Mga Hapot Hale sa mga Parabasa
◼ Ano “an marahay” na dai nagigibo ni apostol Pablo, arog kan sinabi nia sa Roma 7:19?
Sa pundamental, an boot sabihon ni Pablo iyo an dai nia pakagibo kan gabos na marahay na bagay na sinasabi sa Pagboot ni Moises. Idto imposible para ki Pablo asin sa gabos pang iba, pati kita, huli sa pagkabakong sangkap asin pagkamakasalan. Alagad dai kaipuhan na madesesperar. An atang ni Cristo nagbukas kan dalan sa kapatawaran nin Dios asin sa marahay na kamugtakan sa atubangan Nia.
An Roma 7:19 nagsasabi: “Huli ta an marahay na minamawot ko dai ko ginigibo, kundi an maraot na hinahaboan ko iyo an ginigibo ko.” Ipinaheheling kan nakapalibot na teksto na an pangenot na sinasabi ni Pablo manongod sa “marahay” sa sentido kan hinahagad kan Pagboot. Sa bersikulo 7 sia nagsabi: “Kasalan daw an Pagboot? Dai nanggad! An totoo ako kutana dai nakamidbid nin kasalan kun bakong huli sa Pagboot; asin, halimbawa, ako dai kutana nakamidbid nin pagkaara kun an Pagboot dai nagsabi: ‘Dai ka maara.’” Iyo, liniwanag kan Pagboot na mantang dai ninda iyan lubos na nakukuyog, an gabos na tawo makasalan.
Dangan sinabi ni Pablo na sia “kaidto nabubuhay na siblag sa pagboot.” Kasuarin idto? Bueno, kan sia nasa habayan ni Abraham bago itao ni Jehova an Pagboot. (Roma 7:9; ikomparar an Hebreo 7:9, 10.) Minsan si Abraham bakong sangkap, dai pa itinatao an Pagboot, kaya dai ikinapagirumdom sa saiya an saiyang pagkamakasalan huli sa dai pakaotob sa dakol na togon kaiyan. Iyan daw nangangahulogan na kan an Pagboot itao na asin nagparisa kan pagkabakong sangkap nin tawo, iyan nagbunga nin maraot na mga resulta? Dai. Ipinagpadagos ni Pablo: “Kaya an Pagboot banal, asin an togon banal asin matanos patin marahay.”—Roma 7:12.
Mangnoha na sinabi ni Pablo na “banal” asin “marahay” an Pagboot. Sa minasunod na mga bersikulo, ipinaliwanag nia na “an marahay”—an Pagboot—lininaw na sia parakasala, asin an kasalan na ini ginibo siang angay sa kagadanan. Isinurat ni Pablo: “An marahay na minamawot ko dai ko ginigibo, kundi an maraot na hinahaboan ko iyo an ginigibo ko. Ngonyan, kun an hinahaboan ko iyo an sakong ginigibo, an naggigibo kaiyan bako nang ako, kundi an kasalan na nag-eerok sa sako.”—Roma 7:13-20.
Kun siring, sa kontekstong ini an sinasabi ni Pablo bakong karahayan sa pankagabsan, o maboot sanang mga gibo. (Ikomparar an Gibo 9:36; Roma 13:3.) An partikularmenteng sinasabi nia iyo an paggibo (o dai paggibo) nin mga bagay na oyon sa marahay na Pagboot nin Dios. Kaidto sia maigot na nag-otob sa Judiong relihiyon asin—kun ikokomparar sa iba—sia “daing kanawayan.” Minsan siring, dawa sa isip nia sia nagin maimbod na oripon kan marahay na Pagboot na iyan, dai pa man giraray nia iyan lubos na naotob. (Filipos 3:4-6) An Pagboot nagpaaninag kan sangkap na mga pamantayan nin Dios, na ipinaheheling sa apostol na sa saiyang laman sia oripon pa man giraray kan ley nin kasalan asin kun siring kondenadong magadan. Minsan siring, makapagpapasalamat si Pablo na huli sa atang ni Cristo sia ipinahayag na matanos—kinalda sa ley nin kasalan asin sa maninigong resulta kaiyan, an sentensiang kagadanan.—Roma 7:25.
An mga Kristiano ngonyan bakong sakop kan Pagboot nin Moises, ta iyan ipinako na sa hariging pasakitan. (Roma 7:4-6; Colosas 2:14) Pero marahay na midbidon niato na idto bakong pagabat na mga ley na marahay pang lingawan na sana niato. Bako, sa pundamental marahay an Pagboot. Kaya may dahelan kitang basahon an mga libro sa Biblia na igwa kan Pagboot asin aramon kun ano an hinagad kaiyan sa Israel. Sa dai na mahahaloy iyan an gigibohon kan mga Saksi ni Jehova sa bilog na daga, na sinusunod an saindang semanal na babasahon sa Biblia.
Mantang binabasa niato an Pagboot, kaipuhan na horophoropon niato an mga prinsipyo na nasa likod kan laen-laen na mga ley kaiyan asin an mga pakinabang na nakamtan kan banwaan nin Dios mantang pinagmamaigotan nindang kuyogon an marahay na mga togon na idto. Maninigo man na masabotan niato na kita bakong sangkap asin kun siring dai lubos na nakakakuyog sa karahayan na nanonodan niato sa Tataramon nin Dios. Alagad mantang nakikipaglaban sa ley nin kasalan, makapaggagayagaya kita sa paglaom na kita makalda paagi sa pag-aplikar sa sato kan atang ni Cristo.