Danay na Lumakaw sa Mamomoton na Kabootan

“An naglalakaw sa katanosan asin mamomoton na kabootan makakanompong nin buhay, katanosan asin kamurawayan.”—TALINHAGA 21:21.

1. Taano ta maninigo niatong laoman na an mga ginigiyahan kan espiritu nin Dios magpaheling nin kabootan?

SI Jehova maboot asin maheherakon. Sia “Dios na maheherakon asin maugayon, maluya sa pagkaanggot asin mayaman sa mamomoton na kabootan asin katotoohan.” (Exodo 34:6, 7) Kaya natural sana na kaiba sa mga bunga kan saiyang banal na espiritu an pagkamoot asin kabootan.—Galacia 5:22, 23.

2. Anong mga halimbawa an pag-oolayan niato ngonyan?

² An mga ginigiyahan kan banal na espiritu ni Jehova, o puwersa aktiba, nagpapaheling kan bunga kaiyan na kabootan. Sinda nagpapaheling nin mamomoton na kabootan sa saindang relasyon sa iba. Tunay na inaarog ninda an halimbawa ni apostol Pablo, na irinerekomendar an saindang sadiri bilang mga ministro nin Dios “paagi sa kabootan” asin iba pang paagi. (2 Corinto 6:3-10) An saindang maboot, maheherakon, mapagpatawad na espiritu kaoyon kan personalidad ni Jehova, na “mayaman sa mamomoton na kabootan” asin an Tataramon igwa nin kadakol na halimbawa nin kabootan. (Salmo 86:15; Efeso 4:32) Ano an manonodan niato sa nagkapira kaini?

An Kabootan Ginigibo Kitang Bakong Paslo Asin Mapag-istimar

3. Paano si Abraham nagin arogan sa pagpaheling nin kabootan, asin anong pagpakosog an itinatao ni Pablo sa bagay na ini?

³ An patriarkang si Abraham (Abram)—an “katood ni Jehova” asin “ama kan gabos na igwa nin pagtubod”—nagpaheling nin marahay na halimbawa sa pagpaheling nin kabootan. (Santiago 2:23; Roma 4:11) Sia asin an saiyang pamilya, kaiba an sobrino niang si Lot, naghale sa siudad nin Caldea na Ur asin naglaog sa Canaan sa pagboot nin Dios. Minsan ngani si Abraham an mas matua asin iyo an payo kan pamilya, sia maboot asin bakong paslo sa pagpabaya ki Lot na kuanon an pinakamarahay na sabsaban, mantang sia an natada an kinua. (Genesis 13:5-18) An kaagid na kabootan puwedeng magpahiro sato na pabayaan an iba na magkaigwa nin mga bentaha asin kita an mawaran. An siring na daing kapasloan na kabootan kaoyon kan hatol ni apostol Pablo: “An lambang saro maghanap, bakong kan saiyang karahayan, kundi kan iba.” Si Pablo mismong ‘nagpaoyon sa gabos na tawo sa gabos na bagay, na dai hinanap an sadiri niang kapakanan kundi an sa dakol, tangani sindang maligtas.’—1 Corinto 10:24, 33.

4. Paano binalosan si Abraham asin Sara sa pagpaheling nin kabootan paagi sa pagkamapag-istimar?

⁴ Kun beses an kabootan nasa porma nin odok sa pusong pag-istimar. Si Abraham asin an saiyang agom, si Sara, nagin maboot asin mapag-istimar sa tolong estranghero na nag-agi sarong aldaw. Pinirit sinda ni Abraham na dai nguna maghale, mantang sia asin si Sara dali-daling nag-andam nin masiram na pagkakan para sa mga bisita. An mga estrangherong idto mga anghel palan ni Jehova, na an saro nagtao kan panuga na an gurang na asin dai nangangaking si Sara magkakaaki. (Genesis 18:1-15) Kanigoan kadakulang balos sa maboot na pag-istimar!

5. Sa anong paagi na si Gayo nagpaheling nin kabootan, asin paano man kita makagigibo nin kaagid dian?

⁵ An sarong paagi na ikapaheheling nin gabos na Kristiano an kabootan iyo an pagigin mapag-istimar. (Roma 12:13; 1 Timoteo 3:1, 2) Kaya, an mga lingkod ni Jehova maboot na iniistimar an nagbibiyaheng mga paraataman. Ini kapareho kan kabootan na ipinaheling kan enot na siglong Kristianong si Gayo. Sia guminibo nin “maimbod na gibo” sa pag-istimar sa nagsosongkong mga tugang—asin sinda “mga estranghero” na dati dai nia midbid. (3 Juan 5-8) Parate na midbid niato an mapapahelingan niato nin maboot na pag-istimar. Tibaad marisa niato na mamondo an sarong espirituwal na tugang na babae. An agom nia tibaad daing pagtubod o tiwalag pa ngani. Dakulang oportunidad na magpaheling nin kabootan paagi sa pag-imbitar saiya na magkamit nin espirituwal na pakikiasosyar asin magkakan kaiba kan satong pamilya paminsanminsan! Minsan dai kita mag-andam nin bangkete, segurado na an satong pamilya maggagayagaya sa pagpaheling nin kabootan sa siring na tugang. (Ikomparar an Talinhaga 15:17.) Asin seguradong ipahahayag nia an saiyang pagpasalamat digdi sa berbal o sa maboot na surat nin pasasalamat.

6. Paano nagpaheling nin kabootan si Lidia, asin taano ta mahalaga na apresyaron an mga gibo nin kabootan?

⁶ Pakabautismohi kan maimbod na babaeng si Lidia, “sia nakimaherak: ‘Kun ako ibinibilang nindong [ni Pablo asin kan saiyang kairiba] maimbod ki Jehova, dumagos kamo sa sakong harong asin umontok dian.’ Asin pinirit nia kami,” an idinugang ni Lucas. Daing duwa-duwa, inapresyar an kabootan ni Lidia. (Gibo 16:14, 15, 40) Pero an dai pakapagpaheling nin apresasyon puwedeng makaraot na marhay sa boot. Sa sarong okasyon, an sarong 80 anyos na tugang na babae na limitado an kosog asin kuwarta maboot na nagpagal sa pag-andam nin pagkakan para sa pirang bisita. Sia namondong marhay kan an sarong barobata dai man lamang sia pinaisi na dai sia makakaabot. Sa saro man na okasyon, an duwang tugang na babae dai nakaabot sa pagkakan na espesyal na inandam para sa sainda nin sarong daragita. “Namondo ako nin makuri,” sabi nia, “ta pareho man sinda dai nakalingaw. . . . Mas gusto ko pang madangog na nalingawan ninda an pamanggihan, alagad ta imbes mayo saindang duwa na nagin maboot o mamomoton nin igo tanganing apodan ako.” An bunga daw kan banal na espiritu na kabootan mapahiro saindo na magin mapag-apresyar asin mapaggirumdom sa irarom nin kaagid na mga kamugtakan?

An Kabootan Ginigibo Kitang Makonsiderasyon

7. Anong punto manongod sa kabootan an ipinag-iilustrar kan ginibong paghihingoa tanganing masunod an gusto ni Jacob manongod sa paglobong?

⁷ An kabootan maninigong gibohon kitang makonsiderasyon sa iba asin sa saindang tama man na mga kabotan. Bilang ilustrasyon: si Jacob (Israel) nakiolay sa saiyang aking si Jose na gibohan sia nin mamomoton na kabootan paagi sa dai paglobong sa saiya sa Egipto. Minsan ini nangaipo na darahon sa harayo an bangkay ni Jacob, si Jose asin an iba pang aki ni Jacob “dinara sia . . . sa daga nin Canaan asin ilinobong sia sa lungib kan oma ni Macpela, an oma na binakal ni Abraham tanganing makasadiri nin lolobngan ki Efron na Heteo sa atubangan nin Mamre.” (Genesis 47:29; 49:29-31; 50:12, 13) Kaoyon sa halimbawang iyan, bako daw na an mamomoton na kabootan maninigong magpahiro sato na otobon an puwede man sa Kasuratan na mga areglo sa paglobong na gusto nin sarong Kristianong miembro nin pamilya?

8. Ano an itinotokdo sato kan nangyari ki Rahab manongod sa pagbalos sa kabootan?

⁸ Kun an iba nagpapaheling sato nin mamomoton na kabootan, bako daw na maninigo kitang magpahayag nin pag-apresyar o bumalos minsan paano? Maninigo nanggad. Si Rahab na patotot nagpaheling nin kabootan paagi sa pagtago kan mga espiyang Israelita. Kaya, an mga Israelitas nagpaheling nin mamomoton na kabootan paagi sa pagliligtas sa saiya asin sa saiyang pamilya kan laglagon ninda an siudad nin Jerico. (Josue 2:1-21; 6:20-23) Kanigoan karahay na halimbawa na nagpaparisa na maninigo niatong balosan an kabootan paagi sa sato mismong pagigin makonsiderasyon asin maboot!

9. Taano ta masasabi nindo na tama man na hagadon sa saro na pahelingan kita nin mamomoton na kabootan?

⁹ Sa bagay na iyan, tama na hagadon sa saro na pahelingan kita nin mamomoton na kabootan. Ini ginibo ni Jonatan, aki kan enot na hade nin Israel, si Saul. Hinagad ni Jonatan sa saiyang namomotan na mas hoben na katood na si David na pahelingan sia asin an saiyang pamilya nin mamomoton na kabootan. (1 Samuel 20:14, 15; 2 Samuel 9:3-7) Nagirumdoman nia ini kan ipamalos nia an mga Gabaonita na pinagkasalaan ni Saul. Sa paggirumdom sa “sumpa ni Jehova” sa pag-oltanan nia asin ni Jonatan, si David nagpaheling nin mamomoton na kabootan paagi sa pagliligtas kan buhay kan aki ni Jonatan na si Mefiboset. (2 Samuel 21:7, 8) Ginigibo man daw nindo na “an saindong Iyo mani Iyo”? (Santiago 5:12) Asin kun kita magurang sa kongregasyon, kita man daw maheherakon kun an mga kapagtubod niato kaipuhan na pahelingan nin mamomoton na kabootan?

An Kabootan Nagpapakosog sa mga Bogkos

10. Paano binendisyonan an mamomoton na kabootan ni Rut?

¹⁰ An mamomoton na kabootan nagpapakosog sa mga bogkos nin pamilya asin nagpapaoswag sa kaogmahan. Ini ipinaheling sa nangyari sa Moabitang si Rut. Sia nagtrabaho bilang paragutol sa oma kan may edad nang si Booz harani sa Betlehem, na nagtatagama nin pagkakan nia asin kan saiyang balo na saka dukhang panugangan na babae, si Noemi. (Rut 2:14-18) Kan huri sinabihan ni Booz si Rut: “Ipinahayag mo an saimong mamomoton na kabootan nin orog karahay sa huring pangyayari kisa sa enot na pangyayari, sa dai pagsunod sa mga barobata baga man dukha o mayaman.” (Rut 3:10) Enot, si Rut nagpaheling nin mamomoton na kabootan ki Noemi. “Sa huring pangyayari,” an Moabita nagpaheling nin mamomoton na kabootan paagi sa pagkagustong paagom sa may edad nang si Booz tanganing patindogon an ngaran kan saiyang nagadan na agom asin kan gurang nang si Noemi. Paagi ki Booz, si Rut nagin ina kan apoon ni David na si Obed. Asin itinao sa saiya nin Dios an “sangkap na balaog” na pagigin apoon ni Jesu-Cristo. (Rut 2:12; 4:13-17; Mateo 1:3-6, 16; Lucas 3:23, 31-33) Kanigoan na bendisyon an ibinunga kan mamomoton na kabootan ni Rut para sa saiya asin sa saiyang pamilya! Ngonyan, an mga bendisyon, kaogmahan, asin pagkosog kan mga bogkos nin pamilya nangyayari man kun an mamomoton na kabootan abunda sa diosnon na mga harong.

11. Ano an nagin epekto kan kabootan ni Filemon?

¹¹ An kabootan nagpapakosog sa mga bogkos sa laog kan mga kongregasyon kan banwaan ni Jehova. An Kristianong lalaking si Filemon midbid sa pagpaheling nin mamomoton na kabootan sa mga kapagtubod. Sinabihan sia ni Pablo: “Danay akong nagpapasalamat sa sakong Dios kun ika nasasambitan ko sa sakong mga pamibi, ta padagos kong nababaretaan an saimong pagkamoot asin pagtubod na nasa saimo para sa Kagurangnan na Jesus asin sa gabos na banal . . . Ako nagkamit nin dakulang kagayagayahan asin karangahan sa saimong pagkamoot, huli ta an boot kan mga banal naginhawahan paagi sa saimo, tugang.” (Filemon 4-7) Dai sinasabi kan Kasuratan kun paano naginhawahan an boot kan mga banal paagi ki Filemon. Minsan siring, segurado na sia nagpaheling nin mamomoton na kabootan sa mga kapwa linahidan sa laen-laen na paagi na nakapaginhawa sa sainda, asin sierto na ini nakapakosog sa mga bogkos sa pag-oltanan ninda. Nangyayari man an kaagid na mga bagay kun an mga Kristiano nagpapaheling nin mamomoton na kabootan ngonyan.

12. Ano an ibinunga kan kabootan na ipinaheling ni Onesiforo?

¹² An kabootan ni Onesiforo nagkaigwa man nin marahay na epekto. “Kaherakan logod kan Kagurangnan an pamilya ni Onesiforo,” sabi ni Pablo, “huli ta parate nia akong pinagiginhawa, asin dai nia ikinasopog an sakong mga kadena. Kundi, kan sia yaon sa Roma, hinanap nia ako nin maigot asin nakua nia ako. Itogot logod sa saiya kan Kagurangnan na magkamit nin pagkaherak gikan ki Jehova sa aldaw na iyan. Asin an gabos na paglilingkod na ginibo nia sa Efeso naaaraman mo nin marhay.” (2 Timoteo 1:16-18) Kun kita magmamaigot na magpaheling nin mamomoton na kabootan sa mga kapwa parasamba, kita magigin maogma asin pakokosogon niato an mga bogkos na pagkamoot sa tugang sa laog kan Kristianong kongregasyon.

13, 14. Paano nagin arogan an kongregasyon sa Filipos, asin ano an reaksion ni Pablo sa kabootan kaiyan?

¹³ Kun an bilog na kongregasyon nagpapaheling nin mamomoton na kabootan sa mga kapwa parasamba, ini nagpapakosog sa bogkos sa pag-oltanan ninda. An siring na dayupot na relasyon yaon sa pag-oltanan ni Pablo asin kan kongregasyon sa siudad nin Filipos. An totoo, an sarong dahelan na sinuratan nia an mga taga-Filipos tanganing pasalamatan an saindang kabootan asin materyal na tabang. Sia nagsurat: “Sa pagpopoon kan pagpahayag kan maogmang bareta, paghale ko sa Macedonia, mayo ni sarong kongregasyon na nakisumaro sa sako sa pagtao asin pag-ako, kundi kamo sana; huli ta, minsan sa Tesalonica, may ipinadara kamo sa sako nin makasaro asin makaduwa para sa pangangaipo ko. . . . Igwa ako kan gabos na bagay asin nagsosopay. Ako nabasog, ngonyan na naako ko na gikan ki Epafrodito an mga bagay hale sa saindo, parong na mahamot, atang na inaako, nakakapaogma sa Dios.”—Filipos 4:15-18.

¹⁴ Bakong makangangalas na kaiba sa mga pamibi ni Pablo an maboot na mga taga-Filipos! Sabi nia: “Danay akong nagpapasalamat sa sakong Dios sa kada pakagirumdom ko sa saindo sa kada pagngayongayo ko para sa saindo gabos, mantang idinodolot ko an sakong pagngayongayo na may kagayagayahan, huli sa itinabang nindo sa maogmang bareta poon kan enot na aldaw sagkod sa oras mismong ini.” (Filipos 1:3-5) An siring na maboot asin matinaong pagsuportar sa gibong paghuhulit kan Kahadean nungka na nagpapatios sa kongregasyon. Kan maboot na magibo kan mga taga-Filipos an saindang makakaya sa bagay na ini, sinierto sa sainda ni Pablo: “Dangan, an sakong Dios mahipno kan gabos nindong pangangaipo sono sa saiyang mga kayamanan sa kamurawayan paagi ki Cristo Jesus.” (Filipos 4:19) Iyo, binabalosan nin Dios an kabootan asin pagkamatinao. An saiyang Tataramon nagsasabi: “An lambang saro, ano man na karahayan an saiyang gibohon, mag-aako liwat kaini ki Jehova.”—Efeso 6:8.

Kun an mga Babae Nagpapaheling nin Kabootan

15, 16. (a) Paano ginirumdom an kabootan ni Dorcas, asin ano an nangyari kan sia magadan? (b) Paano an maboot na mga Kristiana pano nin marahay na mga gibo ngonyan?

¹⁵ An mamomoton na kabootan kan disipulong si Dorcas (Tabita) na taga-Jope dai nawaran nin balos. “An babaeng ini pano nin marahay na mga gibo asin mga paglimos,” asin kan ‘sia maghelang asin magadan,’ ipinakua kan mga disipulo si Pedro sa Lida. Pag-abot nia, “dinara sia ninda sa itaas na kuwarto; asin an gabos na balo uminatubang sa saiya na nananangis asin ipinaheheling an dakol na panlaog na gubing asin panluwas na gubing na ginibo ni Dorcas kan sia nasa sainda pa.” Imahinaron an pangyayari: An mamondo, naghihibing mga balo nagsaysay sa apostol kun gurano kaboot ni Dorcas asin ipinaheling saiya an mga gubing na ebidensia kan saiyang pagkamoot asin kabootan. Pakapahalea kan gabos, si Pedro luminuhod sa pamibi asin inatubang an bangkay. Hinanyoga! Sia nagsabi: “Tabita, buhat!” Asin uya! “Binuklat nia an saiyang mga mata asin, pagkaheling nia ki Pedro, sia tuminukaw. Pakagawgawan nia saiya kan saiyang kamot, pinatindog nia sia, asin inapod nia an mga banal asin an mga balo patin iinatubang nia siang buhay.” (Gibo 9:36-41) Kanigoan na bendisyon gikan sa Dios!

¹⁶ Ini an enot na nakatalang pagbuhay liwat nin sarong apostol ni Jesu-Cristo. Asin an mga kamugtakan na naggiya pasiring sa makangangalas na milagrong ini nakagamot sa kabootan. Siisay an makasasabi na si Dorcas bubuhayon liwat kun sia bakong pano nin marahay na mga gibo asin mga paglimos—kun sia dai nagsopay sa mamomoton na kabootan? Bako sana na si Dorcas asin an mga balong idto binendisyonan kundi an milagro kan pagbuhay liwat saiya nagpapatotoo sa kamurawayan nin Dios. Iyo, “ini naaraman sa bilog na Jope, asin dakol an nagturubod sa Kagurangnan.” (Gibo 9:42) Ngonyan, an maboot na mga Kristiana pano man nin marahay na mga gibo—tibaad nananahi para sa mga kapagtubod, nagluluto para sa mga gurang na sa tahaw niato, nag-iistimar sa iba. (1 Timoteo 5:9, 10) Ini dakulaon na patotoo sa mga nagmamasid! Orog sa gabos, kanigoan an satong kaogmahan na an diosnon na debosyon asin mamomoton na kabootan nagpapahiro sa ‘dakulang hukbong ini nin mga babae na magsabi kan maogmang bareta’ sa ikamumuraway kan satong Dios, si Jehova!—Salmo 68:11.

Padagos na Lumakaw sa Mamomoton na Kabootan

17. Ano an sinasabi sa Talinhaga 21:21, asin paano minaaplikar an mga tataramon na iyan sa diosnon na mga indibiduwal?

¹⁷ An gabos na nagmamawot na oyonan nin Dios kaipuhan na lumakaw sa mamomoton na kabootan. “An naglalakaw sa katanosan asin mamomoton na kabootan makakanompong nin buhay, katanosan asin kamurawayan,” sabi nin madonong na talinhaga. (Talinhaga 21:21) An diosnon na tawo maigot na naglalakaw sa katanosan nin Dios, na perming ginigiyahan nin banal na mga pamantayan. (Mateo 6:33) Sia padagos na nagpapaheling nin maimbod na pagkamoot, o mamomoton na kabootan, sa iba sa materyal asin nangorogna sa espirituwal na mga paagi. Sa siring, sia nakakanompong nin katanosan, ta an espiritu ni Jehova nagtatabang saiya na makapamuhay nin matanos. An totoo, sia ‘may gubing na katanosan’ kapareho kan diosnon na tawong si Job. (Job 29:14) An siring na tawo dai naghahanap kan sadiri niang kamurawayan. (Talinhaga 25:27) Imbes, nakakamtan nia an ano man na kamurawayan na itinotogot ni Jehova na akoon nia, tibaad sa paggalang nin mga kapwa tawo na pinahiro nin Dios na magin maboot sa saiya huli sa saiya man na mamomoton na kabootan sa sainda. Dugang pa, an maimbod na nag-ootob sa kabotan nin Dios nakakanompong nin buhay—bako sanang sa laog nin pirang taon na madaling lumihis kundi sagkod lamang.

18. Taano ta maninigo kitang lumakaw sa mamomoton na kabootan?

¹⁸ Kun siring, an gabos logod na namomoot ki Jehova Dios padagos na lumakaw sa mamomoton na kabootan. Paagi sa kuwalidad na ini namomotan kita nin Dios asin nin iba. Iyan nagpapatalubo sa pagkamapag-istimar asin ginigibo kitang makonsiderasyon. An kabootan nagpapakosog sa mga bogkos sa laog kan pamilya asin kan Kristianong kongregasyon. An mga babae na nagpapaheling nin mamomoton na kabootan inaapresyar asin pinahahalagahan na gayo. Asin an gabos na naglalakaw sa marahayon na kuwalidad na ini nagtatao nin kamurawayan sa Dios nin mamomoton na kabootan, si Jehova.

Ano an Isisimbag Nindo?

◻ Paano nagin arogan si Abraham sa pagpaheling nin kabootan?

◻ Ano an itinotokdo sato kan nangyari ki Rahab manongod sa pagbalos sa kabootan?

◻ Paano nagpaheling nin kabootan an kongregasyon sa Filipos?

◻ Paano an maboot na mga Kristiana pano nin marahay na mga gibo ngonyan?

◻ Taano ta maninigo kitang lumakaw sa mamomoton na kabootan?