Padagos na Magpatanid Manongod sa Pambihirang Gibo ni Jehova

“Si Jehova matindog na siring kaidto sa Bukid nin Perasim, sia maaanggot na siring kaidto sa kapantayan na harani sa Gabaon.”—ISAIAS 28:21.

1, 2. Anong pambihirang gibo an ginibo ni Jehova sa kapakanan kan Saiyang banwaan kan panahon ni David?

SARONG misteryosong gibo! An pinakapambihirang gibo! Iyan an ginibo ni Jehova sa kapakanan kan saiyang banwaan kan suanoy na panahon kaidto pang ika-11 siglo B.C.E. Asin an misteryosong gibong ini sarong arogan nin mas pambihira pang gibo na saiyang gigibohon sa haraning ngapit. Ano an suanoy na gibong iyan? Dai nahaloy pakatapos na tumukaw si David bilang hade sa Jerusalem, an kataed na mga Filisteo naglansar nin pagsalakay, asin ini an nagpangyari sa makangangalas na gibo ni Jehova. Enot, an mga Filisteo nagpoon na salakayon an hababang kapantayan nin Refaim. Nag-arang si David ki Jehova kun ano an maninigo niang gibohon asin pinagbotan na sumalakay. Sa pagkuyog kan tataramon ni Jehova, dinaog nanggad ni David an mapuwersang hukbo nin mga Filisteo sa Baal-perazim. Pero an mga Filisteo habong akoon an pagkadaog. Dai nahaloy nagbalik sinda tanganing salakayon asin laglagon an iba pa sa hababang kapantayan kan Refaim, asin hinagad liwat ni David an paggiya ni Jehova.

² Ngonyan sinabihan sia kaiba an saiyang hukbo na pumuwesto sa hudian kan mga Filisteo. Sinabi ni Jehova: “Kun madangog mo an tanog nin pagmartsa sa ibabaw kan mga moral, sa panahon na iyan desidido kang humiro, huli ta sa panahon na iyan si Jehova naenot na sa saimo sa paglugad sa hukbo kan mga Filisteo.” Asin iyan an nangyari. Naghalat si David sagkod na nagprodusir si Jehova nin tanog nin pagmartsa sa ibabaw kan mga moral—tibaad paagi sa makosog na doros. Tolos-tolos, si David asin an saiyang hukbo nagruluwas asin sinalakay an iba an atension na mga Filisteo, dinaog sinda na kadakol an nagadan. An relihiyosong mga imahen kan mga Filisteo na nagkawararak sa lugar nin ralaban tiniripon asin linaglag.—2 Samuel 5:17-25; 1 Cronica 14:8-17.

3. Taano an misteryosong gibo ni Jehova ta nakainteres sa mga Judio kan panahon ni Isaias, asin taano ta maninigo iyan na ikainteres kan Kakristianohan ngonyan?

³ Ini pambihirang gibo, sarong misteryosong gibo, na ginibo ni Jehova tumang sa mga Filisteo asin sa kapakanan kan saiyang linahidan na hade. An pambihirang gibong ini nangorognang nakaiinteres huli ta nagpatanid si propeta Isaias na si Jehova magibo nin kaagid na misteryoso asin makapangyarihan tumang sa espirituwal na mga paraburat kan Juda. Kaya, an bakong maimbod na relihiyosong mga lider kan panahon ni Isaias nangaipong magmangno. An Kakristianohan ngonyan maninigo man na magmangno huli ta an nangyari sa Juda sarong arogan kan pangultimong kaaabtan kan Kakristianohan.

“An Higdaan Halipoton”

4, 5. (a) Paano malinaw na iinilustrar ni Isaias an bakong komportableng situwasyon kan relihiyosong mga lider kan saiyang panahon? (b) Ano an dahelan kan bakong komportableng situwasyon kan Kakristianohan ngonyan?

⁴ Enot, ibinuyagyag ni Isaias an katunayan na an mga tratado na linaoman kan suanoy na espirituwal na mga paraburat sarong pandadaya, kaputikan. Dangan malinaw niang iinilustrar an bakong komportableng situwasyon kan mga naglalaom sa kaputikan na iyan. Sinabi nia: “Huli ta an higdaan halipoton tanganing higdaan, asin an tamong mismo kayakpiton kun itinatamong.” (Isaias 28:20) An siisay man na naghihigda sa higdaan na halipoton nakanonompong na lampas an saiyang mga bitis sa higdaan. Sa ibong na lado, kun ititiko nia an saiyang mga tohod tanganing magkaigo sa kahalipotan kan higdaan, an tamong kayakpiton asin an kadaklan na kabtang kan saiyang lawas nakalataw man giraray. Ano man an gibohon nia, an ibang kabtang nia dai matatamongan.

⁵ Iyan an situwasyon, sa simbolikong pagtaram, kan mga naglaom sa pailihan nin kaputikan kan panahon ni Isaias. Iyan man an bakong komportableng situwasyon kan mga naglalaom sa pailihan nin kaputikan kan Kakristianohan ngonyan. Nasa kalipotan sinda, sabi ngani. Ini bakong an panahon para hanapon an pagranga sa laog kan kinabanon na areglo para sa katoninongan asin seguridad. Sa anino kan nagdadangadang na gibohon sa paghokom nin Dios, an pakialyansa sa politikal na mga namamahala dai matao nin nakaoogmang pagranga sa Kakristianohan.

An Misteryosong Gibo ni Jehova

6. Paano mahiro si Jehova tumang sa Juda, asin paano sia mahiro tumang sa Kakristianohan?

⁶ Sa malinaw na pagladawan sa bakong komportableng situwasyon kan bakong maimbod na Jerusalem kan panahon nia—asin sa modernong bakong maimbod na Kakristianohan—padagos na sinabi ni Isaias: “Huli ta si Jehova matindog na siring kaidto sa Bukid nin Perasim, sia maaanggot na siring kaidto sa kapantayan na harani sa Gabaon, tangani na magibo nia an saiyang gibo—an saiyang gibong misteryoso—asin tangani na magibo nia an saiyang trabaho—an saiyang trabaho pambihira.” (Isaias 28:21) Iyo, nagpatanid si Isaias na dai mahahaloy si Jehova matindog na siring kaidto sa Baal-perasim. Pero ngonyan mahiro sia tumang sa saiyang daing pagtubod na banwaan, asin gigibohon nia iyan siring sa dai mapogolan na pagbaha na naglilipwas sa guwang kan narumpag na sagop. An tipan sa kagadanan kan Jerusalem mapatutunayan na imbalido asin daing epekto. Sa kaagid na paagi, si Jehova mahiro sa haraning ngapit tumang sa Kakristianohan, asin mapatutunayan nia na daing halaga an gabos niang nakabuburat na pakikioyon sa kinaban na ini. An saiyang dakulang organisasyon lalaglagon asin an saiyang mga parasunod magkakawararak. An saiyang falsong mga dios lubos na sosoloon.

7. Taano an mga katuyohan ni Jehova manongod sa Juda ta inapod na “misteryoso” asin “pambihira”?

⁷ Taano ta inapod ni Isaias an paghiro ni Jehova tumang sa Jerusalem na misteryoso asin pambihirang gibo? Bueno, an Jerusalem iyo an sentro kan pagsamba ki Jehova asin an siudad kan linahidan na hade ni Jehova. (Salmo 132:11-18) Bilang siring, iyan dai pa lamang nalaglag kaidto. An templo kaiyan nungkang nasolo. An makahadeng harong ni David, kan establisaron sa Jerusalem, nungkang bumagsak. An siring na mga bagay imposible. Pambihira nanggad na isipon ni Jehova na itogot na mangyari an siring na mga bagay.

8. Anong patanid an itinao ni Jehova manongod sa saiyang nagdadangadang na pambihirang gibo?

⁸ Pero si Jehova nagtao nin igong patanid paagi sa saiyang mga propeta na maootob an nakakukubhan na mga pangyayari. (Miqueas 3:9-12) Halimbawa, si propeta Habakuk, na nabuhay kan ikapitong siglo B.C.E., nagsabi: “Helinga nindo, banwaan, sa tahaw kan mga nasyon, asin magmasid, patin tumurohok na may pagngalas sa lambang saro. Magngalas kamo; huli ta may gibohon na ginigibo sa saindong kaaldawan, na dai nindo tutubodon minsan ngani iyan isaysay. Huli ta uya patitindogon ko an mga Caldeo, an nasyon na mapait asin pusokpusokan, na nagduduman sa mahiwas na mga lugar sa daga tanganing sadirihon an mga istada na bakong sadiri kaiyan. Iyan makatatakot asin makangingirhat.”—Habakuk 1:5-7.

9. Sa anong paagi inotob ni Jehova an saiyang patanid tumang sa Jerusalem?

⁹ Kan 607 B.C.E., inotob ni Jehova an saiyang ipinatanid. Sa pagtogot sa mga hukbo nin Babilonya na salakayon an Jerusalem, tinogotan nia sindang laglagon kapwa an siudad asin an templo. (Lamentacion 2:7-9) Saro pa, itinogot niang laglagon an Jerusalem sa ikaduwang pangyayari. Taano? Bueno, pakalihis nin 70 taon nin pagkadistiyero, an nagbakleng mga Judio nagbuwelta sa saindang sadiring daga, asin saro pang templo an ipinatindog sa Jerusalem. Alagad, binayaan liwat kan mga Judio si Jehova. Kan enot na siglo C.E., kinotar ni Pablo an mga tataramon ni Habakuk sa mga Judio kan panahon nia, sa siring nagpatanid na magkakaigwa nin aplikasyon sa ngapit an hula. (Gibo 13:40, 41) Si Jesus mismo espisipikong nagpatanid na an Jerusalem asin an templo kaiyan lalaglagon huli sa kakulangan nin pagtubod sa kabtang kan mga Judio. (Mateo 23:37–24:2) Naghinanyog daw an enot na siglong mga Judiong idto? Dai. Arog kan saindang mga apoon, lubos nindang isinikwal an patanid ni Jehova. Kaya, inotro ni Jehova an saiyang misteryosong gibo. An Jerusalem asin an templo kaiyan linaglag kan 70 C.E. paagi sa mga hukbo kan Roma.

10. Paano mahiro si Jehova tumang sa Kakristianohan sa haraning ngapit?

¹⁰ Taano, kun siring, ta hohonaon nin siisay man na si Jehova dai magibo nin arog kaiyan sa sato mismong panahon? An totoo, ootobon nia an saiyang katuyohan maski ngani iyan garo misteryoso asin pambihira sa mga nagduduwaduwa. Ngonyan an punteriya kan saiyang paghiro iyo an Kakristianohan, na siring sa suanoy na Juda, naghihingakong nagsasamba sa Dios pero nagin daing paglaom sa karatan. Paagi sa saiyang Mas Dakulang David, si Cristo Jesus, si Jehova maduman sa “mga Filisteo” kan Kakristianohan sa oras na dai ninda linalaoman. Gigibohon nia an saiyang pambihirang gibo sagkod sa puntong paraon an kahurihurihing mga gira kan relihiyosong sistema nin Kakristianohan.—Mateo 13:36-43; 2 Tesalonica 1:6-10.

Pagpatanid Dapit sa Gibo ni Jehova

11, 12. Paano nagpatanid an mga Saksi ni Jehova manongod sa nagdadangadang na mga paghokom ni Jehova?

¹¹ Sa dakol na taon an mga Saksi ni Jehova nagpatanid manongod sa nagdadangadang na gibo nin paghokom ni Jehova. Itinokdo ninda na an kalaglagan kan Jerusalem asin kan templo kaiyan kan 607 B.C.E. asin liwat kan 70 C.E. makahulang mga patanid manongod sa mangyayari sa Kakristianohan, na huli sa saiyang apostasiya, nagin kabtang kan pankinaban na imperyo nin falsong relihiyon, an Dakulang Babilonya. Huli kaini, an paghokom nin Dios sa Dakulang Babilonya nangorognang ipanonongod sa Kakristianohan, mantang sia an pinakakulpableng kabtang kan satanikong katiriponan na iyan.—Kapahayagan 19:1-3.

¹² An mga Saksi ni Jehova nagtokdo sa makahulang patanid kan Biblia na sa itinalaan na panahon ni Jehova, an politikal na mga parasambay kan Dakulang Babilonya mabirik sa saiya. Sa pagsimbolisar kaini bilang an sampulong sungay kan mapulang mabangis na hayop, nagpatanid an Kapahayagan: “An sampulong sungay na naheling mo, asin an mabangis na hayop, an mga ini maoongis sa patotot [an Dakulang Babilonya] asin lulugadon asin huhubaan sia, asin kakakanon an saiyang laman asin lubos siang sosoloon sa kalayo.” (Kapahayagan 17:16) An relihiyosong Kakristianohan sosoloon asin lalaglagon kaiba an gabos na iba pang falsong relihiyon. Ini an magigin misteryosong gibo ni Jehova, an saiyang pambihirang gibo sa satong panahon.

13. Paano an reaksion sa mga patanid ni Jehova ngonyan kaagid kan naatubang ni Isaias?

¹³ Kun ipinaaabot kan mga Saksi ni Jehova an patanid manongod sa nagdadangadang na grabeng kapahamakan na ini, parate sindang nakaaatubang sa nanunuyang ngirisihan. Iniisip nin mga tawo kun sa paghona ninda siisay sinda tanganing magsabi nin siring na mga bagay. An Kakristianohan garo marigon na gayo, establisadong marhay nanggad. Tara, an iba naghohona na an saiyang kamugtakan nag-ooswag pa ngani. An mga gobyerno na dating nagdaogdaog saiya dai pa nahaloy nagtao nin orog na katalingkasan sa paghiro. Alagad, an totoo, an Kakristianohan maninigong maghinanyog sa sadol ni Isaias: “Dai nindo ipagpaheling an saindong sadiri na paratuya, tangani na dai kumosog an saindong mga gapos, huli ta may madatong na kalaglagan, sarong bagay na nadesisyonan na, na sakong nadangog sa Soberanong Kagurangnan, si Jehova nin mga hukbo, para sa bilog na daga.”—Isaias 28:22; 2 Pedro 3:3, 4.

14. Paano an mga gapos kan Kakristianohan nagin mas makosog asin mas higot?

¹⁴ Sa kadaklan na kabtang, an Kakristianohan magpapadagos na tumang sa Hade asin sa Kahadean. (2 Tesalonica 2:3, 4, 8) Alagad, kadungan kaiyan, an saiyang mga gapos magigin mas makosog asin mas higot. Sa ibang pagtaram, an saiyang kalaglagan paorog asin paorog na masisierto. Si Jehova dai maliwat kan saiyang desisyon na laglagon an Kakristianohan kun paanong dai nia liniwat an saiyang desisyon na itogot an kalaglagan kan Jerusalem asin kan saiyang templo kan 607 B.C.E.

“Lumuwas Kamo Saiya”

15. Anong paagi nin pagdulag an bukas sa sadiosan an pusong mga indibiduwal?

¹⁵ Paano makalilikay an saro sa kaaabtan kan Kakristianohan? Kan panahon nin Israel, isinugo ni Jehova an maimbod na mga propeta tanganing pabalikon an mga sadiosan an puso sa tunay na pagsamba. Ngonyan, ibinangon nia an saiyang mga Saksi, na ngonyan minilyon na, para sa kaagid na katuyohan. Saindang mapusong ibinubuyagyag an gadan sa espirituwal na kamugtakan kan Kakristianohan. Sa paggibo nin siring, maimbod nindang inaarog an siring sa damat na mga kapahayagan kan anghelikong pagpatanog nin trumpeta sa Kapahayagan kapitulo 8 asin 9. Saro pa, mahigos nindang ibinabalangibog an sadol na nasusurat sa Kapahayagan 18:4: “Lumuwas kamo saiya, banwaan ko, . . . kun habo nindong mag-ako nin kabtang kan saiyang mga damat.” An “saiya” na sinambit digdi iyo an Dakulang Babilonya, an pankinaban na imperyo nin falsong relihiyon, na an pangenot na kabtang kaiyan iyo an Kakristianohan.

16. Sa anong paagi nakadulag an minilyon hale sa falsong relihiyon?

¹⁶ Magpoon kan 1919, asin nangorogna magpoon kan 1922, an nag-ooswag na kadaklan kan mahohoyo, na naghimate sa sadol na iyan, nagbaya na sa Dakulang Babilonya. Enot rinibo, dangan ginatos na ribo, asin ngonyan minilyon an nagsiblag kan saindang sadiri sa falsong relihiyon, nangorogna sa Kakristianohan, asin nagdulag na pasiring sa malinig na pagsamba. (Isaias 2:2-4) Aram ninda na solamente paagi sa siring na pagluwas sa Dakulang Babilonya saindang malilikayan an pag-ako kan saiyang mga damat, na magkakaigwa nin kulminasyon sa saiyang kalaglagan pag-abot kan panahon na gibohon na an pambihirang gibo ni Jehova.

17, 18. Paano si Jehova nagin korona nin kamurawayan asin kuwintas nin kagayonan sa saiyang banwaan?

¹⁷ Ilinadawan ni propeta Isaias an maogmang kamugtakan kan mga nanindogan para sa malinig na pagsamba. Sinabi nia: “Sa aldaw na iyan si Jehova nin mga hukbo magigin siring sa korona nin kamurawayan asin siring sa kuwintas na burak nin kagayonan sa nagkatarada sa saiyang banwaan, asin siring sa espiritu nin hustisya sa saro na nagtutukaw sa paghokom, asin siring sa kapangyarihan sa mga minaparayo kan laban sa tata.”—Isaias 28:5, 6.

¹⁸ Huli sa saindang kaimbodan sa katotoohan, si Jehova an dai nagagadan na korona nin kamurawayan para sa mga miembro kan grupo nin maimbod asin madonong na oripon. Ini nangorognang nagin totoo magpoon kan 1926. Kan taon na iyan an luwas na Enero 1 kan The Watch Tower nagdoon kan mahalagang pangangaipo na padakulaon an ngaran ni Jehova sa nakakapahirong artikulo na may temang “Siisay an Magtataong Onra ki Jehova?” Magpoon kaidto, an linahidan na mga Kristiano nagpahayag kan ngaran na iyan sa bilog na kinaban orog kasuarin man. Kan 1931 sinda orog pang namidbid kaiba ni Jehova paagi sa pag-ako kan ngaran na mga Saksi ni Jehova. Saro pa, sarong dakulang kadaklan nin ibang karnero an nagruluwas man hale sa Kakristianohan asin sa natada kan Dakulang Babilonya. Inako man ninda an ngaran nin Dios. An resulta? Si Jehova mismo—imbes na an ibang temporaryong nasyonal na katalingkasan—an nagin korona nin kamurawayan asin kuwintas nin kagayonan para sa labing apat na milyon katawo sa mga 212 kadagaan asin mga isla nin dagat. Kanigoan nanggad na onra na darahon an ngaran kan solamenteng nabubuhay asin tunay na Dios!—Kapahayagan 7:3, 4, 9, 10; 15:4.

“Sa Saiya Matogdon an Espiritu ni Jehova”

19. Siisay an sarong nagtutukaw sa paghokom, asin paano si Jehova nagin an espiritu nin hustisya sa saiya?

¹⁹ Para ki Jesus, “an sarong nagtutukaw sa paghokom,” si Jehova nagin “an espiritu nin hustisya.” Kan anion sa daga si Jesus, nagsayuma siang daogon kan nakabuburat na espiritu nin kinabanon na pakialyansa. Ngonyan, bilang an pinatukaw sa tronong Hade ni Jehova, pano sia nin banal na espiritu, na naggigiya saiya sa paggibo nin timbang, malinaw an pananaw na mga desisyon. Naotob ki Jesus an hula: “Sa saiya matogdon an espiritu ni Jehova, asin an espiritu nin kadonongan asin nin pakasabot, an espiritu nin hatol asin nin kakosogan, an espiritu nin kaaraman asin nin takot ki Jehova.” (Isaias 11:2) Tunay nanggad, paagi ki Jesus, “gigibohon [ni Jehova] an hustisya na pansokol asin an katanosan na panpantay.” (Isaias 28:17) Mantang an bururat sa espirituwal na mga kaiwal malulunosan sa kalaglagan, gigibohon an hustisya sa banal na ngaran asin unibersal na soberaniya ni Jehova.

20, 21. Sa anong paagi an mga tataramon sa Isaias 28:1-22 nakaapektar sa saindo?

²⁰ Kun siring, kanigoan kamakangangalas nanggad an kahulogan kan hulang ini kan Isaias kapitulo 28 para sa sato ngonyan! Kun magdanay kitang daing digta kan espirituwal na mga paraburat kan Kakristianohan asin magdanay sa malinig na pagsamba, kita poprotehiran kun gibohon na ni Jehova an saiyang misteryosong gibo asin an saiyang pambihirang gibo. Kanigoan nanggad an paggayagaya niato na maaraman ini! Asin kanigoan nanggad an kaogmahan ta na horophoropon na kun mangyari na an mga bagay na ini, an gabos mapipiritan na maaraman na si Jehova nin mga hukbo naghiro sa kapakanan kan saiyang maimbod na banwaan asin para sa saiya mismong bindikasyon paagi ki Jesu-Cristo!—Salmo 83:17, 18.

²¹ Kaya logod an gabos na tunay na Kristiano padagos na daing takot na magpatanid manongod sa misteryosong gibo ni Jehova. Magdanay sinda sa pagtaram manongod sa saiyang pambihirang gibo. Sa paggibo ninda nin siring, ibalangibog ninda sa gabos na an satong dai natatanyog na paglaom nasa Kahadean nin Dios sa irarom kan saiyang nagtutukaw sa tronong Hade. Logod an saindang kaigotan, determinasyon, asin kaimbodan kumontribuwir sa daing sagkod na kaomawan kan satong makakamhan sa gabos na Dios, si Jehova.—Salmo 146:1, 2, 10.

Nagigirumdoman daw Nindo?

◻ Taano an Kakristianohan ta nasa bakong komportableng situwasyon?

◻ Ano an katuyohan ni Jehova para sa Jerusalem, asin taano ini ta “misteryoso” asin “pambihira”?

◻ Anong patanid an ihinahayag kan mga Saksi ni Jehova manongod sa Kakristianohan, asin anong reaksion an naaatubang ninda?

◻ Paano madudulagan nin mga tawo an kaaabtan kan Kakristianohan?

[Retrato para sa Pahina 11]

Ootrohon ni Jehova an saiyang misteryosong gibo, ngonyan tumang sa Kakristianohan