Dai Nalilingawan nin Dios “an Pagkamoot na Saindong Ipinaheling Para sa Saiyang Ngaran”
“AN Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.” (Hebreo 6:10) An mga tataramon na ini ni apostol Pablo totoo para sa mga Saksi ni Jehova sa Sirangan na Europa. Maimbod na naglilingkod sa intereses kan ngaran nin Dios, sa dakol na dekada sinda nagtrabaho nin haloy asin maigot sa irarom nin mga pangangalad na ibinugtak kan mga gobyernong dating kontrolado nin Sobyet. Nagigirumdoman ni Jehova an marahay nindang mga gibo asin pinaooranan sinda nin mga bendisyon sa Kahadean. Halimbawa, helingon niato an report kan nakaaging taon nin paglilingkod sa tolo sana sa mga lugar na iyan.
Mga Teritoryo kan Dating Unyon Sobyet
An mga teritoryo kan dating Unyon Sobyet nagreport na kaidtong 1992 na taon nin paglilingkod, an pinakahalangkaw na bilang nin mga parahayag sa Kahadean luminangkaw nin 35 porsiento—poon sa 49,171 sagkod sa 66,211! Alagad ta bako sana iyan, ta nagin aktibong marhay an mga parahayag na idto, arog kan maheheling sa marahay na mga paglangkaw nin ikinawaras na mga babasahon sa Biblia, pati magasin. Ginamit man ninda sa marahay an mga brochure asin pulyeto, na nakawaras nin 1,654,559. Iyan labing triple kan kabilangan kan nakaaging taon na 477,235! Ano an reaksion sa gabos na ikinapasakamot na ini? Pagdoble kan kabilangan nin mga pag-adal sa Biblia. Ngonyan 38,484 pag-adal sa Biblia an ginigibo.
Siring man, luminangkaw nin 94 porsiento an pakikakabtang sa pag-auxiliary payunir. Malinaw na ini nakakontribuwir sa pambihirang kabilangan nin mga disipulong bagong mabautismohan, 26,986, kun ikokomparar sa kabilangan kaidtong nakaaging taon na 6,570, makangangalas na 311-porsientong paglangkaw!
Paano enot na nagkainteres sa maogmang bareta an bagong mga mabautismohan? Kun beses sarong bagay na nakatabang an hararom na pagmakolog kan Saksing nag-aadal. An sarong nangengenot na paraataman sa Moldova nagsasaysay:
“Kami mag-agom nagsongko sa sarong babae na nagpaheling nin interes kaidto sa katotoohan kan Biblia. Naponan sa saiya an pag-adal sa Biblia. Pero, an agom nia dai man lamang nagpaheling nin interes. Sarong aldaw kan kami pasiring sa pagsongko sa saiya sa pagpapadagos kan pag-adal, malipoton asin nagniniyebe an panahon. Haros mayong katawotawo sa mga tinampo, pero kami nakaabot sa harong nia sa eksaktong oras. Sinabihan nia an saiyang agom: ‘Naheling mo kun gurano an pagmakolog sato kan mga tawong ini? Nasa oras sinda sa ibong kan pagniyebe.’ An pangyayaring ini nagpahorophorop sa saiyang agom. Liniwat nia an saiyang isip asin nakiayon sa pag-adal, asin ngonyan sinda mag-agom bautisado nang mga Saksi.”
Sa ibang panahon an pagigin magalang kan Saksi puwedeng makapukaw nin interes sa maogmang bareta. An saro sa kamagurangan, na taga-Moldova man, nagkaigwa kan eksperyensiang ini:
“An sarong lalaki na sinongko ko sa sakong teritoryong hinuhulitan dai interesado sa mga Saksi ni Jehova. Sabi nia Ortodokso sia, arog kan saiyang ama asin lolohon. Kaya ipinakiolay nia sako na maghale. Minsan siring, bago ako naghale, tinawan nia ako kan oportunidad na isabi saiya an dahelan kan sakong pagsongko. Itinokdo ko an Mateo 28:19, na nagsasabi: ‘Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu.’ Dangan itinao ko saiya an adres kan samong tiriponan asin naghale na ako. Sa pagngalas ko, pakalihis nin sarong semana an lalaking ini nagduman sa samong pagtiripon! Dai sia naghale sagkod na matapos an programa. Ipinaliwanag nia na sa bilog na semana, nagbasol sia huli sa pagigin indiperente sa sako. Ora mismo naponan an pag-adal sa Biblia, asin ngonyan sia saro na sa satong mga tugang.”
An saro pang lataw na kabtang kan taon nin paglilingkod iyo an dakulaon na paghiro na mapanigoan an pangangaipo kan satong mga tugang sa lugar na iyan. Kaidtong tiglipot nin 1991/92, mga 400 toneladas na pagkakan asin kadakol na gubing na panlalaki, pambabae, asin pan-aki an ipinadara sa mga nangangaipo. An mga probisyon na ini iwinaras sa haros gabos na kabtang kan dating teritoryo kan Unyon Sobyet, sagkod pa ngani sa Irkutsk sa Siberia asin Khabarovsk, harani sa Hapon. Pambihira nanggad ining tanda na dai nalingawan ni Jehova an pagkamoot na ipinaheling kan satong mga tugang para sa saiyang ngaran! An ebidensiang ini nin pagkamoot sa tugang na pinukaw kan espiritu ni Jehova nagresulta man kan saindang pagigin kasaro kan saindang pamilyang pambilog na kinaban. Halimbawa, an sarong tugang na babae sa Ukraine nagsurat sa sangang opisina:
“An tabang na itinao nindo sa samo nakapahirong gayo sa samong puso. Napahibi kami asin nagpasalamat ki Jehova Dios sa dai pakalingaw sa samo. Totoo, igwa kami nin materyal na mga kadepisilan ngonyan, pero huli sa tabang na nag-abot hale sa samong mga tugang sa Solnopan, nakabawi kami sa materyal na paagi. Ngonyan, huli sa tabang nindo, an samong pamilya makatatao nin mas dakol na panahon sa paglilingkod ki Jehova. Kun bobooton ni Jehova, an sakong aking babae asin ako mag-o-auxiliary payunir sa mga bulan nin tig-init.”
Dugang pa, an pag-ayuda nakatao nin patotoo sa mga tagaluwas ta naheling nin mga nagmamasid na an mga Saksi nagpapaheling nin pagkamoot paagi sa saindang mga gawe. An sarong pamilya hale sa saro pang kongregasyon nagsurat: “Naresibi mi an materyal na tabang na pagkakan asin gubing. Kadakol kaini! An saindong pagtabang asin pagpakosog leksion sa samo na kami man maninigong gumibo nin karahayan sa iba. An aktong ini nin pagkamoot narisa nin mga daing pagtubod, saka nin mga interesado patin kan saindang mga pamilya; iyan nagin dakulaon na patotoo manongod sa tunay na kasararoan nin magturugang.”
An limang pandistritong kombension asin sarong internasyonal na kombension na ginibo kaining nakaaging Hunyo asin Hulyo, na may temang “Mga Paradara nin Liwanag,” saro pang ebidensia kan pagbendisyon ni Jehova sa kahigosan kan saiyang mga Saksi asin sa pagkamoot na ipinaheling ninda sa pagpamidbid kan saiyang ngaran. An mga kombension inatenderan nin 91,673 katawo, asin 8,562 an nabautismohan. An pinakadakol na nag-atender sa St. Petersburg, an lugar kan internasyonal na kombension, na duman nagtiripon an 46,214—kaiba an mga delegado hale sa mga 30 nasyon sa bilog na kinaban—sa Istadyum sa Kirov.
Sa Siberia an sarong lalaki na mga 60 anyos an edad nagduman sa kombension sa Irkutsk sa pag-usyoso sana. Sabi nia: “An gabos na nag-aatender areglado an paggubing, na may huyom sa lalauogon, asin maboot sa lambang saro. An mga tawong ini garo sararong pamilya. Mamamatean mo na sinda magkakatood bako sanang sa istadyum kundi pati sa tunay na buhay. Nakaresibi ako nin marahayon na babasahon sa Biblia asin orog kong naaraman kun anong klaseng organisasyon ini. Boot kong makipag-olay sa mga Saksi ni Jehova asin makipag-adal sa sainda sa Biblia.”
Sa kombension man sanang idto sa Irkutsk, na 5,051 an nag-atender, an sarong babaeng interesado hale sa Republika nin Yakut, Siberia, nagkomento: “Kun pinagmamasdan ko an mga tawo, boot kong humibi sa kagayagayahan. Nagpapasalamat akong marhay ki Jehova na tinabangan nia akong mamidbid an siring na mga tawo. Digdi sa kombension, nakaresibi ako nin babasahon, asin boot kong ipakipag-olay iyan sa iba. Gusto kong marhay na magin parasamba ki Jehova.”
An direktor kan Istadyum Sentral sa Alma Ata, Kazakhstan, na 6,605 an nag-atender sa kombension, nagsabi kaini: “Naoogma akong marhay sa saindong gawe-gawe. Kombensido na ako ngonyan na kamo gabos, hoben asin gurang, mga tawong kagalanggalang. Dai ko masasabing nagtutubod ako sa Dios, pero nagtutubod ako sa banal na mga bagay na ipinaheheling kan saindong pagkamagturugang, sa saindong kaisipan manongod sa espirituwal asin materyal na mga pamantayan.”
An sarong pulis sa kombension sa Alma Ata nagkomento: “Duwang beses ko na kamong nakaibaiba, perming sa kombension. Marahayon na makiiba sa mga Saksi ni Jehova.”
Romania
Dai man nalingawan ni Jehova an pagkamoot na ipinaheling kan mga tugang sa Romania para sa saiyang ngaran. Kadakol kan maogmang mga okasyon para sa mga Saksi kan nakaaging taon nin paglilingkod. Enot, naestablisar liwat an sangang opisina sa Bucharest. Nagpoon kan 1949 an ultimong legal na aktibidad. Mga 20 tugang na lalaki asin babae an nagtatrabaho sa bagong mga pasilidad kan opisina. An sangang opisina naglilingkod sa 24,752 na parahayag—kaharohalangkaweng bilang na 21 porsiento an ilinangkaw sa promedyo kan nakaaging taon.
Pakalihis nin dakol na taon na hilom na paghuhulit, natotood na an mga parahayag sa pampublikong pagharongharong. An sarong eksperyensia hale sa Distrito nin Mureş nagpapaheling kun paano inaaprobetsaran nin pirang Saksi an ano man na oportunidad na maghulit sa iba, dawa kun sinda nasa biyahe. An sangang opisina nagsurat:
“An sarong parahayag nagdesisyon na maghulit nin kuwarto-kuwarto sa tren. Sa kadaklan marahay an reaksion kan mga tawo, alagad ta sa ultimong kuwarto, may nangyaring kadepisilan. Mayo sa mga pasahero an gustong umako nin kopya kan satong mga magasin. Sa katapustapusi, an sarong lalaki, na medyo anggot, tuminindog asin nagkurahaw: ‘Iaapon ko sa bintana an gabos mong magasin! Taano ta iniistorbo mo kaming marhay kan saimong relihiyon?’ An parahayag maboot na nagsimbag na dawa kun iapon nia an mga magasin, puwedeng makinabang an iba sa saiyang gigibohon—an mga makapupurot kan magasin. Kan marisa an pagkakalmado kan parahayag, huminangang marhay an lalaki kaya kinua nia an mga magasin asin sia na mismo an nanwaras kaiyan sa ibang pasahero duman sa laog kan kuwarto. Makangangalas, sinda gabos kuminua nin magasin. Pakawarasan kaiyan, mayo na nin nawalat na kopya para sa lalaki. Kaya, hinapot sia kan parahayag: ‘Mister, habo nindong magkaigwa nin sadiring kopya?’ Kaya inagaw kan lalaki an saro sa mga magasin sa sarong pasaherong duwa an kopya asin nagsabi: ‘Ngonyan may nakaabot na sakong sarong kopya!’”
Sa dakol na nasyon an paghuhulit kan mga Saksi ni Jehova kun beses nakapukaw sa pagtumang kan klero nin Kakristianohan. Sa Romania, an mga padi kan Iglesya Ortodokso parateng naaanggot sa mga Saksi. Pero ini dai makapaoontok sa pagbendisyon ni Jehova sa saiyang banwaan huli sa pagkamoot na ipinaheling ninda sa saiyang ngaran. An sarong paraataman sa sirkito nagsurat:
“Kaiba kan lokal na kongregasyon, luminuwas kami sa paglilingkod sa puwerang mga lugar. Sanggatos an mga tugang. Nag-arkila kami nin awto na nagdara samo nin mga 50 kilometros sa puwera, pasiring sa sarong sadit na banwaan. Inimbitaran mi an dakol sa pahayag-publiko na gigibohon sa Kultural na Tiriponan. Sa pagpoon tolos kan pagtiripon, nag-abot an pading Ortodokso tanganing ribokon an pagtiripon. Hiningoa kan mga pulis na papondohon an padi. Alagad ta habo niang kumalma. Nahimo niang papondohon an pagtiripon kan pasaon nia an salming sa puwerta mayor. Minsan siring, an dakol na tagaduman dai oyon sa iginawe kan padi. Kaya ikinatao an lubos na patotoo sa gabos na nag-atender, asin kadakol na babasahon an ikinawaras.”
Makamomondo ta sa dakol na kabtang kan nasyon, kakadikit kan mga Saksi. Kan enot na umabot an sarong regular payunir sa distrito nin Olt, an nanompongan nia sisiyam na tugang sa bilog na distrito asin mahiwas na teritoryo sa paghuhulit. Pakalihis nin sarong taon an mga Saksi nagin 27, na an lima nareaktibar na mga parahayag. An payunir nag-istar sa siudad nin Corabia, na mayo ni sarong Saksi. Pakalihis nin 45 pa sanang aldaw nin pag-istar duman kan mga Saksi, an lokal na rektor nagprotesta sa radyo nin Craiova tumang sa saindang gibohon. Sinabi nia na “linaog” ninda an siudad nin Corabia paagi sa saindang mga katokdoan, na hinihingoang papagliwaton nin relihiyon an mga tawo. Nagpadagos an mga pag-atake, na an intension papondohon an gibohon asin raoton an dangog kan mga Saksi sa lugar na idto. Iyan gabos nakaabot sa kulminasyon kan an mga tugang yaon sa Bucharest para sa pandistritong kombension. An Ortodoksong rektor sa Corabia nagtao nin mapuwersang paisi pakalihis kan saiyang sermon: “Maninigo na kita gabos magdemonstrar sa tinampo tanganing mapukaw an mga pulis na humiro tumang sa mga Saksi, na inolakitan an bilog na lugar kan saindang mga babasahon asin inilo an mga tawo.” Alagad ta kan banggi bago mangyari an miting, may pambihirang nangyari. An sarong grupo nin mga manraraot linaglag an katedral asin an Kultural na Tiriponan kan Siudad. Kaya, nungka na nangyari an miting sa pagprotesta!
Mga Teritoryo kan Dating Yugoslavia
An taon nin paglilingkod kan 1992 nagin masakit na taon para sa mga tugang sa lugar nin Yugoslavia. Pero kadungan kaiyan, nagkaigwa sinda nin magayagayang mga eksperyensia. Salamat sana, dai nalilingawan ni Jehova an saindang gibo asin an pagkamoot na ipinaheling ninda para sa saiyang ngaran.
An guerra enot na nagpoon sa Slovenia, dangan sa Croatia, dangan sa Bosnia asin Herzegovina. Sa laog nin sarong taon, gikan sa sarong republika, an limang bagong Estado naghihingoang establisaron an sadiri nindang mga linderos, ley, asin kuwarta. Ginatos na Saksi an kinaipuhan na dumulag sa saindang harong asin makipaili sa saindang mga tugang sa ibang lugar. Kapareho sa ibang nasyon sa Sirangan na Europa, may pan-emerhensiang mga komite na ninombrahan sa darakulang siudad, na inaasikaso an dadagusan, pagkakan, asin gubing para sa satong mga tugang na nangangaipo. Sa laog kan taon nin paglilingkod, mga 55 tonelada nin pagkakan an iwinaras sa mga tugang sa mga kongregasyon sa laog kan maribok na mga lugar. May naresibing kadakol na surat nin pagpasalamat.
An mga tugang sa Dubrovnik nagsaysay kun gurano an pasasalamat ninda sa itinaong tabang. Kan magpuli an sarong tugang na babae dara an saiyang supot nin pagkakan, naghapot an sarong kataed kun saen nia binakal an sogok. Sinabihan sia kan tugang na an saiyang espirituwal na mga tugang sa ibang lugar an nagpadara kaiyan. Napangalas an kataed. Sa saro pang kaso an sarong dai midbid na lalaking taga-Slovenia nagtelepono sa sarong magurang asin nagsabi: “Nabaretaan ko na iwinawaras kan mga Saksi ni Jehova an kakanon na naresibi hale sa saindang mga tugang sa matanos na paagi. May ipinadara akong nagkapirang kahon sa mga tawo; pero iyan nungkang nakaabot. Puwede daw na ipadara ko saindo an mga pan-ayudang ini, asin iwaras nindo?” Siring man, marahay an bareta nin mga diaryo asin radyo manongod sa satong pag-ayuda.
An sarong tugang na nabautismohan sa internasyonal na kombension duman sa Zagreb kan 1991 nakaaram sa nag-oorog na mga kasakitan asin buminakal nin sarong tindahan nin pagkakan. Ipinuli nia sa saiyang harong na harani sa lugar nin guerra an kakanon. Kan grumabe na nin orog an kakulangan sa kakanon, an suplay na ini nagin dakulaon na bendisyon sa mga tugang.
Nahimong makakua nin permiso na an sarong dakulang trak magdara nin pangenot na mga pagkakan para sa nalalaom na mga tugang sa Sarajevo. Ikinaoogma ming sabihon na mapangganang nagibo an paghatod.
May nagadan nang mga sibilyan sa ralaban. Makamomondo, sa katapusan kan taon nin paglilingkod, anom na sa satong mga tugang na lalaki asin babae saka duwang tawong interesado an nawaran nin buhay, asin an iba nalugadan.
Minsan siring, ipinaheheling nin dakol na eksperyensia na sa kadaklan, proteksion an pagigin saro sa mga Saksi ni Jehova. Sa sarong kaso an mga tugang nagbibiyahe pasiring sa pandistritong kombension sa Belgrade kan an awto papondohon nin mga soldados, na naghahapot kun baga may kaiba sindang mga miembro nin sarong relihiyon. An mga tugang nagsimbag na mayo. Kaipuhan na ipaheling ninda an saindang identification card, asin an iba sa sainda may ngaran na nagpaparisa na posible na sinda miembro kan relihiyon na iyan. Pinagsahotan sindang nagpuputik kan mga soldados, alagad ta dara kan mga tugang an saindang notisya sa paghale sa iglesya; dawa sinda ipinangaki sa relihiyon na iyan, sabi ninda, ngonyan sinda mga Saksi na ni Jehova, na nagbibiyahe pasiring sa saindang kombension. Huli kaini tinogotan sindang dumagos kan mga soldados.
Ipinagpapadagos nin mga payunir an saindang paglilingkod na may dai naiinaan na kaigotan, asin ini nagin dakulaon na pan-animar sa gibohon. An The Watchtower, na may nakaoogmang mga tutob sa kompletong kolor, durungan na tinatradusir sa gabos na pangenot na tataramon kan rehiyon. Iyan regular na nagtatao sa mga mamomoton sa katotoohan asin katanosan kan saindang espirituwal na “kakanon sa igong panahon.” (Lucas 12:42) Kaidtong 1992 na taon nin paglilingkod, 674 bagong tugang na lalaki asin babae an nabautismohan.
Segurado nanggad, dai nalingawan nin Dios an gibo kan mga tugang sa Sirangan na Europa asin an pagkamoot na ipinaheling ninda para sa saiyang ngaran. Dugang pa, mawot nia na an gabos na nagsasamba sa saiya, saen man sinda nag-eerok, kumuyog sa marahay na hatol na sunod na itinao ni Pablo, sa Hebreo 6:11, na nagsasabi: “Minamawot niamo na an lambang saro sa saindo magpaheling kan kaparehong kahigosan tanganing magkaigwa kan biyong kasiertohan kan paglaom sagkod sa katapusan.”