Saen Manonompongan an Tunay na Kaogmahan?
DAKOL na tawo an naghohona na manonompongan an kaogmahan paagi sa pagkaigwa nin materyal na mga rogaring. Kumusta man kamo? Minsan ngani an materyal na mga bagay siertong makakokontribwir sa satong kaogmahan, an mga iyan dai minagarantiya kaiyan; ni na an pisikal na mga kaginhawahan nakaparirigon sa pagtubod o nakakapagpanigo sa espirituwal na mga pangangaipo.
Sa saiyang Sermon sa Bukid, si Jesu-Cristo nagsabi: “Maogma idtong mga nakamamate kan saindang espirituwal na pangangaipo, huli ta an kahadean kan kalangitan sadiri ninda.” (Mateo 5:3) Nagsabi man si Jesus: “Lumikay kamo sa gabos na klase nin kaaraan, huli ta minsan kun an sarong tawo abunda an saiyang buhay dai minagikan sa mga bagay na saiyang nasasadirihan.”—Lucas 12:15.
Dakol an naghahanap nin kaogmahan paagi sa bawal na seksuwal na pakikidorog asin iba pang “mga gibo kan laman.” (Galacia 5:19-21) Minsan siring, an pagpadara sa kasingawan sa laman dai nagtatao nin tunay asin nagdadanay na kaogmahan. An totoo, an mga naggigibo nin siring na mga bagay dai magmamana kan Kahadean nin Dios.—1 Corinto 6:9, 10.
An iba minabaling sa panlaog na pagkatawo sa paghanap ninda nin kaogmahan paagi sa pagprobar na parigonon an sainda mismong pagpahalaga sa sadiri. An mga libreriya asin tindahan nin libro pano nin mga librong giya sa personal na pag-oswag, alagad an siring na mga publikasyon dai nakatao nin nagdadanay na kaogmahan sa mga tawo. Kaya, kun siring, saen kita makanonompong nin tunay na kaogmahan?
Tangani na magin tunay na maogma, dapat niatong midbidon an satong kanaturalan nang espirituwal na pangangaipo. Si Jesus nagsabi: “Maogma idtong mga nakamamate kan saindang espirituwal na pangangaipo.” Siempre, dai kita makikinabang kun masasabotan sana niato an pangangaipong ini dangan dai kita nin ano man na ginigibo dapit kaiyan. Sa pag-ilustrar: Ano an mangyayari sa sarong nakikipareha sa maraton na pakatapos kan paorumbasan dai inintindi an labi-labing pagkapaha sa tubig kan saiyang hawak? Bako daw na sa dai mahahaloy mapaaatubang sia sa pagkawara kan tubig sa hawak asin iba pang magabat na mga epekto? Kaagid kaiyan, kun dai niato iintindihon an satong pangangaipo nin espirituwal na kakanon, sa katapustapusi maaalang kita sa espirituwal. Mapasiring ini sa kawaran nin kagayagayahan asin kaogmahan.
Lubos na minidbid ni Jesus an saiyang espirituwal na pangangaipo, na regular na nag-aadal asin naghohorophorop sa Tataramon nin Dios. Pasil sana niang makua asin basahon an mga kabtang kan Banal na Kasuratan, asin tinokdoan nia an iba na gibohon man iyan. (Lucas 4:16-21; ikomparar an Efeso 4:20, 21.) Iinagid man ni Jesus sa kakanon an paggibo kan kabotan kan saiyang langitnon na Ama. An paggibo kan kabotan nin Dios nagtao sa saiya nin dakulang kaogmahan.—Juan 4:34.
Iyo, an tunay na kaogmahan dai makakamtan paagi sa pagkaigwa nin materyal na mga bagay; ni na an kaogmahan bunga nin pagpanigo sa makasalan na laman. An tunay na kaogmahan sarong kamugtakan kan puso, na basado sa tunay na pagtubod asin marahay na relasyon ki Jehova Dios. Tamang-tama, kun siring, nag-awit si salmista David: “Maogma an banwaan na an Dios iyo si Jehova.”—Salmo 144:15b.
[Retrato sa pahina 23]
An pagtubod asin marahay na relasyon sa Dios magtatao sa saindo nin tunay na kaogmahan