Puwede Na daw an Minsan Arin na Relihiyon?

“Makaturotriste an naabtan kan satong kapanahonan. Kaipuhan niato nin relihiyon, pero mayo kita nin nanonompongan na Dios na tama dian.”—Lucian Blaga, Romanianong parasurat nin berso asin pilosopo

“An relihiyon asin an klero nagin, asin seguro magigin siring kaiyan sa halawig na panahon, kabilang sa pinakadakulang mga kaiwal nin progreso asin libertad.”—Khristo Botev, Bulgariong parasurat nin berso

AN MGA kotasyon digdi nagpaparisa kan alanganon na kamugtakan nin dakol na sinserong tawo. Sa irarom kan saindang boot namamatean ninda an pangangaipo nin relihiyon, pero an misteryosong Dios na itinotokdo kan klero bakong Dios na puwede nindang masabotan asin kamotan. Dugang pa, aram ninda na an klero asin an saindang mga relihiyon dakula an nagibo sa pag-olang sa progreso asin libertad nin tawo. Iyo, minsan ngani nag-oorog na namimidbid an pangangaipo sa relihiyon, an mga tawong sadiosan habo sa minsan arin na sanang relihiyon.

Sarong Mahalagang Pagkakalaen

An relihiyon may pangenot na kabtang sa naturalesa asin kasaysayan nin katawohan. An relihiyon inaapod kan The New Encyclopædia Britannica na “sarong katunayan sa eksperyensia, kultura, asin kasaysayan nin tawo” asin idinudugang pa: “Igwa nin mga ebidensia nin relihiyosong mga kaisipan asin kaimbodan sa lambang kabtang nin buhay nin tawo.” Alagad ta ipinaheheling nin kasaysayan na mayo sa mayor na mga relihiyon nin kinaban an nagin bendisyon sa katawohan.

An estadista nin India na si Jawaharlal Nehru sarong beses nagkomento: “An pagmamasid sa inaapod na relihiyon, o minsan paano an organisadong relihiyon, sa India asin sa iba pang lugar, nakapano sato nin makuring pagkauyam.” Kun kokonsideraron an mga guerrang pinaglabanan asin an mga krimen na ginibo sa ngaran nin relihiyon, kamo daw sadiosan na dai maoyon sa saiya?

Kan ika-18 siglo, an pilosopong Pranses na si Voltaire nagsabi nin interesanteng pagkakalaen. Sia nagsurat: “An relihiyon, sabi nindo, nagpaluwas nin dakol na makasosopog na mga gibo. An dapat nindong sabihon superstisyon, an superstisyon na naghahade sa satuyang mamondong kinaban. An superstisyon iyo an pinakamaringis na kaiwal kan dalisay na pagsamba na utang niato sa Supremong Persona.” Linabanan ni Voltaire an relihiyosong pagkapanatiko kan saiyang kaaldawan, pero pinapagdanay nia an saiyang pagtubod sa Dios bilang Kaglalang kan uniberso. Narisa nia an pagkakalaen nin tunay na relihiyon asin nin falso.

An Pangangaipong Pumili

Bakong gabos oyon ki Voltaire. An iba nagsasabing may karahayan sa gabos na relihiyon; kaya, dai ninda namamatean an dakulang pangangaipo na hanapon an tunay na relihiyon. An siring na mga tawo maninigong maghimate sa patanid ni propeta Isaias, na nagsurat: “Herak man kan mga nagsasabing an marahay maraot asin an maraot marahay, idtong mga riniribayan nin kadikloman an liwanag asin nin liwanag an kadikloman, idtong mga riniribayan nin mapait an mahamis asin nin mahamis an mapait!” (Isaias 5:20) An falsong relihiyon nagpaluwas kan ikararaot nin katawohan. Iyan nagbunga nin espirituwal na kadikloman asin nagwalat nin mapait na namit sa ngoso nin may mga sadiosan na puso.

Kun siring, an pagpipilian bakong pagigin ateista asin pagtubod sa minsan arin na relihiyon. Bakong arog kaiyan kasimple. Oras na midbidon nin saro an pangangaipo sa Dios, kaipuhan na hanapon nia an tunay na relihiyon. Arog kan marahayon na pagkasabi kan parasiyasat na si Émile Poulat sa Le Grand Atlas des Religions (An Dakulang Libro nin mga Relihiyon): “An mga bagay na itinotokdo asin hinahagad [nin mga relihiyon] grabe an pagkaralaenlaen kaya imposibleng tubodon gabos iyan.” Kaoyon digdi, an Pranses na Encyclopædia Universalis (Ensiklopedya Unibersal) nagsasabi: “Kun talagang mabuwelta sa relihiyon an ika-21 siglo, . . . kaipuhan na magdesisyon an tawo kun baga an sagradong mga bagay na iinoopresir sa saiya tunay o falso.”

Kun Paano Pipilion an Tamang Relihiyon

Ano an magiya sa sato sa pagpili kan tamang relihiyon? Tama an Encyclopædia Universalis sa pagtampok kaiyan kan halaga nin katotoohan. An relihiyon na nagtotokdo nin mga kaputikan dai puwedeng magin tunay. An kadarudakulaing propeta na naglakaw sa ibabaw nin daga nagsabi: “An Dios Espiritu, asin idtong nagsasamba saiya kaipuhan na magsamba saiya sa espiritu asin sa katotoohan.”—Juan 4:24.

An propetang iyan iyo si Jesu-Cristo, asin sinabi man nia: “Magmaan kamo sa falsong mga paratokdo nin relihiyon, na minadolok sa saindo na an gubing sa karnero alagad sa katotoohan mahanab na mga lobo. Mamimidbid nindo sinda paagi sa saindang mga bunga. . . . An lambang marahay na kahoy nagbubunga nin marahay, alagad an kahoy na raot nagbubunga nin raot.” (Mateo 7:15-17, Phillips) Sa pakaheling sa raot na bunga kan “darakulang” relihiyon sa kinaban, asin pati kan nagralataw na mga sekta asin kulto, an pagheling na dian nin dakol na sinserong tawo ‘raot na mga kahoy,’ dai nanggad puwede. Alagad paano daw ninda manonompongan an tunay na relihiyon?

Siyempre imposible na adalan an gabos na rinibong relihiyon sa laog asin luwas nin Kakristianohan bago kamo pumili. Pero, kun—arog kan sabi ni Jesus—gagamiton niatong pangilatis an katotoohan asin bunga, puwedeng mamidbid an tunay na relihiyon.

Katotoohan Asin Bunga

Sinabi ni Jesus an katotoohan. Kun dapit digdi, anong grupo nin mga nagtutubod an nagsisikwal sa relihiyosong mga kaputikan na kinua sa suanoy na mitolohiya asin Griegong pilosopiya na lakop sa kadaklan na relihiyon? An saro sa kaputikan na iyan iyo an katokdoan na an kalag nin tawo inmortal.a An katokdoan na ini nagpalataw sa naglalanghad sa Dios na doktrina nin impiernong may kalayo.

Sinabi man ni Jesus an bunga. Kun dapit digdi, may aram daw kamong relihiyon na nakapaluwas nin tunay na internasyonal na pag-iribaiba na dian an mga pag-oltanan sa rasa, tataramon, asin nasyonalidad napangganahan paagi sa pagkamoot asin pagsinabotan? May aram daw kamong pankinaban na relihiyosong komunidad na an mga miembro mas gusto pang lamagon kisa togotan na an mga politiko o namomoon sa relihiyon sutsutan sindang ikaongis an saindang mga tugang na lalaki saka babae asin gadanon sinda sa ngaran nin nasyonalismo o relihiyon? An relihiyon na nagsisikwal sa siring na mga relihiyosong kaputikan asin nagpapaluwas nin siring na bunga makatatao nin mapuwersang ebidensia na iyan tunay, bako daw?

Ginigibo Ngonyan an Tunay na Relihiyon

Igwa daw nin siring na relihiyon? Igwa. Pero kaipuhan na admitiron nindo na iyan bakong saro sa darakulang relihiyon kan kinaban. Maninigo daw niatong ipagngalas ini? Dai. Sa saiyang bantog na Sermon sa Bukid, sinabi ni Jesus: “Maglaog ka sa tatang hayakpit, huli ta halakbang asin mahiwas an dalan na pasiring sa kalaglagan, asin dakol an mga nagraralaog dian; sa ibong na kampi piot an tata asin hayakpit an dalan pasiring sa buhay, asin diit an mga nakakukua kaiyan.”—Mateo 7:13, 14.

Kaya saen daw manonompongan an tunay na relihiyon? Sa bilog na kapakumbabaan asin pagkasadiosan, kaipuhan na sabihon mi na an mga Saksi ni Jehova minabilog nin internasyonal na komunidad na naglalakaw sa ‘piot asin hayakpit na dalan’ na ini. Totoo, may pagtuyang inaapod nin mayor na mga relihiyon an mga Saksi ni Jehova na sarong sekta. Pero iyan an eksaktong inginaran kan apostatang mga namomoon sa relihiyon kan enot na siglo C.E. sa enot na mga Kristiano.—Gibo 24:1-14.

Taano ta nagsasarig an mga Saksi ni Jehova na nasa sainda an tunay na relihiyon? Bueno, sinda minabilog sa internasyonal na asosasyon nin magturugang na nakaaabot sa labing 200 na kadagaan asin nakahahale kan mga pagkabaranga sa nasyonalidad, rasa, tataramon, asin sosyal na kamugtakan. Asin nagsasayuma sindang tumubod sa mga doktrina—minsan pa gurano kasuanoy—na malinaw na kontra sa sinasabi kan Biblia. Alagad paano sinda nakaabot sa siring na marahayon na kamugtakan? Asin ano an kalabot sa pag-otob kan tunay na relihiyon? Ini asin an iba pang hapot manongod sa relihiyon ipaliliwanag sa masunod na duwang artikulo.

[Nota sa Ibaba]

[Ritrato sa pahina 7]

An mga Krusada kaiba sa raot na bunga nin falsong relihiyon

[Credit Line]

Bibliothèque Nationale, Paris

[Ritrato sa pahina 8]

An tunay na relihiyon nagpapaluwas nin marahay na bunga