Buhay—Sarong Balaog Hale sa Dios

BEINTE-KUWATRO oras aroaldaw, an satong puso nagbobomba nin mahalagang dugo sa bilog niatong hawak. Natotorog kita, asin an satong mga pulmon nagpapadagos sa pagdakula asin pagsadit. Nagkakakan kita, asin an kakanon automatikong tinutunaw. Ini gabos nangyayari aroaldaw, na kakadikit o mayo kitang itinataong atension. An misteryoso asin makangangalas na mga prosesong ini, na madalion na dai mapahalagahan, kaiba kan balaog na inaapod niatong buhay. Sa sarong sentido iyan sarong balaog na maaapod na milagroso.

Horophoropa an prosesong pangingidam asin pagkamundag nin tawo. Minsan ngani sa normal ilinuluwas nin hawak an nakalaog na tisyu, ipinupuwera kan matris an napertilisar na similya nin babae. Imbes na iluwas an nagdadakulang embrion bilang nakalaog na tisyu, iyan pinakakakan asin pinoprotehiran kaiyan sagkod na iyan andam nang lumuwas bilang sarong omboy. Kun mayo an kakayahan kan matris na gibohon an napakahalagang pagpuwerang ini sa pinagkatodan na iluwas an nakalaog na tisyu, magigin imposible an pagkamundag nin tawo.

Pero, magigin halipot an buhay nin bagong mamundag na omboy kun bakong huli sa nangyayari sa matris kun an feto mga apat na bulan pa sana. Sa panahon na iyan minapoon iyan na supsupon an pamagang kaiyan, na iniihersisyo an kalamnan na sa huri magpapangyari saiya na sumuso sa ina. Asin ini saro sana sa kadakol na bagay na may labot sa buhay asin kagadanan na riniresolberan haloy pa bago mamundag an omboy.

Mantang nasa matris an feto, may labot sa gilid kan puso kaiyan. Pero, an labot na ini automatikong minasirra pagkamundag. Dugang pa, an sarong dakulang ugat na nananggilid sa mga pulmon mantang nasa matris pa an feto automatikong minasadit pagkamundag; an dugo minadiretso na sa mga pulmon, na dian iyan mabubugtakan nin oksiheno sa pagpoon kan omboy na maghangos.

Ini gabos kapinonan pa sana. Sa bilog na buhay, an serye nin magayonon an disenyong mga sistema (arog baga kan mga sistema respiratoryo, sirkulatoryo, nerbiyos, asin endokrino) magibo asin makoordinar kan saindang mga trabaho sa tibay na dai mapaniwalaan nin tawo​—gabos para sa pagpapadagos nin buhay. Bakong makangangalas na an sarong suanoy na kagsurat nagsabi mapadapit sa Dios: “Ika oomawon ko huli ta sa makangingirhat na paagi ako makangangalas na ginibo. Makangangalas an saimong mga gibo, na aram na gayo kan sakuyang kalag.”​—Salmo 139:14.

Malinaw na an kagsurat sa magagayon na tataramon na iyan dai nagtubod na an buhay bunga sana nin buta, ebolusyonaryong pagkanorongod o aksidente. Kun siring an kamugtakan, mayo kita nin mga obligasyon o paninimbagan sa kun paano niato ginagamit an satong buhay. Minsan siring, an mga mekanismo nin buhay malinaw na nagpaparisa nin disenyo, asin an disenyo nagkakaipo nin paradisenyo. Sinasabi kan Biblia an prinsipyong ini: “Siyempre, an lambang harong igwa nin kaggibo, alagad an naggibo kan gabos na bagay iyo an Dios.” (Hebreo 3:4) Kaya mahalaga na “aram nindo na si Jehova Dios. Sia an naggibo sa sato, asin bakong kita mismo.” (Salmo 100:3) Iyo, an buhay bako sanang marahay na aksidente; iyan balaog hale mismo sa Dios.​—Salmo 36:9.

Mantang siring an nangyari, ano an satong obligasyon sa Kagtao nin buhay? Paano nia kita linalaoman na gamiton an satong buhay? An mga ini asin an kasumpay na mga hapot pag-oolayan niato sa masunod na artikulo.