Tunay na Kaogmahan sa Paglilingkod ki Jehova
“Maogma idtong an saiyang paratabang iyo an Dios ni Jacob, na an paglaom yaon ki Jehova na saiyang Dios.”—SALMO 146:5.
1, 2. Ano an sinabi manongod sa kahulogan nin kaogmahan, asin ano an kahulogan nin kaogmahan para sa dakol ngonyan?
ANO an kaogmahan? An mga leksikograpo, pilosopo, asin teologo dakol nang siglo na pinagmamaigotan na tawan iyan nin kahulogan. Pero dai sindang ikinatataong kahulogan na inooyonan kan gabos. An Encyclopædia Britannica nag-aadmitir: “An ‘kaogmahan’ saro sa pinakamaulyas na termino.” Minalataw na an kaogmahan may laen-laen na kahulogan sa laen-laen na tawo, depende sa saindang pagmansay sa buhay.
2 Para sa dakol an kaogmahan nasisentro sa marahay na salud, materyal na mga rogaring, asin marahay na mga kaibaiba. Pero, may mga tawo na igwa kaiyan gabos pero mamondo. Para sa mga lalaki asin babae na dusay ki Jehova Dios, an Biblia nagtatao nin ideya nin kaogmahan na laen na marhay sa paghona nin kadaklan.
Laen Man na Pagmansay sa Kaogmahan
3, 4. (a) Sairisay an ipinahayag na maogma ni Jesus? (b) Ano an mamamangno mapadapit sa mga dahelan nin kaogmahan na sinabi ni Jesus?
3 Sa saiyang Sermon sa Bukid, si Jesu-Cristo dai nagsabi na an kaogmahan depende sa marahay na salud, materyal na mga rogaring, asin iba pa. Ipinahayag niang tunay na maogma an mga “nakamamate kan saindang espirituwal na pangangaipo” asin an mga “nagugutom asin napapaha sa katanosan.” Konektado sa duwang bagay na ini na kaipuhan sa tunay na kaogmahan an garo baga masakit paniwalaan pero totoong mga tataramon ni Jesus: “Maogma an mga nagmomondo, huli ta sinda rarangahon.” (Mateo 5:3-6) Malinaw na dai boot sabihon ni Jesus na an mga tawo automatikong magigin maogma kun sinda mawaran nin namomotan. Imbes, an boot niang sabihon idtong mga ipinagmomondo an saindang pagigin makasalan asin an mga bunga kaiyan.
4 Si apostol Pablo nagtaram manongod sa mga linalang na tawo na nag-aagrangay sakop nin kasalan basado sa paglaom na iyan “bubutasan man hale sa kaoripnan nin kalapaan.” (Roma 8:21, 22) An mga tawo na nag-aako sa nakatutubos sa kasalan na probisyon ni Jehova paagi sa pantubos na atang ni Cristo asin nag-ootob sa kabotan nin Dios tunay na nararanga asin nagigin maogma. (Roma 4:6-8) Sa Sermon sa Bukid, ipinahayag man ni Jesus na maogma “an mga mahoyo,” “an mga maheherakon,” “an mga malinig sa puso,” asin “an mga matoninong.” Itinao nia an garantiya na minsan pinaglalamag, an mga mahoyong iyan dai mawawaran kan saindang kaogmahan. (Mateo 5:5-11) Interesanteng mangnohon na an mas halangkaw na mga dahelan na ini nin kaogmahan pinapantay an kamugtakan kan mayayaman asin dukha.
An Pasisikadan Para sa Tunay na Kaogmahan
5. Ano an pasisikadan kan kaogmahan kan nagdusay na mga lingkod nin Dios?
5 An burabod nin tunay na kaogmahan mayo sa materyal na kayamanan. An madonong na si Hadeng Salomon nagsabi: “An bendisyon ni Jehova—iyan an nakapayayaman, asin dai nia iyan dinadagdagan nin kakologan.” (Talinhaga 10:22) Para sa mga linalang na nagmimidbid sa unibersal na soberaniya ni Jehova, an kaogmahan dai ikasusuway sa bendisyon nin Dios. An nagdusay na igwa kan asin namamatean an bendisyon ni Jehova sa saiya tunay na maogma. Sa pagmansay kan Biblia, an kaogmahan pakamate nin pagkakontento, satispaksion, asin pagkawili sa paglilingkod ki Jehova.
6. Ano an hinahagad sa banwaan ni Jehova tangani na sinda tunay na maogma?
6 An tunay na kaogmahan depende sa tamang relasyon ki Jehova. Iyan basado sa pagkamoot sa Dios asin kaimbodan sa saiya. An nagdusay na mga lingkod ni Jehova biyong oyon sa mga tataramon ni Pablo: “Sa katunayan, mayo sa sato nin nabubuhay para sa saiya sana . . . Nabubuhay kita para ki Jehova . . . Sadiri kita ni Jehova.” (Roma 14:7, 8) Kun siring, an tunay na kaogmahan dai makakamtan na siblag sa pagkuyog ki Jehova asin magayagayang pagpasakop sa saiyang kabotan. Si Jesus nagsabi: “Maogma an mga nagdadangog sa tataramon nin Dios asin nag-ootob kaiyan!”—Lucas 11:28.
Nagliliwatliwat na mga Dahelan nin Kaogmahan
7, 8. (a) Paano makaklasipikar an mga dahelan nin kaogmahan? (b) Ano an masasabi manongod sa pag-agom asin pag-aki?
7 An mga dahelan nin kaogmahan na nasambitan sa enotan masasabing mga “pundamental,” o “permanente,” ta iyan totoo para sa nagdusay na mga lingkod ni Jehova sa gabos na panahon. Dugang pa, may mga maaapod na nagliliwatliwat na mga dahelan, mga bagay na tibaad magbunga nin kaogmahan sa sarong panahon pero kadikit sana o mayo ngani sa ibang panahon. Sa mga panahon na patriarkal asin bago-Kristiano, an pag-agom asin pag-aki ibinilang na kaipuhan sa kaogmahan. Maririsa ini sa nakatataros sa pusong pakimaherak ni Raquel ki Jacob: “Tawan mo ako nin mga aki ta kun dai ako magigin gadan na babae.” (Genesis 30:1) An kaisipan na ini manongod sa pag-aki angay sa katuyohan ni Jehova para sa panahon na idto.—Genesis 13:14-16; 22:17.
8 An pag-agom asin pag-aki ibinilang na mga bendisyon na itinao nin Dios sa banwaan ni Jehova kan enot na mga panahon. Minsan siring, an kasakitan iinasosyar digdi asin sa iba pang kamugtakan sa kapahapahamak na mga panahon sa saindang kasaysayan. (Ikomparar an Salmo 127, 128 sa Jeremias 6:12; 11:22; Lamentacion 2:19; 4:4, 5.) Kaya malinaw na an pag-agom asin pag-aki bakong permanenteng mga dahelan nin kaogmahan.
Kaogmahan Minsan Daing Agom kan Nakaagi
9. Taano ta nag-ako nin taonan na komendasyon an aking daraga ni Jefte?
9 An dakol na lingkod nin Dios nakanompong nin tunay na kaogmahan minsan daing agom. Huli sa paggalang sa sumpa kan saiyang ama, an aking daraga ni Jefte nagdanay na daing agom. Sa kadikit na panahon sia asin an mga amiga niang daraga naghibi huli sa saiyang pagkadaraga. Alagad kanigoan na kagayagayahan an nakamtan nia sa paglilingkod nin bilog na panahon sa harong ni Jehova, tibaad kaiba kan “mga babae na naggigibo nin organisadong paglilingkod sa tata kan tolda nin katiriponan”! (Exodo 38:8) Huli kaini, nag-ako sia nin taonan na komendasyon.—Hokom 11:37-40.
10. Ano an hinagad ni Jehova ki Jeremias, asin minalataw daw na sia mamondo sa buhay bilang resulta?
10 Huli sa dramatikong mga panahon na nabuhayan ni propeta Jeremias, hinagad nin Dios na dai sia mag-agom asin mag-aki. (Jeremias 16:1-4) Pero naeksperyensiahan ni Jeremias an katotoohan kan mga tataramon nin Dios: “Maogma an makosog na tawo na nananarig ki Jehova, asin na an nagin kompiansa iyo si Jehova.” (Jeremias 17:7) Sa laog nin labing 40 taon na paglilingkod bilang propeta, si Jeremias maimbod na naglingkod sa Dios bilang soltero. Sagkod sa aram ta, nungka na sia nag-agom asin nagkaaki. Pero, siisay an magdududa na si Jeremias maogma, kapareho kan maimbod na Judiong natada na ‘nag-ogma huli sa karahayan ni Jehova’?—Jeremias 31:12.
11. Ano an pira sa mga halimbawa sa Kasuratan na maimbod na mga lingkod ni Jehova na maogma minsan sinda daing agom?
11 Dakol pang iba an magayagayang naglingkod ki Jehova na daing agom. Sinda magsalang daing agom o balo. Kabilang sa sainda an propetisang si Ana; tibaad si Dorcas, o Tabita; si apostol Pablo; asin an kadarudakulaing halimbawa sa gabos—si Jesu-Cristo.
Daing Agom Pero Maogma Ngonyan
12. Ano an tinawan nin lugar kan nagkapira sa maogma, dusay na mga lingkod ni Jehova, asin taano?
12 Ngonyan, rinibong Saksi ni Jehova an maimbod na naglilingkod sa Dios na daing agom. An iba naako an pag-agda ni Jesus: “An makatatao nin lugar [sa balaog na dai pag-agom] magtao nin lugar.” Ini ginibo ninda “huli sa kahadean kan kalangitan.” (Mateo 19:11, 12) An boot sabihon, ginamit ninda sa marahay an saindang katalingkasan na itinao nin Dios paagi sa pagdusay nin mas dakol na panahon asin kosog sa pagpaoswag sa intereses kan Kahadean. An dakol sainda naglilingkod bilang mga payunir, misyonero, o miembro kan pamilyang Bethel sa opisina prinsipal kan Watch Tower Society o sa saro kan mga sanga kaiyan.
13. Anong mga halimbawa an nagpapaheling na an Kristiano puwedeng magin daing agom asin maogma?
13 An sarong namomotan na may edad nang tugang na babae tinawan an saiyang estorya sa buhay kan nagpaparisang titulo na “Single and Happy as a Pioneer” [sa Bicol, “Daing Agom Asin Maogma Bilang Payunir”]. (The Watchtower, Mayo 1, 1985, pahina 23-6) An saro pang daing agom na tugang na babae na labi nang 50 anyos na naglilingkod sa Bethel nagsabi: “Lubos akong kontento sa sakong buhay asin sa sakong trabaho. Mas masibot ako ngonyan kisa kasuarin man sa trabaho na namomotan kong marhay. Dai ako nin pagbasol. Ootrohon kong gibohon an iyo man sanang desisyon.”—The Watchtower, Hunyo 15, 1982, pahina 15.
14, 15. (a) Sono ki apostol Pablo, ano an kaipuhan tanganing magdanay na daing agom? (b) Taano ta sinasabi ni Pablo na an daing agom “orog karahay” asin “orog na maogma”?
14 Risahon an terminong “desisyon.” Si Pablo nagsurat: “Kun an siisay man trangkilo sa saiyang puso, na dai nangangaipo, kundi may kapangyarihan sa saiyang sadiring boot asin nagdesisyon na sa saiyang puso, na papagdanayon an saiyang pagkasoltero, marahay an saiyang ginigibo. Kaya an nagtatao man kan saiyang pagkasoltero sa pag-agom marahay an ginigibo, alagad an dai nagtatao kaiyan sa pag-agom orog karahay.” (1 Corinto 7:37, 38) Taano ta “orog karahay”? Ipinaliwanag ni Pablo: “Boot ko na kamo dai mapurisaw. An lalaking daing agom napupurisaw sa mga bagay kan Kagurangnan, kun paano nia mapaooyonan an Kagurangnan. . . . Siring man, an babaeng daing agom, asin an daraga, napupurisaw sa mga bagay kan Kagurangnan . . . Alagad ini isinasabi ko sa saindong sadiring pakinabang, . . . tanganing pahiroon kamo sa bagay na maninigo asin nangangahulogan nin danay na paglilingkod sa Kagurangnan na mayo nin kaolangan.”—1 Corinto 7:32-35.
15 Konektado daw sa kaogmahan an “danay na paglilingkod sa Kagurangnan na mayo nin kaolangan” sa katuyohan na ‘mapaoyonan an Kagurangnan’? Malinaw na iyan an paghona ni Pablo. Sa pagtaram manongod sa sarong balong Kristiana, sia nagsabi: “Sia hiwas nang magpakasal sa siisay man na boot nia, sanang dian sa Kagurangnan. Alagad sia orog na maogma kun sia magdanay na siring, sa sakuyang opinyon. Tunay na ako naghohona na yaon man sa sako an espiritu nin Dios.”—1 Corinto 7:39, 40.
Mga Bentaha kan Pagigin Daing Agom
16. Ano an pirang bentaha nin daing agom na mga Saksi ni Jehova?
16 Baga man an Kristiano daing agom huli sa personal na desisyon o huli sa mga kamugtakan, an pagigin daing agom may darang dakol na personal na bentaha. An mga daing agom sa kadaklan mas dakol an panahon sa pag-adal sa Tataramon nin Dios asin paghorophorop dian. Kun aaprobetsaran ninda an kamugtakan na ini, mararom an saindang espirituwalidad. Mantang mayo nin agom na makahihiras sa saindang problema, dakol an nakanonood na orog na magsarig ki Jehova asin hagadon an saiyang paggiya sa gabos na bagay. (Salmo 37:5) Ini nakatatabang na papangyarihon an mas dayupot na relasyon ki Jehova.
17, 18. (a) Anong mga oportunidad sa mas mahiwas na langtad nin paglilingkod an bukas sa mga lingkod ni Jehova na daing agom? (b) Paano ilinadawan nin pirang daing agom na lingkod ni Jehova an saindang kaogmahan?
17 An mga Kristianong daing agom may mga oportunidad sa mas mahiwas na langtad nin paglilingkod sa ikaoomaw ni Jehova. An espesyal na pagtotokdo na itinatao ngonyan sa Paadalan sa Ministeryal na Pagtotokdo para sana sa mga tugang na lalaking daing agom o balo. An mga tugang na babaeng daing agom mas libre man na mag-aabot sa mga pribilehiyo sa paglilingkod sa Dios. An may edad nang tugang na babae na nasambitan sa enotan nagboluntaryong maglingkod sa sarong nasyon sa Aprika kan, sa pagkotar sa saiya, sia “medyo maluyaluyahon na babae na labi nang 50 anyos.” Asin sia nagdanay duman, minsan sa panahon nin pagprohibir, kan pahaleon sa nasyon an gabos na misyonero. Sagkod ngonyan sia naglilingkod duman bilang payunir, minsan ngani sia labi nang 80 anyos. Maogma daw sia? Sa saiyang estorya sia nagsurat: “Nagamit ko an ekstrang katalingkasan asin pagigin libreng bumalyo na itinatao nin pagigin daing agom na magin masibot sa ministeryo, asin ini nagtao sako nin dakulang kaogmahan. . . . Sa nag-aging mga taon ruminarom an sakong relasyon ki Jehova. Bilang babaeng daing agom sa sarong nasyon sa Aprika, napatunayan ko na sia Paraingat.”
18 Mahalaga man na mangnohon an isinabi nin sarong tugang na lalaki na dakol na dekada na naglingkod sa opisina prinsipal kan Watch Tower Society. Maogma sia, minsan sia nungka na nag-agom asin minsan sia may langitnon na paglaom na daing esperansang mag-agom. Sa edad na 79, sia nagsurat: “Aroaldaw inaarang ko sa satong namomotan na langitnon na Ama sa pamibi an tabang asin kadonongan na ako magdanay na mabagsik asin makosog sa espirituwal saka sa pisikal tanganing makapagpadagos ako sa pag-otob kan saiyang banal na kabotan. Sa nakaaging kuwarenta y nuwebeng taon sa paglilingkod ki Jehova tunay na ako nagkamit nin maogma, kapakipakinabang asin binendisyonan na dalan nin buhay. Asin sa dai na kutana maninigong kabootan ni Jehova ako naglalaom sa padagos na paglilingkod sa saiyang onra asin kamurawayan pati sa ikabebendisyon kan saiyang banwaan. . . . [An] kagayagayahan ni Jehova nakatatabang sako na ipagpadagos an marahay na pakilaban kan pagtubod, na hinahalat an panahon na an mga kaiwal ni Jehova mayo na asin an bilog na daga mapano na kan saiyang kamurawayan.”—Bilang 14:21; Nehemias 8:10; The Watchtower, Nobyembre 15, 1968, pahina 699-702.
Sa Ano Depende an Tunay na Kaogmahan?
19. Sa ano perming masasarig an satong kaogmahan?
19 An satong mahalagang relasyon ki Jehova, an saiyang pag-oyon, asin an saiyang bendisyon—ini an mga bagay na magtatao sato nin tunay na kaogmahan sagkod lamang. Huli sa tamang pagmansay na ini sa kun ano an nagbubunga nin tunay na kaogmahan, minsan an mga may agom na lingkod ni Jehova nakarerealisar na an saindang pag-agom bakong iyo an pinakamahalaga sa saindang buhay. Kinukuyog ninda an hatol ni apostol Pablo: “Ini sinasabi ko, mga tugang, nainaan na an panahon na natatada. Kaya magpoon ngonyan an mga igwa nin agom magin siring sa mayo.” (1 Corinto 7:29) Ini dai nangangahulogan na pabayaan an saindang agom. An maygurang na Kristianong mga agom na lalaki inienot an paglilingkod ki Jehova, asin iyo man an ginigibo kan saindang diosnon, mamomoton, asin mapagsuportar na mga agom na babae, na an iba naglilingkod pa ngani nin bilog na panahon bilang kaibaiba kan saindang agom.—Talinhaga 31:10-12, 28; Mateo 6:33.
20. Ano an tamang kaisipan nin dakol na Kristiano dapit sa mga pribilehiyo bilang may agom?
20 An may agom na mga tugang na lalaki na nagbibiyaheng mga paraataman, boluntaryong trabahador sa Bethel, kamagurangan sa kongregasyon—sa katunayan, an gabos na Kristianong mga agom na inienot an intereses kan Kahadean—dai ‘minagamit kan kinaban nin lubos’; hinihingoa ninda na ibagay an saindang mga pribilehiyo bilang may agom sa saindang dusay na buhay nin paglilingkod ki Jehova. (1 Corinto 7:31) Pero, maogma sinda. Taano? Huli ta an nangongorog na dahelan kan saindang kaogmahan bakong an saindang agom kundi an saindang paglilingkod ki Jehova. Asin an dakol na maimbod na agom na lalaki asin babae—iyo, pati an saindang mga aki—naoogma na iyan siring.
21, 22. (a) Basado sa Jeremias 9:23, 24, ano an maninigong makapano sa sato nin kaogmahan? (b) Anong mga dahelan nin kaogmahan an sinasabi sa Talinhaga 3:13-18?
21 Si propeta Jeremias nagsurat: “Iyo ini an isinabi ni Jehova: ‘An madonong dai maghambog dapit sa saiya man sana huli sa saiyang kadonongan, asin an makosog dai maghambog dapit sa saiya man sana huli sa saiyang kakosogan. An mayaman dai maghambog dapit sa saiya man sana huli sa saiyang kayamanan. Kun an naghahambog dapit sa saiya man sana maghambog dapit sa saiya man sana huli kan mismong bagay na ini, an pagkaigwa nin pakamansay asin an pagkaigwa nin kaaraman dapit sa sako, na ako si Jehova, an Saro na nagsasagibo nin pagkaherak, hustisya asin katanosan sa daga; huli ta ikinaoogma ko an mga bagay na ini,’ an sabi ni Jehova.”—Jeremias 9:23, 24.
22 Baga man kita daing agom o may agom, an satong pinakadakulang gikanan nin kaogmahan maninigo na iyo an satong kaaraman manongod ki Jehova asin an marigon na pagtubod na nasa sato an saiyang bendisyon ta inootob niato an saiyang kabotan. Naoogma man kita na magkaigwa nin pagmansay sa tunay na sokol nin mahahalagang bagay, an mga bagay na ikinawiwili ni Jehova. An may agom nang si Hadeng Salomon dai ibinibilang an pag-agom na iyo an solamenteng liyabe sa kaogmahan. Sinabi nia: “Maogma an tawo na nakanompong nin kadonongan, asin an tawo na nagkukua nin pakamansay, huli ta an pagkaigwa kaiyan bilang pakinabang mas marahay kisa pagkaigwa nin pirak bilang pakinabang asin an pagkaigwa kaiyan bilang bunga kisa bulawan mismo. Iyan orog na mahalaga kisa mga korales, asin an gabos na ibang kinawiwilihan mo dai ikababaing dian. An kahalawigan nin mga aldaw yaon sa toong kamot kaiyan; asin sa walang kamot kaiyan igwa nin mga kayamanan asin kamurawayan. An mga dalan kaiyan kawiliwiling mga dalan, asin an gabos na dana kaiyan katoninongan. Iyan kahoy nin buhay para sa mga nangangapot kaiyan, asin an mga marigon na nangangapot kaiyan aapodon na maogma.”—Talinhaga 3:13-18.
23, 24. Taano ta makasisierto kita na an gabos na maimbod na lingkod ni Jehova magigin maogma sa bagong palakaw nin mga bagay?
23 Logod kita na may agom makanompong nin daing sagkod na kagayagayahan sa pag-otob sa banal na kabotan. Asin logod an satong namomotan na mga tugang na lalaki asin babae na daing agom sa kagustohan ninda o huli sa mga kamugtakan makatagal sa gabos na pagbalo sa sainda asin makanompong nin kaogmahan asin pagkakontento sa paglilingkod ki Jehova ngonyan asin sagkod lamang. (Lucas 18:29, 30; 2 Pedro 3:11-13) Sa nagdadangadang na palakaw nin mga bagay nin Dios, bubukasan an “mga balumbon.” (Kapahayagan 20:12) Ini magkakaigwa nin makaoogmang bagong mga togon asin regulasyon na makakokontribuwir sa kaogmahan nin makinuyog na katawohan.
24 Tunay nanggad, makasasarig kita na an satong “maogmang Dios” may natatagama satong marahayon na mga bagay na magbubunga kan satong lubos na kaogmahan. (1 Timoteo 1:11) An Dios magpapadagos na ‘bikladon an saiyang kamot asin panigoan an mawot nin lambang bagay na may buhay.’ (Salmo 145:16) Bakong makangangalas na igwa asin danay na magkakaigwa nin tunay na kaogmahan sa paglilingkod ki Jehova.
Ano an Isisimbag Nindo?
◻ Ano an pasisikadan nin kaogmahan kan dusay na mga lingkod ni Jehova?
◻ Kan mga panahon kan Biblia, siisay an pira sa maogmang daing agom na mga lingkod ni Jehova?
◻ Taano ta irinekomendar ni Pablo an dai pag-agom, asin paano nadiskobre nin mga Kristiano na ini maogmang buhay?
◻ An kaogmahan niato perming masasarig sa ano?
◻ Taano ta maninigo kitang magsarig na an gabos na maimbod sa bagong palakaw nin mga bagay magigin maogma?
[Ritrato sa pahina 16]
An dakol na tugang na babae na daing agom maogmang naglilingkod ki Jehova bilang bilog na panahon na mga ministro
[Ritrato sa pahina 18]
An paglilingkod sa intereses ni Jehova iyo an pangenot na ginigikanan nin kaogmahan