An Paglaom Nakahahale sa Pagkadesesperar!

SA Webster’s Ninth New Collegiate Dictionary, an pagkadesesperar tinawan kan kahulogan na “biyong pagkawara nin paglaom.” Kaya malinaw na tanganing mahale an pagkadesesperar, kaipuhan niato nin paglaom!

An daing palad na tawo na napipiritan na mag-istar sa gilid nin dalan dai madidesesperar nin biyo kun sia may paglaom. An paglaom makatatao pa ngani nin kapusoan asin kosog na magtagal sa mga nag-aagi sa mga kasakitan nin depresyon. Pero kaipuhan na masasarigan an paglaom! Ano an boot sabihon kaini?

An Pasisikadan nin Paglaom

Horophoropa an nangyari ki Sara, an agom kan patriarkang si Abraham. Madali nang mag-90 anyos, baog pa man giraray sia asin haloyon nang desesperado kun baga mangangaki pa. Pero, kan 99 anyos na an saiyang agom, inotro ni Jehova an panuga na ginibo nia dakol nang taon an nakaagi​—si Abraham tunay na magkakaigwa nin “banhi,” o eridero. Aram ni Abraham na ini masasarigan na panuga. Isip-isipa kun gurano kaogma si Sara kan, sa milagrosong paagi, nangyari an maogmang okasyon, asin ipinangaki nia si Isaac! (Genesis 12:​2, 3; 17:​1-4, 19; 21:2) Dai napasala an pagsarig ni Abraham sa Dios, arog kan ipinaliwanag ni apostol Pablo: “Huli sa panuga nin Dios [si Abraham] dai . . . nagduwaduwa huli sa kakulangan nin pagtubod, kundi nagin makosog huli sa saiyang pagtubod, na nagpapamuraway sa Dios.”​—Roma 4:20.

Sa pagsurat sa mga Judio na nagin Kristiano kan saiyang kaaldawan, si Pablo nangatanosan na sa duwang marigon na dahelan sinda makasasarig sa panuga nin Dios na kaligtasan paagi ki Jesus. Sa pagsitar sa panuga nin Dios ki Abraham asin sa Saiyang banal na sumpa kaiba kaiyan, an apostol nangatanosan: “An mga tawo ipinanunumpa an saro na orog na dakula, asin an saindang sumpa iyo an panapos sa gabos na pasuruhay, huli ta iyan legal na garantiya sa sainda. Sa paaging ini an Dios, kan mawot niang ipahayag nin orog sa mga paramana kan panuga an dai pagkaliwat kan saiyang kahatolan, suminumpa, tanganing, paagi sa duwang dai nagliliwat na bagay na dian dai mangyayaring magputik an Dios, kita na nagdulag pasiring sa pailihan magkaigwa nin masarig na pagpakosog na mangapot sa paglaom na ibinugtak sa atubangan niato.” (Hebreo 6:​16-18) Iyo, totoo asin masasarigan an mga panuga nin Dios. Si Jehova makakamhan sa gabos asin iyo sana an may kakayahan na garantiyahan an kaotoban kan saiyang itinaram.

An Paglaom​—“Sierto Asin Marigon”

Si Pablo nagsurat na an Kristianong paglaom “sierto asin marigon.” (Hebreo 6:19) Aram ni Pablo kun saen napapasikad an saiyang paglaom. Saiyang ipinaliliwanag: “Iyan [an paglaom] minalaog sa lipod.” Ano an boot sabihon kaini? Malinaw na an boot sabihon digdi ni Pablo iyo an suanoy na templo sa Jerusalem. Digdi may kuwartong Kabanalbanale, na separado sa ibang kabtang kan edipisyo paagi sa lipod. (Exodo 26:​31, 33; Mateo 27:51) Siyempre, haloyon nang nalaglag an literal na templo sa Jerusalem. Kaya, ngonyan, ano an katimbang kan Kabanalbanaleng ini?

An langit mismo, na duman nagtutukaw sa trono an Dios mismo! Ipinaliwanag ini ni Pablo kan sia magsabi na si Jesus pagkasakat nia sa langit “naglaog, bakong sa banal na lugar na ginibo nin mga kamot [sa templo sa Jerusalem], na inarog sa tunay, kundi sa langit mismo, tanganing tumindog sa atubangan nin Dios para sa sato.” (Hebreo 9:24) Kaya an Kristianong paglaom, na minatabang sato na labanan an pagkadesesperar, depende bakong sa mga politikong tawo kundi sa sarong langitnon na areglo. Iyan depende sa Saro na nombrado nin Dios, si Jesu-Cristo, na nagtao kan saiyang buhay bilang pantubos sa satong mga kasalan asin ngonyan nasa atubangan na nin Dios sa pagtabang sato. (1 Juan 2:​1, 2) Saro pa, siring sa parateng ipinaliliwanag sa magasin na ini, an Jesus na ini iyo an ninombrahan nin Dios na magsakop bilang Hade sa langitnon na Kahadean nin Dios asin iyo na poon pa kan 1914. Sa dai na mahahaloy hahaleon kan langitnon na Kahadean na ini an mga bagay na dahelan na nadidesesperar an dakol.

Paglaom​—“Angkla Para sa Kalag”

Tanganing makombensir an mga nagbabasa na marigon an pasisikadan kan saindang paglaom sa kaligtasan paagi ki Jesus, guminamit nin pagbabaing si Pablo. “An paglaom na ini,” an paliwanag nia, “yaon sa sato bilang angkla para sa kalag.”​—Hebreo 6:19.

An angkla aram na marhay nin mga parabiyahe arog ni Pablo. An suanoy na mga angkla nakaaagid na marhay sa modernong mga angkla, na parateng gibo sa batbat na may duwang garo-ngipon na poro na pankurapot sa irarom kan dagat. Kan pasiring sa Roma kaidtong mga taon 58 C.E., an barkong nasasakyan ni Pablo namemeligrong masangrad. Alagad ta kan an barko minapasiring sa mas hababaw pa, an mga tripulante “nagholog nin apat na angkla hale sa likod.” Salamat sa mga angklang idto, an barko nakaligtas sa bagyo.​—Gibo 27:​29, 39, 40, 44.

Kun siring, ano an dapat nindong gibohon tanganing magibong arog kasegurado nin angkla an saindong paglaom tangani na makaya nindo an kasakitan sa pagbuhay, pisikal o emosyonal na helang, o ano pa man na ibang “bagyo” na umagi saindo? Enot, siertohon sa saindong sadiri na an mga panuga kan Biblia masasarigan. “Siertohon an gabos na bagay.” (1 Tesalonica 5:21) Halimbawa, sa sunod na kaolayon kamo nin mga Saksi ni Jehova, hinanyogon an saindang sinasabi. Kun bihira sindang dumalaw sa saindong lugar, hanapon sinda sa pinakaharaning Kingdom Hall. Dai kamo pipiriton na umayon sa sainda, pero iimbitaran kamo na umako nin daing bayad na pag-adal sa Biblia, na iaareglong gibohon sa lugar asin oras na kombenyente sa saindo.

Sisiertohon saindo kan siring na pag-adal na an Dios “iyo an parabalos sa mga maigot na naghahanap sa saiya.” (Hebreo 11:6) Manonodan nindo na sa dai na mahahaloy hahaleon kan Kahadean nin Dios sa pagsakop kan Hade, si Cristo Jesus, an karatan asin bakong pagkapantaypantay na dahelan na an dakol desesperado ngonyan. Sa pamamahala kan Kahadean na iyan, an dagang ini ibabalik sa pagigin paraiso, asin tatawan nin Dios nin buhay na daing sagkod an mga namomoot sa saiya. (Salmo 37:29; Kapahayagan 21:4) Kanigoan kamamuraway na paglaom!

Maingat na basahon an Biblia tanganing maheling na totoo an paglaom na ini. Dangan maghingoa na makultibar an dayupot na personal na relasyon sa Dios, na nagigin katood nia arog ni Abraham. (Santiago 2:23) Mantang si Jehova an “Paradangog nin pamibi,” isabi saiya an saindong mga pinaghahaditan. Kun odok an saindong pagdolok, an saindong pamibi makatatabang saindo na gumian an saindong mga pasan asin mahale an saindong pagkadesesperar. Tibaad bukasan pa ngani kan espiritu nin Dios an paagi na maliwat an kamugtakan na ikinasasakit nindo.​—Salmo 55:22; 65:2; 1 Juan 5:​14, 15.

“Mangapot”!

Pakarekomendar na an saiyang mga kapwa disipulo “siertohon an gabos na bagay,” idinugang ni Pablo: “Mangapot sa marahay.” (1 Tesalonica 5:21) An sarong paagi na magibo ini makiiba sa mga tawo na nangangapot man sa Kristianong paglaom. An madonong na hadeng si Salomon nagpatanid: “Sia na naglalakaw na kaiba nin mga madonong magigin madonong, alagad sia na nakiiiba sa mga mangmang maraot an aabotan.” (Talinhaga 13:20) Dai itogot na an salang paghona o pagkasopog makaolang saindo sa paghanap sa marahay na mga kaiba. Halimbawa, kabilang sa mga Saksi ni Jehova an mga tawo na kaidto daing paglaom. Alagad an saindang pag-adal sa Biblia, kaiba an maogmang pakikiiba sa mga kapagtubod, nagpaparigon sa saindang relasyon ki Jehova asin nagtatao sainda nin masasarigan, garo-angklang paglaom. Ini daw talagang nakahahale sa pagkadesesperar? Iyo nanggad.

Helinga si Annmarie, na nadesesperar huli sa maisog na tratamiento kan saiyang agom. “Nagdesisyon akong tapuson an sakong buhay,” an paliwanag nia, “pero sa dai ko maaraman na dahelan nagdesisyon akong mamibi nguna sa Dios. An nagigirumdoman kong sinabi ko, ‘Taano ta dai mo ako natatabangan? Haloy na akong naglalaom saimo, pero daing nangyayari.’ Tinapos ko an sakong pamibi na iniisip na mayo nin katuyohan an buhay, kaya marahay pang magadan na ako. Kan oras na idto may nagtoktok. Inisip kong dai idto intindihon, na naglalaom na kun siisay man idto maghale na sana.

“Nagpadagos an pagtoktok, asin naribok ako. Pinahid ko an sakong luha asin hineling kun siisay an nasa pinto, na naglalaom na makahale tolos ako tanganing magibo ko an sakong intension. Pero,” sabi ni Annmarie, “salamat ki Jehova, bakong siring an nangyari, ta pagbukas ko sa pinto, may naheling akong duwang babaeng nagtitindog. Totoo, ribaraw na marhay an isip ko, asin dai ko man talaga nasabotan an sinasabi ninda. Pero inalokan ninda ako nin libro na magpapaliwanag na may katuyohan an buhay. Idto an talagang kaipuhan ko tanganing mabuhay liwat an interes ko sa buhay.” Iinareglo kan mga bisita nia an regular na pakiadal sa saiya sa Biblia. Si Annmarie nakanood na magin katood nin Dios. Ini man nagtao saiya nin katuyohan sa buhay. Ngonyan tinatabangan nia an iba na magsarig man sa Dios.

Tibaad naglaom kamong matapos an pagkadesesperar na dai narerealisar an gabos na kalabot. Alagad kun kamo namibi na: “Dumatong logod an kahadean mo. Gibohon logod an boot mo, kun paano sa langit, siring man sa daga,” kun siring ipinamibi nindo an pagdatong kan Kahadean nin Dios sa pamamahala ni Jesu-Cristo, na mahale kan mga bagay na dahelan na madesesperar an mga tawong may matanos na puso. (Mateo 6:10) An saindong personal na pag-adal sa Biblia asin regular na pakikiiba sa iba na may siring man na pagsarig maparigon sa saindong pangangapot sa paglaom na an Kahadean ni Jehova dumatong asin gibohon na Paraiso an satong daga. (1 Timoteo 6:​12, 19) Ini an mamuraway na paglaom na ipinaiisi kan magasin na ini sa kada luwas. Bilog na pusong akoon an paglaom tanganing mapaglabanan an pagkadesesperar. Tunay nanggad, an paglaom “dai nagdadara nin kamondoan.”​—Roma 5:5.

[Ritrato sa pahina 7]

An pag-adal sa Biblia nagtatao sato nin paglaom na nagseserbing “angkla para sa kalag”