Magsolog nin Kahoyoan!

“Bilang mga pinili nin Dios, banal asin namomotan, isolog nindo an mamomoton na mga pagmate nin pagkaherak, kabootan, kababaan nin boot, kahoyoan, asin pakatios.”—COLOSAS 3:12.

1-3. Sa Colosas 3:12-14, ano an isinabi ni apostol Pablo manongod sa kahoyoan asin iba pang diosnon na kuwalidad?

ITINATAO ni Jehova sa saiyang banwaan an pinakaprimerang piguratibong gubing. An totoo, an gabos na nagmamawot kan saiyang pag-oyon kaipuhan na magsolog nin gubing na may makosog na mga tursido nin kahoyoan. An kuwalidad na ini nakararanga ta iniinaan kaiyan an tension sa masakit na mga kamugtakan. Iyan nagpoprotehir man, ta linalabanan kaiyan an iriwal.

² Sinadol ni apostol Pablo an saiyang mga kapwa linahidan na Kristiano: “Bilang mga pinili nin Dios, banal asin namomotan, isolog nindo an mamomoton na mga pagmate nin pagkaherak, kabootan, kababaan nin boot, kahoyoan, asin pakatios.” (Colosas 3:12) An tiempo kan termino sa Griego na trinadusir na “isolog nindo” nagpaparisa nin aksion na dapat na gibohon na may pag-apreta. An mga linahidan, na pinili, banal, asin namomotan nin Dios, dai dapat na mag-atraso sa pagsolog nin mga kuwalidad na arog kan kahoyoan.

³ Idinugang pa ni Pablo: “Padagos kamong magpatiriostios asin magpatarawadtawadan kun an siisay man igwa nin sumbong tumang sa saro. Kun paanong pinatawad kamo ni Jehova, siring man an gibohon nindo. Alagad, laen pa sa gabos na bagay na ini, isolog nindo an pagkamoot, huli ta iyan sangkap na bogkos nin pagkasararo.” (Colosas 3:13, 14) An pagkamoot, kahoyoan, asin iba pang diosnon na kuwalidad nagpapangyari sa mga Saksi ni Jehova na “mag-ontok na sararo.”—Salmo 133:1-3.

Kaipuhan an Mahoyong mga Pastor

4. An tunay na mga Kristiano nagsusulot nin piguratibong gubing na hinabol sa anong mga kuwalidad?

⁴ An tunay na mga Kristiano naghihingoa na ‘gadanon an mga kabtang kan saindang hawak kun dapit sa pakikisaro, karigsokan, seksuwal na horot, maraot na mawot, asin kaaraan,’ asin pinagmamaigotan nindang haleon an ano man na daan na gubing na may tela nin kaanggotan, kabangisan, karatan, pagmuda, asin bastos na orolay. (Colosas 3:5-11) Saindang hinahale an “daan na pagkatawo” (sa literal, “gurang na tawo”) asin isinosolog an “bagong pagkatawo” (o, “bagong tawo”), na angay na isulot. (Efeso 4:22-24, Kingdom Interlinear) An saindang bagong gubing, na hinabol sa pagkaherak, kabootan, kababaan nin boot, kahoyoan, asin pakatios, nakatatabang sainda na maresolberan an mga problema asin mamuhay sa diosnon na paagi.—Mateo 5:9; 18:33; Lucas 6:36; Filipos 4:2, 3.

5. Ano an manongod sa pagpunsionar kan Kristianong kongregasyon na minagibong dakulang kagayagayahan an pagigin kabtang kaiyan?

⁵ An mga tawong ibinibilang na asensado sa kinaban na ini parateng maisog, maringis pa ngani. (Talinhaga 29:22) Laen nanggad sa banwaan ni Jehova! An Kristianong kongregasyon dai nagpupunsionar arog nin pagpalakaw nin iba sa negosyo—sa matibay pero maisog na paagi na tibaad magpamondo sa mga tawo. Imbes, sarong kagayagayahan an magin kabtang kan kongregasyon. An sarong dahelan iyo na an kahoyoan sarong kabtang kan kadonongan na ipinaheheling nin mga Kristiano sa pankagabsan asin nangorogna nin mga lalaki na kuwalipikadong magtokdo sa mga kapagtubod. Iyo, kagayagayahan an ibinubunga kan pagtotokdo asin paghatol nin nombradong kamagurangan na nagtotokdo “na may kahoyoan na gikan sa kadonongan.”—Santiago 3:13.

6. Taano ta dapat na magin mahoyo an Kristianong mga magurang?

⁶ An espiritu, o nangingibabaw na kaisipan, kan banwaan nin Dios naghahagad na an mga lalaking pinaniwalaan na mangataman sa kongregasyon mahoyo, rasonable, asin mapagsabot. (1 Timoteo 3:1-3) An mga lingkod ni Jehova siring sa maboot na mga karnero, bakong matagas an payong mga kanding, sutil na mga mula, o maringis na mga lobo. (Salmo 32:9; Lucas 10:3) Huling arog-karnero, sinda kaipuhan na tratohon na may kahoyoan asin kabootan. (Gibo 20:28, 29) Iyo, linalaoman nin Dios an mga magurang na magin mahoyo, maboot, mamomoton, asin mapasensia sa saiyang mga karnero.—Ezequiel 34:17-24.

7. Paano maninigong tokdoan nin mga magurang an iba o tabangan an may helang sa espirituwal?

⁷ Bilang “oripon nin Kagurangnan,” an magurang “maninigong magin maboot sa gabos, angay na magtokdo, padagos na nagpopogol sa irarom nin karatan, nagtotokdo na may kahoyoan duman sa mga minatumang; ta tibaad sinda tawan nin Dios nin pagsolsol na magiya sa tamang kaaraman kan katotoohan.” (2 Timoteo 2:24, 25) An mga pastor na Kristiano maninigong magpaheling nin maboot na konsiderasyon kun naghihingoang tabangan an may helang sa espirituwal, ta an mga karnero rogaring nin Dios. Dai sinda dapat na tratohon nin mga magurang na arog kan pagtratar nin tangdanan kundi kaipuhan na magin mahoyo, arog kan Marahay na Pastor, si Jesu-Cristo.—Juan 10:11-13.

8. Ano an nangyari sa mahoyong si Moises, asin taano?

⁸ An magurang tibaad may panahon na madepisilan na papagdanayon an mahoyong espiritu. “An tawong si Moises iyo an pinakamahoyo sa gabos na tawo na yaon sa ibabaw kan daga.” (Bilang 12:3) Pero, kan an mga Israelitas napaatubang sa kakulangan nin tubig duman sa Cades, iniwal ninda si Moises asin binasol sia sa pagdara sainda hale sa Egipto pasiring sa alang na kapatagan. Sa ibong kan gabos na tinios ni Moises na may kahoyoan, sia nagtaram na daing pagmamaan, may kaisogan. Sia asin si Aaron nagtindog sa atubangan kan banwaan asin inapod an atension sa sainda man sana, na sinasabi ni Moises: “Pagdangog kamo, ngonyan, mga sumbikalan! Sa gapo daw na ini na kami mapaluwas nin tubig para sa saindo?” Dangan pinukpuk nin makaduwa ni Moises an gapo, asin pinaluwas nin Dios an “dakol na tubig” para sa banwaan asin sa saindang mga hayop. Dai naogma si Jehova ta dai Sia pinakangbanal ni Moises asin ni Aaron, kaya si Moises dai nagkapribilehiyo na pangenotan an mga Israelitas palaog sa Dagang Panuga.—Bilang 20:1-13; Deuteronomio 32:50-52; Salmo 106:32, 33.

9. Paano puwedeng mabalo an kahoyoan nin magurang?

⁹ An kahoyoan nin sarong magurang na Kristiano tibaad mabalo man sa laen-laen na paagi. Halimbawa, pinatanidan ni Pablo si Timoteo na puwedeng may maglataw na “maabhaw” asin “narurungaw dapit sa mga pagduwaduwa asin pasuruhay manongod sa mga tataramon.” Idinugang ni Pablo: “Sa mga bagay na ini minagikan an pagkauri, iriwal, mga pagraway, maraot na mga pagsahotsahot, madahas na mga pasuruhay manongod sa daing kamanungdanan na mga bagay nin mga tawong maraot an isip asin nawaran kan katotoohan.” An paraataman na si Timoteo dai dapat na gumawe nin maisog kundi dapat na ‘dumulag sa mga bagay na ini,’ asin ‘sunodon an katanosan, diosnon na debosyon, pagtubod, pagkamoot, pakatagal, kahoyoan nin boot.’—1 Timoteo 6:4, 5, 11.

10. Ano an kaipuhan na ipagirumdom ni Tito sa mga kongregasyon?

¹⁰ Minsan ngani an mga magurang kaipuhan na mahoyo, dapat sindang magin marigon para sa tama. Arog kaiyan si Tito, na pinagigirumdom an mga miembro kan mga kongregasyon sa Creta na “dai magtaram nin maraot tumang sa kiisay man, dai magin makiiwalon, magin rasonable, nagpapaheling nin bilog na kahoyoan sa gabos na tawo.” (Tito 3:1, 2) Sa pagpaliwanag kun taano an mga Kristiano ta maninigong magin mahoyo sa gabos, kaipuhan na ipaheling ni Tito kun gurano kaboot asin kamamomoton si Jehova. Dai ilinigtas nin Dios an mga nagtutubod huli sa ano man na matanos nindang gibo kundi sono sa saiyang pagkaherak paagi ki Jesu-Cristo. An kahoyoan asin pagpapasensia ni Jehova nangangahulogan man nin kaligtasan para sa sato. Kun siring, kapareho ni Tito, an mga magurang sa presenteng panahon maninigong ipagirumdom sa mga kongregasyon na magpasakop sa Dios, na inaarog Sia paagi sa pagtrato sa iba sa mahoyong paagi.—Tito 3:3-7; 2 Pedro 3:9, 15.

An Kahoyoan Naggigiya sa Madonong na Parahatol

11. Sono sa Galacia 6:1, 2, paano maninigong itao an hatol?

¹¹ Ano kun nagkasala an sarong piguratibong karnero? Sabi ni Pablo: “Mga tugang, minsan kun an sarong tawo may nagibong kasalan bago nia iyan maaraman, kamo na igwang espirituwal na mga kuwalipikasyon pagmaigotan nindo na ibangon an tawong iyan sa espiritu nin kahoyoan, mantang binabantayan man nindo an saindong sadiri, ta tibaad kamo masugotan man. Padagos na magturowangan sa pagabat sa lambang saro, asin sa siring maotob nindo an pagboot ni Cristo.” (Galacia 6:1, 2) An hatol mas epektibo kun iyan itinatao sa espiritu nin kahoyoan. Dawa kun an mga magurang naghihingoang hatolan an tawong anggot, maninigo sindang magpaheling nin pagpopogol sa sadiri, na naaaraman na “an malomoy na dila mismo minabare nin tolang.” (Talinhaga 25:15) An saro na arog nin tolang katagas tibaad mapalomoy nin mahoyong mga tataramon, asin tibaad mawara an saiyang katagasan.

12. Paano nakatatabang sa parahatol an mahoyong espiritu?

¹² Si Jehova mahoyong Paratokdo, asin an saiyang mahoyong paagi nin pagtotokdo epektibo sa kongregasyon. Ini nangorognang totoo kun kinakaipuhan na hatolan nin mga magurang an mga nagkakaipo nin espirituwal na tabang. Si disipulo Santiago nagsurat: “Siisay an madonong asin may pakasabot dian sa saindo? Ipahayag nia paagi sa saiyang marahay na gawe an saiyang mga gibo na may kahoyoan na gikan sa kadonongan.” An kahoyoan gikan sa paggalang asin pagpasalamat sa “kadonongan hale sa itaas,” na may kaibang mapakumbabang pagmidbid sa mga limitasyon nin saro. An mahoyo asin mapakumbabang espiritu nagpoprotehir sa parahatol na makagibo nin nakadadanyar na mga komento asin sala patin ginigibong mas pasil na akoon an saiyang hatol.—Santiago 3:13, 17.

13. Paano an “kahoyoan na gikan sa kadonongan” nakaaapektar sa paagi nin pagtao nin hatol?

¹³ An “kahoyoan na gikan sa kadonongan” minaolang sa pagigin matarom na dai iniisip o maisog nin sarong parahatol. Pero, an pagmakolog sa pagkakatood o pagkamit kan pag-oyon nin saro dai dapat na magtulod sa sarong magurang na magsabi nin mga bagay na sa ikaoogma imbes na mahoyong itao an prangkang hatol basado sa Tataramon nin Dios. (Talinhaga 24:24-26; 28:23) An hatol na inako ni Amnon sa saiyang pinsan nagpanigo sa saiyang kamawotan, pero buhay nia an nagin kabayadan. (2 Samuel 13:1-19, 28, 29) Kun siring, an kamagurangan sa presente dai dapat na inaan an puwersa kan mga prinsipyo kan Biblia tanganing matoninong an konsensia nin saro, ta an paggibo kaiyan puwedeng magbugtak sa peligro kan saiyang buhay. Arog ni Pablo, an mga magurang dai dapat na mag-alangan sa pagsabi sa iba “kan gabos na sadol nin Dios.” (Gibo 20:26, 27; 2 Timoteo 4:1-4) An maygurang na Kristianong parahatol nagpapaheling nin diosnon na takot asin nagtatao nin matanos na hatol na may kahoyoan na gikan sa kadonongan.

14. Taano an magurang ta maninigong magmaan na dai gumibo nin mga desisyon na maninigong gibohon nin iba?

¹⁴ An kahoyoan na pinapadisan nin langitnon na kadonongan maolang sa magurang na gumibo nin maisog na mga kahagadan. Maninigong marealisar man nia na bakong madonong asin maninigo na sia an gumibo nin desisyon na maninigong gibohon nin ibang tawo para sa saiyang sadiri. An magurang maninimbag sa mga resulta kun sia nagdedesisyon para sa iba, asin babasolon sia para sa ano man na maraot na resulta. An magurang puwedeng apodon an atension sa sinasabi kan Biblia, pero kun mayo nin pagboot sa Kasuratan dapit sa bagay, an sadiring paghusgar asin konsensia kan tawo an dapat na magdeterminar kun ano an gigibohon nia o dai nia gigibohon. Arog kan sabi ni Pablo: “An lambang saro magpapasan kan saiyang sadiring pasan.” (Galacia 6:5; Roma 14:12) Minsan siring, an naghahapot puwedeng matabangan na makagibo nin tamang desisyon paagi sa paghahapot nin magurang na nakatatabang sa tawo na mangatanosan sa mga teksto na konektado sa mga dalan na tibaad bukas sa saiya.

15. Ano an maninigong gibohon kun dai aram kan magurang an simbag sa sarong hapot?

¹⁵ Kun dai aram nin magurang an simbag sa sarong hapot, dai sia maninigong sumimbag tangani sanang dai mapasopog. An kahoyoan na gikan sa kadonongan maolang sa saiya sa pagpatibasang asin tibaad pagtao nin salang simbag na sa huri puwedeng gikanan nin kasakitan. May “panahon na dai maggirong asin panahon na magtaram.” (Eclesiastes 3:7; ikomparar an Talinhaga 21:23.) An magurang maninigong “magtaram” sana kun aram nia an simbag sa hapot o nakagibo sia nin bastanteng pagsiyasat tanganing makatao nin eksaktong simbag. Madonong na dai simbagon an mga hapot nin pagbanabana.—Talinhaga 12:8; 17:27; 1 Timoteo 1:3-7; 2 Timoteo 2:14.

Halaga nin Dakol na Parahatol

16, 17. Taano ta maninigo sa mga magurang na maghinapotan?

¹⁶ An pamibi asin pag-adal makatatabang sa mga magurang na sumimbag sa mga hapot asin magkapot nin masakit na mga problema, pero maninigong girumdomon na “sa kadakolan nin mga parahatol may nahahaman.” (Talinhaga 15:22) An pagkonsulta sa ibang magurang nagbubunga nin mahalagang pagkatiripon nin kadonongan. (Talinhaga 13:20) Bakong gabos na magurang parareho an kabatidan o kaaraman sa Biblia. Kaya, an kahoyoan na gikan sa kadonongan maninigong magpahiro sa magurang na daing gayo nin kabatidan na magkonsulta sa mga magurang na may orog na kaaraman asin kabatidan, nangorogna kun kaipuhan na asikasohon an sarong magabat na bagay.

¹⁷ Kun an mga magurang pinipili na mag-asikaso sa magabat na bagay, sinda puwede man na humagad nin tabang na kompidensial. Tanganing matabangan sia sa paghokom sa mga Israelitas, si Moises puminili nin “mga lalaking may kakayahan, natatakot sa Dios, mga lalaking mapaniniwalaan, na naoongis sa madayang pakinabang.” Minsan ngani sinda mga magurang, bakong arog ki Moises an saindang kaaraman asin kabatidan. Kaya, “an magabat na kaso dinadara ninda ki Moises, alagad an lambang sadit na kaso sinda na mismo an nag-aasikaso bilang mga hokom.” (Exodo 18:13-27) Kun siring, kun kaipuhan, an mga magurang na nag-aasikaso sa depisil na kaso ngonyan puwedeng tama man na patabang sa eksperyensiadong mga paraataman, minsan ngani sinda an magibo kan ultimong desisyon.

18. Sa pag-asikaso sa hudisyal na mga bagay, ano an nagdedeterminar na mga bagay na naggagarantiya nin tamang mga desisyon?

¹⁸ An Judiong Mishnah nagsasabi na sa Israel an mga minakompuwesto sa mga hokoman kan banwaan laen-laen an kabilangan sono sa gabat kan kaso. May tunay na halaga an dakol na parahatol, minsan ngani an kadakolan sana dai naggagarantiya nin katamaan, ta an mayoriya puwede man na masala. (Exodo 23:2) An nagdedeterminar na mga bagay na naggagarantiya na magigibo an tamang mga desisyon iyo an Kasuratan asin an espiritu nin Dios. An kadonongan asin kahoyoan mapahiro sa mga Kristiano na pumasakop digdi.

Pagpatotoo na May Kahoyoan

19. Paano nakatatabang an kahoyoan sa banwaan ni Jehova na makapagpatotoo sa iba?

¹⁹ An kahoyoan nakatatabang man sa mga lingkod ni Jehova na magpatotoo sa mga tawo na laen-laen an ugale. (1 Corinto 9:22, 23) Huling si Jesus nagtokdo na may kahoyoan, an mga dukha dai natakot sa saiya, arog kan pagkatakot ninda sa maisog na mga namomoon sa relihiyon. (Mateo 9:36) Siyempre, an saiyang mahoyong mga paagi nakaakit sa “mga karnero,” bakong sa maraot na “mga kanding.” (Mateo 25:31-46; Juan 3:16-21) Minsan ngani si Jesus naggamit nin mapuwersang mga termino mapadapit sa arog-kanding na mga parasaginsagin, an mga Saksi ni Jehova dapat na mahoyo kun nagpapahayag kan mga mensahe nin Dios sa paghokom ngonyan ta mayo sinda kan pagmansay asin autoridad na kapareho ni Jesus. (Mateo 23:13-36) Mantang nadadangog ninda an mensahe kan Kahadean na ihinuhulit na may kahoyoan, ‘an may tamang tendensia sa buhay na daing katapusan nagigin mga paratubod,’ arog kan mga arog-karnero na nakadangog ki Jesus.—Gibo 13:48.

20. Paano nakikinabang an sarong inaadalan sa Biblia kun sia tinotokdoan na may kahoyoan?

²⁰ Nakakamtan an marahay na mga resulta sa pagpatotoo asin pagtotokdo sa iba na may kahoyoan asin pagpukaw sa saindang boot basado sa pangangatanosan, mga prinsipyo kan Biblia, asin katotoohan. “Pakangbanalon nindo an Cristo bilang Kagurangnan sa saindong puso,” an isinurat ni Pedro, “na perming andam na sumimbag sa lambang naghahagad saindo nin rason para sa saindong paglaom, alagad ginigibo iyan sa mahoyong boot asin hararom na paggalang.” (1 Pedro 3:15) An inaadalan na tinotokdoan sa mahoyong paagi makakokonsentrar sa pinag-aadalan imbes na maribaraw o tibaad masingkog pa ngani sa maisog, garo nakikidiskutiran na paagi. Arog ni Pablo, an mga ministro na nagtotokdo sa kahoyoan makasasabi: “Dai kami sa ano man na paagi nagbubugtak nin masisingkogan, tanganing an samong ministeryo dai makuanan nin kabasolan.” (2 Corinto 6:3) Minsan mga nagtutumang kun beses may marahay na reaksion sa mga nagtotokdo na may kahoyoan.

An Kahoyoan Hinahagad sa Gabos

21, 22. Paano an kahoyoan nagtatao nin pakinabang sa bilog na banwaan ni Jehova?

²¹ An Kristianong kahoyoan dai dapat na isolog sana tanganing pahangaon an mga nasa luwas kan organisasyon ni Jehova. An kuwalidad na ini kaipuhan man sa mga relasyon sa laog kan banwaan nin Dios. (Colosas 3:12-14; 1 Pedro 4:8) An mga kongregasyon napakokosog sa espirituwal kun an mahoyong mga magurang asin ministeryal na lingkod oroyon na nagtatarabang. An pagpaheling nin kahoyoan asin iba pang diosnon na kuwalidad mahalaga sa gabos sa banwaan ni Jehova ta may “sarong pagboot” para sa gabos.—Exodo 12:49; Levitico 24:22.

²² An kahoyoan nakakokontribuwir sa katoninongan asin kaogmahan kan banwaan nin Dios. Kun siring, iyan maninigong magin kabtang kan tela nin mga kuwalidad na minabilog sa gubing na sulot nin gabos na Kristiano sa harong, sa kongregasyon, asin saen man. Iyo, an gabos na lingkod ni Jehova kaipuhan na magsolog nin kahoyoan.

Ano an Isisimbag Nindo?

◻ Taano ta maninigong magin mahoyo an Kristianong mga magurang?

◻ Paano ginigiyahan nin kahoyoan an madonong na parahatol?

◻ Ano an halaga nin dakol na parahatol?

◻ Taano ta kapakipakinabang na magpatotoo sa kahoyoan?

[Ritrato sa pahina 15]

An banwaan ni Jehova arog-karnero asin kaipuhan na tratohon na may kahoyoan

[Credit Line]

Garo Nalbandian

[Ritrato sa pahina 17]

An kahoyoan nagpapangyari sa banwaan ni Jehova na magpatotoo sa mga tawo na laen-laen an ugale