Taano ta Makuri an Pagkadesesperar?

PAGLAOM sa mas marahay na buhay​—naotob man giraray sa katapustapusi! Ini an paniniwala kan dakol na nag-iistar sa inaapod kaidtong Sirangan na Alemania kan mapukan an Lanob sa Berlin kan Nobyembre 1989. Pero pakalihis nin mga sarong taon, sinda nagreklamo na “mas nasasakitan sindang atubangon an maringis na kinaban nin kapitalistang demokrasya kisa buhay na protehido kan Lanob sa Berlin.” An resulta? Pagkadisganar asin nag-oorog na pagkadesesperar.

An kadahasan sa pamilya asin komunidad puwedeng makapirit sa mga tawo na humale sa saindang harong huli sa paghanap nin katiwasayan, alagad ta pipira sana an nakanonompong kaiyan. An iba tibaad an kaabtan mapabilang sa mga daing istada na sa mga tinampo nag-iistar. Sa nagkapirang nasyon an kadaklan sa sainda naguguot sa kadakol na rekisitos kan gobyerno. Mantang dai kayang magkaharong huli ta mayo sinda nin trabaho, dai man sinda puwedeng makakua nin trabaho ta mayo sinda nin adres sa harong. Naghihingoang tumabang an mga ahensia kan gobyerno sa asistensia publika, alagad ta nahahaloyhaloy na resolberan an mga problema. Kaya nagkakaigwa nin pagkabigo asin pagkadesesperar.

Huli sa pagkadesesperar dakol na babae an nakagiginibo nin nakakukubhan na mga paagi. Sa report na Women and Crime in the 1990s, an paralektura sa ley na si Dr. Susan Edwards nagpapaliwanag: “An pagkaholog [sa pagpapatotot] nin mas hoben na mga babae direktang resulta nin ekonomikong pangangaipo, bakong nin kakulangan nin disiplina sa sadiri o pinaghalean na pamilya.” Siring man, an mga barobatang lalaki na naghahale sa harong sa paghanap nin trabaho sa parate mayong nakukua. An iba, sa pagkadesesperar, nagigin ‘paarkilahan na mga lalaki,’ na ipinagagamit an saindang hawak sa mga homoseksuwal para sa pagkakan asin istaran, na nagigin rogaring nin maraot na mga kriminal.

An maringis na mga katunayan sa politika, kadahasan, kasakitan sa kabuhayan, gabos puwedeng gikanan nin pagkadesesperar. Pati an mga propesyonal dai nalilibre mantang hinihingoa nindang papagdanayon an saindang maluhong pamumuhay mantang inaatubang an naggagrabeng pinansial na mga problema. An resulta? “An pan-aapi puwedeng makaparungaw sa sarong madonong,” arog kan pagkasabi ni Hadeng Salomon kan suanoy!a (Eclesiastes 7:7) Tunay nanggad, huli sa pagkadesesperar nagdadakol an minagibo kan pinakagrabeng solusyon​—an paghuhugot.

An Pinakagrabeng Solusyon

An dakol na paghuhugot nin mga hobenes nagpapaheling na pati sinda apektado kan damat na pagkadesesperar. An sarong Britanong kolumnista sa diaryo naghapot: “Ano an nangyayari sa satong panahon na dahelan nin grabeng pagkadesesperar nin mga tin-edyer?” Sa pagsiyasat sa mga aki na nasa pag-oltanan nin 8 asin 16 an edad na naospital pakatapos na ilohon an sadiri, si Dr. Eric Taylor kan London’s Institute of Psychiatry nagbabareta: “An sarong makangangalas na bagay iyo na kadakol sa mga aki an desesperado asin daing paglaom manongod sa mga bagay.” An Britania may rekord nin kinakarkulong 100,000 na dai nakagagadan pero tuyong pag-inom nin ilo taon-taon na garo man sana desesperadong mga paghagad nin tabang.

An sarong institusyon sa paglimos sa Britania pinonan an sarong kampanya na hinanyogon na may pagkaherak an mga desesperado. Sa paaging ini sinasabi kan mga parakonseho dian na sinda nagtatao nin “mga pansalida sa kagadanan.” Pero, inaadmitir ninda na dai ninda kayang resolberan an mga problema na dahelan kan pagkadesesperar nin mga tawo.

An bilang nin mga paghuhugot nagpaparisa “kun gurano an pagkarayoan nin boot asin kakulangan nin sosyal na pagkaborogkos sa sosyedad,” an komento kan peryodikong The Sunday Correspondent. Taano daw ta halangkawon an bilang nin mga paghuhugot ngonyan? Sinitar kan peryodiko an “kadaihan nin istada, pagkosog nin pag-inom, peligro nin Aids asin pagsirra kan mga ospital sa kapay” bilang mga dahelan na nagtutulod sa mga tawo sa grabeng pagkadesesperar kaya hinohona ninda na an solamenteng solusyon sa saindang mga problema iyo an paghuhugot.

Igwa daw nin paglaom na mahale an pagkadesesperar? Igwa! “Tindog kamo nin tanos asin tingagan an saindong mga payo” an nakapakokosog na kurahaw ni Jesus! (Lucas 21:28) Ano daw an boot niang sabihon? Ano an malalaoman niato?

[Nota sa Ibaba]