Paisi
Tabang sa mga Komite kan Namamahalang Grupo
An mga miembro kan Namamahalang Grupo kan mga Saksi ni Jehova, na ngonyan 12 an kabilangan, padagos na maimbod na naglilingkod sa saindang mga asignasyon. Sinda perming nagpapasalamat sa maimbod na mga miembro kan nagdadakol na “dakulang kadaklan” para sa saindong maigot na pagsuportar. (Kapahayagan 7:9, 15) Huli sa grabeng pag-oswag sa bilog na kinaban, garo maninigo ngonyan na tawan nin dugang na tabang an Namamahalang Grupo. Kaya napagdesisyonan na imbitaran an pirang katabang, sa kadaklan hale sa dakulang kadaklan, na umiba sa miting kan kada Komite kan Namamahalang Grupo, an boot sabihon, an mga Komite sa Tawohan, Pagpublikar, Paglilingkod, Pagtotokdo, asin Pagsurat. Kaya, an bilang kan mga maatender sa mga miting kan kada saro sa mga komiteng ini magigin pito o walo. Sa pagdirehir kan mga miembro nin komite kan Namamahalang Grupo, an mga katabang na ini makikakabtang sa orolay asin ootobon an laen-laen na asignasyon sa sainda kan komite. An bagong areglong ini mapoon sa Mayo 1, 1992.
Sa dakol nang taon, an kabilangan kan natatada sa linahidan na mga Saksi nag-iina, mantang an kabilangan kan dakulang kadaklan nagdakol nin lihis pa sa satong linalaoman. (Isaias 60:22) Kanigoan an pagpasalamat niato ki Jehova para sa makangangalas na pag-oswag na ini! Kan an bagong ngaran, mga Saksi ni Jehova, may pagpasalamat na akoon kan 1931, an pinakahalangkaw na bilang nin mga parahayag sa Kahadean 39,372, na an kadaklan naghihingakong linahidan na mga tugang ni Cristo. (Isaias 43:10-12; Hebreo 2:11) Pakalihis nin sisentang taon, kan 1991, an pankinaban na pinakahalangkaw na bilang nin mga parahayag 4,278,820, na 8,850 sana an naghihingakong kaiba sa linahidan na natatada. Siring sa linalaoman sa liwanag kan Kasuratan, ngonyan an “dakulang kadaklan” nalabihan na sa bilang an natatada kan “sadangoton na arimpompon” sa proporsion na labing 480 sa kada 1. (Lucas 12:32; Kapahayagan 7:4-9) Sa pag-asikaso sa naghihiwas na intereses kan Kahadean, talagang kaipuhan asin pinasasalamatan kan natatada an kooperasyon asin tabang kan dakulang kadaklan.
Arog kan ipinaliwanag sa luwas na Abril 15, 1992 kan The Watchtower, may grupo na naglilingkod kaiba kan espirituwal na Israel ngonyan na nakababaing sa mga Netineo asin sa mga aki kan mga oripon ni Salomon na nagpuli hale sa pagkadistiyero sa Babilonya kaiba kan Judiong natada; an mga bakong Israelitang idto mas dakol pa ngani sa papuling mga Levita. (Esdras 2:40-58; 8:15-20) An “mga itinao” hale sa dakulang kadaklan ngonyan maygurang na mga lalaking Kristiano na nagkaigwa na nin mahiwas na kabatidan bilang resulta nin pangangataman sa mga sangang opisina, sa gibong pagbibiyahe, asin sa 66,000 na kongregasyon na establisado ngonyan sa bilog na daga.
Kasuarin pa sana, ginibo an mga Pankahadean na Paadalan sa Pagmiministro sa bilog na kinaban para sa pagtotokdo sa mga paraataman asin sa saindang katabang na ministeryal na mga lingkod. Duman sana sa Estados Unidos, 59,420 paraataman an nag-atender. An “kamagurangan na lalaking” ini sa siring nasangkapan na otobon nin mas epektibo an saindang mga paninimbagan.—1 Pedro 5:1-3; ikomparar an Efeso 4:8, 11.
Sa opisina prinsipal kan mga Saksi ni Jehova sa Brooklyn, an ibang “itinao” dakolon nang taon na naglilingkod. Kaiba digdi an maygurang na mga paraataman hale sa dakulang kadaklan na nagkamit nin mayaman na abilidad asin kabatidan. Kaya an Namamahalang Grupo puminili nin pira sa mga paraataman na iyan na tumabang sa mga miting kan mga komite kan Namamahalang Grupo. Dai man nangangahulogan na an mga lalaking ini iyo an pinakahaloy na sa paglilingkod. Imbes, sinda maygurang, eksperyensiadong mga lalaki na may mga kuwalipikasyon na ginigibo sindang angay na tumabang sa partikular na mga langtad. An pagkaasignar sainda na magtrabaho kaiba nin sarong komite dai nagtatao sainda nin espesyal na katongdan. Arog kan sabi ni Jesus manongod sa saiyang mga disipulo, “kamo gabos magturugang.” (Mateo 23:8) Pero dakula an ipaniniwala sa mga lalaking ini, kaya “dakol man an hahagadon” sa sainda.—Lucas 12:48.
Ipinaggagayagaya niato an pag-abante kan organisasyon ni Jehova ngonyan. Sa nakaaging sampulong taon, haros 100 porsiento an pagdakol kan mga naglilingkod sa langtad, kaoyon kan hula manongod sa Orog na Dakulang David, si Jesu-Cristo: “An pag-oswag kan saiyang gobyerno asin katoninongan dai matatapos.” (Isaias 9:7, King James Version) Kun paanong an mga Netineo nagtrabaho kaiba kan mga saserdote sa paghirahay sa mga lanob nin Jerusalem, ngonyan man naootob an hula manongod sa organisasyon ni Jehova: “Asin mga tagaibang daga an matogdok kan saimong mga lanob.” (Isaias 60:10; Nehemias 3:22, 26) An modernong mga Netineo dapat na omawon para sa kaigotan na ipinaheheling ninda sa pagtogdok kan tunay na pagsamba, na tinatabangan “an mga saserdote ni Jehova” sa ano man na trabaho o paglilingkod sinda maasignar sa pankinaban na organisasyon ni Jehova.—Isaias 61:5, 6.