An Pag-agom Sana daw an Liyabe sa Kaogmahan?
“Sia hiwas na magpakasal sa siisay man na boot nia, sanang dian sa Kagurangnan. Alagad sia orog na maogma kun sia magdanay na siring.”—1 CORINTO 7:39, 40.
1. Paano ilinaladawan kan Kasuratan si Jehova, asin ano an ginibo nia para sa saiyang mga linalang?
SI Jehova iyo an “maogmang Dios.” (1 Timoteo 1:11) Bilang an Abundang Paratao kan “lambang marahay na balaog asin lambang sangkap na regalo,” itinatao nia sa gabos niang intelihenteng linalang—tawo asin espiritu—an eksaktong kaipuhan ninda tanganing magin maogma sa paglilingkod sa saiya. (Santiago 1:17) Mapadapit dian, an gamgam na nag-aawit, an nagdadarudalagan na ido, o an nagkakawat na lumod gabos nagpapatotoo na linalang ni Jehova an mga hayop tanganing maogma sa buhay sa saindang kanya-kanyang istada. Sinasabi pa ngani kan salmista sa poetikong paagi na “nagkabarasog an mga kahoy ni Jehova, an mga sedro sa Libano na itinanom nia.”—Salmo 104:16.
2. (a) Ano an nagpapaheling na si Jesus nakanonompong nin kaogmahan sa pag-otob sa kabotan kan saiyang Ama? (b) Ano an mga dahelan kan mga disipulo ni Jesus na maogma?
2 Si Jesu-Cristo ‘an eksaktong representasyon kan saiya mismong naturalesa.’ (Hebreo 1:3) Kaya bakong makangangalas na si Jesus apodon na an “maogma asin iyo sanang Paraboot.” (1 Timoteo 6:15) Itinatao nia sato an makangangalas na halimbawa sa kun paano an pag-otob sa kabotan ni Jehova mas nakakokontento kisa pagkakan, na nagbubunga nin makuring kaogmahan. Ipinaheheling man sato ni Jesus na puwedeng maogma kun naghihiro na may takot sa Dios, an boot sabihon, may hararom na paggalang asin tamang pagkakubhan na mapaanggot Sia. (Salmo 40:8; Isaias 11:3; Juan 4:34) Kan an 70 disipulo magpuli na “may kaogmahan” pakatapos nin paghuhulit kan Kahadean, si Jesus mismo “naogma nin labi-labi sa banal na espiritu.” Pakapahayagan kan saiyang kaogmahan sa saiyang Ama sa pamibi, an mga disipulo naman an kinaolay nia asin sinabi: “Maogma an mga mata na nakaheheling kan mga bagay na saindong naheheling. Huli ta ako nagsasabi saindo, Kadakol na mga propeta asin hade an nagmarawot na maheling an mga bagay na saindong naheheling alagad dai naheling an mga iyan, asin na madangog an mga bagay na saindong nadadangog alagad dai nadangog an mga iyan.”—Lucas 10:17-24.
Mga Dahelan na Maogma
3. Ano an nagkapirang dahelan na maogma?
3 Dai daw maninigong maogma an satong mga mata na maheling an mga bagay na naheheling niato bilang kaotoban kan Tataramon asin mga katuyohan ni Jehova sa panahon na ini kan katapusan? Dai daw kita maninigong maogma nin labi-labi na masabotan an mga hula na dai nasabotan kan maimbod na mga propeta asin hade na arog ni Isaias, Daniel, asin David? Dai daw kita nawiwili na maglingkod sa maogmang Dios, si Jehova, sa pangengenot kan maogmang Paraboot, an satong Hadeng Jesu-Cristo? Siyempre iyo!
4, 5. (a) Tanganing magdanay na maogma sa paglilingkod ki Jehova, ano an kaipuhan na likayan niato? (b) Ano an pirang bagay na nakakokontribuwir sa kaogmahan, asin anong hapot an pinalalataw kaini?
4 Pero, kun boot niatong magdanay na maogma sa paglilingkod sa Dios, dai niato dapat na ibasar sa kinabanon na mga ideya an satong mga enot na kaipuhan para sa kaogmahan. Ini madaling makapalibog sa satong isip ta kabale dian an materyal na kayamanan, mapagpasikat na pamumuhay, asin iba pa. An ano man na “kaogmahan” na basado sa siring na mga bagay madaling mawawara, ta an kinaban na ini mawawara.—1 Juan 2:15-17.
5 An kadaklan na nagdusay na lingkod ni Jehova nakaaaram na an pakaabot sa kinabanon na mga pasohan dai magtatao nin tunay na kaogmahan. Solamente an satong langitnon na Ama an nagtatao nin espirituwal asin materyal na mga bagay na nakakokontribuwir sa tunay na kaogmahan kan saiyang mga lingkod. Kanigoan an pagpasalamat niato sa espirituwal na kakanon na itinatao nia sato paagi sa “maimbod asin madonong na oripon”! (Mateo 24:45-47) Pinasasalamatan man niato an pisikal na pagkakan asin iba pang materyal na bagay na inaako niato sa mamomoton na kamot nin Dios. Yaon man an makangangalas na balaog nin pag-agom asin an konektadong mga kaogmahan sa buhay pampamilya. Bakong makangangalas na an odok sa pusong kamawotan ni Noemi para sa saiyang nabalong mga manugang na babae ipinahayag sa mga tataramon na ini: “Tawan logod kamo nin balaog ni Jehova, asin makanompong kamo nin kapahingaloan an balang saro sa harong kan saiyang agom na lalaki.” (Rut 1:9) Kaya an pag-agom sarong liyabe na makabubukas sa pinto pasiring sa dakulang kaogmahan. Pero pag-agom sana daw an liyabe na makabubukas sa pinto pasiring sa maogmang buhay? An mga hobenes nangorogna kaipuhan na odok na siyasaton kun baga ini siring.
6. Sono sa Genesis, ano an pangenot na katuyohan kan areglo nin pag-agom?
6 Sa pagsaysay kan ginikanan nin pag-agom, an Biblia nagsasabi: “Linalang nin Dios an tawo siring sa saiyang ladawan, sa ladawan nin Dios linalang nia sia; linalang nia an lalaki asin babae. Dangan, binendisyonan sinda nin Dios asin sinabihan sinda nin Dios: ‘Pangagbunga asin pangagdakol kamo asin panoa nindo an daga asin sakopa nindo iyan.’” (Genesis 1:27, 28) Sa pag-establisar ni Jehova kan pag-agom, si Adan ginamit na buhayon an dagdag pang mga tawong linalang, sa siring pinadadakol an rasa nin tawo. Pero bako sana ini an katuyohan kan pag-agom.
“Sanang Dian sa Kagurangnan”
7. Anong kahagadan sa pag-agom an pinagmaigotan na marhay na otobon nin sarong maimbod na patriarka?
7 Mantang si Jehova Dios an Kagpundar kan pag-agom, lalaoman niato na sia magbugtak nin mga pamantayan sa pag-agom na magbubunga nin kaogmahan sa saiyang mga lingkod. Kan mga panahon kan patriarka, an pag-agom sa mga bakong parasamba ki Jehova mapuwersang pinogolan. Pinasumpa ni Abraham an oripon niang si Eliezer sa ngaran ni Jehova na dai nia ikukua nin agom an aki kan patriarka na si Isaac sa mga Cananeo. Si Eliezer nagbaklay nin harayo asin maingat na kinuyog an mga instruksion ni Abraham tanganing manompongan ‘an babae na itinalaga ni Jehova para sa aki kan saiyang kagurangnan.’ (Genesis 24:3, 44) Kaya naagom ni Isaac si Rebeca. Kan an aki nindang si Esau pumili nin mga agom sa paganong mga Hiteo, an mga babaeng ini “ginikanan nin kapaitan nin boot ni Isaac asin ni Rebeca.”—Genesis 26:34, 35; 27:46; 28:1, 8.
8. Anong pangangalad an ibinugtak sa pag-agom kan tipan nin Pagboot, asin taano?
8 Sa irarom kan tipan nin Pagboot, an pag-agom nin mga lalaki o babae na gikan sa isinabing mga nasyon na Cananeo bawal. Pinagbotan ni Jehova an saiyang banwaan: “Dai ka makipagbalae sa sainda. Dai mo ipagtao an saimong aking daraga sa saiyang aki, asin dai mo pagkuanon an saiyang aking daraga para sa saimong aki. Huli ta patatalikodon nia an saimong aking lalaki sa pagsunod sa sako, asin sinda siertong maglilingkod sa ibang mga dios; asin an kaanggotan ni Jehova talagang malaad tumang sa saimo, asin siertong paparaon ka nia sa madali.”—Deuteronomio 7:3, 4.
9. Anong hatol sa pag-agom an itinatao kan Biblia sa mga Kristiano?
9 Bakong makangangalas na an kaagid na mga pangangalad sa pag-agom sa mga dai nagsasamba ki Jehova aplikado man sa Kristianong kongregasyon. Hinatolan ni apostol Pablo an mga kapagtubod nia: “Dai kamo makipagsakal na bakong timbang sa mga dai nagtutubod. Huli ta anong pakikiiba igwa an katanosan asin katampalasanan? O ano an pakikisumaro kan liwanag sa diklom? Dugang pa, ano an pagkakaoyon ni Cristo asin ni Belial? O ano an pakikikabtang kan tawong may pagtubod sa daing pagtubod?” (2 Corinto 6:14, 15) An hatol na ini minaaplikar sa laen-laen na paagi asin aplikado nanggad sa pag-agom. An malinaw na instruksion ni Pablo sa gabos na nagdusay na lingkod ni Jehova iyo na maninigo na sinda mag-isip “sanang [agomon an saro] kun sia kasaro kan Kagurangnan.”—1 Corinto 7:39, nota sa ibaba.
Dai Nakaaagom “sa Kagurangnan”
10. Ano an ginigibo nin dakol na Kristianong daing agom, asin anong hapot an minalataw?
10 An dakol na Kristianong daing agom pinili na arogon an halimbawa ni Jesu-Cristo sa pagpatalubo sa balaog na dai pag-agom. Saro pa, huli ta sa presente dai nakanonompong nin diosnon na maaagom asin kun siring mag-agom “sa Kagurangnan,” an dakol na maimbod na Kristiano nagsarig ki Jehova asin dai nguna nag-agom imbes na mag-agom nin daing pagtubod. Pinaluluwas sa sainda kan espiritu nin Dios an mga bunga na arog kan kagayagayahan, katoninongan, pagtubod, asin pagpopogol sa sadiri, na nagpapangyari sainda na magdanay na mabini mantang daing agom. (Galacia 5:22, 23) Kabilang sa mapangganang nakapapasar sa pagbalong ini sa debosyon sa Dios an dakol niatong tugang na Kristiana, na iginagalang na gayo niato. Sa laen-laen na kadagaan, mas dakol sinda sa mga tugang na lalaki asin kun siring may dakulang kabtang sa paghuhulit. An totoo, “si Jehova mismo an nagtatao kan tataramon; an mga babae na nagsasabi kan maogmang bareta dakulang hukbo.” (Salmo 68:11) Sa katunayan, an dakol na daing agom na lingkod nin Dios lalaki man o babae nagdadanay sa integridad huli ta sinda ‘nananarig ki Jehova sa bilog nindang puso, asin itinatanos ninda an saindang dana.’ (Talinhaga 3:5, 6) Alagad segurado daw na magigin mamondo an mga sa presente dai puwedeng mag-agom “sa Kagurangnan”?
11. Sa ano makasisierto an mga Kristiano na nagdadanay na daing agom huli sa paggalang sa mga prinsipyo kan Biblia?
11 Girumdomon niato na kita mga Saksi kan maogmang Dios, si Jehova, na naglilingkod sakop kan maogmang Paraboot, si Jesu-Cristo. Kaya kun an paggalang niato sa mga pangangalad na malinaw na sinasabi sa Biblia magpahiro sato na magdanay na daing agom ta dai kita nakanonompong nin maaagom “sa Kagurangnan,” makatanosan daw na isipon na pababayaan kitang magin mamondo nin Dios asin ni Cristo? Dai nanggad. Kun siring, kaipuhan na isipon niato na posibleng magin maogma bilang mga Kristiano mantang daing agom. Kaya ni Jehova na gibohon kitang tunay na maogma baga man may agom o daing agom.
An Liyabe sa Tunay na Kaogmahan
12. Ano an ipinaririsa kan nangyari sa suwayan na mga anghel kun dapit sa pag-agom?
12 An pag-agom bakong an solamenteng liyabe sa kaogmahan para sa gabos na lingkod nin Dios. Halimbawa, helinga an mga anghel. Bago kan Baha, an ibang anghel pinatubo an mga horot na bakong natural sa espiritung mga linalang, dai na nakontento sa bagay na sinda dai puwedeng mag-agom, asin nagmateryalisar nin mga hawak sa laman tanganing makaagom nin mga babae. Huli ta an mga anghel na ini “nagbaya sa saindang sadiring tamang erokan,” sinda “itinagama [nin Dios] na may daing sagkod na mga gapos sa irarom nin kadikloman para sa paghokom kan dakulang aldaw.” (Judas 6; Genesis 6:1, 2) Malinaw na nungka na inareglo nin Dios na mag-agom an mga anghel. Kaya an pag-agom dai puwedeng magin liyabe sa saindang kaogmahan.
13. Taano ta maogma an banal na mga anghel, asin ano an ipinaririsa kaini para sa gabos na lingkod nin Dios?
13 Pero, maogma an maimbod na mga anghel. Ibinugtak ni Jehova an mga pasisikadan kan daga na may “magayagayang konsierto an mga bitoon nin kaagahan asin sararong pag-omaw kan [anghel na] mga aki nin Dios.” (Job 38:7, The New Jerusalem Bible) Taano ta maogma an banal na mga anghel? Huli ta sinda perming naglilingkod ki Jehova Dios, ‘naghihinanyog sa tingog kan saiyang tataramon’ tanganing otobon iyan. Ikinaoogma ninda an “pag-otob sa saiyang ikinaoogma.” (Salmo 103:20, 21, nota sa ibaba) Iyo, an kaogmahan kan banal na mga anghel gikan sa maimbod na paglilingkod ki Jehova. Iyan man an liyabe sa tunay na kaogmahan para sa mga tawo. An totoo, an mag-agom na linahidan na mga Kristiano na maogmang naglilingkod ngonyan sa Dios dai magigin mag-agom kun buhayon na liwat pasiring sa langitnon na buhay, pero sinda maoogma bilang espiritung mga linalang na nag-ootob sa banal na kabotan. Kun siring, may agom man o daing agom, an gabos na maimbod na lingkod ni Jehova puwedeng magin maogma ta an tunay na pasisikadan nin kaogmahan maimbod na paglilingkod sa Kaglalang.
“Bagay na Mas Marahay Kisa mga Aking Lalaki Asin Aking Babae”
14. Anong makahulang panuga an itinao sa diosnon na mga kapon sa suanoy na Israel, asin taano ta tibaad garo ini pambihira?
14 Dawa kun an maimbod na Kristiano dai noarin man mag-agom, ikagagarantiya nin Dios an kaogmahan kan sarong iyan. Makukua an pagpakosog sa mga tataramon na ini na makahulang isinabi sa mga kapon sa suanoy na Israel: “Siring an sabi ni Jehova sa mga kapon na nag-ootob kan sakong mga sabbath asin nagpili kan sakong naogmahan patin nangangapot sa sakong tipan: ‘Tatawan ko sinda sa sakong harong asin sa laog kan sakong mga lanob nin girumdoman asin ngaran, bagay na mas marahay kisa mga aking lalaki asin aking babae. Ngaran na daing katapusan an itatao ko sainda, saro na dai puputolon.’” (Isaias 56:4, 5) Tibaad an saro naglalaom na an mga ini panunugaan nin agom asin mga aki tanganing magdanay an saindang ngaran. Pero an ipinanuga sa sainda “bagay na mas marahay kisa mga aking lalaki asin aking babae”—nagdadanay na ngaran sa harong ni Jehova.
15. Ano an masasabi manongod sa kaotoban kan Isaias 56:4, 5?
15 Kun an mga kapon na ini ibibilang na makahulang ladawan mapadapit sa “Israel nin Dios,” sinda nagrerepresentar sa mga linahidan na mag-aako nin nagdadanay na lugar sa espirituwal na harong, o templo, ni Jehova. (Galacia 6:16) Daing duwa-duwa, an hulang ini magkakaigwa nin literal na aplikasyon sa diosnon na mga kapon kan suanoy na Israel na bubuhayon liwat. Kun aakoon ninda an pantubos na atang ni Cristo asin magpapadagos na pilion an kinawiwilihan ni Jehova, sinda mag-aako nin “ngaran na daing katapusan” sa bagong kinaban nin Dios. Ini puwede man na umaplikar sa mga kabilang sa “ibang karnero” sa panahon na ini kan katapusan na idinidigson an pag-agom asin pag-aki tanganing mas lubos na ikadusay an sadiri sa paglilingkod ki Jehova. (Juan 10:16) An iba sa sainda tibaad magadan na daing agom asin daing aki. Pero kun sinda maimbod, sa pagbuhay liwat sinda maako nin “bagay na mas marahay kisa mga aking lalaki asin aking babae”—ngaran na “dai puputolon” sa bagong palakaw nin mga bagay.
An Pag-agom Bakong Iyo an Solamenteng Liyabe sa Kaogmahan
16. Taano ta masasabi na an pag-agom dai perming nagtatao nin kaogmahan?
16 An iba naghohona na an kaogmahan dai ikasusuway sa pag-agom. Pero kaipuhan na admitiron na minsan sa tahaw kan mga lingkod ni Jehova ngonyan, an pag-agom dai perming nagtatao nin kaogmahan. Iyan nakareresolber sa pirang problema pero sa parate ginigikanan nin iba na tibaad mas masakit na atubangon kisa inaagihan nin mga daing agom. Sinabi ni Pablo na an pag-agom nagtatao nin ‘kahorasaan sa laman.’ (1 Corinto 7:28) May mga panahon na an may agom “napupurisaw” asin “nababanga.” Sa parate sia nasasakitan na magibo an “danay na paglilingkod sa Kagurangnan na mayo nin kaolangan.”—1 Corinto 7:33-35.
17, 18. (a) Ano an ibinareta nin pirang nagbibiyaheng paraataman? (b) Ano an ihinatol ni Pablo, asin taano ta kapakipakinabang na iaplikar iyan?
17 An pag-agom asin dai pag-agom pareho balaog nin Dios. (Rut 1:9; Mateo 19:10-12) Minsan siring, tanganing magin mapanggana sa arin man na kamugtakan, kaipuhan an mapagngayongayong paghorophorop. Ibinabareta nin nagbibiyaheng mga paraataman na an dakol na Saksi hoben pang marhay na nag-aagom, na sa parate nag-aaki bago sinda magin andam na isaabaga an ibinubungang mga paninimbagan. An iba sa mga mag-agom na ini nagbubulag. An ibang mag-agom inaatubang an saindang mga problema, pero dai nakatao nin kaogmahan sainda an saindang pag-agom. Arog kan isinurat kan dramatistang Ingles na si William Congreve, an mga nag-agom nin dali-dali “tibaad magsolsol nin haloy.”
18 Ibinabareta man nin mga paraataman sa sirkito na an ibang barobata dai nagpepresentar na maglingkod sa Bethel o dai nagboboluntaryo para sa Paadalan sa Ministeryal na Pagtotokdo huli sa kahagadan na dai mag-agom sa sarong peryodo nin panahon. Alagad si Pablo nagtao kan sadol na dai mag-agom sagkod na sia “lihis na sa pagbukad nin pagkabarobata,” an boot sabihon, maghalat sagkod na mainaan an enot na alimbukay nin seksuwal na horot. (1 Corinto 7:36-38) An mga taon na ginamit sa pagigin daing agom na adulto nagtatao sa saro nin napakahalagang kabatidan asin pagmansay, na ibinubugtak sia sa mas marahay na kamugtakan na pumili nin agom o gumibo kan pinag-isipan na marhay na desisyon na dai mag-agom.
19. Ano an puwedeng magin pagmansay niato sa mga bagay kun mayo man kita nin tunay na pangangaipong mag-agom?
19 An iba sa sato lihis na sa pagbukad nin pagkabarobata, na may makosog na pagmawot sa seksuwal na pagdodorog. Tibaad kun beses hinohorophorop niato an mga bendisyon nin pag-agom pero sa katotoohan igwa kita kan balaog nin dai pag-agom. Tibaad maheling ni Jehova na kita epektibong nakapaglilingkod sa saiya na daing agom asin mayo man nin tunay na pangangaipong mag-agom, na tibaad umobligar sato na bayaan an pirang pribilehiyo sa paglilingkod sa saiya. Kun an pag-agom bakong personal na pangangaipo asin dai kita bendisyonan nin agom, tibaad may ibang tagama sato an Dios. Kun siring tumubod kita na itatao nia an kaipuhan niato. An pinakadakulang kaogmahan bunga nin mapakumbabang pag-ako sa minalataw na kabotan nin Dios para sa saro, kun paanong an Judiong mga tugang ‘nag-oyon asin pinamuraway an Dios’ kan marealisar ninda na itinogot nia sa mga Hentil an pagsolsol tangani na sinda magkaigwa nin buhay.—Gibo 11:1-18.
20. (a) Anong hatol sa dai pag-agom an itinatao digdi sa hoben na mga Kristiano? (b) Anong pundamental na punto manongod sa kaogmahan an nagdadanay na totoo?
20 Kun siring, an pag-agom puwedeng magin liyabe sa kaogmahan, minsan ngani puwede man na buksan kaiyan an tata pasiring sa mga problema. Sarong bagay an segurado: An pag-agom bakong an solamenteng dalan sa pakanompong nin kaogmahan. Kinokonsiderar an gabos na bagay, magigin madonong, nangorogna sa hoben na mga Kristiano, na pagmaigotan na tawan nin lugar an pirang taon na pagigin daing agom. An mga taon na iyan magagamit sa marahay sa paglilingkod ki Jehova asin sa pag-oswag sa espirituwalidad. Pero ano man an edad o espirituwal na pag-oswag, an pundamental na puntong ini nagdadanay na totoo para sa gabos na lubos na nagdusay sa Dios: An tunay na kaogmahan manonompongan sa maimbod na paglilingkod ki Jehova.
Ano an Isisimbag Nindo?
◻ Taano ta maogma an mga lingkod ni Jehova?
◻ Taano an pag-agom ta bakong iyo an liyabe sa pinakadakulang kaogmahan?
◻ Sa pagpili nin agom, ano an kahagadan sa banwaan ni Jehova?
◻ Taano ta makatanosan na tumubod na puwedeng magin maogma an mga Kristiano na nagdadanay na daing agom?
◻ Ano an kaipuhan na admitiron manongod sa pag-agom asin kaogmahan?