An Presensia kan Mesiyas Asin an Saiyang Paghade

“An Jesus na ini na inako gikan sa saindo pasiring sa langit madatong sa iyo man sanang paagi na naheling sia nindong nagsasakat sa langit.”​—GIBO 1:11.

1, 2. (a) Paano rinanga nin duwang anghel an mga apostol ni Jesus kan sia sumakat sa langit? (b) Anong mga hapot an pinalalataw kan paglaom sa pagbalik ni Cristo?

AN ONSENG lalaki nagtitindog sa sirangan na bakilid kan Bukid nin mga Olibo, na nakatorohok sa langit. Pira pa sanang minuto an nakaagi si Jesu-Cristo nagsakat hale sa tahaw ninda, na ruminayo an saiyang pigura sagkod na idto natahoban nin panganoron. Sa nakaaging mga taon kaiba nia, naheling kan mga lalaking ini na si Jesus nagtao nin abundang pruweba na sia an Mesiyas; inagihan na ngani ninda an kamondoan huli sa saiyang kagadanan asin an makuring kaogmahan huli sa saiyang pagkabuhay liwat. Ngonyan nawara na sia.

² An duwang anghel biglang naglataw asin isinabi an nakararangang mga tataramon na ini: “Mga lalaking taga-Galilea, taano kamo ta nagtatangad sa langit? An Jesus na ini na inako gikan sa saindo pasiring sa langit madatong sa iyo man sanang paagi na naheling sia nindong nagsasakat sa langit.” (Gibo 1:11) Nakapakokosog nanggad nin boot​—an pagsakat ni Jesus sa langit dai nangahulogan na natapos na an saiyang interes sa daga asin katawohan! Al kontraryo, mabuwelta si Jesus. Daing duwa-duwa na an mga tataramon na ini nakatao nin paglaom sa mga apostol. An minilyon na tawo ngonyan tinatawan man nin dakulang halaga an panuga sa pagbalik ni Cristo. An iba inaapod iyan na “Ikaduwang Pagdatong” o “Adviento.” Pero an kadaklan nariribong sa kun ano an tunay na kahulogan kan pagbalik ni Cristo. Sa anong paagi na mabalik si Cristo? Noarin? Asin paano ini nakaaapektar sa satong buhay ngonyan?

An Paagi kan Pagbalik ni Cristo

3. Ano an paniniwala nin dakol manongod sa pagbalik ni Cristo?

³ Sono sa librong An Evangelical Christology, “an ikaduwang pagdatong o pagbalik ni Cristo (parousia) nag-eestablisar kan kahadean nin Dios, sa katapustapusi, nin hayag, asin sagkod lamang.” Naniniwala an kadaklan na an pagbalik ni Cristo maheheling, literal na maheheling nin gabos sa planetang ini. Tanganing masuportaran an ideyang ini, dakol an itinotokdo an Kapahayagan 1:​7, na nagsasabi: “Uya! Sia madatong kaiba kan mga panganoron, asin an gabos na mata makaheheling sa saiya, asin an mga suminaksak sa saiya.” Alagad dapat daw na saboton sa literal an bersikulong ini?

4, 5. (a) Paano niato naaaraman na an Kapahayagan 1:7 bakong literal an kahulogan? (b) Paano pinatutunayan kan mismong mga tataramon ni Jesus an pagsabot na ini?

⁴ Girumdoma, an librong Kapahayagan iinaatubang “sa mga tanda.” (Kapahayagan 1:1) Kaya an bersikulong ini seguradong simboliko; total, paano “an mga suminaksak sa saiya” makaheheling sa pagbalik ni Cristo? Haros 20 siglo na sindang gadan! Saro pa, sinabi kan mga anghel na si Cristo mabalik “sa iyo man sanang paagi” na sia naghale. Bueno, paano sia naghale? May minilyon daw na nagheheling? Bako, pipira sanang maimbod an nakaheling kan pangyayari. Asin kan kaolayon sinda kan mga anghel, literal daw na pinagheheling kan mga apostol an pagbiyahe ni Cristo sagkod sa langit? Dai, tinahoban na si Jesus nin sarong panganoron. Paghaloyhaloy, segurado na sia naglaog na sa espiritung kalangitan bilang espiritung persona, na dai naheheling kan mga mata nin tawo. (1 Corinto 15:50) Kaya, sa pinakahalawig, an naheling sana kan mga apostol an kapinonan kan biyahe ni Jesus; dai ninda maheheling an katapusan kaiyan, an saiyang pagbabalik sa langitnon na presensia kan saiyang Ama, si Jehova. Ini puwede sana nindang mamansayan paagi sa saindang mga mata nin pagtubod.​—Juan 20:17.

⁵ Itinotokdo kan Biblia na si Jesus mabalik sa kaparehong marhay na paagi. Si Jesus mismo nagsabi dai mahaloy bago sia nagadan: “Kadikit pang panahon asin an kinaban dai na makaheheling sa sako.” (Juan 14:19) Sinabi man nia na “an kahadean nin Dios dai madatong na maheheling nin risang gayo.” (Lucas 17:20) Kun siring, sa anong sentido na “an gabos na mata makaheheling sa saiya”? Tanganing masimbag, enot kaipuhan nguna niato an malinaw na pakasabot sa termino na ginamit ni Jesus asin kan saiyang mga parasunod mapadapit sa saiyang pagbalik.

6. (a) Taano an mga termino na arog nin “pagbalik,” “pag-abot,” “adviento,” asin “pagdatong” ta bakong igong traduksion sa termino sa Griego na pa·rou·siʹa? (b) Ano an nagpapaheling na an pa·rou·siʹa, o “presensia,” mas halawig kisa sa ano man na madali sanang okasyon?

⁶ An totoo, bako sanang “pagbalik” an gigibohon ni Cristo. An terminong iyan, kapareho kan “pagdatong,” “pag-abot,” o “adviento,” nagpaparisa nin sarong okasyon sa halipot sanang panahon. Alagad ta orog pa dian an kahulogan kan termino sa Griego na ginamit ni Jesus asin kan saiyang mga parasunod. An termino pa·rou·siʹa, na sa literal nangangahulogan “kataed” o “presensia.” Minaoyon an kadaklan na iskolar na an kaiba sa terminong ini bako sanang pag-abot kundi an kasunod na presensia​—arog baga kan opisyal na bisita nin sarong hade. An presensiang ini bako sanang halipot na pangyayari; iyan espesyal na panahon, sarong itinalaan na peryodo nin panahon. Sa Mateo 24:​37-39, sinabi ni Jesus na “an presensia [pa·rou·siʹa] kan Aki nin tawo” magigin kapareho kan “mga aldaw ni Noe” na natapos sa Baha. Sa laog nin mga dekada itinotogdok ni Noe an dahong asin pinatatanidan an mga maraot bago uminabot an Baha asin pinara an maraot na palakaw na idto sa kinaban. Siring man, an dai naheheling na presensia ni Cristo malawig nin pirang dekada bago iyan sumagkod sa sarong dakulang panlaglag.

7. (a) Ano an nagpapatunay na an pa·rou·siʹa dai maheheling kan mga mata nin tawo? (b) Paano asin noarin maootob an mga teksto na nagsasabing an pagbalik ni Cristo maheheling kan “gabos na mata”?

⁷ Daing duwa-duwa, an pa·rou·siʹa dai literal na naheheling kan mga mata nin tawo. Kun iyo, taano ta dakol na panahon an inubos ni Jesus, arog kan maheheling niato, sa pagtao sa saiyang mga parasunod nin tanda tanganing tabangan sinda na mamansayan an presensiang ini?a Minsan siring, kun si Cristo dumatong na sa paglaglag sa pankinaban na palakaw ni Satanas, an katunayan kan saiyang presensia mahahayag na gayo sa gabos. Sa panahon na iyan na “an gabos na mata makaheheling sa saiya.” Pati an mga nagtutumang ki Jesus makamamansay, sa panluluya kan boot ninda, na an paghade ni Cristo tunay.​—Helingon an Mateo 24:30; 2 Tesalonica 2:8; Kapahayagan 1:​5, 6.

Noarin Iyan Mapoon?

8. Anong pangyayari an minatanda sa kapinonan kan presensia ni Cristo, asin saen ini nangyari?

⁸ An presensia kan Mesiyas mapoon sa okasyon na nakaootob sa pabalikbalik na tema sa mga hula sa Mesiyas. Sia kinoronahan bilang Hade sa langit. (2 Samuel 7:​12-16; Isaias 9:​6, 7; Ezequiel 21:​26, 27) Si Jesus mismo nagpaliwanag na an saiyang presensia konektado sa saiyang paghade. Sa nagkapirang ilustrasyon, ibinaing nia an saiyang sadiri sa sarong kagurangnan na binayaan an saiyang pamilya asin mga oripon, nagbiyahe nin haloy pasiring sa sarong “harayong daga” na duman sia nag-ako nin “makahadeng kapangyarihan.” Itinao nia an saro sa ilustrasyon na arog kaiyan bilang kabtang kan saiyang simbag sa hapot kan saiyang mga apostol manongod sa kun noarin mapoon an saiyang pa·rou·siʹa; an saro man itinao nia ta “sinda naghohona na an kahadean nin Dios bigla na sanang mahahayag.” (Lucas 19:​11, 12, 15; Mateo 24:3; 25:​14, 19) Kaya kaidtong panahon na sia yaon digdi sa daga bilang tawo, an pagkorona sa saiya haloyon pa, na mangyayari sa “harayong daga” nin langit. Noarin iyan mangyayari?

9, 10. Ano an ebidensia na si Cristo naghahade sa presente sa langit, asin kasuarin nia pinonan an saiyang paghade?

⁹ Kan an mga disipulo ni Jesus maghapot sa saiya: “Ano an magigin tanda kan saimong presensia asin kan pagtatapos kan palakaw nin mga bagay?” si Jesus nagsimbag paagi sa pagtao sainda nin detalyadong paglaladawan sa maabot na panahon na iyan. (Mateo, kapitulo 24; Marcos, kapitulo 13; Lucas, kapitulo 21; helingon man an 2 Timoteo 3:​1-5; Kapahayagan, kapitulo 6.) An tandang ini detalyadong paglaladawan sa sarong maribok na panahon. Iyan panahon na mamarkahan nin internasyonal na mga guerra, nag-oorog na krimen, nagraraot na buhay pampamilya, mga epidemyang helang, gutom, asin linog​—bakong bilang mga problemang lokal kundi bilang mga krisis na lakop sa daga. Pamilyar daw ini? An kada minaaging aldaw nagpapatunay na an ika-20 siglo tamang-tama sa paglaladawan ni Jesus.

¹⁰ An mga historyador minaoyon na an 1914 panahon nin pagkaliwat sa kasaysayan nin tawo, napakahalagang taon na pakalihis kaiyan an dakol sa mga problemang ini nawaran na nin kontrol, na nakalakop na sa daga. Iyo, an pisikal na mga pangyayari sa kinaban na kaotoban kan hula sa Biblia gabos nagtotokdo sa 1914 bilang an taon na si Jesus nagpoon na magsakop bilang Hade sa langit. Dugang pa, an hula sa Daniel kapitulo 4 nagtatao nin kronolohikong ebidensia na nagdadara sato sa iyo man sanang taon​—1914—​bilang an panahon na an nombradong Hade ni Jehova mapoon sa saiyang paghade.b

Taano ta Panahon nin Kariribokan?

11, 12. (a) Taano ta nadedepisilan an iba na maniwala na si Cristo naghahade sa langit ngonyan mismo? (b) Paano niato ikaiilustrar an nangyari pakatapos na koronahan si Jesus bilang Hade?

¹¹ Pero an iba nag-iisip-isip, ‘Taano ta maribokon an kinaban kun an Mesiyas naghahade sa langit? Dai daw nin maginibo an saiyang paghade?’ Tibaad makatabang an sarong ilustrasyon. An sarong nasyon pinamamahalaan nin sarong maraot na presidente. Nagpatindog sia nin maraot na palakaw na an impluwensia nakaaabot sa gabos na kanto kan daga. Pero nag-eleksion; nanggana an sarong marahay na tawo. Ano na ngonyan? Arog kan nangyayari sa pirang nasyon na demokratiko, nagkakaigwa nin pirang bulan na panahon nin transisyon bago inaguraron an bagong presidente. Ano an igagawe kan duwang tawong ini sa laog kan siring na panahon? Tolos-tolos daw na maatake an marahay na tawo asin gagabaon an gabos na karatan na ginibo kan naenot sa saiya sa bilog na nasyon? Imbes, bako daw na sia makonsentrar nguna sa kabeserang siudad, na inoorganisar an bagong gabinete asin pinuputol an koneksion sa maraot na mga barkada asin kampon kan dating presidente? Sa siring, kun sia magkapot na nin lubos na kapangyarihan, makapamamahala sia hale sa sarong malinig, marahay an dalagan na kabesera. Kun manongod sa maraot na presidente, dai daw nia aaprobetsaran an halipot na panahon na natatada tanganing makua sa nasyon an gabos na ilegal na ganansiang makukua nia bago sia mawaran kan gabos na kapangyarihan?

¹² Garo arog kaiyan an pa·rou·siʹa ni Cristo. Ipinaheheling kan Kapahayagan 12:​7-12 na kan si Cristo gibohon na Hade sa langit, enot pinalayas nia sa langit si Satanas asin an mga demonyo, sa siring linilinigan an lugar kan Saiyang gobyerno. Mantang nagtios kan haloy nang hinahalat na pagkadaog na ini, ano an ginibo ni Satanas sa laog kan “halipot na panahon” bago kapotan ni Cristo an lubos niang kapangyarihan digdi sa daga? Kapareho kan maraot na presidente, hinihingoa nia na makua an gabos na makukua nia sa daan na palakaw na ini. Bakong kuwarta an gusto nia; buhay nin mga tawo an gusto nia. Gusto niang irayo ki Jehova asin sa Saiyang nakatukaw nang Hade an pinakadakol na tawong mahihimo nia.

13. Paano ipinaheheling kan Kasuratan na an kapinonan kan paghade ni Cristo magigin maribok na panahon digdi sa daga?

¹³ Kaya bakong makangangalas na an kapinonan kan paghade kan Mesiyas nangangahulogan nin panahon nin “herak man kan daga.” (Kapahayagan 12:12) Siring man, ipinaheheling kan Salmo 110:​1, 2, 6 na an Mesiyas poponan an saiyang paghade ‘sa tahaw kan saiyang mga kaiwal.’ Paghaloyhaloy sana na lubos niang roronoton “an mga nasyon,” kaiba an gabos na kabtang kan maraot na palakaw ni Satanas, sagkod na mapara!

Kun an Mesiyas Na an Naghahade sa Daga

14. Ano an magigibo kan Mesiyas pakalaglaga nia sa maraot na palakaw nin mga bagay ni Satanas?

¹⁴ Pakalaglaga nia sa palakaw ni Satanas asin sa gabos na nagsusuportar dian, an Mesiyanikong Hade, si Jesu-Cristo, sa katapustapusi makahihimong otobon an makangangalas na mga hula sa Biblia na naglaladawan sa saiyang Milenyal na Paghade. Tinatabangan kita kan Isaias 11:​1-10 na masabotan kun magigin anong klaseng hade an Mesiyas. Sinasabi sato kan bersikulo 2 na sia magkakaigwa kan “espiritu ni Jehova . . . , espiritu nin kadonongan asin pakasabot, [kan] espiritu nin hatol asin nin kakosogan.”

15. Ano an magigin kahulogan kan ‘espiritu nin kakosogan’ sa paghade kan Mesiyas?

¹⁵ Horophoropa kun ano an magigin kahulogan kan ‘espiritu nin kakosogan’ sa paghade ni Jesus. Kan sia nasa daga, igwa sia nin kadikit na kakosogan gikan ki Jehova, na nagpangyari sa saiya na magmilagro. Asin ipinaheling nia an odok sa pusong kamawotan na tumabang sa mga tawo, na sinasabi, “Boot ko.” (Mateo 8:3) Pero an saiyang mga milagro kan mga aldaw na idto patanaw sana kan gigibohon nia kun sia naghahade na hale sa langit. Si Jesus magibo nin mga milagrong panglobo! An mga may helang, buta, bongog, kimay, asin pilay paoomayan sagkod lamang. (Isaias 35:​5, 6) An abundang kakanon, na pantay-pantay an pagkawaras, tatapuson sagkod lamang an gutom. (Salmo 72:16) Kumusta man an dai mabilang na minilyon sa mga lolobngan na ikinawili nin Dios na girumdomon? An “kakosogan” ni Jesus kaiba an kapangyarihan na buhayon sinda liwat, na tinatawan nin oportunidad an kada saro na mabuhay sagkod lamang sa Paraiso! (Juan 5:​28, 29) Pero, dawa igwa kan gabos na kakosogan na ini, an Mesiyanikong Hade magdadanay na mapakumbabang gayo. “Maoogma sia sa pagkatakot ki Jehova.”​—Isaias 11:3.

16. Magigin anong klaseng Hokom an Mesiyanikong Hade, asin paano iyan mapapalaen sa mga katunayan manongod sa mga hokom na tawo?

¹⁶ An Hadeng ini magigin man sangkap na Hokom. “Dai sia maghohokom oyon sa pakaheling sana kan saiyang mga mata, o magsasagwe oyon sana sa nadadangog kan saiyang mga talinga.” Siisay na hokom na tawo, kan nakaagi o sa presente, an ikalaladawan nin siring? Minsan an tawong marahayon an paghusgar makapaghohokom sana basado sa saiyang naheheling asin nadadangog, na ginagamit an ano man na kadonongan o pagmansay nia. Kaya, an mga hokom asin hurado sa daan na kinaban na ini puwedeng makombensir o maribaraw paagi sa tusong mga argumento, mga pasale sa pagbista, o nagkakakontrahan na ebidensia. Sa parate an mayayaman sana asin makapangyarihan an kayang magbayad para sa epektibong depensa, na sa katotoohan binabakal an hustisya. Bakong siring sa pagsakop kan Mesiyanikong Hokom! Nababasa nia an puso. Mayo nin matatago sa saiya. An hustisya, na timplado nin pagkamoot asin pagkaherak, dai ipababakal. Iyan perming mangyayari.​—Isaias 11:​3-5.

Kun Paano Kamo Apektado kan Saiyang Paghade

17, 18. (a) Anong maogmahon na ladawan kan ngapit nin katawohan an sinasabi sa Isaias 11:​6-9? (b) Kiisay minaaplikar sa pangenot an hulang ini, asin taano? (c) Paano magkakaigwa nin literal na kaotoban an hulang ini?

¹⁷ Siyempre, an paghade kan Mesiyas may dakulang impluwensia sa saiyang mga sakop. Iyan nakababakle sa mga tawo. Ipinaheheling kan Isaias 11:​6-9 kun gurano an pagbakleng iyan. Ilinaladawan kan hulang ini an nakapahihiro sa boot na ladawan nin peligroso, naninibang mga hayop​—mga oso, lobo, leopardo, leon, kobra—​na kaiba nin magarong mga hayop asin nin mga aki pa ngani. Pero dai nang peligro an mga naniniba! Taano? An bersikulo 9 minasimbag: “Dai sinda magibo nin maraot o manraraot sa bilog na sakuyang banal na bukid; huli ta an daga mapapano kan kaaraman dapit ki Jehova kun paanong an tubig nakatatahob sa mismong kadagatan.”

¹⁸ Siyempre, an “kaaraman dapit ki Jehova” daing epekto sa literal na mga hayop; kaya an mga bersikulong ini siertong sa pangenot aplikado sa mga tawo. An paghade kan Mesiyas mag-iisponsor nin panglobong programa nin pagtotokdo, na tinotokdoan an mga tawo manongod ki Jehova asin sa saiyang mga dalan, na tinotokdoan an gabos na tratohon an saindang kapwa na may pagkamoot, paggalang, asin dignidad. Sa maabot na Paraiso, an katawohan milagrosong dadarahon kan Mesiyas sa pisikal asin moral na pagkasangkap. An naniniba, sa-hayop na mga ugale na mantsa sa bakong sangkap na naturalesa nin tawo mawawara na. Sa literal man na sentido, an katawohan magkakaigwa na nin matoninong na relasyon sa mga hayop​—sa katapustapusi!​—Ikomparar an Genesis 1:28.

19. Paano nakaaapektar sa buhay nin mga tawo an paghade kan Mesiyas sa huring mga aldaw na ini?

¹⁹ Pero girumdoma, naghahade na ngonyan an Mesiyas. Ngonyan pa, an mga sakop kan saiyang Kahadean nakanonood na mag-iribang matoninong, na sa sarong sentido inootob an Isaias 11:​6-9. Saro pa, sa laog nin haros 80 taon, inootob ni Jesus an Isaias 11:10: “Mangyayari sa aldaw na iyan na malataw an gamot ni Jese na matindog bilang sarong tanda para sa mga banwaan. Sa saiya pati an mga nasyon madolok na may paghapot, asin an saiyang pahingaloan kaipuhan na magin mamuraway.” An mga tawo hale sa gabos na nasyon nagdodorolok sa Mesiyas. Taano? Huli ta poon kan sia magpoon na maghade, sia ‘nagtitindog na bilang sarong tanda.’ Ipinaaaram nia an saiyang presensia sa bilog na kinaban paagi sa mahiwas na programa nin pagtotokdo na ilinadawan sa enotan. An totoo, ihinula ni Jesus na an lakop sa dagang paghuhulit magigin lataw na tanda kan saiyang presensia bago matapos an daan na palakaw na ini.​—Mateo 24:14.

20. Anong kaisipan an maninigong likayan kan gabos na sakop kan paghade kan Mesiyas, asin taano?

²⁰ Kaya an presensia ni Jesus na may kapangyarihan bilang Hade bakong harayoon, teoretikong bagay, na tema sana nin intelektuwal na debate nin mga teologo. An saiyang paghade nakaaapektar asin nakapababakle sa mga buhay digdi sa daga, arog kan ihinula ni Isaias. Giniyahan ni Jesus an minilyon na sakop kan saiyang Kahadean hale sa maraot na palakaw na ini kan kinaban. Saro daw kamong sakop? Kun siring maglingkod na igwa kan gabos na entusiasmo asin kagayagayahan na maninigo sa satong Hade! Totoo, madalion na mapagal, na umiba sa mapagdudang kurahaw kan kinaban: “Haen man ining ipinanugang presensia nia?” (2 Pedro 3:4) Alagad arog kan isinabi mismo ni Jesus, “an makatagal sagkod sa katapusan iyo an maliligtas.”​—Mateo 24:13.

21. Paano niato gabos madudugangan an satong pag-apresyar sa Mesiyanikong paglaom?

²¹ An kada aldaw na minaagi irinarani kita sa dakulang aldaw na pagbobotan ni Jehova an Saiyang Aki na ipahayag an saiyang presensia sa bilog na kinaban. Nungka na togotan na dumiklom an saindong paglaom sa aldaw na iyan. Horophoropon an pagigin Mesiyas ni Jesus asin an saiyang mga kuwalidad bilang natutukaw nang Hade. Horophoropon man si Jehova Dios, an autor asin nagdidirehir sa dakulang paglaom sa Mesiyas na sinasabi sa Biblia. Mantang ginigibo nindo iyan, sierto na an saindong saboot magigin orog na kapareho ni apostol Pablo kan sia sumurat: “O an rarom kan mga kayamanan asin kadonongan patin kaaraman nin Dios!”​—Roma 11:33.

[Mga Nota sa Ibaba]

Ano an Isisimbag Nindo?

◻ Sa anong paagi mabalik si Cristo?

◻ Paano niato naaaraman na an pa·rou·siʹa ni Cristo dai naheheling asin malawig nin haloy-haloy?

◻ Noarin mapoon an presensia ni Cristo, asin paano niato ini naaraman?

◻ Anong klaseng langitnon na Hade an Mesiyas?

◻ Sa anong mga paagi na an paghade ni Cristo nakaaapektar sa buhay kan mga sakop kaiyan?

[Ritrato sa pahina 14]

An paglaom na si Jesus mabalik may dakulang kahulogan para sa saiyang maimbod na mga apostol

[Ritrato sa pahina 16]

Sa paghade hale sa langit, si Jesus magibo nin panglobong mga milagro

[Credit Line]

Daga: Basado sa retrato kan NASA