liwat an mga matanos asin an mga bakong matanos.” (Gibo 24:15) Manongod sa daganon na pagkabuhay liwat, makakabilang sa “mga matanos” an maimbod na mga lalaki asin babae kan suanoy—si Abraham, Rahab, asin kadakol pang iba—na ipinahayag na matanos kun manongod sa pakikatood sa Dios. (Santiago 2:21, 23, 25) Kabilang man sa grupong ini an matanos na ibang karnero na nagadan na maimbod ki Jehova sa modernong panahon. Posible, an gabos na nagdanay na iyan sa integridad bubuhayon liwat nin amay sa Milenyal na Paghade ni Jesus. (Job 14:13-15; 27:5; Daniel 12:13; Hebreo 11:35, 39, 40) Mayong duwa-duwa na an dakol na ining binuhay liwat na mga matanos iaasignar sa espesyal na mga pribilehiyo sa pangangataman sa dakulaon na trabaho na ibalik an Paraiso.—Salmo 45:16; ikomparar an Isaias 32:1, 16-18; 61:5; 65:21-23.

10. Sa mga bubuhayon liwat, sairisay an “mga bakong matanos”?

¹⁰ Alagad, sairisay an “mga bakong matanos” na sinambit sa Gibo 24:15? Kabilang sa mga ini an dakulang masa nin katawohan na nagadan sa bilog na kasaysayan, nangorogna idtong mga nabuhay sa ‘mga panahon nin kamangmangan.’ (Gibo 17:30) An mga ini, huli sa lugar na namundagan ninda o sa panahon na nabuhay sinda, dai nagkaigwa nin oportunidad na manodan an pagkuyog sa kabotan ni Jehova. Saro pa, tibaad may iba na nakadangog kan mensahe nin kaligtasan alagad dai naghimate nin lubos kan panahon na iyan o nagadan bago sinda nag-oswag pasiring sa pagdusay asin pagpabautismo. Sa pagkabuhay liwat an mga siring kaipuhan na gumibo nin orog pang pagbago sa saindang pag-iisip asin paagi nin buhay kun boot nindang makinabang sa oportunidad na ini para sa pag-ako nin buhay na daing sagkod.

An Balumbon nin Buhay

11. (a) Ano an “balumbon nin buhay,” asin kiisay na ngaran an nasusurat sa balumbon na ini? (b) Taano an balumbon nin buhay ta bubuksan durante kan Sangribong Taon na Paghade?

¹¹ Nagtataram si Juan manongod sa “balumbon nin buhay.” Ini an rekord kan mga nakalinyang mag-ako nin daing sagkod na buhay hale ki Jehova. An mga ngaran kan linahidan na mga tugang ni Jesus, kan dakulang kadaklan, asin kan maimbod na mga lalaki kan suanoy, siring ki Moises, nakarekord sa balumbon na ini. (Exodo 32:32, 33; Daniel 12:1; Kapahayagan 3:5) Alagad, mayong kabilang sa “bakong matanos” na binuhay liwat na nasusurat an saindang ngaran sa balumbon nin buhay. Kaya an balumbon nin buhay bubuksan sa Sangribong Taon na Paghade tanganing mapangyari an pagsurat kan ngaran nin iba pa na magigin kuwalipikado. Idtong dai nasurat an saindang ngaran sa balumbon, o libro, nin buhay “iaapon sa danaw nin kalayo.”—Kapahayagan 20:15; ikomparar an Hebreo 3:19.

12. Ano an magdedeterminar kun baga an sarong tawo nasusurat an saiyang ngaran sa binuksan na balumbon nin buhay, asin paano an ninombrahan na Hokom ni Jehova nagtao nin halimbawa?

¹² Kun siring, ano an magdedeterminar kun baga an sarong tawo nasusurat an saiyang ngaran sa nakabukas na balumbon nin buhay sa panahon na iyan? An pangenot na elemento magigin kaagid kan mga panahon ni Adan asin ni Eva: pagkuyog ki Jehova. Siring kan isinurat ni apostol Juan sa saiyang namomotan na kapwa mga Kristiano: “An kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:4-7, 17) Sa pagkuyog, an ninombrahan ni Jehova na Hokom nagtao nin halimbawa: “Minsan ngani sia [si Jesus] Aki, sia nakanood nin pagkuyog hale sa mga bagay na saiyang tinios; asin pakatapos na sia ginibong sangkap nagtao sia nin daing sagkod na kaligtasan sa gabos na nagkukuyog sa saiya.”—Hebreo 5:8, 9.

Pagbukas sa Iba Pang Balumbon

13. Paano an mga binuhay liwat maninigong magpaheling kan saindang pagkuyog, asin anong mga prinsipyo an maninigo nindang sunudon?

¹³ Paano maninigong ipaheling kan mga binuhay liwat na ini an saindang pagkuyog? Itinokdo mismo ni Jesus an duwang dakulang pagboot, na sinasabi: “An enot, ‘Dangoga, O Israel, si Jehova na satong Dios sarong Jehova, asin mamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.’ An ikaduwa iyo ini, ‘Mamotan mo an saimong kataed siring sa saimo man sana.’” (Marcos 12:29-31) Yaon man an haloy nang naestablisar na mga prinsipyo ni Jehova na maninigong kuyugon, siring kan pagsikwal sa paghabon, pagputik, paggadan, asin inmoralidad.—1 Timoteo 1:8-11; Kapahayagan 21:8.

14. Ano pang ibang balumbon an binuksan, asin ano an laog kan mga iyan?

¹⁴ Alagad, nasambit pa sana ni Juan an ibang balumbon na bubuksan durante kan Milenyal na Paghade. (Kapahayagan 20:12) Ano an mga ini? Kun minsan, nagtatao si Jehova nin espesipikong mga instruksion para sa partikular na mga situwasyon. Halimbawa, kan panahon ni Moises nagtao sia nin detalyadong serye nin mga pagboot na nangahulogan nin buhay para sa mga Israelitas kun sinda magkuyog. (Deuteronomio 4:40; 32:45-47) Kan enot na siglo, itinao an bagong mga instruksion tanganing tabangan an mga maimbod na kuyugon an mga prinsipyo ni Jehova sa irarom kan Kristianong palakaw nin mga bagay. (Mateo 28:19, 20; Juan 13:34; 15:9, 10) Ngonyan ibinareta ni Juan na an mga gadan “hinokoman oyon sa saindang mga gibo.” Kun siring, maliwanag na an pagbukas kan mga balumbon na ini magpupublikar kan detalyadong mga kahagadan ni Jehova para sa katawohan durante kan sangribong taon. Paagi sa pag-aplikar sa saindang buhay kan mga regulasyon asin pagboot sa mga balumbon na iyan, an makinuyog na mga tawo mahihimong palawigon an saindang mga aldaw, na sa katapustapusi mag-ako nin buhay na daing katapusan.

15. Anong klaseng edukasyonal na kampanya an kaipuhan durante kan pagbuhay liwat, asin paano an pagbuhay liwat posibleng magpapadagos?

¹⁵ Kanigoan kahiwas na kampanya nin teokratikong edukasyon an kinakaipuhan! Kan 1987 an mga Saksi ni Jehova nangenot, sa promedyo, sa 3,005,048 pag-adal sa Biblia sa manlaenlaen na lugar. Alagad durante sa pagkabuhay liwat, dai mabilang na minilyon na pag-adal, basado sa Biblia asin sa bagong mga balumbon, an daing duwa-duwang pangengenotan! An bilog na banwaan ni Jehova mangangaipong magin mga paratokdo asin maghingoa. An mga binuhay liwat, mantang sinda nag-ooswag, daing duwa-duwa na makikikabtang sa dakulang programang ini sa pagtotokdo. Posible, an pagbuhay liwat magpapadagos sa paaging an mga nabubuhay puwedeng magkaigwa nin kagayagayahan sa pagsabat asin pagtotokdo sa dating mga miembro kan pamilya asin mga katood na masabat asin magtotokdo man sa iba. (Ikomparar an 1 Corinto 15:19-28, 58.) An labing apat na milyon na mga saksi ni Jehova na aktibong nagpapalakop kan katotoohan ngonyan nagbubugtak nin marahay na pundasyon para sa mga pribilehiyo na linalaom nindang akoon sa pagkabuhay liwat.—Isaias 50:4; 54:13.

16. (a) Kiisay na ngaran an dai isusurat sa balumbon, o libro, nin buhay? (b) Kiisay idtong an pagkabuhay liwat mapatutunayan na “sa buhay”?

¹⁶ Kun manongod sa daganon na pagkabuhay liwat, sinabi ni Jesus na ‘idtong naggiribo nin marahay maruluwas sa pagkabuhay liwat sa buhay, idtong naggiribo nin maraot sa pagkabuhay liwat sa paghokom.’ Digdi an “buhay” asin “paghokom” kabaliktaran kan kada saro, na nagpapaheling na an mga binuhay liwat na “naggiribo nin maraot” pakatapos na matokdoan kan ipinasabong na Kasuratan asin kan mga balumbon hohokoman na bakong angay sa buhay. An saindang ngaran dai isusurat sa balumbon, o libro nin buhay. (Juan 5:29) Ini magigin totoo man para sa siisay man na kan enot nagsunod sa maimbod na pamumuhay alagad, huli sa nagkapirang rason, nagsiko durante kan Sangribong Taon na Paghade. An mga ngaran puwedeng mapara. (Exodo 32:32, 33) Sa ibong na lado, idtong mga makinuyog na nagsunod sa mga bagay na nasusurat sa mga balumbon pagdadanayon an saindang ngaran sa nasusurat na rekord, an balumbon nin buhay, asin padagos na mabubuhay. Para sainda, an pagkabuhay liwat mapatutunayan na “sa buhay.”

An Katapusan kan Kagadanan Asin Hades

17. (a) Anong pambihirang aksion an ilinadawan ni Juan? (b) Noarin mawawaran nin laog an Hades? (c) Noarin an Adanikong kagadanan “iaapon sa danaw nin kalayo”?

¹⁷ Masunod, ilinadawan ni Juan an sarong bagay na tunay na pambihira! “Asin an kagadanan asin Hades iinapon sa danaw nin kalayo. Ini iyo an ikaduwang kagadanan, an danaw nin kalayo. Siring man, an siisay man na dai nasusurat sa libro nin buhay iinapon sa danaw nin kalayo.” (Kapahayagan 20:14, 15) Sa katapusan kan milenyal na Aldaw nin Paghokom, “an kagadanan asin Hades” lubos nang hinale. Taano ta nagkakaipo ini nin sangribong taon? An Hades, an ordinaryong lolobngan nin katawohan, mahahalean nin laog kun an kahurihurihi na nasa memorya nin Dios binuhay na liwat. Alagad sagkod na an siisay man na tawo may digta pa kan minanang kasalan, an Adanikong kagadanan padagos pa man giraray na nasa sainda. An gabos na binuhay liwat sa daga, siring man an dakulang kadaklan na makaliligtas sa Armagedon, mangangaipong kuyugon an nasusurat sa mga balumbon sagkod na an merito kan pantubos ni Jesus ikaaplikar na nin lubos sa paghale nin helang, paggurang, asin iba pang minanang diperensia. Dangan an Adanikong kagadanan, kaiba an Hades, “iaapon sa danaw nin kalayo.” Iyan mawawara na sagkod lamang!

18. (a) Paano ilinadawan ni apostol Pablo an kapangganahan kan pamamahala ni Jesus bilang Hade? (b) Ano an gigibohon ni Jesus para sa sinangkap nang pamilya nin tawo? (c) Ano pang ibang bagay an mangyayari sa katapusan kan sangribong taon?

¹⁸ Kaya, an programa na ilinadawan ni apostol Pablo sa saiyang surat sa mga taga-Corinto makokompleto: “Huli ta sia [si Jesus] kaipuhan na maghade sagkod na ikinabugtak na nin Dios an gabos na kaiwal sa irarom kan saiyang mga bitis. Bilang an ultimong kaiwal, an [Adanikong] kagadanan paparaon.” Ano an masunod na mangyayari? “Kun an gabos na bagay ikinapasakop na sa saiya, dangan an Aki mismo mapasakop man sa Saro na nagpasakop sa saiya kan gabos na bagay.” Sa ibang pagtaram, si Jesus “itatao an kahadean sa saiyang Dios asin Ama.” (1 Corinto 15:24-28) Iyo, si Jesus, sa pakadaog sa Adanikong kagadanan paagi sa merito kan saiyang pantubos na atang, iiintrega an sinangkap na pamilya nin tawo sa saiyang Ama, si Jehova. Maliwanag na sa puntong ini, sa katapusan kan sangribong taon, na si Satanas bubutasan asin mangyayari an huring pagbalo tanganing madeterminaran kun kiisay na ngaran an magdadanay na nakatala nin permanente sa balumbon nin buhay. “Maghingoa kamo nin maigot” tanganing an saindong ngaran magin kabilang sainda!—Lucas 13:24; Kapahayagan 20:5.

[Nota sa Ibaba]