Dai Na Mahahaloy—Sarong Kinaban na Mayo nin Pagkadesesperar

AN BUHAY paorog nang paorog na nagigin eksihido, asin dakol an dahelan nin pagkadesesperar. Kun nadedesganar, tibaad nadedepisilan kitang kontrolon an satong emosyon. Tara, maski an mga tawo na gustong mabuhay puedeng magin mamondong marhay! Estudyare an pirang halimbawa.

Kan suanoy na mga panahon, si propeta Moises nanluyang marhay an boot kaya sia nagsabi sa Dios: “Tabi gadanon mo na logod ako, kun ako naoyonan kan saimong mga mata, asin dai mo ipaheling sa sako an sakong kapahamakan.” (Bilang 11:15) Kan nagdudulag sa saiyang mga kaiwal, si propeta Elias nagkagsing: “Igo na! Ngonyan, O Jehova, kuana an sakong kalag [buhay].” (1 Hade 19:4) Asin si propeta Jonas nagsabi: “O Jehova, tabi halea sa sako an sakong kalag, huli ta an sakong kagadanan orog karahay kisa sakong pagigin buhay.” (Jonas 4:3) Alagad si Moises, si Elias, o si Jonas dai naghugot. Sinda gabos nakakaaram kan togon nin Dios: “Dai ka maggadan.” (Exodo 20:13) Huling makosog an pagtubod sa Dios, aram ninda na mayo nin situwasyon na dai nang paglaom asin na an buhay balaog gikan sa Dios.

Paano man an mga problema na inaatubang ta ngonyan? Apuera sa emosyonal na mga kapurisawan o pisikal na mga problema, tibaad kun beses kaipuhan tang tioson an pagmaltrato nin mga miembro nin pamilya, kataed, o katrabaho. May nauunabihan an Biblia na mga tawong pano “nin gabos na pagkabakong matanos, kabikoan, kaaraan, karatan, na pano nin pagkauri, paggadan, iriwal, pandadaya, maraot an intension na ugale, na mga parahinghing, mga paralibak, naoongis sa Dios, daing galang, maabhaw, nagpapasikat sa sadiri, mga paratugdas nin karatan, masinuhay sa mga magurang, mayong pakasabot, naglalapas nin mga tipan, mayo nin natural na kapadangatan, mayong pagkaherak.” (Roma 1:28-31) Dahel napalilibotan nin siring na mga tawo aroaldaw an buhay tibaad magin garo siring sa pagabat. Paano ta matatabangan an mga nangangaipo nin karangahan asin kaginhawahan?

Pagigin Andam na Maghinanyog

An mga kasakitan asin pagdusa puedeng magin dahelan na an sarong indibiduwal mawaran nin pagkatimbang kan saiyang isip. An madonong na tawo nagsabi: “An pan-aapi puedeng makaparungaw sa sarong madonong.” (Eclesiastes 7:7) Kaya maninigo na seryosong asikasohon an saro na nagtataram manongod sa paghugot. An mga problema nia, baga man emosyonal, pisikal, sa isip, o espirituwal, tibaad nangangaipo nin tolos-tolos na atension. Siempre, laen-laen an propesyonal na mga pagbolong asin terapi, asin dapat na gumibo nin personal na desisyon mapadapit sa klase nin mga terapi.—Galacia 6:5.

Ano man an dahelan kan mga pakamate nin paghugot, an pagkaigwa nin may pagmansay, madinamayon, asin mapasensiang tawo na matutugaan nin mga problema puede nanggad na dakula an magigibo. An mga miembro nin pamilya asin katood na andam na maghinanyog puedeng makatabang. Apuera sa pakikipagkapwa asin kabootan, an nakaparirigon na mga ideya hale sa Tataramon nin Dios puedeng makatabang na marhay sa mga nawaran nin paglaom.

Espirituwal na Tabang sa mga Purisaw

Tibaad mangalas kamong maaraman kun gurano kanakaparirigon sa boot an pagbasa sa Biblia. Minsan ngani bako iyan na manwal para sa marahay na kamugtakan kan isip, matatabangan kita kan Biblia na mapahalagahan an buhay. An sabi ni Hadeng Salomon: “Namidbid ko na mayong orog karahay para sa sainda kisa maggayagaya asin gumibo nin marahay sa panahon kan pagkabuhay nin saro; asin siring man na an lambang tawo kumakan asin uminom nanggad patin makaheling nin karahayan para sa gabos niang kahigosan. Iyan an balaog nin Dios.” (Eclesiastes 3:12, 13) Apuera sa nakakokontentong gibohon na nagtatao nin kahulogan sa buhay, an simpleng mga bagay—arog baga kan preskong doros, saldang, mga burak, kahoy, asin gamgam—mga balaog na tao nin Dios na puede tang ikaogma.

Orog pa nganing nakapaoogma an garantiya kan Biblia na si Jehova Dios asin an saiyang Aki, si Jesu-Cristo, may pagmakolog sa sato. (Juan 3:16; 1 Pedro 5:6, 7) Tamang-tama, an salmista nagsabi: “Pag-omawon si Jehova, na sa aroaldaw dinadara an pasan para sa sato, an tunay na Dios kan satong kaligtasan.” (Salmo 68:19) Minsan ngani tibaad makamate kita nin pagkadaing halaga asin pagkadaing kuenta, inaagda kita nin Dios na mamibi sa saiya. Makasisierto kamo na mayo nin mapakumbaba asin sinserong naghahagad nin tabang sa saiya na isisikwal.

Mayo nin tama sanang maglaom nin buhay na daing problema sa ngonyan. (Job 14:1) Pero, an katotoohan sa Tataramon nin Dios ipinaheling sa dakol na tawo na an paghugot bako an tamang paagi nin pagresolber sa saindang mga problema. Isip-isipa na sana kun paano tinabangan ni apostol Pablo an sarong desesperadong bantay sa bilanggoan na, “huling nagimata sa pagtorog asin naheling na bukas an mga pinto kan bilanggoan, hinugkot an saiyang espada asin magadan na kutana kan saiyang sadiri, sa paghona na nakadulag an mga bilanggo.” Ensegida, an bantay na idto sa bilanggoan nagkonklusyon na mas marahay pa an paghugot kisa makasosopog asin tibaad atrasadong kagadanan dahel sa kapabayaan nia. An apostol nagkurahaw: “Dai mo pagkologan an saimong sadiri, huli ta uya kami gabos!” Si Pablo dai nagtapos sa mga tataramon na iyan. Sa katunayan, rinanga ninda ni Silas an bantay sa bilanggoan asin sinimbag an hapot kaini: “Mga ginoo, ano an dapat kong gibohon tanganing maligtas?” Sinda nagsimbag: “Tumubod ka sa Kagurangnan na Jesus asin ika maliligtas, ika asin an saimong kairiba sa harong.” Dangan itinaram ninda an tataramon ni Jehova sa saiya asin sa kairiba nia sa harong, na an resulta iyo na “sia asin an saiyang harong tolos na nabautismohan.” An bantay na iyan sa bilanggoan asin an gabos niang kairiba sa harong naggayagayang marhay asin nakanompong nin bagong kahulogan sa buhay.—Gibo 16:27-35.

Ngonyan, abaang kaginhawahan na maaraman na bakong an Dios an responsable sa mga karatan! Ipinamimidbid kan saiyang Tataramon an sarong maraot na espiritu, na “inaapod Diablo asin Satanas,” bilang an saro na “ilinalagalag an bilog na ineerokan na daga.” Alagad mauubos na an saiyang panahon. (Kapahayagan 12:9, 12) Dai na mahahaloy, an gabos na kapurisawan na dinara ni Satanas asin kan saiyang mga demonyo sa mga nag-eerok digdi sa daga matatapos paagi sa pag-interbenir nin Dios. Dangan an ipinanuga nin Dios na bagong kinaban nin katanosan mapangyari nin permanenteng katapusan sa mga dahelan kan kadaihan nin paglaom asin paghugot.—2 Pedro 3:13.

Karangahan sa mga Nag-aagrangay Para sa Tabang

Dawa ngonyan, an mga dai nin paglaom puedeng makakua nin karangahan sa Kasuratan. (Roma 15:4) Si salmista David nag-awit: “An pusong laglag asin ronot, O Dios, dai mo duduhagion.” (Salmo 51:17) Totoo, dai ta madudulagan an nagkapirang kasakitan asin mamamatean ta an mga epekto nin pagkabakong sangkap. Alagad an pagkua nin tamang kaaraman dapit sa satong maboot, mamomoton, asin makatanosan na langitnon na Ama maasegurar giraray sa sato na kita mahalagang marhay sa saiyang mga mata. An Dios puedeng magin satuyang pangenot na Katood asin Paratokdo. Kun mapatalubo kita nin dayupot na relasyon ki Jehova Dios, nungka niang susudyaon an satong linalaoman sa saiya. “Ako, si Jehova, an saimong Dios,” sabi kan satong Kaglalang, “an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.”—Isaias 48:17.

Dakol na tawo an natabangan kan pagsarig sa Dios. Bilang ilustrasyon: Si Mara pinanluya na kan nagpapadagos na depresyon kan magadan an saiyang kasarosaroing aking lalaki sa aksidente sa auto.a Nataranta sia asin nagprobar na maghugot. Minsan siring, sia ngonyan nagbabangon nin amay aroaldaw tanganing asikasohon an saiyang mga trabaho sa harong. Naoogma sia sa paghinanyog sa musika asin pagtabang sa iba. An paglaom na “magkakaigwa nin pagkabuhay liwat an mga matanos sagkod an mga bakong matanos” hinale an kolog na bunga kan makaturotristeng pagkagadan kan saiyang padangat na aki asin pinakosog an saiyang pagtubod sa Dios. (Gibo 24:15) Mantang nungkang minawot ni Mara na magin siring sa anghel sa langit, an mga tataramon sa Salmo 37:11 tuminaros sa saiyang puso: “An mga mahoyo mismo makasasadiri kan daga, asin manonompongan nanggad ninda an saindang nangongorog na dakulang kaogmahan sa nagsosopay na katoninongan.”

An saro pang babaeng taga Brazil, si Sandra, nagmaigot na marhay na magin pinakamarahay na ina para sa saiyang tolong aki. Inadmitir nia: “Sibot-sibot ako kaya kan an ama ko biglang magadan asin madiskobre ko, kadungan kaiyan, na an sakong agom igwa nin sambay, dai ko na lamang naisip na mamibi sa Dios para sa tabang.” Huli sa pagkadesesperar si Sandra nagprobar na maghugot. Ano an nakatabang sa saiya na maomayan? An saiyang pagpapahalaga sa espirituwal na mga bagay. “Barobanggi bago ako matorog, binabasa ko an Biblia, asin hinihingoa ko na ibugtak an sakong sadiri sa kamugtakan kan mga tawo na binabasa ko. Binabasa ko man an mga magasin na Torrengbantayan asin Awake!, asin espesyalmenteng gustong-gusto ko an mga estorya nin buhay huli ta tinatabangan ako kaiyan na makontento sa sakong kamugtakan sa buhay.” Sa pakaaram na si Jehova iyo an saiyang pinakadayupot na katood, nakanood sia na magin espesipiko sa saiyang mga pamibi.

Sarong Ngapit na Mayo nin Pagkadesesperar

Abaa kanakararangang maaraman na temporaryo sana an pagdusa nin tawo! Sa pamamahala kan Kahadean nin Dios, maggagayagaya an mga aki asin nasa edad na na biktima ngonyan nin krimen, inhustisya, o prehuwisyo. Siring kan ihinula sa sarong makahulang salmo, an ninombrahan ni Jehova na Hade, si Jesu-Cristo, “ililigtas . . . an dukha na naghahagad nin tabang, siring man an nagsasakit nin makuri asin an siisay man na mayo nin paratabang.” Dugang pa, “maheherak sia sa hababa asin sa dukha, asin an kalag kan mga dukha saiyang ililigtas.” Tunay nanggad, “gikan sa pan-aapi asin sa kadahasan saiyang tutuboson an saindang kalag, asin an saindang dugo magigin mahalagang marhay sa saiyang mga mata.”—Salmo 72:12-14.

Harani na an panahon para sa kaotoban kan makahulang mga tataramon na iyan. Kaakit-akit daw para sa saindo an ideya na pagkamit nin buhay na daing katapusan digdi sa daga sa siring na mga kamugtakan? Kun iyo, may dahelan kamo na maggayagaya asin pakamahalon an buhay bilang balaog gikan sa Dios. Asin kun ihinihiras nindo sa iba an nakararangang mga panuga na ini sa Kasuratan, puede kamong makatao nin dakulang kaogmahan sa buhay kan mga nag-aagrangay para sa tabang sa daing pagkaherak, daing pagkamoot na kinaban na ini.

[Nota sa Ibaba]

[Ritrato sa pahina 6]

Dakol an oportunidad para sa kaogmahan ngonyan

[Ritrato sa pahina 7]

Inaantisipar daw nindo an sarong kinaban na mayo nin pagkadesesperar?