Pagpapastor Kaiba kan Satuyang Dakulang Kaglalang
“Si Jehova an sakuyang Pastor. Dai ako magkukulang nin ano man. An sakuyang kalag saiyang pinagiginhawa. Ginigiyahan nia ako sa mga dalan nin katanosan huli sa saiyang ngaran.”—SALMO 23:1, 3.
1. Anong mamomoton na kaginhawahan an itinatao ni Jehova?
AN IKA-23 na Salmo, “sarong awit ni David,” nakapaginhawa sa dakol na pagal na kalag. Pinakosog sinda kaiyan na magkaigwa kan pagsarig na sinasabi sa Sal 23 bersikulo 6: “Sierto na an karahayan asin mamomoton na kabootan magdadanay sa sako sa gabos na aldaw nin sakuyang pagkabuhay; asin mag-oontok ako sa harong ni Jehova sagkod lamang.” Iyan daw an saindong kamawotan, na umontok sagkod lamang sa harong nin pagsamba ni Jehova, kasaro kan saiyang banwaan na ngonyan tinitipon hale sa gabos na nasyon kan daga? An “pastor asin paraataman sa saindong kalag,” an satuyang Dakulang Kaglalang, si Jehova Dios, matabang saindo na maabot an pasohan na iyan.—1 Pedro 2:25.
2, 3. (a) Paano mamomoton na pinapastoran ni Jehova an saiyang banwaan? (b) Paano dramatikong nagdakol an “aripompon” ni Jehova?
2 An Kaglalang sa “bagong kalangitan asin sarong bagong daga” iyo man an Organisador asin Supremong Paraataman sa Kristianong kongregasyon, an “harong nin Dios.” (2 Pedro 3:13; 1 Timoteo 3:15) Sia interesadong marhay na pastoran an saiyang banwaan, siring sa malinaw na sinasabi kan Isaias 40:10, 11: “Uya! An Soberanong Kagurangnan na Jehova mismo madatong bilang makosog na saro, asin an saiyang takyag magsasakop para sa saiya. Uya! An saiyang balos dara nia, asin an tangdan na ibinabayad nia nasa atubangan nia. Siring sa pastor aatamanon nia an saiyang sadiring aripompon. Sa saiyang mga takyag titiponon nia an mga karnero; asin sa saiyang daghan dadarahon nia sinda. An mga nagpapasuso aatamanon nia.”
3 Sa pinahiwas na sentido, kabale sa “aripompon” na ini an mga haloy nang naglakaw sa Kristianong katotoohan asin an “mga karnero” na natipon nin bago pa sana—arog kan dakol na nababautismohan ngonyan sa Aprika asin sa Sirangan na Europa. An makosog, nagpoprotehir na takyag ni Jehova tinitipon sinda sa saiyang daghan. Minsan sinda garo mga karnerong nalagalag, ngonyan sinda namugtak sa dayupot na relasyon sa saindang namomotan na Dios asin Pastor.
An Katabang na Pastor ni Jehova
4, 5. (a) Siisay “an marahay na pastor,” asin paano sia itinokdo nin hula? (b) Anong gibong pagbubulagbulag an pinangengenotan ni Jesus, na may anong pambihirang resulta?
4 Naglilingkod sa too kan saiyang Ama sa langit, “an marahay na pastor,” si Jesu-Cristo, nagtatao man nin maheherakon na atension sa “mga karnero.” Itinao nia an saiyang buhay enot tanganing pakinabangon an “sadangoton na aripompon” nin mga linahidan dangan, ngonyan, an dakulang kadaklan kan saiyang mga “ibang karnero.” (Lucas 12:32; Juan 10:14, 16) An Dakulang Pastor, si Jehova Dios, kinakaolay an gabos na karnerong ini, na sinasabi: “Uya ako, ako mismo, asin tunay na mahokom ako . . . sa tahaw nin karnero asin karnero. Asin patitindogon ko sa tahaw ninda an sarong pastor, asin pakakakanon nia sinda, an sakuya mismong oripon na si David. Sia mismo mapasabsab sa sainda, asin sia mismo magigin saindang pastor. Asin ako mismo, si Jehova, magigin Dios ninda, asin an sakong oripon na si David prinsipe sa tahaw ninda. Ako mismo, si Jehova, an nagtaram.”—Ezequiel 34:20-24.
5 An ngaran na ‘sakuyang oripon na si David’ makahulang nagtotokdo ki Cristo Jesus, an “banhi” na magmamana kan trono ni David. (Salmo 89:35, 36) Sa aldaw na ini nin paghokom sa mga nasyon, an katabang na Pastor ni Jehova asin Hade, si Cristo Jesus, Aki ni David, padagos na ibinubulag an “mga karnero” nin katawohan sa mga tibaad naghihingakong “karnero” alagad sa katotoohan “kanding.” (Mateo 25:31-33) An “sarong pastor” na ini pinatindog man tanganing magpasabsab sa mga karnero. Kanigoan kamuraway na kaotoban kan hulang ini an naheheling niato ngonyan! Mantang an mga politiko nagtataram manongod sa pagsararo sa katawohan paagi sa bagong areglo sa kinaban, an sarong Pastor sa aktuwal pinagsasararo an mga karnero kan gabos na nasyon paagi sa kampanya nin paghuhulit sa laen-laen na tataramon na solamente an organisasyon nin Dios sa daga an makagigibo.
6, 7. Paano sinisierto kan “maimbod asin madonong na oripon” na may “kakanon sa igong panahon” an mga karnero?
6 Mantang daing ontok sa paglakop an mensahe kan Kahadean sa bagong mga teritoryo, sinisierto kan “maimbod asin madonong na oripon” nin linahidan na mga Kristiano, na isinugo kan sarong Pastor, na nagigibo an gabos na probisyon tanganing ikapadara an “kakanon sa igong panahon.” (Mateo 24:45) An dakol sa 33 na imprentahan na sanga kan Watch Tower Society sa bilog na daga dinudugangan an pag-imprenta tanganing mapanigoan an nag-oorog na pangangaipo sa mas dakol asin mas marahay an kuwalidad na mga libro asin magasin sa Biblia.
7 Ginigibo kan Namamahalang Grupo nin mga Saksi ni Jehova an gabos na mahihimo tanganing mapakarhay an kuwalidad nin pagtradusir sa mga 200 na tataramon asin ponan an pagtradusir sa dugang pang mga tataramon sono sa pangangaipo tanganing malakopan an bilog na langtad sa kinaban. Ini bilang pagsuportar sa sugo ni Jesus sa saiyang mga disipulo sa Gibo 1:8: “Kamo mag-aako nin kapangyarihan kun dumatong na saindo an banal na espiritu, asin kamo magigin mga saksi ko . . . sagkod sa kaporoporohi nin daga.” Dugang pa, an New World Translation of the Holy Scriptures, na naimprenta na sa 14 tataramon sa kabilogan o kabtang sana, ngonyan tinatradusir sa 16 pang ibang tataramon sa Europa, Aprika, asin Oriente.
Pagkakamit kan “Katoninongan nin Dios”
8. Paano mayaman na binendisyonan an mga karnero kan tipan nin katoninongan na ginibo sa sainda ni Jehova?
8 Paagi sa saiyang sarong Pastor, si Cristo Jesus, nakikipagtipan si Jehova sa Saiyang basog na mga karnero nin “tipan nin katoninongan.” (Isaias 54:10) Nagtutubod sa pinabolos na dugo ni Jesus, an mga karnero pinapangyayaring lumakaw sa liwanag. (1 Juan 1:7) Nakakamtan ninda ‘an katoninongan nin Dios na minalampas sa gabos na kaisipan asin nag-iingat kan saindang puso asin mga pag-isip paagi ki Cristo Jesus.’ (Filipos 4:7) Siring sa ilinaladawan sa Ezequiel 34:25-28, pinapastoran ni Jehova an saiyang mga karnero pasiring sa sarong espirituwal na paraiso, sarong kawiliwiling kamugtakan na may katiwasayan, nakagiginhawang prosperidad, asin pagigin mabunga. An mamomoton na Pastor na ini nagsasabi manongod sa saiyang mga karnero: “Maaaraman ninda na ako si Jehova kun barion ko na an saindang sakal asin ikaligtas ko na sinda hale sa kamot kan mga guminamit sa sainda bilang mga oripon. Asin dai na sinda magigin habonon kan mga nasyon; . . . asin sinda mag-eerok na dai nin pag-alaman, asin mayo nin siisay man na mapatakot sa sainda.”
9. Anong mga oportunidad an binukasan sa banwaan nin Dios kan ‘pagbari sa sakal’?
9 Sa nakaaagi pa sanang mga taon, naeksperyensiahan na nin mga Saksi ni Jehova sa dakol na nasyon an pagbari sa “saindang sakal.” Sinda talingkas na maghulit kisa kasuarin pa man. Asin kita logod gabos, sa gabos na nasyon, gamiton sa marahay an katiwasayan na itinatao ni Jehova mantang kita naghihingoa na mahaman an gibohon. Kanigoan na pagpasarig sa boot an itinatao ni Jehova mantang nagdadangadang kita sa panahon kan kadarudakulaing kahorasaan na maheheling nin katawohan!—Daniel 12:1; Mateo 24:21, 22.
10. Siisay an itinao ni Jehova na tumabang sa Marahay na Pastor, si Cristo Jesus, asin paano kinaolay ni apostol Pablo an nagkapira sa mga ini?
10 Bilang pag-andam para sa aldaw na iyan kan saiyang pamamalos tumang sa mga maraot, si Jehova nagtao nin katabang na mga pastor tanganing tumabang sa Marahay na Pastor, si Cristo Jesus, sa pag-ataman sa aripompon. An mga ini ilinaladawan sa Kapahayagan 1:16 bilang kompletong kabilangan na “pitong bitoon” sa toong kamot ni Jesus. Kan enot na siglo, kaolay ni apostol Pablo an nagrirepresentar na grupo kan katabang na mga pastor na ini, na sinasabi: “Mag-ingat kamo sa saindong sadiri asin sa bilog na aripompon, na sa tahaw kaiyan kamo ninombrahan kan banal na epiritu bilang mga paraataman, na pastoran an kongregasyon nin Dios, na saiyang binakal paagi sa dugo kan saiyang sadiring Aki.” (Gibo 20:28) Ngonyan, igwa nin manampulong ribong katabang na pastor na naglilingkod sa 69,558 kongregasyon sa bilog na kinaban.
Abante Katabang na mga Pastor!
11. Paano mapangganang nangenot an ibang pastor sa mga teritoryo na parateng nahuhulitan?
11 Sa dakol na lugar an mga pastor na ini kaipuhan na mangenot sa mga teritoryo na paorootro nang nahulitan sa huring mga aldaw na ini. Paano daw ninda mapagdadanay na makosog an entusiasmo kan aripompon? Marahayon nanggad an ginigibo kan mga pastor, asin an saro sa mga paagi na dian sinda nagin mapanggana iyo an pag-animar sa pag-auxiliary asin pagregular payunir. Dakol na pastor an nakikabtang mismo sa paglilingkod na ini, asin pati an mga parahayag na dai nakagibo kaiyan nagpaheling kan espiritu nin pagpapayunir, na naglilingkod na may kagayagayahan na nakatatabang na mapangganahan an pagkaindiperente sa teritoryo. (Salmo 100:2; 104:33, 34; Filipos 4:4, 5) Kaya, mantang an kinaban nalalamos na sa karatan asin anarkiya, dakol na arog-karnero an napapagmata sa paglaom sa Kahadean.—Mateo 12:18, 21; Roma 15:12.
12. Anong seryosong problema an yaon sa mga lugar na marikas an pagdakol, asin paano ini kun beses inaatubang?
12 An saro pang problema iyo na sa parate kulang nin kuwalipikadong mga pastor na mag-aataman sa aripompon. Sa mga lugar na marikas an pagdakol, arog sa Sirangan na Europa, kadakol nin bagong kongregasyon na mayo ni sarong nombradong magurang. May nagboboluntaryong mga karnero na nagpapasan kan paninimbagan, pero sinda kulang na marhay nin kabatidan, asin kaipuhan an tabang sa pagtokdo sa mga karnero na nagraralaog sa mga kongregasyon. Sa kadagaan na arog nin Brazil, Mejico, asin Zaire, na marikason an pagdakol, an hoben pang mga Saksi kinaipuhan na gamiton sa pag-organisar sa paglilingkod asin pagtotokdo sa ibang bagohan. Marahayon an tabang na itinatao kan mga payunir, asin sa langtad na ini matotokdoan nin mga tugang na babae an bagohan na mga tugang na babae. Paagi sa saiyang espiritu binibendisyonan ni Jehova an mga resulta. Nagpapadagos an pagdakol.—Isaias 54:2, 3.
13. (a) Mantang mahiwason an anihon, ano an maninigong ipamibi nin gabos na Saksi? (b) Paano sinimbag an mga pamibi kan banwaan nin Dios bago asin durante kan ikaduwang guerra mundial?
13 Sa kadagaan na establisado nang marhay an paghuhulit, sa kadagaan na bago pa sanang mawara an mga pangangalad, asin sa mga teritoryong bagong mabukasan, aplikado pa man giraray an mga tataramon ni Jesus sa Mateo 9:37, 38: “Iyo, an anihon mahiwas, alagad an mga paraani kakadikit. Kaya makimaherak kamo sa Kagurangnan kan anihon na magsobol nin mga paraani sa saiyang anihon.” Kaipuhan man na ipamibi niato na magpatindog logod si Jehova nin mas dakol pang pastor. Ikinapaheling nia na kaya nia ini. Bago asin durante kan Guerra Mundial II, an maisog na mga diktador na arog-Asirio naghingoang laglagon an mga Saksi ni Jehova. Alagad bilang simbag sa saindang mga pamibi, dinalisay ni Jehova an saindang organisasyon, na ginibo iyan na teokratiko nanggad, asin itinao an kinakaipuhan na “mga pastor.”a Idto kaoyon kan hula na: “Kun manongod sa Asirio, kun sia pumadigdi sa satong daga asin kun sia tumongtong sa satong mga torreng erokan, mapatindog man kita tumang sa saiya nin pitong pastor, iyo, walong duke nin katawohan”—labi pa sa bastanteng dusay na mga magurang na mangengenot.—Miqueas 5:5.
14. Ano an pangenot na pangangaipo sa organisasyon, asin anong pagpakosog an itinatao sa mga tugang?
14 Dakulaon an pangangaipo na an gabos na bautisadong Saksing lalaki maghingoang aboton an dugang pang mga pribilehiyo. (1 Timoteo 3:1) Apretado an situwasyon. Marikason na nagdadangadang an katapusan kan palakaw na ini. Sinasabi kan Habacuc 2:3: “An bisyon para sa itinalaan na panahon pa, asin padagos iyan na maghihidali sagkod sa katapusan, asin dai iyan magpuputik. . . . Sierto nanggad na iyan maootob. Dai iyan mahuhuri.” Mga tugang na lalaki, puwede daw kamong maghingoa tanganing makuwalipikar para sa dugang pang mga pribilehiyo sa gibong ini nin pagpapastor—bago umabot an katapusan?—Tito 1:6-9.
Teokratikong Pagpapastor
15. Sa anong paagi na sarong teokrasya an banwaan ni Jehova?
15 Tanganing lubos na makapakikabtang sa pag-oswag kan organisasyon ni Jehova, an saiyang banwaan kaipuhan na magin teokratiko an punto-de-vista. Paano daw ninda magigibo ini? Bueno, ano an kahulogan kan terminong “teokratiko”? An Webster’s New Twentieth Century Dictionary tinawan nin kahulogan an “teokrasya” na “pamamahala nin Dios sa sarong estado.” Sa sentidong ini na an “banal na nasyon” kan banwaan ni Jehova sarong teokrasya. (1 Pedro 2:9; Isaias 33:22) Bilang mga miembro o kaayon kan teokratikong nasyon na iyan, an tunay na mga Kristiano dapat na mamuhay asin maglingkod na nagkukuyog sa Tataramon nin Dios asin sa mga prinsipyo kaiyan.
16. Sa pundamental, paano niato ikapaheheling na kita teokratiko?
16 Malinaw na ipinaliwanag ni apostol Pablo kun paano maninigong magin teokratiko an mga Kristiano. Enot, sinasabi nia na sinda maninigong “magsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.” An pagkatawo kan Kristiano dapat na moldehon oyon sa matanos na mga prinsipyo nin Dios na sinasabi sa saiyang Tataramon. Dapat na magmaimbod sia ki Jehova asin sa Saiyang mga ley. Pakailustraran kun paano ini magigibo, si Pablo nagsadol: “Magin kamong mga paraarog sa Dios, bilang namomotan na mga aki.” (Efeso 4:24–5:1) Siring sa makinuyog na mga aki, dapat na arogon niato an Dios. Iyan an tunay na teokrasyang inootob, na ipinaheheling na kita talagang pinamamahalaan nin Dios!—Helingon man an Colosas 3:10, 12-14.
17, 18. (a) Anong pangenot na kuwalidad nin Dios an inaarog nin teokratikong mga Kristiano? (b) Sa saiyang mga tataramon ki Moises, paano idinoon ni Jehova an Saiyang pangenot na kuwalidad, alagad anong patanid an idinugang Nia?
17 Ano an pangenot na kuwalidad nin Dios na maninigo niatong arogon? Nagsimbag si apostol Juan sa 1 Juan 4:8 kan sia magsabi: “An Dios pagkamoot.” Pakalihis nin walong bersikulo, sa bersikulo 16, inotro nia an mahalagang marhay na prinsipyong ini: “An Dios pagkamoot, asin an nagdadanay sa pagkamoot nagdadanay na kasaro nin Dios asin an Dios nagdadanay na kasaro nia.” An Dakulang Pastor, si Jehova, iyo an personipikasyon nin pagkamoot. An teokratikong mga pastor nag-aarog sa saiya paagi sa pagpaheling nin hararom na pagkamoot sa mga karnero ni Jehova.—Ikomparar an 1 Juan 3:16, 18; 4:7-11.
18 An Dakulang Teokrata ipinahayag an saiyang sadiri ki Moises bilang si “Jehova, Jehova, Dios na maheherakon asin maugayon, maluway sa pagkaanggot asin mayaman sa mamomoton na kabootan asin katotoohan, nagpapadanay nin mamomoton na kabootan sa rinibo, na nagpapatawad sa sala asin paglapas patin kasalan, alagad dai nanggad nagpapalibre sa silot, na nagtatao nin silot para sa sala nin mga ama sa mga aki asin sa mga makoapo, sa ikatolong kapag-arakian asin sa ikaapat na kapag-arakian.” (Exodo 34:6, 7) Sa siring idinodoon ni Jehova an laen-laen na kabtang kan saiyang pangenot na teokratikong kuwalidad, an pagkamoot, mantang marigon na nagpapatanid na saiyang padudusahan an kasalan kun maninigo.
19. Bakong arog kan mga Fariseo, paano maninigong gumawe sa teokratikong paagi an mga Kristiano?
19 Para sa mga may katongdan nin paninimbagan sa organisasyon, ano an boot sabihon kan pagigin teokratiko? Si Jesus nagsabi manongod sa mga escriba asin Fariseo kaidtong saiyang kaaldawan: “Sinda nagbobogkos nin magabat na mga pasanon asin ibinubugtak iyan sa mga abaga nin mga tawo, alagad sinda mismo harabong humiro kaiyan minsan kan saindang moro.” (Mateo 23:4) Kanigoan kamapan-api asin kadai nin pagkamoot! An tunay na teokrasya, o pamamahala nin Dios, naghahagad nin pagpapastor sa aripompon paagi sa pag-aplikar kan mamomoton na mga prinsipyo sa Biblia, bakong pagpagabat sa mga karnero paagi sa daing katapusan na mga reglamentong gibo nin tawo. (Ikomparar an Mateo 15:1-9.) Kadungan kaiyan, dapat na arogon nin teokratikong mga pastor an Dios paagi sa pagdagdag sa saindang pagkamoot nin karigonan sa pagpapadanay sa kalinigan kan kongregasyon.—Ikomparar an Roma 2:11; 1 Pedro 1:17.
20. Anong organisasyonal na areglo an minimidbid nin teokratikong mga pastor?
20 Minimidbid nin tunay na mga pastor na sa huring mga aldaw na ini, ninombrahan ni Jesus an saiyang maimbod asin madonong na oripon na mamahala sa gabos na rogaring asin na giniyahan kan banal na espiritu an oripon na ini sa pagnombra sa mga magurang para sa pagpapastor sa mga karnero. (Mateo 24:3, 47; Gibo 20:28) Kaya, kalabot sa pagigin teokratiko an pagkaigwa nin hararom na paggalang sa oripon na ini, sa organisasyonal na mga areglo na ginibo kan oripon na iyan, asin sa areglo nin mga magurang sa laog kan kongregasyon.—Hebreo 13:7, 17.
21. Anong marahay na halimbawa an itinao ni Jesus para sa katabang na mga pastor?
21 Si Jesus nagtao nin marahay na halimbawa, na perming nagpapagiya ki Jehova asin sa Saiyang Tataramon. Sia nagsabi: “Dai ako makagigibo ni sarong bagay sa sadiri kong boot; sono sa sakong nadangog, ako naghohokom; asin an paghokom na sakuyang ginigibo matanos, huli ta pinagmamaigotan kong maotob, bakong an sadiri kong kabotan, kundi an kabotan nia na nagsugo sa sako.” (Juan 5:30) An katabang na mga pastor kan Kagurangnan na Jesu-Cristo maninigong magpatalubo sa kaparehong mapakumbabang kaisipan. Kun an magurang perming nagpapagiya sa Tataramon nin Dios, arog ki Jesus, kun siring sia tunay na teokratiko.—Mateo 4:1-11; Juan 6:38.
22. (a) Sa anong paagi na maninigong maghingoa an gabos na magin teokratiko? (b) Ano an maboot na pangagda ni Jesus sa mga karnero?
22 Bautisadong mga lalaki, maghingoa kamong makuwalipikar para sa mga pribilehiyo sa kongregasyon! Kamo gabos na namomotan na karnero, maghingoa na magin teokratiko, na inaarog an Dios asin si Cristo sa pagpaheling nin pagkamoot! Logod an mga pastor asin aripompon parehong maggayagaya huli ta sinimbag ninda an pangagda ni Jesus: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan. Pasana nindo an sakong sakal asin magin sakong mga disipulo, huli ta ako maboot asin mapakumbaba sa puso, asin makakukua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.”—Mateo 11:28-30.
[Nota sa Ibaba]
a Helingon an mga artikulo sa Watchtower na may titulong “Organization,” sa mga luwas na Hunyo 1 asin 15, 1938.
Ikapaliliwanag daw Nindo?
◻ Ano an “aripompon” ni Jehova, asin sairisay an kairiba dian?
◻ Paano guminawe si Jesus bilang “an marahay na pastor” kan enot na siglo, asin ngonyan?
◻ Ano an pangenot na kabtang nin katabang na mga pastor sa pag-ataman sa aripompon?
◻ Ano an pundamental na kahulogan kan terminong “teokrasya”?
◻ Ano an maninigong igawe nin sarong Kristiano—partikularmente an sarong katabang na pastor—tanganing magin teokratiko?
[Ritrato sa pahina 20]
Siring sa debotadong pastor, inaataman ni Jehova an saiyang aripompon
[Ritrato sa pahina 23]
An pag-arog sa kuwalidad ni Jehova Dios na pagkamoot inootob na teokrasya