“Lalo Nang” Umatender sa mga Pagtiripon
1 An pagtorotiripon mahalagang marhay kaidto pa sa banwaan ni Jehova. An mga Israelita igwa nin templo asin mga sinagoga ninda bilang sentro para sa tunay na pagsamba, pag-edukar nin Dios, asin magayagayang asosasyon. Sa kaagid na mga dahelan an enot na mga Kristiano dai pinabayaan an pagtorotiripon. Mantang nagdadakol an mga pangigipit asin kasakitan sa delikadong mga panahon na ini, kita man nangangaipo nin espirituwal na pagpapakosog na itinatao kan satong mga pagtiripon kan kongregasyon asin “lalo nang” kaipuhan niato iyan. (Heb. 10:25) Mangnohon an tolong dahelan kun taano kita ta nag-aatender sa mga pagtiripon.
2 Para sa Asosasyon: Sinasadol kita kan Kasuratan na “padagos kamong magparangaranga asin magpakinosogkosogan.” (1 Tes. 5:11) An diosnon na asosasyon pinapano an satong isip nin nakapakokosog na mga ideya asin minomotibar kita na gumibo nin marahay na mga gibo. Alagad kun kita magsosolosolo, may tendensia kitang akoon an rungaw, paslo, o inmoral na mga ideya pa ngani.—Tal. 18:1.
3 Para sa Pagtotokdo: An Kristianong mga pagtiripon nagtatao nin nagpapadagos na programa nin pagtotokdo sa Biblia na dinisenyo na papagdanayon na buhay sa satong puso an pagkamoot nin Dios. Iyan nagtatao nin praktikal na giya sa pag-aplikar “kan gabos na sadol nin Dios.” (Gibo 20:27) Sinasanay kita kan mga pagtiripon sa abilidad nin paghuhulit asin pagtotokdo kan maogmang bareta, mga abilidad na lalo nang kaipuhan ngonyan tangani na maeksperyensiahan an dai ikaladawan na kagayagayahan nin pakanompong asin pagtabang sa mga maako kan katotoohan sa Biblia.
4 Para sa Proteksion: Sa maraot na kinaban na ini, an kongregasyon sarong tunay na espirituwal na pailihan—sarong lugar nin katoninongan asin pagkamoot. Kun kita nag-aatender sa mga pagtiripon kan kongregasyon, an banal na espiritu nin Dios may mapuersang impluwensia sa sato, na nagpapaluwas kan mga bunga na “pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.” (Gal. 5:22, 23) An mga pagtiripon pinasasarig kita na makapanindogan nin marigon asin masarig sa pagtubod. Sinasangkapan kita kaiyan na magin andam para sa maabot na mga pagbalo.
5 Paagi sa regular na pag-atender sa mga pagtiripon, naeeksperyensiahan niato an ilinadawan kan salmista, na nasusurat sa Salmo 133:1, 3: “Uya! Kanigoan karahay asin kanigoan kaogma na an magturugang mag-ontok na sararo!” Saen man naglilingkod asin nagtitiripon an banwaan nin Dios ngonyan, “dian ipinagboot ni Jehova na mamugtak an bendisyon, patin buhay sagkod sa panahon na daing sagkod.”