Madonong na Gamiton an Saindong Kristianong Katalingkasan
“Magin kamong siring sa mga tawong talingkas, alagad pinangangaptan an saindong katalingkasan . . . bilang mga oripon nin Dios.”—1 PEDRO 2:16.
1. Anong katalingkasan an nawara ni Adan, asin ibabalik ni Jehova an katawohan sa anong katalingkasan?
KAN magkasala an enot niatong mga magurang sa tatamnan nin Eden, iwinara ninda para sa saindang mga aki an mamuraway na eredasyon—katalingkasan sa kasalan asin karatan. Bilang resulta, kita gabos namundag na mga oripon nin karatan asin kagadanan. Alagad makaoogma, katuyohan ni Jehova na ibalik an maimbod na mga tawo sa makangangalas na katalingkasan. Ngonyan, an mga may matanos na puso galagang hinahalat an “kapahayagan kan mga aki nin Dios,” na bunga kaiyan sinda “bubutasan man hale sa kaoripnan nin kalapaan asin magkakaigwa kan mamuraway na katalingkasan kan mga aki nin Dios.”—Roma 8:19-21.
‘Linahidan na Maghulit’
2, 3. (a) Sairisay an “mga aki nin Dios”? (b) Ano an makangangalas na kamugtakan ninda, kaiba an anong paninimbagan?
2 Sairisay an “mga aki nin Dios” na ini? Sinda linahidan nin espiritung mga tugang ni Jesus na magigin mga hade kaiba nia sa langitnon na Kahadean. An enot sa mga ini naglataw kaidtong enot na siglo C.E. Inako ninda an nakapatatalingkas na katotoohan na itinokdo ni Jesus, asin poon kan Pentecostes 33 C.E., nakikabtang sinda sa mamuraway na mga pribilehiyo na sinabi ni Pedro kan sia sumurat sa sainda: “Kamo ‘rasang pinili, sarong makahadeng pagkasaserdote, banal na nasyon, banwaan para sa espesyal na pagkasadiri.’”—1 Pedro 2:9a; Juan 8:32.
3 Magin espesyal na rogaring nin Dios—kanigoan kamakangangalas na bendisyon! Asin an sa modernong aldaw na natatada sa linahidan na mga aking ini nin Dios igwa man kan binendisyonan na kamugtakan na ini sa Dios. Alagad an siring kamuraway na pribilehiyo may kaibang mga paninimbagan. Inapod ni Pedro an atension sa saro digdi kan sia magpadagos na magsabi: “‘Ipahayag nindo an mga kamurawayan’ kan saro na nag-apod sa saindo hale sa kadikloman pasiring sa saiyang makangangalas na liwanag.”—1 Pedro 2:9b.
4. Paano inotob nin linahidan na mga Kristiano an paninimbagan na kaiba kan saindang Kristianong katalingkasan?
4 Inotob daw nin linahidan na mga Kristiano an paninimbagan na ini na ipahayag an mga kamurawayan nin Dios? Iyo. Sa makahulang pagtaram manongod sa mga linahidan poon kan 1919, si Isaias nagsabi: “An espiritu kan Soberanong Kagurangnan na Jehova yaon sa sako, huli ta linahidan ako ni Jehova na magsabi kan maogmang bareta sa mga mahoyo. Isinugo nia ako sa pagpaomay sa mga nasasakitan an puso, sa pagbalangibog nin katalingkasan sa mga nabihag asin sa pagpabuklat sa mga mata kan mga bilanggo; sa pagbalangibog kan taon nin marahay na boot ni Jehova asin kan aldaw nin pamalos kan satong Dios.” (Isaias 61:1, 2) Ngonyan, an linahidan na natatada, sa pag-arog sa halimbawa ni Jesus, na pangenot na inaaplikaran kan kasuratan na ini, maigot na ipinahahayag sa iba an maogmang bareta manongod sa katalingkasan.—Mateo 4:23-25; Lucas 4:14-21.
5, 6. (a) Ano an ibinunga kan entusiastikong paghuhulit nin linahidan na mga Kristiano? (b) Anong mga pribilehiyo asin paninimbagan an nakakamtan kan mga kaiba sa dakulang kadaklan?
5 Bilang resulta kan saindang entusiastikong paghuhulit, naglataw an sarong dakulang kadaklan nin ibang karnero sa huring mga aldaw na ini. Nagruluwas sinda sa gabos na nasyon tanganing umiba sa mga linahidan sa paglilingkod ki Jehova, asin an mga ini ginibo man na talingkas kan katotoohan. (Zacarias 8:23; Juan 10:16) Kapareho ni Abraham sinda ipinahahayag na matanos basado sa pagtubod asin luminaog sa dayupot na relasyon ki Jehova Dios. Asin kapareho ni Rahab an pagkapahayag sa sainda na matanos ilinilinya sinda para sa kaligtasan—sa kaso ninda, kaligtasan sa Armagedon. (Santiago 2:23-25; Kapahayagan 16:14, 16) Alagad an siring kamuraway na mga pribilehiyo may kaiba man na paninimbagan na isabi sa iba an manongod sa kamurawayan nin Dios. Iyan an dahelan na naheling sinda ni Juan na inoomaw sa publiko si Jehova, “na nagkukurahaw sa makosog na tingog, na nagsasabi: ‘Utang niato an kaligtasan sa satong Dios, na nagtutukaw sa trono, asin sa Kordero.’”—Kapahayagan 7:9, 10, 14.
6 Kan nakaaging taon an dakulang kadaklan, na ngonyan labi nang apat na milyon an kabilangan, kaiba an sadit na natatada pang grupo nin linahidan na mga Kristiano, haros sarong bilyon na oras an inubos sa pagpahayag kan mga kamurawayan ni Jehova. Ini an pinakamarahay na mahihimong paggamit sa saindang espirituwal na katalingkasan.
“Tawan nin Onra an Hade”
7, 8. Anong paninimbagan sa sekular na autoridad an katakod kan Kristianong katalingkasan, asin sa bagay na ini, anong salang kaisipan an dapat niatong likayan?
7 An satuyang Kristianong katalingkasan may katakod na iba pang paninimbagan. Sinabi ni Pedro an nagkapira kan sia sumurat: “Tawan nin onra an gabos na klase nin tawo, mamoot kamo sa bilog na kasararoan nin mga tugang, matakot kamo sa Dios, tawan nin onra an hade.” (1 Pedro 2:17) Ano an ipinaririsa kan mga tataramon na “tawan nin onra an hade”?
8 “An hade” nagrerepresentar sa sekular na mga namomoon. Ngonyan, may nagtubo sa kinaban na espiritu nin paglapastangan sa autoridad, asin ini pasil na makaapektar sa mga Kristiano. Tibaad isipon pa ngani nin Kristiano kun taano ta maninigo niang tawan nin onra “an hade,” mantang “an bilog na kinaban namumugtak sa kapangyarihan kan maraot.” (1 Juan 5:19) Huli sa mga tataramon na ini, tibaad mamatean nia na sia libreng balgahon an mga ley na bakong kombenyente asin dai magbuhis kun dai sia madadakop. Alagad ini tumang sa direktang pagboot ni Jesus na “itao ki Cesar an mga bagay na ki Cesar.” Iyan garo man sana ‘paggamit sa saiyang katalingkasan bilang pantahob sa karatan.’—Mateo 22:21; 1 Pedro 2:16.
9. Ano an duwang marahay na dahelan sa pagigin makinuyog sa sekular na autoridad?
9 An mga Kristiano obligadong magtao nin onra sa autoridad asin pumasakop dian—dawa kun ini sa limitadong paagi. (Gibo 5:29) Taano? Sa 1 Pedro 2:14, 15, isinabi ni Pedro an tolong dahelan kan sabihon nia na an mga gobernador “isinugo [nin Dios] na magkastigo sa mga paragibo nin maraot alagad mag-omaw sa mga paragibo nin marahay.” An takot sa kastigo igo nang dahelan na kuyogon an autoridad. Makasosopog nanggad na an saro sa mga Saksi ni Jehova mamultahan o mabilanggo huli sa pangongolog, paghabon, o iba pang krimen! Isip-isipa na sana kun gurano ikaoogma nin nagkapira na ibantog an siring na bagay! Sa ibong na lado, mantang kita namimidbid huli sa pagkuyog sono sa ley, inoomaw kita nin mga namamahalang makatanosan an isip. Tibaad tawan kita nin orog na katalingkasan na gibohon an satuyang paghuhulit kan maogmang bareta. Saro pa, ‘sa paggibo nin marahay napaoontok niato an mangmang na orolay kan rungaw na mga tawo.’ (1 Pedro 2:15b) Ini ikaduwang dahelan sa pagkuyog sa autoridad.—Roma 13:3.
10. Ano an pinakamakosog na dahelan sa pagkuyog sa sekular na autoridad?
10 Alagad ta may mas makosog na dahelan. An mga autoridad yaon huli sa pagtogot ni Jehova. Arog kan sabi ni Pedro, an politikal na mga namomoon “isinugo” ni Jehova, asin “kabotan nin Dios” na an mga Kristiano magdanay na sakop ninda. (1 Pedro 2:15a) Kaagid kaiyan, si apostol Pablo nagsasabi: “An nagdadanay na mga kapangyarihan nagtitirindog sa saindang relatibong mga kamugtakan na itinogot nin Dios.” Kaya, an satuyang konsensia na tinokdoan sa Biblia nagpapahiro sato na kuyogon an mga autoridad. Kun kita magsayumang pumasakop sa sainda, kita “minatumang sa areglo nin Dios.” (Roma 13:1, 2, 5) Siisay sa sato an magugustong tumangon an areglo nin Dios? Iyan sala nanggad na paggamit sa Kristianong katalingkasan!
‘Mamoot sa mga Tugang’
11, 12. (a) Anong paninimbagan sa mga kapagtubod an kaiba kan satong Kristianong katalingkasan? (b) Siisay an nangorognang maninigo sa satong mamomoton na pagkonsiderar, asin taano?
11 Sinabi man ni Pedro na an mga Kristiano maninigong “mamoot . . . sa bilog na kasararoan nin mga tugang.” (1 Pedro 2:17) Ini saro pang paninimbagan na kaiba nin Kristianong katalingkasan. An kadaklan sa sato miembro nin sarong kongregasyon. An totoo, kita gabos miembro kan internasyonal na kasararoan, o organisasyon, nin magturugang. An pagpaheling nin pagkamoot sa mga ini madonong na paggamit sa satong katalingkasan.—Juan 15:12, 13.
12 Si apostol Pablo may sinabing sarong grupo nin mga Kristiano na nangorognang maninigo sa satong pagkamoot. Sabi nia: “Magin kamong makinuyog duman sa mga nangengenot dian sa tahaw nindo asin magin mapagpasakop, huli ta sinda nagbabantay sa saindong kalag bilang an mga maninimbag; tanganing ini magibo nindang may kaogmahan asin bakong sa kamondoan, huli ta ini makararaot sa saindo.” (Hebreo 13:17) An mga nangengenot sa kongregasyon iyo an kamagurangan. Totoo, an mga lalaking ini bakong sangkap. Minsan siring, nombrado sinda sa pamamahala kan Namamahalang Grupo. Sinda nangengenot paagi sa halimbawa asin may konsiderasyon, asin ibinugtak sinda na magbantay sa satong kalag. Kanigoan kagabat na asignasyon! (Hebreo 13:7) Makaoogma, an kadaklan na kongregasyon may marahay, mapagkooperar na espiritu, asin kagayagayahan kan mga magurang na magtrabaho kaiba ninda. Mas depisil kun may mga tawong habong magkooperar. Ginigibo pa man giraray kan magurang an saiyang trabaho, pero arog kan sabi ni Pablo, ginigibo nia iyan “sa kamondoan.” Tunay na habo niatong mamondo an mga magurang! Boot niato na sinda maogma sa saindang trabaho tangani na kita mapakosog ninda.
13. Ano an pirang paagi na kita makakokooperar sa kamagurangan?
13 Ano an pirang paagi na dian kita makakokooperar sa kamagurangan? An saro pagtabang sa mantension asin paglinig sa Kingdom Hall. An saro pa pagkooperar sa gibong pagdalaw sa mga may helang asin pagtabang sa may kamatean. Saro pa, puwede kitang maghingoa na magdanay na makosog sa espirituwal, tanganing dai magin pasanon. An sarong mahalagang lugar para sa kooperasyon nasa pagpapadanay sa moral asin espirituwal na kalinigan kan kongregasyon, kapwa paagi sa sato mismong gawe asin sa pagsumbong nin mga kaso nin magabat na pagkakasala na naaaraman niato.
14. Paano kita maninigong magkooperar sa disiplinang ginibo kan kamagurangan?
14 Kun beses, tanganing mapagdanay na malinig an kongregasyon, kaipuhan na itiwalag kan kamagurangan an parakasalang habong magsolsol. (1 Corinto 5:1-5) Iniingatan kaini an kongregasyon. Tibaad makatabang man iyan sa parakasala. Sa parate, an siring na disiplina nakatabang na makapag-isip-isip an parakasala. Alagad ano kun an natiwalag dayupot na katood o paryente? Halimbawa an tawong iyan ama o ina niato o aking lalaki o aking babae niato. Iginagalang pa man daw giraray niato an aksion na ginibo kan kamagurangan? Totoo, tibaad masakit iyan. Alagad kanigoan na pag-abuso sa satong katalingkasan kun pagdududahan niato an desisyon kan kamagurangan asin ipadagos an espirituwal na pakikiasosyar sa saro na napatunayan na nakararaot na impluwensia sa kongregasyon! (2 Juan 10, 11) An banwaan ni Jehova sa kabilogan maninigong omawon huli sa saindang pakikikooperar sa siring na mga bagay. Bilang resulta, an organisasyon ni Jehova nagdadanay na daing digta sa marigsok na kinaban na ini.—Santiago 1:27.
15. Kun an saro makaginibo nin magabat na kasalan, ano an maninigong gibohon nia tolos?
15 Ano kun kita an makaginibo nin magabat na kasalan? Ilinadawan ni Hadeng David an inooyonan ni Jehova kan sia magsabi: “Siisay an matukad sa bukid ni Jehova, asin siisay an masakat sa saiyang banal na lugar? An siisay man na daing kasalan sa saiyang kamot asin malinig sa puso, na dai dinara an Sakuyang kalag sa daing kamanungdanan, ni nanumpa man nin mapandaya.” (Salmo 24:3, 4) Kun sa ano man na dahelan kita bako nang ‘daing kasalan sa satong kamot asin malinig sa puso,’ kaipuhan kitang humiro na may pag-apreta. Nasa panganib an satong buhay na daing katapusan.
16, 17. Taano an nagkasala nin magabat na mga kasalan ta dai maninigong magprobar na sadirihon an pagresolber sa bagay?
16 An iba nasugotan na itago an magagabat na kasalan, na tibaad nangangatanosan: ‘Nagtuga na ako ki Jehova asin nagsolsol. Kaya taano ta ilalabot ko pa an kamagurangan?’ An nagkasala tibaad nasosopog o natatakot sa tibaad gibohon kan kamagurangan. Alagad maninigong girumdomon nia na minsan ngani si Jehova an solamenteng makalilinig kan satong kasalan, tinawan Nia nin pangenot na paninimbagan an kamagurangan sa kalinigan kan kongregasyon. (Salmo 51:2) Sinda yaon sa pagpaomay, sa “paghusay liwat kan mga banal.” (Efeso 4:12) An dai pagdolok sa sainda kun kaipuhan niato an espirituwal na tabang garo dai pagpadoktor kun kita may helang.
17 An iba na pinoprobaran na asikasohon nin solo an mga bagay nakaririsa na pakalihis nin dakol na bulan o taon, riniribok pa man giraray sinda kan saindang konsensia. Mas grabe pa, an iba na itinatago an magabat na kasalan nahoholog sa pagkakasala sa ikaduwa asin ikatolo pa nganing beses. Kun sa katapustapusi maaraman na kan kamagurangan an bagay, iyan nagigin kaso na nin paorootrong pagkakasala. Mas marahay nanggad na kuyogon an hatol ni Santiago! Sia nagsurat: “Igwa daw nin naghehelang dian saindo? Apodon nia an kamagurangan na lalaki kan kongregasyon, asin sinda mamibi para sa saiya, na linalahidan sia nin lana sa ngaran ni Jehova.” (Santiago 5:14) Dumolok sa kamagurangan mantang panahon pa nin pagpaomay. Kun kita mag-aatraso, tibaad kita tumagas na sa dalan nin pagkakasala.—Eclesiastes 3:3; Isaias 32:1, 2.
Itsura Asin Pag-aling-aling
18, 19. Taano ta marahay an komento nin sarong padi manongod sa mga Saksi ni Jehova?
18 Kaidtong limang taon na an nakaagi, sa sarong magasin na pamparokya, an sarong pading Katoliko sa Italia may pag-omaw na nagtaram manongod sa mga Saksi ni Jehova.a Sabi nia: “Kun para sa sako, gusto ko an mga Saksi ni Jehova; iyan prangka kong inaadmitir. . . . An mga midbid ko marahayon an ugale, maluway kun magtaram . . . [asin] nakakokombensir nanggad. Noarin niato masasabotan na an katotoohan kaipuhan an tamang pag-aatubang? Na an mga nagpapahayag kan katotoohan dai dapat na napipiritan, mabata, gunos, bagla?”
19 Sono sa mga tataramon na ini, naghanga an padi, kabilang sa ibang bagay, sa paggubing asin itsura kan mga Saksi. Malinaw na an mga nakaolay nia naghinanyog sa hatol na itinao kan “maimbod asin madonong na oripon” sa nag-aging mga taon. (Mateo 24:45) Sinasabi kan Biblia na an gubing nin mga babae maninigong ‘husay asin mabini.’ (1 Timoteo 2:9) Sa nagraraot na panahon na ini, kaipuhan man an hatol na iyan para sa mga lalaki. Bako daw na makatanosan na an mga representante kan Kahadean nin Dios disenteng umatubang sa mga tagaluwas?
20. Taano ta maninigong risahon nin Kristiano an saiyang gubing sa gabos na oras?
20 An iba tibaad umoyon na sa mga pagtiripon asin sa paglilingkod sa langtad, maninigo sindang mag-ingat sa saindang paggubing, pero tibaad iniisip ninda na an mga prinsipyo kan Biblia dai na minaaplikar sa ibang panahon. Pero kita daw minaontok sa pagigin mga representante kan Kahadean nin Dios? Totoo, laen-laen an kamugtakan. Kun kita nagtatabang sa pagtogdok nin Kingdom Hall, an gubing niato laen man sa kun kita umatender sa pagtiripon sa Kingdom Hall na iyan. Kun kita nag-aaling-aling, posible na an gubing niato mas mahayahay. Alagad basta kita naheheling nin iba, an gubing niato maninigo na perming husay asin mabini.
21, 22. Paano kita naingatan tumang sa nakararaot na pag-aling-aling, asin ano an maninigong magin punto-de-vista niato sa hatol manongod sa siring na mga bagay?
21 An saro pang tinatawan nin dakulang atension iyo an pag-aling-aling. An mga tawo—partikularmente an mga hobenes—nagkakaipo nin pag-aling-aling. Bakong kasalan o pagsayang nin panahon an pag-iskedyul nin pag-aling-aling para sa pamilya. Maski si Jesus inagda an saiyang mga disipulo na ‘magpahingalo nin kadikit.’ (Marcos 6:31) Alagad mag-ingat na an pag-aling-aling dai magbukas kan tata pasiring sa espirituwal na pagkaolakit. Nabubuhay kita sa kinaban na itinatampok nin pag-aling-aling an seksuwal na inmoralidad, grabeng kadahasan, takot, asin espiritismo. (2 Timoteo 3:3; Kapahayagan 22:15) An maimbod asin madonong na oripon alisto sa mga peligrong iyan asin daing ontok na nagpapatanid sa sato tumang dian. Hinohona daw nindo na an mga pagirumdom na ini pakikiaram sa saindong katalingkasan? O nagpapasalamat daw kamo na an organisasyon ni Jehova may igong pagmakolog sa saindo na perming iapod sa saindong atension an siring na mga peligro?—Salmo 19:7; 119:95.
22 Nungka paglingawan na minsan an satong katalingkasan gikan ki Jehova, maninimbag kita sa paagi nin paggamit niato dian. Kun kita magbibinongog sa marahay na hatol asin gumibo nin salang mga desisyon, dai niato mababasol an iba. Si apostol Pablo nagsasabi: “An lambang saro sa sato maninimbag para sa saiyang sadiri sa Dios.”—Roma 14:12; Hebreo 4:13.
Galagang Halaton an Katalingkasan kan mga Aki nin Dios
23. (a) Anong mga bendisyon mapadapit sa katalingkasan an nakakamtan na niato ngonyan? (b) Anong mga bendisyon an galaga niatong hinahalat?
23 Tunay na kita mapalad na banwaan. Talingkas kita sa falsong relihiyon asin superstisyon. Salamat sa pantubos na atang, makadodolok kita ki Jehova na may malinig na konsensia, na talingkas sa espirituwal na paagi sa pagkaoripon sa kasalan asin kagadanan. Asin sa madali na maabot an “kapahayagan kan mga aki nin Dios.” Sa Armagedon, an mga tugang ni Jesus na nasa saindang langitnon na kamurawayan ihahayag sa mga tawo bilang mga paralaglag sa mga kaiwal ni Jehova. (Roma 8:19; 2 Tesalonica 1:6-8; Kapahayagan 2:26, 27) Pakalihis kaiyan, an mga aking ini nin Dios ihahayag bilang pinakapaagihan kan mga bendisyon na nagbobolos hale sa trono nin Dios pasiring sa katawohan. (Kapahayagan 22:1-5) Sa katapustapusi, an pagpapahayag na ini kan mga aki nin Dios magbubunga kan pagbendisyon sa maimbod na mga tawo nin mamurawayon na katalingkasan kan mga aki nin Dios. Hinahalat daw nindo an panahon na iyan? Kun siring, madonong na gamiton an saindong Kristianong katalingkasan. Paoripon na ngonyan sa Dios, asin kakamtan nindo an makangangalas na katalingkasan na iyan sagkod lamang!
[Nota sa Ibaba]
a Kan huri binawi kan padi an komendasyon na ini, na minalataw na sa kapiritan.
Kahon sa Pagrepaso
◻ Paano pinamuraway si Jehova kan mga linahidan asin kan ibang karnero?
◻ Taano ta maninigong magtao nin onra an mga Kristiano sa sekular na autoridad?
◻ Sa anong mga paagi na makakokooperar an Kristiano sa kamagurangan?
◻ Mapadapit sa gubing, taano an mga Saksi ni Jehova ta napapalaen sa dakol sa kinaban?
◻ Ano an maninigo niatong likayan pag-abot sa pag-aling-aling?
[Ritrato]
An kamagurangan nangorognang maninigo sa satong pagkamoot asin kooperasyon
[Mga ritrato]
An gubing nin Kristiano maninigong husay, mabini, asin angay sa okasyon