An Biblia—Tataramon nin Dios o nin Tawo?
Kapitulo 14: An Biblia Asin Kamo
Sinasabi nin modernong mga kritiko na an Biblia bakong sientipiko asin nagkakakontrahan, na iyan koleksion sana nin mga osipon. Sa ibong na lado, si Jesus nagsabi: “An saimong [sa Dios] tataramon katotoohan.” (Juan 17:17) An ebidensia nagsusuportar ki Jesus imbes na sa mga kritiko. Ipinaheheling nin mga katunayan na an Biblia totoo kun dapit sa kasaysayan. Dugang pa, an pambihirang pagkaoroyon kaiyan, an totoong mga hula kaiyan, an hararom na kadonongan kaiyan, asin an kapangyarihan kaiyan sa ikararahay sa buhay nin mga tawo gabos nagpapaheling na an Biblia iyo an nasusurat na Tataramon nin Dios. Arog kan isinurat ni apostol Pablo: “An gabos na Kasuratan ipinasabong nin Dios asin kapakipakinabang.”—2 Timoteo 3:16.
1. (Iiba an introduksion.) (a) Ano an pinatutunayan kan mga katunayan manongod sa Biblia? (b) Ano an mga implikasyon kan bagay na an Biblia iyo an ipinasabong na Tataramon nin Dios?
An bagay na an Biblia tataramon nin Dios, bakong nin tawo, may hararom na mga implikasyon. Iyan nangangahulogan na an Dios talagang nakikomunikar sa tawo. Sinimbag nia an dakol niatong hapot asin isinabi an solusyon sa dakol niatong problema. Iyan nangangahulogan man na an mga paglaom sa ngapit na sinasabi sa Biblia totoo. An Kahadean nin Dios talagang naghahade asin pag-abot nin panahon mahiro na haleon sa dagang ini an gabos na inhustisya, pan-aapi, asin kasakitan.
2. An kaaraman na an Biblia Tataramon nin Dios maninigong magpahiro saindo na gibohon an ano?
2 Ngonyan, an hapot: Ano an gigibohon nindo sa impormasyon na ini? Minsan paano, an kaaraman na an Biblia Tataramon nin Dios maninigong makadagka saindo na siyasaton iyan. An salmista pinanugaan nin kaogmahan an mga naggigibo kaiyan kan sia sumurat: “Maogma an tawo na dai naglakaw sa hatol kan mga maraot . . . kundi an saiyang kaogmahan yaon sa ley ni Jehova, asin sa saiyang ley sia nagbabasa aldaw asin banggi.”—Salmo 1:1, 2.
Akoon an Tabang
3, 4. (a) Arog kan ipinaheheling mismo kan Biblia, ano an maninigo niatong gibohon kun kita may nanonompongan na mga bagay sa Biblia na dai niato nasasabotan? (b) Siisay an perming naoogmang tabangan an mga tawo na orog na masabotan an Biblia?
3 Posible na sa pagbasa nindo kan Biblia may manonompongan kamong mga bagay na dai nindo nasasabotan. (2 Pedro 3:16) An sarong pangyayari na nakatala sa libro kan Biblia na Mga Gibo nagpapaheling na ini maninigong laoman. Dai mahaloy pagkagadan ni Jesus, an sarong Etiope nagbabasa sa mga hula kan libro sa Biblia na Isaias. An Kristianong ebanghelista na si Felipe sinabat an tawo asin naghapot: “Nakasasabot ka kan binabasa mo?” Dai nakasasabot an Etiope, kaya inimbitaran nia si Felipe na tabangan siang makasabot.—Gibo 8:30, 31.
4 An sarong babae sa Estados Unidos nasa kaparehong kamugtakan. Sia regular na nagbabasa kan Biblia, pero may dakol na mahahalagang katokdoan kan Biblia na dai nia nasasabotan sa sadiri niang pagbasa. Kaidto sanang nakipag-olay sia sa mga Saksi ni Jehova na nanodan nia an pundamental na mga katotoohan sa Biblia, kaiba an halaga kan Kahadean nin Dios asin an dakol na bendisyon na itatao sa katawohan kan Kahadean. Kun iimbitaran nindo sinda, an mga Saksi ni Jehova maoogma man na tabangan kamo tanganing orog nindong masabotan an binabasa nindo sa Biblia.
Iaplikar an Hatol kan Biblia
5. Sono sa Biblia, anong dalan an nagtatao nin kaogmahan?
5 Sinasadol kita bako sanang basahon an Biblia kundi gibohon man an nababasa niato. (Salmo 119:2) Dugang pa, an Biblia nagsasadol: “Namitan nindo asin helingon nindo na si Jehova marahay, O banwaan; maogma an makosog na tawo na nagpapaili sa saiya.” (Salmo 34:8) Garo man sana iyan nag-aagda na baloon niato an Dios. Probaran na mamuhay sono sa mga prinsipyo nin Dios, na ipinaheheling na kamo nagsasarig sa Dios na iyo an nakaaaram kun ano an pinakamarahay para sa saindo. Dian sana nindo maheheling na ini man nanggad an tamang dalan. An mga igwa kan siring na pagsarig sa Dios talagang maogma.
6. Praktikal daw na pagmaigotan na mamuhay sono sa mga pamantayan kan Biblia ngonyan? Ipaliwanag.
6 An iba nagsasabi na mayo nin makapamumuhay sono sa mga prinsipyo sa Biblia sa madaya, inmoral, madahas na kinaban na ini. Pero an totoo dakol an naggigibo kaiyan. Siisay? An sarong hoben na lalaki sa Aprika may nanompongan na grupo nin siring na mga tawo. Sia nagsurat: “Sa nakaaging pirang taon pinagmamasdan ko na digdi sa Zimbabwe kamo, na mga Saksi ni Jehova, an talagang naghihingoa na arogon si Cristo . . . Kamo sana an grupo, sagkod ngonyan, na nakakombensir sako manongod sa pagkamoot nin Dios asin sa puwersa kan Saiyang ebanghelyo, paagi sa saindong pamumuhay asin bako sanang paagi sa mga diskurso asin babasahon. Kamo namumuhay sono sa asin naghuhulit kan ebanghelyo mantang kadakoldakol kan naghuhulit kan ebanghelyo pero dai namumuhay sono dian.”
Akoon an Kapangyarihan Kaiyan
7. Anong usong mga gawe ngonyan an tumang sa sinasabi kan Biblia?
7 Sinabi ni apostol Pablo na an Biblia “kapakipakinabang para sa pagtokdo, sa pagsagwe, sa paghusay kan mga bagay.” (2 Timoteo 3:16) Pero kun beses an sinasabi kan Biblia bakong popular. Halimbawa, kinokondenar kan Biblia an homoseksuwal na mga gibo, pero an homoseksuwalidad ibinibilang nin dakol na puwede man na estilo nin pamumuhay. (Roma 1:24-27; 1 Corinto 6:9-11; 1 Timoteo 1:9-11) Sinasabi man kan Biblia na an buhay nin omboy na nasa matris pa mahalaga asin dai maninigong tuyong gadanon, pero mga 50 milyones na aborsion an ginigibo sa bilog na kinaban taon-taon. (Exodo 21:22, 23; Salmo 36:9; 139:14-16; Jeremias 1:5) Ano kun kita mismo nadedepisilan na akoon an sinasabi kan Biblia sa mga bagay na iyan?
8, 9. Kun sa primero nasasakitan kitang akoon an sarong punto sa Biblia, ano an maninigo niatong girumdomon, asin kiisay na mga pamantayan an maninigo niatong perming akoon?
8 Bueno, nanodan nin mga Kristiano na perming madonong na kuyogon an Tataramon nin Dios. Taano? Huli ta sa huri, an pagkuyog sa sinasabi kan Biblia perming nagbubunga kan pinakamarahay para sa gabos. (Talinhaga 2:1-11) An totoo, limitadong marhay an mga tawo kun dapit sa kadonongan. Bihira nindang matanaw an magigin resulta sa huri kan saindang ginigibo. Si propeta Jeremias nagtuga: “Aram kong marhay, O Jehova, na bakong sadiri nin tawo an saiyang dalan. Mayo sa tawong naglalakaw an kakayahan na giyahan an saiyang lakad.”—Jeremias 10:23.
9 Kaipuhan sanang mangalagkalag kita sa palibot tanganing maheling na tama an paghusgar na ini. An kadaklan na problema sa kinaban direktang mga resulta kan dai pagkuyog nin mga tawo sa hatol kan Tataramon nin Dios. Ipinaheling kan halawig, maribok na kasaysayan nin katawohan na dai kaya nin mga tawo na magsadiring magdesisyon sa moral na mga bagay. An Dios madonong nanggad kisa sainda. Taano ta dai akoon an sinasabi nia, imbes na sarigan an sadiri niatong kadonongan?—Talinhaga 28:26; Jeremias 17:9.
Mayo nin Siisay Man na Sangkap
10, 11. (a) Anong mga katunayan manongod sa pagkagibo sato asin sa kinaban na nabubuhayan niato an nagbubunga nin mga problema kun kita naghihingoang mamuhay sono sa mga pamantayan kan Biblia? (b) Anong klaseng pakikiiba an isinasadol sato kan Biblia na hanapon, asin saen niato manonompongan an siring na pakikiiba?
10 Pinatatanidan kita kan Biblia sa saro pang punto na dian kaipuhan niato an tabang. Kita gabos may minanang tendensia na magkasala. “An tendensia kan puso nin tawo maraot poon sa saiyang pagkaniaki.” (Genesis 8:21; Roma 7:21) Pinagagrabe pa an problemang ini kan bagay na kita nabubuhay sa sarong kinaban na dai nagkukuyog sa mga prinsipyo kan Biblia. Kaya kaipuhan niato an tabang bako sanang sa pagsabot kan Biblia kundi sa pag-otob man sa mga nanonodan niato. Iyan an dahelan na dinadagka kita kan Biblia na makiasosyar sa iba na boot na mamuhay sono sa diosnon na mga pamantayan. An salmista nagsurat: “Ikinaongis ko an kongregasyon nin mga maraot, asin dai ako minatukaw sa kaibanan nin mga tampalasan. . . . Sa tahaw kan nagkakasararong mga kadaklan oomawon ko si Jehova.” Asin an saro pang salmo nagsasabi: “Kanigoan karahay asin kanigoan kaogma na an magturugang mag-ontok na sararo!”—Salmo 26:5, 12; 133:1.
11 An pag-iribaiba mahalagang kabtang nin pagsamba para sa mga Saksi ni Jehova. Sinda may nagkapirang pagtiripon kada semana, saka mga kombension sa panapanahon, na duman iriba nindang inaadalan an Biblia asin pinag-oolayan kun paano minaaplikar sa saindang buhay an mga prinsipyo kaiyan. Sinda minakompuwesto nin lakop sa kinaban na “kasararoan nin magturugang” na dian an kada saro dinadagka asin tinatabangan na mapagdanay an haralangkaw na pamantayan na ini sa Biblia. (1 Pedro 2:17) Taano ta dai umatender sa saro nindang pagtiripon asin helingon kun paano makatatabang man saindo an siring na komunidad?—Hebreo 10:24, 25.
Mamuhay Sono sa Tataramon nin Dios
12. Anong mga bendisyon an makukua sa pakaaram na an Biblia Tataramon nin Dios?
12 Kaya an pakaaram na an Biblia Tataramon nin Dios nagtatao nin mga bendisyon asin paninimbagan. Kita mapalad ta nag-aako kita nin paggiya sa satong pan-aroaldaw na gawe na dai makukua sa iba. Dugang pa, nanonodan niato an pagkamoot nin Dios sa pagtao kan saiyang Aki sa pagtubos sa sato tangani na kita magkaigwa kan paglaom na daing katapusan na buhay. (Juan 3:16) Aram niato na si Jesus nagsasakop na ngonyan bilang Hade asin sa dai na mahahaloy mahiro sa paghale kan karatan sa daga. Asin may kompiansa niatong hinahalat an matanos na “bagong kalangitan asin sarong bagong daga” na ipinanuga mismo nin Dios.—2 Pedro 3:13.
13. Ano an nagigin mga paninimbagan niato kun inaako niato na an Biblia Tataramon nin Dios?
13 Alagad girumdomon na kita may paninimbagan na adalan an Biblia asin isapuso an sinasabi kaiyan. An Dios mismo nagsasadol: “Aki ko, dai mo paglingawan an sakong pagboot, asin kuyogon logod kan saimong puso an sakong mga togon.” (Talinhaga 3:1) Dawa kun an pagheling sa Biblia nin kadaklan tataramon sana nin tawo, kita maninigong mapusong tumogot na “makua logod na an Dios totoo, minsan pa an gabos na tawo makuang putikon.” (Roma 3:4) Pagiyahan sa kadonongan nin Dios an saindong buhay. “Manarig ka ki Jehova sa bilog mong puso . . . Sa gabos mong dalan girumdomon mo sia.” (Talinhaga 3:5, 6) An madonong na pagkuyog sa Tataramon nin Dios sa paaging ini makaaapektar sa saindong buhay sa ikararahay ngonyan asin sagkod lamang.