“Darahon Nindo an Gabos na Ikasampulong Kabtang sa Tambobong”

“Tabi baloa nindo ako sa bagay na ini, . . . kun baga dai ko bukasan sa saindo an mga gaha kan kalangitan.”​—MALAQUIAS 3:10.

1. (a) Kan ikalimang siglo B.C.E., anong pangagda an itinao ni Jehova sa saiyang banwaan? (b) Kan enot na siglo C.E., ano an ibinunga kan pagdatong ni Jehova sa templo para sa paghokom?

KAN ikalimang siglo B.C.E., an mga Israelita bako nang maimbod ki Jehova. Sinda dai nagbayad nin mga tinagba asin nagdara nin mga hayop na bakong angay sa templo bilang mga dolot. Minsan siring, ipinanuga ni Jehova na kun dadarahon ninda an bilog na tinagba sa tambobong, ibububo nia an bendisyon sagkod na mayo na nin kulang. (Malaquias 3:​8-10) Pakalihis nin mga 500 na taon, si Jehova, na irinirepresentar ni Jesus bilang an Saiyang mensahero kan tipan, nagdatong sa templo sa Jerusalem para sa paghokom. (Malaquias 3:1) Bilang sarong nasyon an Israel nanompongan na kulang, alagad an mga indibiduwal na nagbalik ki Jehova mayaman na binendisyonan. (Malaquias 3:7) Sinda linahidan na magin espirituwal na mga aki ni Jehova, sarong bagong linalang, “an Israel nin Dios.”​—Galacia 6:16; Roma 3:​25, 26.

2. Kasuarin nakatalaan na magkaigwa nin ikaduwang kaotoban an Malaquias 3:​1-10, asin kita inaagdang gibohon an ano mapadapit digdi?

² Pakalihis nin haros 1,900 na taon, kan 1914, si Jesus pinatukaw sa trono bilang Hade kan langitnon na Kahadean nin Dios, asin an ipinasabong nin Dios na mga tataramon sa Malaquias 3:​1-10 nakatalaan na magkaigwa nin ikaduwang kaotoban. May koneksion sa makaoogmang okasyon na ini, an mga Kristiano ngonyan inaagdang darahon an bilog na tinagba sa tambobong. Kun iyan gigibohon niato, kita man magkakamit nin mga bendisyon sagkod na mayo na nin kulang.

3. Siisay an mensahero na nag-aandam kan dalan bago ki Jehova (a) kan enot na siglo? (b) bago an enot na guerra mundial?

³ Mapadapit sa saiyang pagdatong sa templo, si Jehova nagsabi: “Uya! isosobol ko an sakuyang mensahero, asin sia mag-aandam nin dalan sa enotan ko.” (Malaquias 3:1) Bilang kaotoban kaini kan enot na siglo, si Juan na Bautisador nag-abot sa Israel na naghuhulit nin pagsolsol sa mga kasalan. (Marcos 1:​2, 3) Igwa daw nin gibong pag-andam may koneksion sa ikaduwang pagdatong ni Jehova sa saiyang templo? Iyo. Sa laog nin mga dekada bago an enot na guerra mundial, an mga Estudyante sa Biblia naglataw na nagtotokdo nin dalisay na doktrina sa Biblia asin ibinubuyagyag an mga kaputikan na naglalanghad sa Dios, arog baga kan mga doktrina sa Trinidad asin impiernong may kalayo. Nagpatanid man sinda manongod sa nagdadangadang na katapusan kan Panahon nin mga Hentil kan 1914. Dakol an naghimate sa mga paradarang ini kan liwanag nin katotoohan.​—Salmo 43:3; Mateo 5:​14, 16.

4. Anong hapot an kaipuhan na husayon sa aldaw kan Kagurangnan?

⁴ Pinonan kan taon 1914 an inaapod kan Biblia na “aldaw kan Kagurangnan.” (Kapahayagan 1:10) May mangyayaring makahulogan na mga okasyon sa aldaw na ini, kaiba an pagpamidbid sa “maimbod asin madonong na oripon” asin an pagnombra sa sarong iyan bilang pinaniwalaan “sa gabos [na] rogaring” kan Kagurangnan. (Mateo 24:​45-47) Kaidtong 1914, rinibong iglesya an naghihingakong Kristiano. Arin daw na grupo an aadmitiron kan Kagurangnan, si Jesu-Cristo, bilang saiyang maimbod asin madonong na oripon? An hapot na iyan huhusayon kun si Jehova dumatong na sa templo.

Pagdatong sa Espirituwal na Templo

5, 6. (a) Saen na templo nagdatong si Jehova sa paghokom? (b) Ano an paghokom na inako kan Kakristianohan ki Jehova?

⁵ Alagad saen na templo sia nagdatong? Malinaw na bakong sa sarong literal na templo sa Jerusalem. An ultimo sa mga templong idto linaglag kaidtong 70 C.E. Alagad ta si Jehova igwa nin orog na dakulang templo na ipinanganino kaidtong yaon sa Jerusalem. Si Pablo nagtaram manongod sa orog na dakulang templong ini asin ipinaliwanag kun gurano iyan kamuraway, na may banal na lugar sa langit asin patyo digdi sa daga. (Hebreo 9:​11, 12, 24; 10:​19, 20) Sa dakulang espirituwal na templong ini na si Jehova nag-abot para sa paghokom.​—Ikomparar an Kapahayagan 11:1; 15:8.

⁶ Kasuarin ini nangyari? Sono sa yaon na dakol na ebidensia, kan 1918.a Ano an resulta? Kun dapit sa Kakristianohan, an naheling ni Jehova sarong organisasyon na an mga kamot nanonoro nin dugo, maraot na sistema relihiyoso na nagpatotot sa kinaban na ini, na nakiaamiga sa mayayaman asin inaapi an mga dukha, nagtotokdo nin mga doktrinang pagano imbes na gibohon an dalisay na pagsamba. (Santiago 1:27; 4:4) Paagi ki Malaquias, si Jehova nagpatanid: “Ako magigin maliksing saksi tumang sa mga salamangkero, asin tumang sa mga parasambay, asin tumang sa mga nagsusumpa nin putik, asin tumang sa mga nandadaya sa mga tangdan nin parapatangdan, sa balo asin sa ilo.” (Malaquias 3:5) Ini gabos ginibo nin Kakristianohan asin mas grabe pa. Kan 1919 malinaw na nahayag na sia kinondenar ni Jehova sa kalaglagan kaiba kan iba pa sa Dakulang Babilonya, an pankinaban na edipisyo nin falsong relihiyon. Poon kaidto, nagluwas an pag-apod sa mga matanos an puso: “Lumuwas kamo saiya, banwaan ko.”​—Kapahayagan 18:​1, 4.

7. Siisay an minidbid ni Jesus na saiyang maimbod asin madonong na oripon?

⁷ Kun siring, siisay an maimbod asin madonong na oripon? Kan enot na siglo, iyan nagpoon sa sadit na grupo na naghimate sa pagpatotoo ni Juan na Bautisador asin ni Jesus, an mensahero kan tipan. Sa satong siglo, iyan an nagkapirang ribo na naghimate sa gibong pag-andam kan Mga Estudyante sa Biblia kaidtong mga taon bago an 1914. An mga ini nagtagal nin maringis na mga pagbalo kaidtong enot na guerra mundial, pero ipinaheling ninda na an saindang puso yaon ki Jehova.

Gibong Paglinig

8, 9. Kan 1918, sa anong mga paagi na an maimbod asin madonong na oripon nagkaipong linigan, asin ano an ipinanuga ni Jehova sa bagay na ini?

⁸ Alagad ta minsan an grupong ini kaipuhan na linigan. An iba na nakiiba sa sainda napatunayan na mga kaiwal kan pagtubod asin kaipuhan na haleon. (Filipos 3:18) An iba habong isaabaga an mga paninimbagan na kalabot sa paglilingkod ki Jehova asin naanod. (Hebreo 2:1) Apuwera kaiyan, may yaon pang Babilonikong mga gibo na kaipuhan na haleon. Kaipuhan man na linigan an maimbod asin madonong na oripon kun dapit sa organisasyon. Kaipuhan na manodan asin iaplikar an tamang paninindogan nin neutralidad sa kinaban na ini. Asin mantang nag-oorog an karatan sa kinaban, kaipuhan sindang makilaban nin maigot tanganing mapagdanay na nasa luwas kan mga kongregasyon an moral asin espirituwal na karigsokan.​—Ikomparar an Judas 3, 4.

⁹ Iyo, kaipuhan an paglinig, alagad ta si Jehova mamomoton na nanuga mapadapit sa pinatukaw na sa tronong si Jesus: “Sia matukaw bilang paradalisay asin paralinig nin pirak asin lilinigan an mga aking lalaki ni Levi; asin dadalisayon nia sinda na siring sa bulawan asin siring sa pirak, asin sinda nanggad magigin para ki Jehova banwaan na nagdodolot nin dolot na regalo na may katanosan.” (Malaquias 3:3) Poon kan 1918, si Jehova, paagi sa mensaherong ini kan tipan, inotob an saiyang panuga asin lininigan an saiyang banwaan.

10. Anong klaseng dolot an dinara kan banwaan nin Dios, asin ano an pangagda ni Jehova?

¹⁰ An linahidan na mga tugang ni Cristo asin an dakulang kadaklan na kan huri uminiba sa sainda sa paglilingkod ki Jehova gabos nakinabang sa paghiro ni Jehova bilang paradalisay asin paralinig nin pirak. (Kapahayagan 7:​9, 14, 15) Bilang organisasyon sinda nag-abot, asin sagkod ngonyan minaabot, na nagdodolot nin dolot na regalo na may katanosan. Asin an saindang dolot “mahamot ki Jehova, siring kaidtong haloy nang mga aldaw asin siring kaidtong suanoy na mga taon.” (Malaquias 3:4) An mga ini an makahulang inagda ni Jehova: “‘Darahon nindo an gabos na ikasampulong kabtang sa tambobong tanganing magkaigwa nin kakanon sa sakong harong; asin tabi baloa nindo ako sa bagay na ini,’ sabi ni Jehova nin mga hukbo, ‘kun baga dai ko bukasan sa saindo an mga gaha kan kalangitan asin ulaan ko kamo nin bendisyon sagkod na mayo na nin kulang.’”​—Malaquias 3:10.

Mga Dolot Asin Tinagba

11. Taano ta dai na hinahagad an mga dolot sono sa palakaw kan Pagboot ni Moises?

¹¹ Kan kaaldawan ni Malaquias an banwaan nin Dios nagdara nin literal na mga dolot asin tinagba, arog baga kan mga trigo, prutas, asin hayop. Dawa kan kaaldawan ni Jesus, an maimbod na mga Israelita nagtatao pa nin literal na mga dolot sa templo. Alagad ta pagkagadan ni Jesus iyan gabos naliwat. An Pagboot pinara na, kaiba an pagboot na magtao nin espisipikong mga dolot asin tinagba. (Efeso 2:15) Inotob ni Jesus an makahulang tipo kan mga dolot sa irarom kan Pagboot. (Efeso 5:2; Hebreo 10:​1, 2, 10) Kun siring, paano makadadara nin mga dolot asin tinagba an mga Kristiano?

12. Anong klaseng espirituwal na mga dolot asin atang an ginigibo nin mga Kristiano?

¹² Para sa sainda, an mga dolot sa pangenot espirituwal. (Ikomparar an Filipos 2:17; 2 Timoteo 4:6.) Halimbawa, si Pablo nagtaram manongod sa paghuhulit bilang dolot kan sia magsabi: “Paagi sa saiya danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.” Itinokdo nia an saro pang espirituwal na klase nin atang kan sia magsadol: “Dai nindo paglingawan an paggibo nin marahay asin pagwaras nin mga bagay sa iba, huli ta sa siring na mga atang naoogmang gayo an Dios.” (Hebreo 13:​15, 16) Kun dinadagka nin mga magurang an saindang mga aki na lumaog sa pagpapayunir, masasabi na sinda idinodolot ninda ki Jehova, kun paanong idinolot ni Jefte an aki niang babae bilang “dolot na tinotong” sa Dios, na iyo an nagtao nin kapangganahan sa saiya.​—Hokom 11:​30, 31, 39.

13. Taano ta dai hinahagad sa mga Kristiano na itao an literal na ikasampulong kabtang kan saindang nakukua?

¹³ Alagad ano man an mga tinagba? Obligado daw an mga Kristiano na itagama an ikasampulong kabtang kan saindang materyal na nakukua asin itao iyan sa organisasyon ni Jehova, arog kan ginigibo sa nagkapirang iglesya nin Kakristianohan? Dai, dai iyan hinahagad. Mayo nin kasuratan na nagsasabi nin siring na reglamento para sa mga Kristiano. Kan si Pablo nangongolekta nin kontribusyon para sa mga nangangaipo sa Judea, mayo sia nin nasambitan na espisipikong porsiento na maninigong itao. Imbes, sia nagsabi: “Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.” (2 Corinto 9:7) Sa pagtaram manongod sa mga nasa espesyal na ministeryo, ipinaheling ni Pablo na mantang an iba tama sanang sustentado nin boluntad na mga kontribusyon, sia andam na magtrabaho asin sustentohan an sadiri. (Gibo 18:​3, 4; 1 Corinto 9:​13-15) Mayo nin mga tinagbang nakatalaan para sa katuyohan na ini.

14. (a) Taano an pagdara niato nin tinagba ta dai nagrirepresentar kan pagtao niato kan gabos niatong makakaya ki Jehova? (b) Ano an irinirepresentar kan tinagba?

¹⁴ Malinaw na para sa mga Kristiano an tinagba nagsisimbolo, o nagrirepresentar, nin sarong bagay. Mantang iyan ikasampulong kabtang asin an numerong sampulo parateng simbolo nin daganon na pagkakompleto sa Biblia, isinisimbolo daw kan tinagba an pagtao niato kan gabos niatong makakaya ki Jehova? Bako. Kun kita nagdudusay kan satong sadiri ki Jehova asin sinisimbolohan ini nin bautismo sa tubig, iyan an panahon na itinatao niato an gabos niatong makakaya sa saiya. Poon sa panahon kan satong pagdusay, mayo na kita nin ano man na bako pang ki Jehova. Minsan siring, tinotogotan ni Jehova an mga indibiduwal na gibohon an gusto ninda sa kun ano an rogaring ninda. Kaya an tinagba nagrirepresentar kan kabtang kan rogaring niato na dinadara niato ki Jehova, o ginagamit sa paglilingkod ki Jehova, bilang tanda kan satong pagkamoot sa saiya asin kan satong pagmidbid sa bagay na kita rogaring nia. An modernong tinagba dai man kaipuhan na ikasampulong kabtang sana. Sa ibang kaso iyan mas kadikit. Sa iba man iyan mas dakol. An kada indibiduwal nagdadara kan idinidikta kan saiyang puso na darahon asin kun ano an itinotogot kan saiyang mga kamugtakan.

15, 16. Ano an kaiba sa satong espirituwal na tinagba?

¹⁵ Ano an kaiba sa espirituwal na tinagbang ini? Primero, itinatao niato ki Jehova an satong panahon asin kosog. An panahon na ginagamit niato sa mga pagtiripon, sa pag-atender sa mga asamblea asin kombension, sa paglilingkod sa langtad, ini gabos bagay na itinatao ki Jehova​—kabtang kan satong tinagba. An oras asin kosog na ginagamit niato sa pagsongko sa mga naghehelang asin pagtabang sa iba​—ini man kabtang kan satong tinagba. An pagtabang sa pagtogdok nin mga Kingdom Hall asin pakikakabtang sa mantension asin paglinig sa tiriponan kabtang man.

¹⁶ Kaiba man sa satong tinagba an satong pinansial na mga kontribusyon. Huli sa pambihirang pagdakula kan organisasyon ni Jehova sa nakaaagi pa sanang mga taon, nagdakol man an pinansial na mga obligasyon. Kaipuhan an bagong mga Kingdom Hall, kaiba an bagong mga sanga asin bagong mga Assembly Hall, pati an mantension sa dati nang natotogdok. An pag-abonar sa gasto kan mga nagpresentar para sa espesyal na paglilingkod​—na sa parate naggigibo nin darakulang personal na pagsasakripisyo tanganing magibo iyan—​dakula man na angat. Kan 1991 an kantidad kan pagsustento sana sa mga misyonero, nagbibiyaheng paraataman, asin espesyal payunir nakaabot sa labing 40 milyones na dolyar, na gabos itinao nin boluntad na mga kontribusyon.

17. Ano man nanggad an maninigo niatong itao bilang satong espirituwal na tinagba?

¹⁷ Ano man nanggad an maninigo niatong itao bilang satong espirituwal na tinagba? Si Jehova daing ibinugtak na porsiento. Minsan siring, an pakamate nin pagdusay, an tunay na pagkamoot ki Jehova asin sa mga tugang, saka an pakamate nin pagkasibot huli sa pakarealisar na may mga buhay na kaipuhan na iligtas, nagpapakosog sato na itao an bilog niatong espirituwal na tinagba. Napahihiro kitang maglingkod ki Jehova sa pinakadakulang mahihimo. Kun kita magigin maimot o napipiritan an pagtao kan satong sadiri o kan satong mga rogaring, ini magigin paghabon niato sa Dios.​—Ikomparar an Lucas 21:​1-4.

Bibendisyonan Sagkod na Mayo Na nin Kulang

18, 19. Paano binendisyonan an banwaan ni Jehova sa pagdara kan saindang bilog na tinagba?

¹⁸ Poon kan 1919, an banwaan ni Jehova nagin matinao kan saindang oras, kosog, asin pinansial na kayamanan sa mga pangangaipo kan paghuhulit. Tunay na dinara ninda an bilog na tinagba sa tambobong. Bilang resulta, inotob ni Jehova an saiyang panuga asin ibinubo an bendisyon sagkod na mayo na nin kulang. Ini pinakadramatikong naheling sa saindang pagdakol. Poon sa pirang ribong linahidan na naglilingkod ki Jehova kan sia dumatong sa saiyang templo kan 1918, sinda nagdakol sagkod na ngonyan an mga linahidan kaiba an saindang kairiba, an ibang karnero, labi nang marhay sa apat na milyon sa 211 laen-laen na kadagaan. (Isaias 60:22) An mga ini binendisyonan man nin nagpapadagos na pagtalubo sa pagkasabot sa katotoohan. Orog pang sinierto sa sainda an makahulang tataramon. Marigon nang naestablisar an pagsarig ninda sa kaotoban kan mga katuyohan ni Jehova. (2 Pedro 1:19) Sinda talagang sarong banwaan na “tinokdoan ni Jehova.”​—Isaias 54:13.

¹⁹ Paagi ki Malaquias, ihinula ni Jehova an dugang pang bendisyon: “Sa panahon na iyan idtong mga nagkakatarakot ki Jehova nag-orolay-olay, an lambang saro sa saiyang kaibanan, asin si Jehova padagos na nagdangog asin naghinanyog. Asin an sarong libro nin girumdoman pinonan na isurat sa atubangan nia para sa mga natatakot ki Jehova asin para sa mga naghohorophorop sa saiyang ngaran.” (Malaquias 3:16) Sa gabos na organisasyon na naghihingakong Kristiano, solamente an mga Saksi ni Jehova an kapwa naghohorophorop sa saiyang ngaran asin nag-oomaw kaiyan sa tahaw kan mga nasyon. (Salmo 34:3) Kanigoan an kaogmahan ninda na sinda ginagarantiyahan na nagigirumdoman ni Jehova an saindang kaimbodan!

20, 21. (a) Anong mapalad na relasyon an nasa tunay na mga Kristiano? (b) Kun dapit sa pagka-Kristiano, anong pagkakalaen an nagigin orog na malinaw?

²⁰ An linahidan na natatada espesyal na banwaan ni Jehova, asin an dakulang kadaklan, na burunyog sa pakiaasosyar sa sainda, nag-aani kaiba ninda kan mga bendisyon nin dalisay na pagsamba. (Zacarias 8:23) Paagi ki Malaquias, si Jehova nanunuga: “‘Sinda magigin nanggad sakuya,’ sabi ni Jehova nin mga hukbo, ‘sa aldaw na ako nagpapaluwas nin espesyal na rogaring. Asin ako maheherak sa sainda, siring sa pagkaherak nin sarong tawo sa saiyang aki na naglilingkod sa saiya.’” (Malaquias 3:17) Kanigoan na bendisyon na si Jehova may siring na pagpadangat sa sainda!

²¹ An totoo, paorog nang paorog na nahahayag an pagkakalaen nin tunay na mga Kristiano asin nin falso. Mantang an banwaan ni Jehova naghihingoang otobon an saiyang mga pamantayan, an Kakristianohan orog man na nag-iirarom sa dalnak nin karigsokan sa kinaban na ini. Tunay na nagigin totoo an mga tataramon ni Jehova: “Maheheling giraray nindo an kalaenan kan matanos asin maraot, kan naglilingkod sa Dios asin kan dai naglingkod sa saiya.”​—Malaquias 3:18.

22. Anong mga bendisyon an masasarigan niatong kamtan kun padagos niatong dadarahon an bilog na tinagba?

²² Sa dai na mahahaloy, maabot an aldaw nin paniningil para sa falsong mga Kristiano. “‘Uya! nagdadangadang an aldaw na nagbabaga na garo horno, asin an gabos na mapalangkaw asin an gabos na naggigibo nin karatan magigin siring sa pinaggapasan. Asin an aldaw na nagdadangadang masolo sa sainda,’ sabi ni Jehova nin mga hukbo.” (Malaquias 4:1) Aram kan banwaan ni Jehova na sinda saiyang iingatan sa panahon na iyan, kun paanong iningatan nia an saiyang espirituwal na nasyon kaidtong 70 C.E. (Malaquias 4:2) Kanigoan an kaogmahan ninda na magkaigwa kan garantiyang iyan! Kaya, sagkod sa panahon na iyan an kada saro logod sato ipaheling an satong pag-apresyar asin pagkamoot ki Jehova paagi sa pagdara kan bilog na tinagba sa tambobong. Sa siring makasasarig kita na ipagpapadagos niang bendisyonan kita sagkod na mayo na nin kulang.

[Nota sa Ibaba]

Ikapaliliwanag daw Nindo?

◻ Sa modernong mga panahon, kasuarin nagdatong si Jehova sa templo kaiba kan saiyang mensahero kan tipan?

◻ Siisay an maimbod asin madonong na oripon, asin anong paglinig an kinaipuhan ninda pakalihis kan 1918?

◻ Anong klaseng espirituwal na mga dolot an dinadara nin tunay na mga Kristiano ki Jehova?

◻ Ano an tinagba na inagda an mga Kristianong darahon sa tambobong?

◻ Anong mga bendisyon an kinakamtan kan banwaan nin Dios huli sa pagdolot nin espirituwal na mga tinagba?

[Ritrato sa pahina 21]

Kaiba sa satong espirituwal na mga tinagba an pagdolot kan satong kosog asin mga rogaring sa pagtogdok nin mga Kingdom Hall

[Ritrato sa pahina 22]

Huli sa bendisyon ni Jehova sa saiyang banwaan, kinaipuhan an dakol na pagtogdok, kaiba an mga Kingdom Hall asin Assembly Hall