Iliniligtas Kita kan Pagkaherak ni Jehova sa Kadaihan nin Paglaom
“Kaherake ako, O Dios, sono sa saimong mamomoton na kabootan. Sono sa kadakolan kan saimong mga pagkaherak paraa an sakuyang mga kalapasan.”—SALMO 51:1.
1, 2. Paano puwedeng maapektaran nin magabat na kasalan an saro sa mga lingkod ni Jehova?
AN PAGBOOT ni Jehova dai malalapas na dai nin padusa. Iyan naririsang marhay kun kita nakagiginibo nin magabat na kasalan tumang sa Dios! Minsan tibaad dakol na taon na kitang maimbod na naglingkod ki Jehova, an paglapas sa saiyang pagboot puwedeng gikanan nin grabeng kahaditan o makuring depresyon. Tibaad mamatean niato na binayaan na kita ni Jehova asin na bako na kitang angay na maglingkod sa saiya. An satong kasalan tibaad magin siring sa dakulaon na panganoron na nakatatahob sa liwanag kan pag-oyon nin Dios.
2 Sarong beses nanompongan ni Hadeng David nin suanoy na Israel na sia nasa siring na kamugtakan. Paano ini nangyari?
An Salang mga Gibo Puwedeng Gumiya Pasiring sa Grabeng Kasalan
3, 4. Ano an nangyari ki Hadeng David sa panahon nin prosperidad?
3 Si David namomoot sa Dios alagad ta guminibo nin salang mga bagay na nagbunga nin magagabat na kasalan. (Ikomparar an Galacia 6:1.) Ini puwedeng mangyari sa siisay man na tawong bakong sangkap, nangorogna kun sia may autoridad sa iba. Bilang mayaman na hade, si David bantog asin makapangyarihan. Siisay an mangangahas na kontrahon an saiyang tataramon? Andam asin boot na maglingkod sa saiya an mga lalaking may kakayahan, asin galaga siang kinukuyog nin mga tawo. Alagad ta nagkasala si David huli sa pagpadakol sa saiyang agom asin pagbilang sa banwaan.—Deuteronomio 17:14-20; 1 Cronica 21:1.
4 Sa panahon na ini nin materyal na prosperidad, si David nakaginibo nin magagabat na kasalan tumang sa Dios asin sa tawo. Tara, an sarong kasalan nagdara sa saro pa na garo mga awat nin sarong tela na si Satanas an kagdisenyo! Mantang an mga kapwa nia Israelita nakilalaban sa mga Amonita, si David pinagheheling hale sa saiyang atop an magayon na agom ni Urias, si Bat-seba, na nagkakarigos. Mantang nasa labanan si Urias, ipinadara kan hade an babae sa saiyang palasyo asin nakisambay sa saiya. Isip-isipa kun gurano an pagkatakot nia kan maaraman na an babae bados! Ipinakua ni David si Urias, sa paglaom na sia makidodorog ki Bat-seba asin ibibilang na saiya an aki. Minsan ngani sia binurat ni David, si Urias nagsayumang makidorog sa babae. Huling desesperado na, si David nagpadara nin hilom na pagboot sa komandanteng si Joab na ibugtak sa enotan si Urias na duman sia seguradong magagadan. Si Urias nagadan sa ralaban, an nabalo niang agom nag-otob sa pinagkatodan na panahon nin pagmondo, asin ini pinakasalan ni David bago naaraman nin mga tawo an pagbabados kaini.—2 Samuel 11:1-27.
5. Ano an nangyari pakapagkasala ni David kaiba si Bat-seba, asin ano an nagin epekto sa saiya kan saiyang mga kasalan?
5 Paagi ki propeta Natan, ibinuyagyag nin Dios an mga kasalan ni David asin nagsabi: “Patitindogon ko tumang sa saimo an kapahamakan gikan sa saimong sadiring harong.” Kaya, nagadan an aki ni Bat-seba. (2 Samuel 12:1-23) An matuang aki ni David, si Amnon, linugos an saiyang tugang sa amang si Tamar asin ginadan man kan tugang ni Tamar. (2 Samuel 13:1-33) An aki kan hade na si Absalom prinobaran na agawon an trono asin sinopog an saiyang ama paagi sa pakidodorog sa mga sambay ni David. (2 Samuel 15:1–16:22) An guerra sibil natapos sa pagkagadan ni Absalom asin sa orog pang kamondoan para ki David. (2 Samuel 18:1-33) Minsan siring, an mga kasalan ni David nagpangyari sa saiyang magpakumbaba asin nagpamate sa saiya kan pangangaipo na makidayupot sa saiyang maheherakon na Dios. Kun kita magkasala, mapakumbaba kitang magsolsol asin rumani ki Jehova.—Ikomparar an Santiago 4:8.
6. Taano ta nangorognang may kasalan si Hadeng David?
6 Si David nangorognang may kasalan ta sia hadeng Israelita na lubos na tatao sa Pagboot ni Jehova. (Deuteronomio 17:18-20) Sia bakong faraon nin Egipto o hade sa Babilonya na mayo nin siring na kaaraman asin tibaad natood nang gumibo nin mga bagay na dai inooyonan nin Dios. (Ikomparar an Efeso 2:12; 4:18.) Bilang miembro nin sarong nasyon na dusay ki Jehova, aram ni David na magagabat na kasalan an pagsambay asin paggadan. (Exodo 20:13, 14) Aram man nin mga Kristiano an pagboot nin Dios. Alagad, kapareho ni David, an iba sa sainda naglalapas kaiyan huli sa kanaturalan nang pagkamakasalan, kaluyahan nin tawo, asin sugot na dai linabanan. Kun iyan mangyari sa siisay man sa sato, dai kita kinakaipuhan na magdanay sa madiklom na kamugtakan na nakaoolang sa satong espirituwal na pananaw asin tinatahoban kita sa makuring kadaihan nin paglaom.
An Pagtuga Nakapagiginhawa
7, 8. (a) Ano an nangyari ki David kan probaran niang itago an saiyang mga kasalan? (b) Taano ta dapat na ituga asin ipondo an kasalan?
7 Kun nagkasala nin grabeng mga paglapas sa pagboot nin Dios, tibaad masakitan kitang ituga an satong mga kasalan, minsan ki Jehova. Ano an puwedeng mangyari sa siring na mga kamugtakan? Sa Salmo 32, inadmitir ni David: “Kan ako dai naggigirong [imbes na magtuga] an sakuyang mga tolang nanluya huli sa sakuyang pag-agrangay sa bilog na aldaw. Huli ta aldaw asin banggi an saimong [ki Jehova] kamot magabat sa sako. An kalabasan kan sakuyang buhay naribayan nin siring sa pagkaalang nin tig-init.” (Bersikulo 3, 4) An parakasalang si David napagal sa paghihingoang itago an saiyang kasalan asin pogolan an nagkasalang konsensia. Huli sa kasakitan nin boot an saiyang kosog luminuyang marhay kaya sia nagin siring sa alang na kahoy na daing tubig na nagtatao nin buhay. An totoo, tibaad nakamate man sia nin maraot na mga epekto sa isip asin sa lawas. Ano man an nangyari, nawaran sia nin kagayagayahan. Kun an siisay man sa sato mamugtak sa siring na situwasyon, ano an maninigo niatong gibohon?
8 An pagtuga sa Dios puwedeng magbunga nin kapatawadan asin pakaginhawa. “Sa katapustapusi itinuga ko an sakuyang kasalan sa saimo, asin dai ko itinago an sakuyang katampalasanan,” an awit ni David. “An sabi ko: ‘Itutuga ko an sakuyang mga kasumbikalan ki Jehova.’ Asin ika mismo nagpatawad kan karatan kan sakuyang mga kasalan.” (Salmo 32:5) Ipinagsasakit daw nindo an sarong itinatagong kasalan? Bako daw na pinakamarahay na magtuga asin ipondo iyan tanganing mag-ako kan pagkaherak nin Dios? Taano ta dai apodan an kamagurangan sa kongregasyon asin humagad nin espirituwal na pagbolong? (Talinhaga 28:13; Santiago 5:13-20) Mimidbidon an saindong pagsolsol, asin pag-abot nin panahon ikababalik an saindong Kristianong kagayagayahan. “Maogma idtong an pagrebelde pinatawad, na an kasalan tinahoban,” sabi ni David. “Maogma an tawo na dai kinukuwentahan ni Jehova nin kasalan, asin sa saiyang espiritu mayo nin pandadaya.”—Salmo 32:1, 2.
9. Kasuarin kinompuwesto an Salmo 51, asin taano?
9 Si David asin Bat-seba may paninimbagan ki Jehova Dios huli sa saindang salang gibo. Minsan ngani puwede sindang gadanon huli sa saindang mga kasalan, kinaherakan sinda nin Dios. Sia nangorognang maheherakon ki David huli sa tipan sa Kahadean. (2 Samuel 7:11-16) An pagsolsol ni David sa saiyang mga kasalan may labot ki Bat-seba maheheling sa Salmo 51. An nakapahihiro sa boot na salmong ini kinompuwesto kan nagsosolsol na hade pakapukawa ni propeta Natan kan saiyang konsensia sa kadakulaan kan saiyang mga paglapas sa banal na pagboot. Kinaipuhan ni Natan an kapusoan na ipaaram ki David an saiyang mga kasalan, kun paanong an nombradong Kristianong kamagurangan dapat na magin mapuso tanganing magibo an siring ngonyan. Imbes na deharan an sahot asin ipagadan si Natan, an hade mapakumbabang nagtuga. (2 Samuel 12:1-14) Ipinaheheling kan Salmo 51 kun ano an isinabi nia sa Dios sa pamibi dapit sa makasosopog niang mga gibo asin iyan tamang-tama sa mapagngayongayong paghorophorop, partikularmente kun kita nagkasala asin nagmamawot kan pagkaherak ni Jehova.
Maninimbag Kita sa Dios
10. Paano si David makababalik sa espirituwal?
10 Si David dai naghingoang ipanarahotan an saiyang kasalan kundi nakimaherak: “Kaherake ako, O Dios, sono sa saimong mamomoton na kabootan. Sono sa kadakolan kan saimong mga pagkaherak paraa an sakuyang mga kalapasan.” (Salmo 51:1) Sa paglapas, si David luminuwas sa Pagboot nin Dios. Alagad ta may paglaom sa saiyang espirituwal na pakabalik kun sia pahehelingan nin Dios nin pabor sono sa Saiyang mamomoton na kabootan, o maimbod na pagkamoot. An kadakolan kan nakaaging mga pagkaherak nin Dios nagtao sa nagsosolsol na hade nin pasisikadan sa pagtubod na paparaon kan saiyang Kaggibo an saiyang mga kalapasan.
11. Ano an isinuherir kan mga atang sa Aldaw nin Pagtubos, asin ano an hinahagad para sa kaligtasan ngonyan?
11 Paagi sa makahulang mga anino kan mga atang kun Aldaw nin Pagtubos, ipinarisa ni Jehova na sia may paaging linigan an mga nagsosolsol sa saindang kasalan. Ngonyan aram ta nang an saiyang pagkaherak asin kapatawadan itinatao sa sato basado sa satong pagtubod sa pantubos na atang ni Jesu-Cristo. Kun si David, na an nasa isip sana mga tipo asin anino kan atang na ini, puwedeng manarig sa mamomoton na kabootan asin mga pagkaherak ni Jehova, gurano pa daw na an mga lingkod nin Dios sa presente maninigong tumubod sa pantubos na itinatao para sa saindang kaligtasan!—Roma 5:8; Hebreo 10:1.
12. Ano an kahulogan nin pagkakasala, asin ano an saboot ni David manongod sa saiyang salang gibo?
12 Sa pakimaherak sa Dios, idinugang ni David: “Hugasan mo ako nin biyo sa sakong sala, asin linigan mo ako sa sakong kasalan. Huli ta aram ko an sakuyang mga kalapasan, asin an sakuyang kasalan danay na nasa atubangan ko.” (Salmo 51:2, 3) An pagkakasala dai pakaabot sa mga pamantayan ni Jehova. Tunay na nagibo iyan ni David. Pero, sia bako man na siring sa paragadan o parasambay na daing labot sa saiyang kasalan, na nahahadit sana sa padusa sa saiya o sa posibilidad na makakua nin helang. Bilang namomoot ki Jehova, ikinaongis ni David an maraot. (Salmo 97:10) Ikinabalde nia mismo an saiyang kasalan asin boot na iyan lubos na linigon sa saiya nin Dios. Biyong aram ni David an saiyang mga kalapasan asin namomondong gayo na tinogotan niang madaog sia kan saiyang makasalan na horot. Permi niang nagigirumdoman an saiyang kasalan, ta an nakamamate nin kasalan na konsensia nin sarong matatakton sa Dios nungka na natotoninong sagkod na mayo nin pagsolsol, pagtuga, asin kapatawadan ni Jehova.
13. Taano ta nasabi ni David na sia nagkasala tumang sana sa Dios?
13 Sa pagmidbid sa saiyang paninimbagan ki Jehova, si David nagsabi: “Sa saimo, sa saimo sanang gayo, nagkasala ako, asin an maraot sa saimong mga mata nagibo ko, tanganing ika mapatunayan na matanos kun ika nagtataram, tanganing ika daing paninimbagan kun ika naghohokom.” (Salmo 51:4) Linapas ni David an mga pagboot nin Dios, hinalean nin onra an katongdan nin hade, asin “daing duwa-duwa na linanghadan . . . si Jehova,” na ibinubugtak Sia sa kamugtakan na langhadan. (2 Samuel 12:14; Exodo 20:13, 14, 17) An makasalan na mga gibo ni David mga kasalan man tumang sa sosyedad nin Israel asin sa mga miembro kan saiyang pamilya, kun paanong an bautisadong parakasala ngonyan nagtatao nin kamondoan o kasakitan sa Kristianong kongregasyon asin sa mga namomotan. Minsan aram kan nagsolsol na hade na sia nagkasala tumang sa mga kapwa nia tawo na arog ni Urias, minidbid nia an mas halangkaw na paninimbagan ki Jehova. (Ikomparar an Genesis 39:7-9.) Minidbid ni David na magigin matanos an paghokom ni Jehova. (Roma 3:4) An mga Kristianong nagkasala kaipuhan na magkaigwa nin kaparehong punto-de-vista.
Nagpapagian na mga Kamugtakan
14. Anong nagpapagian na mga kamugtakan an sinitar ni David?
14 Minsan ngani dai nanarahotan si David, sia nagsabi: “Uya! Sa karatan ako ipinangaki, asin sa kasalan ipinangidam ako kan sakong ina.” (Salmo 51:5) Si David ipinangaki sa karatan, asin an saiyang ina nag-agi nin kolog sa pangangaki huli sa minanang pagigin makasalan. (Genesis 3:16; Roma 5:12) An saiyang mga tataramon dai nangangahulogan na an tamang pagdodorog nin mag-agom, pangingidam, asin pangangaki makasalan, mantang an Dios an nag-areglo kan pag-agom asin pangangaki; ni an boot man na sabihon ni David espisipikong kasalan kan saiyang ina. Sia ipinangidam sa kasalan ta an saiyang mga magurang makasalan kapareho nin gabos na tawong bakong sangkap.—Job 14:4.
15. Minsan ngani tibaad konsideraron nin Dios an nakapagigian na mga kamugtakan, ano an dai niato maninigong gibohon?
15 Kun kita nagkasala, puwede niatong sitaron sa pamibi sa Dios an ano man na nagpapagian na mga kamugtakan na tibaad nakakontribuwir sa pakagibo niato nin sala. Alagad ta dai niato gibohon na sarahotan sa malaswang gawe an dai na kutana maninigong kabootan nin Dios o gamiton an minanang pagigin makasalan bilang tagoan na dai manimbag sa satong kasalan. (Judas 3, 4) Inako ni David an paninimbagan sa pag-isip-isip nin maramog na mga bagay asin pagpadaog sa sugot. Mamibi kita na dai kita pabayaan sa sugot dangan humiro kita oyon sa pamibing iyan.—Mateo 6:13.
Makimaherak na Linigan
16. Anong kuwalidad an nawiwilihan nin Dios, asin paano iyan maninigong makaapektar sa satong gawe?
16 An mga tawo tibaad garo baga marahay na mga indibiduwal na maimbod sa Dios, alagad ta hiniheling nia an sa irarom asin minamansayan kun ano sinda sa laog. Sabi ni David: “Uya! Ika [si Jehova] nawili sa katotoohan mismo sa panlaog na mga kabtang; asin sa natatagong pagkatawo ipamidbid mo logod sa sako an kadonongan.” (Salmo 51:6) Si David nagkasala nin pagputik asin katusohan sa pagmaniobra kan kagadanan ni Urias asin paghihingoang itago an pagbabados ni Bat-seba. Minsan siring, aram nia na ikinawiwili nin Dios an katotoohan asin kabanalan. Ini maninigong makaapektar sa satong gawe sa marahay na paagi, ta kokondenaron kita ni Jehova kun kita tuso. (Talinhaga 3:32) Aram man ni David na kun an Dios ‘ipamimidbid sa saiya an kadonongan,’ bilang nagsolsol na hade, masusunod nia an banal na mga pamantayan sa natatada pa niang buhay.
17. Ano an kahulogan kan pamimibi na dalisayon paagi sa hisopo?
17 Huling nasabotan kan salmista an pangangaipo nia sa tabang nin Dios sa pagdaog sa makasalan na mga tendensia, ipinakimaherak pa nia: “Dalisayon mo logod ako sa kasalan paagi sa hisopo, tangani akong magin malinig; hugasan mo logod ako, tangani na ako magin maputi pa sa niyebe.” (Salmo 51:7) Kabilang sa iba pang bagay, an poon nin hisopo (tibaad oregano, o Origanum maru) ginamit sa seremonya nin paglinig sa mga tawong dati may lepra. (Levitico 14:2-7) Kaya angay na si David mamibi na dalisayon sa kasalan paagi sa hisopo. Asosyado man an ideya nin pagigin dalisay sa pakimaherak nia na hugasan sia ni Jehova tangani na sia biyong malinigan, na maputi pa sa niyebe na daing ariw o iba pang ati. (Isaias 1:18) Kun an siisay man sa sato ngonyan riniribok kan konsensia huli sa salang gibo, tumubod kita na kun kita may pagsolsol na mahagad kan kapatawadan nin Dios, kita saiyang madadalisay asin malilinigan basado sa pantubos na atang ni Jesus.
Makimaherak na Makabalik
18. Ano an kamugtakan ni David bago sia nagsolsol asin nagtuga, asin paano makatatabang ngonyan an kaaraman dapit kaini?
18 An siisay man na Kristiano na nasakitan na huli sa nakamamate nin kasalan na konsensia makasasabot sa mga tataramon ni David: “Padangogon mo [ni Jehova] logod ako nin kaogmahan asin kagayagayahan, tanganing an mga tolang na saimong rinonot magin magayagaya.” (Salmo 51:8) Bago nagsolsol si David asin nagtuga kan saiyang mga kasalan, ginibo siang miserable kan saiyang nariribok na konsensia. Dai ngani nia ikinaoogma an mga awit nin kaogmahan asin kagayagayahan na ginigibo nin matitibay na parakanta asin ekspertong mga musikero. Grabe na an kasakitan sa boot kan makasalan na si David huli sa dai pag-oyon nin Dios kaya garo sia tawong rinonot nin makologon an mga tolang. Minamawot niang gayo an kapatawadan, espirituwal na pagkaomay, asin pakabalik kan dati niang kagayagayahan. An nagsolsol na parakasala ngonyan nagkakaipo man kan kapatawadan ni Jehova tanganing makamtan liwat an dati niang kagayagayahan bago sia guminibo nin nagsapeligro kan saiyang relasyon sa Dios. An pagbabalik kan “kagayagayahan nin banal na espiritu” sa sarong tawong nagsolsol nagpapaheling na si Jehova pinatawad na sia asin namomotan sia. (1 Tesalonica 1:6) Kanigoan na karangahan an itinatao kaiyan!
19. Ano an mamamatean ni David kun paraon nin Dios an gabos niang sala?
19 Namibi pa si David: “Tagoa an saimong lalauogon sa sakong mga kasalan, asin paraa an gabos kong sala.” (Salmo 51:9) Dai malalaoman si Jehova na magheling sa kasalan na may pag-oyon. Kaya, pinakiolayan siang tagoon an saiyang lalauogon sa mga kasalan ni David. Nakimaherak man an hade na paraon logod nin Dios an gabos niang sala, haleon an gabos niang karatan. Kun iyan gigibohon sana ni Jehova! Bubuhayon kaiyan an boot ni David, hahaleon an gabat nin riniribok na konsensia, asin magpaparisa sa nagsolsol nang hade na sia pinatawad na kan saiyang mamomoton na Dios.
Ano Kun Nagkasala Kamo?
20. Ano an irinirekomendar para sa siisay man na Kristiano na nagkasala nin magabat?
20 Ipinaririsa kan Salmo 51 na an siisay man na nagdusay na lingkod ni Jehova na nagkasala nin magabat pero nagsosolsol may pagsarig na makaaarang sa saiya na pahelingan sinda nin pabor asin linigan sinda sa saindang kasalan. Kun kamo Kristiano na nagkasala sa siring na paagi, taano ta dai hagadon an kapatawadan kan satong langitnon na Ama sa mapakumbabang pamibi? Midbidon an pangangaipo nindo sa tabang nin Dios tanganing magin inooyonan sa atubangan nia, asin arangon na ibalik nia an dati nindong kagayagayahan. An nagsolsol na mga Kristiano may pagsarig na makadodolok ki Jehova sa pamibi na igwa kan siring na mga kahagadan, ta “sia bulaos na magpapatawad.” (Isaias 55:7; Salmo 103:10-14) Siyempre, maninigong apodan an kamagurangan sa kongregasyon tangani na makatao sinda kan kinakaipuhan na espirituwal na tabang.—Santiago 5:13-15.
21. Ano an masunod niatong sisiyasaton?
21 Kaya an pagkaherak ni Jehova nagliligtas sa saiyang banwaan sa kadaihan nin paglaom. Alagad siyasaton niato an iba pang odok sa pusong pakimaherak kan nagsolsol na si David sa Salmo 51. Ipaheheling kan satong pag-adal na dai ikinaoongis ni Jehova an laglag na puso.
Ano an Isisimbag Nindo?
◻ Ano an puwedeng magin epekto nin magabat na kasalan sa saro sa mga lingkod ni Jehova?
◻ Paano naapektaran si David kan probaran niang itago an saiyang kasalan?
◻ Taano ta sinabi ni David na sia nagkasala tumang sana sa Dios?
◻ Minsan ngani tibaad konsideraron nin Dios an nakapagigian na mga kamugtakan kun kita magkasala, ano an dai niato maninigong gibohon?
◻ Ano an maninigong gibohon nin Kristiano kun sia nagkasala nin magabat?