Mag-ingat sa Falsong mga Propeta!
NAGHIHIGDA na tanganing matorog an mag-agom na taga-Brazil kan madangog nindang may nakalaog na mga parahabon sa saindang harong. Nakadulag an natakot na gayong mag-agom paagi sa bintana sa kuwarto asin nag-apod sa pulisiya. Alagad pakatapos an agom na babae nanluyang gayo huli kan eksperyensia kaya dai sia mapatorog sa harong asin kaipuhan na matorog sa harong kan saiyang ina.
An siisay man na salakaton an saiyang harong o habonan sa ibang paagi magpapaheling nin simpatiya. An siring na eksperyensia tibaad makanenerbiyos, asin makamomondo, nag-oorog an mga tawo na nagsasakit sa paaging ini. Alagad, igwa nin klase nin paghabon na may mas grabe nanggad na mga resulta.
Ano an mas grabeng klaseng ini nin paghabon, asin sairisay an mga parahabon? Si Jesu-Cristo nagtao sato nin impormasyon manongod dian kan, sa pakikipag-olay manongod sa satong panahon, sinabi nia: “Dakol na falsong propeta an malataw asin mandadaya sa dakol.” (Mateo 24:11) An falsong mga propeta mga parahabon? Sa anong paagi sinda naghahabon? An paghabon ninda konektado sa saindang paghula. Kaya tanganing masabotan nin lubos an bagay, kaipuhan ta ngunang maaraman kun ano an paghula sono sa Biblia.
Kun Ano an Kahulogan kan Paghula
Kun iniisip nindo an manongod sa paghula, tibaad an enot na iisipon nindo iyo an paghula manongod sa ngapit. Kabtang nanggad ini kan gibohon kan mga propeta nin Dios kan suanoy, alagad bako iyan an pangenot nindang gibohon. Halimbawa, kan sabihan si propeta Ezequiel paagi sa sarong bisyon na “humula sa doros,” kaipuhan nia sanang itaram an pagboot hale sa Dios. (Ezequiel 37:9, 10) Kan bistahon si Jesus sa atubangan kan mga saserdote, linutaban asin tinaplong sia, asin an mga paralamag nia nanunuyang nagsarabi: “Maghula ka sa samo, Cristo. Siisay an tuminaplong sa saimo?” Dai ninda hinagad ki Jesus na humula kan ngapit. Inangat sia ninda na midbidon paagi sa kapangyarihan nin Dios an tuminaplong sa saiya.—Mateo 26:67, 68.
An totoo, an pangenot na kaisipan na ipinaaabot kan orihinal na mga tataramon kan Biblia na itrinadusir na “humula” o “hula” sa pangenot sabihon an kaisipan nin Dios manongod sa sarong bagay o, siring kan pagkasabi kan libro nin Gibo, isaysay an “makangangalas na mga bagay nin Dios.” (Gibo 2:11) Sa pakahulogan na ini hinabonan an dakol na tawo kan falsong mga propeta.
Alagad, sairisay an falsong mga propeta, asin ano an hinahabon ninda? Tanganing simbagon an hapot na ini, balikan niato an kasaysayan kan nasyon nin Israel kan panahon ni Jeremias.