Kun Taano ta Kaipuhan Kamong Umatender sa Kristianong mga Pagtiripon
SA LAOG nin dakol na bulan, si Rosario, na nag-iistar sa Amerika del Sur, naogma sa pag-adal sa Biblia kaiba ni Elizabeth. Nakapaogma ki Rosario na manodan an dapit sa Kahadean nin Dios asin kun paano papapangyarihon kaiyan an Paraisong mga kamugtakan digdi sa daga. Alagad kun iniimbitaran sia ni Elizabeth na umatender sa mga pagtiripon sa Kingdom Hall, habo nia. Hinona nia na makakapag-adal sia kan Biblia sa harong asin magigibo an sinasabi kaiyan, na ginigibo iyan dawa dai nag-aatender sa mga pagtiripon sa kongregasyon. Naisip-isip na man daw nindo kun baga an Kristianong mga pagtiripon talagang kapakipakinabang saindo? Taano daw ta iinaareglo nin Dios para sa saiyang banwaan na magtiripon?
Mantang an mga Kristiano kan enot na siglo laen na gayo sa mga tawo na nasa palibot ninda, an tamang pakikiasosyar mahalaga sa saindang kaligtasan. Si apostol Pablo nagsurat sa sarong kongregasyon kan enot na mga Kristiano: ‘Nagin kamong daing kasagwean asin daing kasalan sa tahaw nin maraot asin bikong kapag-arakian, na sa tahaw kaiyan kamo nagliliwanag siring sa mga ilaw kan kinaban.’ (Filipos 2:15) An mga Kristiano nagkaigwa nin pambihira kadepisil na panahon sa Judea, asin para sa sainda na nagsurat si Pablo: “Magpasaradolsadol kita na magdagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magpakinosogan kita, asin lalo na ta naheheling nindo na an aldaw harani na.” (Hebreo 10:24, 25) Paano daw niato dadagkahon an kada saro sa pagkamoot asin marahay na mga gibo paagi sa pagtiripon?
Kun Paano ‘Pinapatarom’ nin mga Kristiano an Kada Saro
An terminong Griego na ginamit ni Pablo asin trinadusir na “magdagka” literal na nangangahulogan nin “pagpapatarom.” An talinhaga sa Biblia nagpapaliwanag kun paano an mga Kristiano “minapatarom” sa kada saro kan iyan magsabi: “Sa batbat, an batbat mismo minatarom. Kaya an tawo minapatarom sa lalauogon nin ibang tawo.” (Talinhaga 27:17; Eclesiastes 10:10) Kita arog sa mga instrumento na kinakaipuhan an regular na pagpatarom. Mantang an pagpahayag nin pagkamoot ki Jehova asin paggibo nin mga desisyon na basado sa satong pagtubod nangangahulogan nin pagigin napapalaen sa kinaban, kaipuhan tang padagos na lumakaw sa ibang dalan, sabi ngani, na laen sa kadaklan.
An padagos na paghihingoa na magin napapalaen puwedeng magpangurol kan satong kaigotan para sa marahay na mga gibo. Pero kun kita kaiba nin mga namomoot ki Jehova, minapatarom kita sa kada saro—nadadagka niato an kada saro sa pagkamoot asin marahay na mga gibo. Sa ibong na lado, kun kita nagsosolo, an tendensia niato orog na konsideraron an satong sadiri. An inmoral, paslo, o rungaw na mga ideya tibaad lumaog sa satong isip. “An nagsosolosolo maghahanap sa saiyang sadiring paslong pagmawot; malapas sia sa gabos na kapakipakinabang na kadonongan.” (Talinhaga 18:1) Iyan an dahelan kun taano ta nagsurat si Pablo sa kongregasyon sa siudad nin Tesalonica: “Padagos kamong magparangaranga asin magpakinosogkosogan, siring sa ginigibo na ngani nindo.”—1 Tesalonica 5:11.
Kan matapos ni Rosario an saiyang pag-adal kan pundamental na mga katokdoan sa Biblia, nagduwaduwa pa man giraray sia sa pakikiasosyar sa kongregasyon. Kaya, dai na kayang magtao nin orog pang tabang, pinondo ni Elizabeth an pagdalaw saiya. Mga pirang bulan an nakalihis dinalaw si Rosario kan nagbibiyaheng paraataman asin hinapot: “Minsan ngani an kada miembro kan pamilya makakakua nin marahay na kakanon paagi sa pagkakan sa restawran, ano daw an mawawara kan gabos na miembro kun dai makakan na iriba sa harong?” Nagsimbag si Rosario: “Mawawara ninda an pag-iribanan kan pamilya.” Nakua nia an punto asin nagpoon na dumuman nin regular sa mga pagtiripon. Naheling nia idtong kapakipakinabang na marhay na nag-aatender na sia poon kaidto sa haros kada pagtiripon.
An pakadangog sa ibang tawo na nagpapahayag nin pagtubod sa magkaparehong mga bagay na pinaniniwalaan nindo nakakapakosog asin siring man an pakaheling kun paano an siring na pagtubod nakapabago sa saindang buhay. Aram ini ni Pablo gikan sa personal na eksperyensia, asin sia nagsurat sa kongregasyon sa Roma: “Ako nagmamawot na maheling kamo, tanganing makawaras ako sa saindo nin espirituwal na mga balaog tanganing kamo maparigon; o, an boot sabihon, tanganing magkaigwa nin pagriribayan nin pagpakosog dian sa saindo, an lambang saro huli sa pagtubod nin iba, an saindo asin an sako man.” (Roma 1:11, 12) Sa katunayan, mga pirang taon bago nakadalaw si Pablo sa Roma, asin kan dalawon nia, idto siring sa bilanggo sa mga kamot kan mga Romano. Alagad kan maheling nia an mga tugang hale sa Roma na nagbaklay nin labi sa 60 kilometros hale sa siudad tanganing sabaton sia, “si Pablo nagpasalamat sa Dios asin nagin mapuso.”—Gibo 28:15.
Paghanap nin Espirituwal na Kakanon sa Masakit na mga Panahon
Mantang nabibilanggo sa Roma, sinuratan ni Pablo an mga Hebreo dapit sa dai pagpabaya sa pagtorotiripon. Mahalaga para sato na idinugang nia an mga tataramon na: “Lalo na ta naheheling nindo na an aldaw harani na.” (Hebreo 10:25) Padagos na ipinaheheling kan mga Saksi ni Jehova hale sa Kasuratan na an taon kan 1914 nagtanda sa kapinonan kan panahon kan katapusan nin kinaban na ini asin na an “aldaw nin paghokom asin kalaglagan kan maraot na mga tawo” harani na. (2 Pedro 3:7) Sono sa libro nin Biblia na Kapahayagan, kan an Diablo palayason sa langit sa kapinonan kan panahon kan katapusan, dakula an saiyang kaanggotan asin “nagluwas sa pakilaban sa mga natatada . . . na nagkukuyog sa mga pagboot nin Dios asin igwa kan gibohon nin pagpatotoo ki Jesus.” (Kapahayagan 12:7-17) Kun siring, an pagkuyog sa mga pagboot nin Dios nangorognang depisil ngonyan; kinakaipuhan tang makitipon nin orog pa sa mga kapagtubod. An mga pagtiripon matabang sato na pasarigon an satong pagtubod asin an satong pagkamoot sa Dios tanganing malabanan an mga pag-atake kan Diablo.
An pagkamoot sa Dios asin pagtubod bakong arog sa mga edipisyo na permanente na oras na iyan itinogdok. Imbes, iyan arog sa nabubuhay na mga bagay na luway-luway na nagtatalubo paagi sa padagos na pagpapakakan alagad naaalang asin nagagadan kun ginugutom. Iyan an dahelan kun taano si Jehova ta nagtatao nin regular na espirituwal na kakanon tanganing pakosogon an saiyang banwaan. Kita gabos nangangaipo nin siring na kakanon, pero saen niato iyan aakoon kun bakong sa organisasyon nin Dios asin sa mga pagtiripon kaiyan? Mayo na.—Deuteronomio 32:2; Mateo 4:4; 5:3.
Nagtao si Jesus nin hapot na makakatabang sato tanganing maheling kun paano nia pinapakakan an Kristianong kongregasyon. Naghapot sia: “Siisay man nanggad an maimbod asin madonong na oripon na pinaniwalaan kan saiyang kagurangnan kan saiyang mga domestiko, tanganing magtao sainda kan saindang kakanon sa igong panahon? Maogma an oripon na iyan kun sa pagdatong kan saiyang kagurangnan makua siang naggigibo nin siring.” (Mateo 24:45, 46) Siisay an pinaniwalaan ni Jesus kan enot na siglo tanganing pakakanon an saiyang mga parasunod, asin siisay an nanompongan niang maimbod na nagpapakakan sainda sa saiyang pagbuwelta sa kapangyarihan sa Kahadean? Malinaw, mayo nin tawong nagdanay na buhay sa laog kan gabos na siglong idto. An ebidensia nagtotokdo sa oripon na iyo an kongregasyon nin mga Kristianong linahidan nin espiritu, kun paanong an nasyon nin Israel iyo an lingkod nin Dios kan bago-Kristianong mga panahon. (Isaias 43:10) Iyo, itinatao ni Jesus an satong espirituwal na kakanon paagi sa pambilog na kinaban na grupo nin mga Kristianong linahidan nin espiritu, na ngonyan ipinaaabot an espirituwal na kakanon paagi sa lokal na mga kongregasyon kan mga Saksi ni Jehova.
An probisyon ni Jesus na paagihan kan espirituwal na kakanon orog pang ilinadawan kan apostol na si Pablo: “‘Kan sia magsakat sa kaitaasan nagdara sia nin mga bihag; nagtao sia nin balaog na mga lalaki.’ . . . Itinao nia an nagkapira bilang mga apostol, an nagkapira bilang mga propeta, an nagkapira bilang mga paraebanghelyo, an nagkapira bilang mga pastor asin paratokdo, manongod sa paghusay liwat kan mga banal, manongod sa gibohon nin paglingkod, manongod sa pagpakosog kan hawak ni Cristo, sagkod na kita gabos makaabot sa pagkasararo sa pagtubod asin sa tamang kaaraman dapit sa Aki nin Dios, sa lubos na pagkatawo, sa sokol nin pagtalubo na kapareho kan kapanoan kan Cristo.”—Efeso 4:8, 11-13.
Enot sa gabos sa laog kan lokal na mga kongregasyon—sa mga pagtiripon—na ining “balaog na mga lalaki” pinakosog an mga tugang. Halimbawa sa Antioquia, “si Judas asin Silas, mantang sinda man mga propeta, nagsadol sa mga tugang sa balakid na tataramon asin nagpakosog sa sainda.” (Gibo 15:32) An mga pahayag kan kuwalipikado sa espirituwal na mga lalaki ngonyan pakokosogon man an satong pagtubod tanganing iyan dai maalang o magin inaktibo.
Puwedeng totoo na nakagibo na kita nin marahay na pag-oswag huli sa personal na tabang nin sarong miembro kan kongregasyon minsan ngani dai pa kita nagpopoon na umatender sa mga pagtiripon. Nagsasabi an Biblia na may panahon na ‘nangangaipo kamo nin may magtokdo sa saindo poon sa kapinonan kan simpleng mga bagay kan banal na mga kapahayagan nin Dios; asin kamo nangangaipo nin gatas, bakong kakanon na matagas.’ (Hebreo 5:12) Pero an saro dai puwedeng magdanay sa gatas sagkod lamang. An Kristianong mga pagtiripon nagtatao nin padagos na programa nin pagtotokdo sa Biblia na dinisenyo tanganing mapagdanay na buhay an pagkamoot sa Dios asin pagtubod sa saiya siring man tanganing magtao nin praktikal na tabang sa pag-aplikar kan “gabos na sadol nin Dios.” (Gibo 20:27) Ini orog pa sa “gatas.” An Biblia dugang pang nagsasabi: “An matagas na kakanon para sa mga maygurang, duman sa mga tawo na huli sa paggamit kan saindang kakayahan nin pagmansay napatood na mamidbid kun ano an tama asin sala.” (Hebreo 5:14) Sa mga pagtiripon dakol an mga tema na pinag-oorolayan na tibaad bakong kabtang kan pundamental na kurso sa pagtotokdo kan Biblia sa harong, siring baga sa bersikulo-por-bersikulo na mga pag-adal kan importanteng mga hula sa Biblia asin an hararom na mga pag-orolay kun paano niato maaarog an Dios sa satong sadiring buhay.
An mga Pagirumdom ni Jehova—Arog sa Sarong Boses sa Likod Nindo
Paagi sa siring na mga pag-aradal sa kongregasyon, regular na pinagigirumdom kita ni Jehova kun maninigong magin anong klaseng mga tawo kita. An siring na mga pagirumdom mahalaga. Kun mayo kan mga iyan madali kitang madara sa pagkamakasadiri, kapalangkawan, asin kapasloan. An mga pagirumdom hale sa Kasuratan matabang sato na kamtan an mapangganang mga relasyon sa ibang tawo asin sa Dios mismo. “Pinaghorophorop ko an sakuyang mga dalan, tanganing ikabuwelta ko an sakuyang mga bitis sa saimong mga pagirumdom,” an pagbuyboy kan kagsurat nin Salmo 119:59.
Mantang regular kitang nag-aatender sa Kristianong mga pagtiripon, naeeksperyensiahan niato an pagkaotob kan hula ni Jehova paagi ki Isaias, na nagsasabing: “Dai na itatago kan saimong Kaharohalangkaweng Paratokdo an saiyang sadiri, asin an saimong mga mata maninigong mga mata na nakakaheling sa saimong Kaharohalangkaweng Paratokdo. Asin an saimong mga talinga makakadangog nin tataramon sa likod mo na nagsasabi: ‘Iyo ini an dalan. Maglakaw kamo dian, banwaan.’” Binabantayan ni Jehova an satong pag-oswag asin mamomoton na itinatanos kita kun nasasala kita sa paglakaw. (Isaias 30:20, 21; Galacia 6:1) Asin nagtatao pa ngani sia nin orog pang tabang kisa kaini.
Pag-ako nin Banal na Espiritu Paagi sa Kongregasyon
Paagi sa regular na pag-atender sa Kristianong mga pagtiripon kaiba kan mga Saksi ni Jehova, pinapakosog kita kan banal na espiritu nin Dios, na nag-eerok sa saiyang banwaan. (1 Pedro 4:14) Dugang pa, an Kristianong mga paraataman sa kongregasyon ninombrahan kan banal na espiritu. (Gibo 20:28) An puwersa aktiba na ini na hale sa Dios igwa nin mapuwersang impluwensia sa sarong Kristiano. An Biblia nagsasabi: “An bunga kan espiritu iyo an pagkamoot, kaogmahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.” (Galacia 5:22, 23) An banal na espiritu, na naghihiro paagi sa organisasyon nin Dios, matabang man sato na magkamit nin makangangalas na malinaw na pakasabot sa kun ano an itinatagama ni Jehova sa mga namomoot saiya. Pakapaliwanaga na an prominenteng mga tawo kan palakaw na ini nin mga bagay dai makakasabot kan mga katuyohan nin Dios, si Pablo nagsurat: “Sa sato na an mga iyan ipinahayag nin Dios paagi sa saiyang espiritu.”—1 Corinto 2:8-10.
Apuwera sa nakakapakosog sa pagtubod na espirituwal na kakanon, an kongregasyon nagtatao nin pagsasanay sa mga nagmamawot na makikabtang sa pangenot na aktibidad kan kongregasyon. Ano iyan?
An Pagsasanay na Itinatao kan Kongregasyon
An Kristianong kongregasyon bakong sarong sosyal na katiriponan kun saen an mga tawo nag-oorogma sana sa pag-aling-aling asin tibaad dinadagka an kada saro na mamuhay nin orog karahay. Pinagbotan ni Jesus an kongregasyon na darahon an maogmang bareta kan Kahadean sa mga namumuhay sa espirituwal na kadikloman. (Gibo 1:8; 1 Pedro 2:9) Poon sa aldaw na pinundar iyan, kan Pentecostes 33 C. E., iyan organisasyon nin mga parahulit. (Gibo 2:4) Nagkaigwa na daw kamo nin eksperyensia na pinagmaigotan na sabihon sa saro an manongod sa mga katuyohan ni Jehova alagad dai sia nakombensir? An mga pagtiripon sa kongregasyon nagtatao nin personal na pagsasanay sa arte nin pagtotokdo. Paagi sa pag-adal sa mga halimbawa sa Biblia, nakakanood kita na magtogdok nin sarong paniniwala na dian mangangatanosan, kun paano gagamiton an Kasuratan bilang basihan para sa lohikong argumento, asin kun paano tatabangan an iba na mangatanosan paagi sa paggamit nin mga hapot asin ilustrasyon. An siring na mga abilidad makatatabang saindo na maeksperyensiahan an dai masabing kagayagayahan sa pagtabang sa saro pang tawo na masabotan an katotoohan kan Biblia.
Sa pano nin kariribokan, inmoral na kinaban na ini, an Kristianong kongregasyon sarong tunay na espirituwal na pailihan. Minsan ngani iyan binibilog nin bakong sangkap na mga tawo, iyan lugar nin katoninongan asin pagkamoot. Kun siring, magin regular na paraatender sa gabos na pagtiripon kaiyan asin maeksperyensiahan sa saindong sadiri an katotoohan kan mga tataramon kan salmista: “Uya! Kanigoan karahay asin kanigoan kaogma na an magturugang mag-ontok na sararo! . . . Ipinagboot ni Jehova na mamugtak an bendisyon, pati an buhay sagkod sa panahon na daing katapusan.”—Salmo 133:1, 3.