An Biblia—Tataramon nin Dios o nin Tawo?
Kapitulo 13: “An Tataramon nin Dios Buhay”
Sa nakaaging kapitulo, naheling niato na an hatol kan Biblia makatatabang sato na maresolberan an mga problema asin malikayan an mga sala. An daing sagkod na kadonongan kan hatol sa Biblia makosog na ebidensia nin pagpasabong. An Biblia mismo nagsasabi: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan.” (2 Timoteo 3:16) Alagad an ginigibo kan Biblia orog pa sa pagtao sato nin madonong na hatol. Bilang Tataramon nin Dios, iyan aktuwal na nakababakle sa mga tawo.
1-3. (a) Paano idinodoon kan Biblia an pangangaipo na magbakle sa pagkatawo? (b) Anong eksperyensia an nagpapaheling kan puwersa kan Biblia na bakleon an mga pagkatawo?
Talaga daw na nakababakle sa mga tawo an Biblia? Iyo, kaya pa ngani kaiyan na liwaton an saindang personalidad. Horophoropa an hatol na ini na nasusurat sa Biblia: “Dapat nindong haleon an daan na pagkatawo na oyon sa dati nindong paggawe na nararaot huli sa mapandayang mga horot kaiyan; kundi dapat kamong magin bago sa puwersa na nagpapahiro kan saindong isip, asin magsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.”—Efeso 4:22-24.
2 Talaga daw na posibleng isolog an bagong pagkatawo? Iyo nanggad! An totoo, an pagigin Kristiano kun beses may kaibang dramatikong mga pagliwat sa pagkatawo. (1 Corinto 6:9-11) Halimbawa, an sarong aking lalaki sa Amerika del Sur nailo sa edad na nuwebe. Huling nagdadakula na daing paggiya nin magurang, nagkaigwa sia nin grabeng mga problema sa pagkatawo. Sia nagsasaysay: “Pagtongtong ko sa edad na 18, biyo na akong adikto sa droga asin nabilanggo na huli sa paghabon tanganing masustentohan an bisyong iyan.” Pero an saiyang inaon saro sa mga Saksi ni Jehova, asin sa huri sia natabangan kan inaon.
3 An paliwanag nia: “Pinonan akong adalan sa Biblia kan inaon ko, asin pakalihis nin pitong bulan nahale ko an bisyo sa droga.” Binayaan man nia an dati niang mga kairiba asin nagkaigwa nin bagong mga amigo sa mga Saksi ni Jehova. Ipinagpadagos nia: “An bagong kairibang ini, kaiba kan sakong regular na pag-adal sa Biblia, nagpangyari sako na umoswag asin sa katapustapusi idusay an sakong buhay sa paglilingkod sa Dios.” Iyo, an dating adiktong ini sa droga asin parahabon nagin aktibong Kristiano, asin an radikal na pagbakleng ini nahimo paagi sa kapangyarihan kan Biblia. Totoo, arog kan sabi ni apostol Pablo, “An tataramon nin Dios buhay asin mapuwersa.”—Hebreo 4:12.
Nabakle Paagi sa Kaaraman
4, 5. Sono sa Colosas 3:8-10, ano an kaipuhan tanganing mapatalubo an bagong pagkatawo?
4 Paano binabakle kan Biblia an mga tawo? An simbag maheheling sa tekstong ini sa Biblia: “Irayo nanggad nindo an gabos na iyan sa saindo, an kaanggotan, kaongisan, karatan, pagraway, asin maraot na pagtaram hale sa saindong ngoso. Dai kamo magpapurutikputik. Halea nindo an daan na pagkatawo asin an mga gibo kaini, asin isolog nindo an bagong pagkatawo, na binabago paagi sa tamang kaaraman oyon sa ladawan kan Saro na naglalang kaiyan.”—Colosas 3:8-10.
5 Mangnoha an mahalagang kabtang kan tamang kaaraman sa Biblia. Ipinaliliwanag kan Biblia kun arin na mga ugale an kaipuhan niatong haleon asin kun arin an maninigo niatong kultibaron. An mismong kaaraman na iyan puwede nang magkaigwa nin mapuwersang epekto, arog kan nadiskobre nin sarong barobata sa timog nin Europa. May dakula siang problema: madahas na ugale. Kan nagdadakula, permi siang nakikiiwal, asin bilang paluwasan kan saiyang kadahasan, nagboksingero sia; pero dai pa man giraray nia makontrol an saiyang pagigin madahas. Kan nasa militar, nagkakaso sia huli sa pagbugbug sa sarong kapwa soldado. Pagkaluwas sa militar, nag-agom sia pero binubugbug man an agom nia. Sa sarong diskutiran sa pamilya, binugbug ngani nia an sadiri niang ama, na natumba sa daga. Tunay na sia sarong anggot, madahas na barobata!
6, 7. Paano an tamang kaaraman sa Biblia nakatabang sa sarong barobata sa timog na Europa na bakleon an saiyang pagkatawo?
6 Pero sa huri nakipag-adal sia kan Biblia sa mga Saksi ni Jehova asin nakadangog nin hatol na arog kan minasunod: “Dai kamo magbalos nin maraot sa maraot sa kiisay man. . . . Kun mahihimo, sagkod sa makakaya nindo, makipagkatoninongan sa gabos na tawo. Dai kamo bumalos, mga namomotan, kundi magtao nin lugar sa kaanggotan.” (Roma 12:17-19) Ini nakatabang saiya na marealisar kun gurano karaot na kaluyahan an saiyang pagigin madahas. Ipinondo nia an pagboksing, na narealisar niang dai angay sa matoninong na Kristianong pagkatawo. Pero kaipuhan na paglabanan pa man giraray nia an saiyang pagigin madahas.
7 Alagad ta natabangan sia kan nagdadakula niang kaaraman sa mga prinsipyo sa Biblia. Nadalisay kaini an saiyang konsensia, na huminiro man tanganing kontrahon an saiyang madaling pag-iinit. Sarong beses, kan medyo nag-oswag na sia sa saiyang pag-adal sa Biblia, may sarong dai kamidbid na naanggot asin pinag-insulto sia nin pasilyak. Namatean kan barobata an pamilyar na kaanggotan na nagtutubo sa saiyang boot. Dangan, namatean nia an saro pang puwersa: pakamate nin kasopganan; asin ini nakaolang saiya na padara sa saiyang kaanggotan. Imbes na “magbalos nin maraot sa maraot,” pinogolan nia an saiyang espiritu. Ngonyan, sia nabakle na, na may bagong pagkatawo, salamat sa tamang kaaraman hale sa Biblia.
Pagmidbid sa Dios
8. (a) Kiisay na ladawan ginigibo an bagong pagkatawo? (b) An tamang kaaraman na nagmomolde sa bagong pagkatawo dapat na may kaibang kaaraman manongod kiisay?
8 Totoo, dakol an aram kun ano an tamang gibohon, pero napadadaog sinda sa mga kaluyahan sa laman. Malinaw na an pagkaigwa nin tamang kaaraman sa tama asin sala bakong iyo sana an kaipuhan. May iba pang nakatabang sa duwang indibiduwal na isinasaysay sa enotan na magbakle. Ano daw iyan? An tekstong nasambitan sa enotan nagsabi: “Isolog nindo an bagong pagkatawo, na binabago paagi sa tamang kaaraman oyon sa ladawan kan Saro na naglalang kaiyan.” (Colosas 3:10) Mangnoha na, kun paanong si Adan kan enot ginibo sa ladawan nin Dios, an bagong pagkatawo ginigibo man sa ladawan nin Dios. (Genesis 1:26) Kun siring, an tamang kaaraman na nakatabang sa duwang barobatang ini kinaipuhan na may kaibang kaaraman sa Dios. Ipinagigirumdom sato kaini an mga tataramon ni Jesus: “Ini nangangahulogan nin buhay na daing katapusan, an saindong pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.”—Juan 17:3.
9. Paano nakatatabang sato an kaaraman manongod sa Dios na bakleon an satong pagkatawo?
9 Paano nakatatabang sato an kaaraman manongod sa Dios na bakleon an satong pagkatawo? Tinatawan kita kaiyan nin motibo na gibohon iyan. Kun namimidbid niato an Dios paagi sa satong pag-adal sa Biblia, nanonodan niato an saiyang banal na mga kuwalidad asin naheheling an pagkamoot na ipinaheling nia sa sato. Ini nagbubunga kan pagkamoot man niato sa saiya. (1 Juan 4:19) Kun siring, makukuyog niato an isinabi ni Jesus na iyo an enot asin kadarudakulaing togon: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.” (Mateo 22:37) An pagkamoot sa Dios nagpapahiro sato na mawoton na isolog an bagong pagkatawo na nakapaoogma sa saiya. Pinahihiro kita kaiyan na mawoton na orog na makaarog sa saiya, minsan pa gurano iyan kasakit.
Mga Kaluyahan na Hararomon an Pakagamot
10, 11. Paano an tamang kaaraman nakatabang sa sarong hoben na babae sa Amerika del Norte na pumoon na bakleon an saiyang pagkatawo?
10 Sa nagkapirang kaso, iyan talagang masakiton. An sarong hoben na babae sa Amerika del Norte kinaipuhan na makilaban nin igo tanganing magbakle. Biktima nin seksuwal na pag-abuso kan aki pa, nagdakula sia sa sarong madahas na pamilya asin kan huri nagdroga. Alagad ta mahal an droga kaya ipinabakal nia an saiyang sadiri bilang patotot tanganing masustentohan an bisyong iyan. Sia nambiktima man asin nanhabon sa mga turista asin an nangyari mas dakol an panahon nia sa mga bilanggoan asin bilyaran kisa sa harong.
11 Kan manompongan sia kan mga Saksi ni Jehova, sia ina na—pakalihis nin pirang aborsion—nin sarong aki sa luwas. Pero nagustohan nia an nadangog nia sa Biblia asin nagpoon na adalan iyan. Dai nahaloy pinatatalubo na nia an relasyon sa Dios asin ginigibo an mga pagliwat sa saiyang buhay.
12, 13. Isaysay kun paano an tamang kaaraman, oras na nakatanom na, minahiro bilang puwersa para sa pagbakle?
12 Alagad ta masakit na pakikilaban an nasa enotan ta hararomon an pakagamot kan daan na pagkatawo. Sarong beses, ikinaanggot nia an sarong hatol na may marahay na intension, nagpondo sia sa pag-adal kan Biblia, asin nagbuwelta sa saiyang marigsok na mga gibo. Pero dai nia malingawan an katotoohan kan Biblia na ikinatanom sa saiya, asin inadmitir nia: “Sa panapanahon nakamamate ako nin kasalan, asin minasabong sa isip ko an mga tataramon kan 2 Pedro 2:22: “An ayam minabalik sa sadiring suka, asin an orig na nalinigan sa paglabog sa lamaw.’”
13 Kan huri, an kaaraman na ini nagmotibar saiya na gumibo nin saro pang determinadong paghihingoa. Sia nagsasabi: “Pinonan kong buksan an tata ki Jehova asin mamibi nin parate para sa tabang.” Kaidto, an bagong pagkatawo orog na nakatanom, minsan ngani kaipuhan pa man giraray siang makilaban nin igo. Sarong beses, sa panahon nin kaluyahan, nagbuwelta sia sa pagbuburat asin inmoralidad. Pero an reaksion nia kaidto nagpaheling na sia talagang nagbabakle na. Ikinabalde nia an saiyang sadiri asin nagsabi: “Namibi ako asin nag-adal nin igo.” Sa katapustapusi, an Tataramon nin Dios nagkaigwa nin puwersa sa saiyang buhay sagkod na sia nagin aktibong Kristiana, na may malinig, kagalang-galang na pamumuhay. Pirang taon na ngonyan, sia biyo nang laen sa dati niang inabuso, adikto sa droga, may malaswang pamumuhay na pagkatawo.
Sarong Banwaan na Binakle kan Tataramon nin Dios
14, 15. (a) Anong puwersa gikan sa Dios an naghihiro paagi sa Biblia? (b) Ano an pirang ugale nin tunay na mga Kristiano ngonyan?
14 An puwersa kan Biblia sa buhay nin mapakumbabang mga tawo nagpapaheling na iyan bako sanang gibo nin tawo. Bilang ipinasabong na Tataramon nin Dios, iyan pinakapaagihan kan paghiro kan espiritu nin Dios. An espiritu na nagpangyari sa mga milagro ni Jesus nagtatabang man sato ngonyan na madaog an maraot na mga kuwalidad asin mapatalubo an Kristianong pagkatawo. An totoo, an pundamental na mga kuwalidad na kaipuhan na kultibaron nin mga Kristiano—an pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri—inaapod sa Biblia na “mga bunga kan espiritu.”—Galacia 5:22, 23.
15 Ngonyan, an espiritung ini naghihiro bako sanang sa pirang indibiduwal kundi sa minilyon na “tinokdoan ni Jehova” asin may ‘abundang pakipagkatoninongan’ sa Saiya. (Isaias 54:13) Sairisay ini? Itinao ni Jesus an sarong paagi na mamidbid sinda, sa pagsabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) An Kristianong pagkamoot bunga kan espiritu asin mayor na kabtang kan Kristianong bagong pagkatawo. Igwa daw nin grupo nin mga tawo na nagpapaheling nin pagkamoot sa paaging isinabi ni Jesus?
16, 17. Kotaron an pirang komento sa peryodiko na nakatatabang na mamidbid an mga “tinokdoan ni Jehova” asin may ‘abundang katoninongan.’
16 Bueno, hinanyoga an sarong parteng ini kan surat na ipinadara sa New Haven Register, sarong peryodiko sa Amerika del Norte: “Baga man kamo nagkainit o nauyam [naanggot], arog ko, sa saindang paghuhulit, dai kang maginibo kundi hangaan an saindang kaimbodan, an saindang karahayan, an saindang pambihirang halimbawa nin gawe-gawe asin marahay na pamumuhay.” An peryodikong Aleman na Münchner Merkur nagtataram manongod sa iyo man sanang grupo kan iyan magsabi: “Sinda an pinakasadiosan asin pinakalistong mga parabuhis sa [Aleman na] Republika Pederal. An pagkuyog ninda sa mga ley maheheling sa saindang pagpadalagan nin sasakyan saka sa mga estadistika nin krimen.”
17 Manongod kiisay nagtataram an duwang peryodikong ini? Manongod sa iyo man sanang grupo na sinabi sa Herald kan Buenos Aires, Argentina. An peryodikong ini nagsabi: “Pinatunayan nin mga Saksi ni Jehova sa nag-aging mga taon na sinda mahigos, toltol, ekonomiya asin matatakton sa Dios na mga siudadano na arog kan malinaw na kaipuhan kan nasyon.” An sosyolohikong pagsiyasat sa Zambia na ipinublikar sa American Ethnologist nagtaram man sa grupong iyan. Iyan nagsasabi: “An mga Saksi ni Jehova nagkakaigwa nin orog na kapangganahan kisa mga miembro nin ibang denominasyon sa pagpapadanay sa marigon na mga pag-agoman.”
18, 19. Paano ilinadawan an mga Saksi ni Jehova sa Italia asin Aprika del Sur?
18 An peryodikong La Stampa sa Italia nagtataram man manongod sa mga Saksi ni Jehova kan iyan magsabi: “Sinda an pinakamaimbod na mga siudadanong mamawoton nin siisay man: dai sinda naglilikay sa pagbubuhis o naghihingoang madulagan an bakong kombenyenteng mga ley para sa sadiri nindang ganansia. An moral na mga pamantayan na pagkamoot sa kataed, pagsayuma sa kapangyarihan, paglikay sa kadahasan asin personal na pagkasadiosan (na para sa kadaklan na Kristiano ‘mga reglamento kun Domingo’ na marahay sanang ihulit sa pulpito) nakaiimpluwensia sa saindang ‘pan-aroaldaw’ na pamumuhay.”
19 An sarong propesor sa unibersidad sa Aprika del Sur na nakaeksperyensia nin diskriminasyon sa irarom kan mga ley sa rasa kan nasyon na iyan inaapod an mga Saksi ni Jehova na “sarong banwaan na tinokdoan kan halangkaw na mga pamantayan kan Biblia na talagang magin ‘buta sa kolor.’” Sa pagpaliwanag kaini, idinugang nia: “Uya an mga tawo na naheheling an panlaog nin iba, bako sanang an kolor kan saindang kublit. An mga Saksi ni Jehova ngonyan iyo an solamenteng tunay na kasararoan nin magturugang sa katawohan.”
20. Taano ta napapalaen an mga Saksi ni Jehova?
20 Ipinaheheling kan mga komentong ini na may sarong grupo nin mga tawo na binukasan an saindang puso sa Biblia asin aktibo an espiritu nin Dios. Mahalagang mangnohon na sinda man sana an sinabi niato sa enotan na nagkukuyog sa pagboot ni Jesus na ihulit an maogmang bareta kan Kahadean sa bilog na kinaban. (Mateo 24:14) Taano ta napapalaen an mga Saksi ni Jehova sa mga paaging ini? Sa dakol na bagay sinda daing kalaenan sa iba. Igwa man sinda kan kaparehong mga kaluyahan sa laman, kaparehong mga problema sa kabuhayan, asin kaparehong pundamental na mga pangangaipo. Alagad bilang grupo, sinda namomoot sa Dios, isinasaboot an Biblia, asin pinababayaan na iyan magkaigwa nin puwersa sa saindang buhay.
21. Ano an pinatutunayan kan bagay na may sarong banwaan na arog kan mga Saksi ni Jehova sa pano nin pagkaongis na kinaban ngonyan?
21 Minilyon na Saksi ni Jehova an yaon sa labing 200 na kadagaan. Kaiba sainda an mga tawo hale sa gabos na rasa, tataramon, asin sosyal na posisyon. Pero sinda sararo, matoninong, internasyonal na kasararoan nin magturugang. Sinda marahay na mga siudadano kan ano man na nasyon na iniistaran ninda, pero primero asin sa pangenot, sinda mga sakop kan Kahadean nin Dios, asin sinda gabos aktibong marhay sa pagsaysay sa iba kan maogmang bareta kan Kahadean na iyan. Makangangalas nanggad na sa baranga, pano nin pagkaongis na kinaban na ini, may grupo na arog kan mga Saksi ni Jehova. An bagay na sinda yaon mapuwersang patotoo na an espiritu nin Dios aktibo pa sa katawohan. Asin iyan pruweba na an Biblia talagang “buhay asin mapuwersa.”