Taano ta Dapat na Kamotan an Saindong Kataed?
AN BUHAY na daing katapusan depende sa satong pagkamoot sa Dios asin sa kataed. Idinoon an puntong iyan sa sarong orolay na nangyari haros 2,000 na taon na an nakaagi.
Hinapot si Jesu-Cristo nin sarong Judio na madonong sa Pagboot ni Moises: “Paagi sa paggibo nin ano na ako magmamana nin buhay na daing katapusan?” Si Jesus nagsimbag: “Ano an nasusurat sa Pagboot? Ano an nababasa mo?” Sa pagkotar kan Pagboot, an lalaki nagsabi: “‘Kamotan mo si Jehova na saimong Dios sa bilog mong puso asin sa bilog mong kalag asin sa bilog mong kosog patin sa bilog mong isip,’ asin, ‘an saimong kataed siring sa saimo man sana.’” “Tama an pagkasimbag mo,” sabi ni Jesus. “Padagos mong gibohon ini asin magkakamit ka nin buhay.”—Lucas 10:25-28.
Dangan ihinapot kan naghahapot ki Jesus: “Siisay man nanggad an sakuyang kataed?” Imbes na simbagon nin direkta, inestorya ni Jesus an nag-iilustrar na kasaysayan manongod sa sarong Judio na hinabonan, hinampak, asin binayaan na naghihigagdan. Uminagi an duwang Judio—enot sarong saserdote dangan sarong Levita. Pareho ninda namasdan an kamugtakan kan kapwa ninda Judio pero daing ginibo na tabangan sia. An sumunod na uminagi sarong Samaritano. Napahiro nin pagkaherak, binolong nia an mga lugad kan eridong Judio, dinara sia sa sarong sakatan, asin binayadan an dugang pang pag-ataman sa saiya.
Hinapot ni Jesus an naghahapot sa saiya: “Siisay sa tolong ini para sa saimo an naggibo kan saiyang sadiri na kataed kan lalaki na naholog sa kamot kan mga parahabon?” Malinaw na an maheherakon na Samaritano. Kaya ipinaheling ni Jesus na an tunay na pagkamoot sa kataed bako sanang sa mga karasa.—Lucas 10:29-37.
Kadaihan nin Pagkamoot sa Kataed
Ngonyan nag-oorog an iriwal nin mga magkakalaen an rasa. Halimbawa, kasuarin pa sana an bagong mga Nazi sa Alemania ilinampog sa daga an sarong lalaki asin binatayan sia kan magagabat nindang bota, na nabari an haros gabos niang gosok. Dangan binubuan sia ninda nin arak na dakol an alkohol asin sinoloan. Sinalakay an lalaking pinabayaan na magadan huli ta sia namaluan na Judio. Sa sarong laen man na pangyayari, inaponan nin naglalaad na bomba an sarong harong na harani sa Hamburg, na nakasolo sa tolong Turco sagkod na magadan—na an saro dies anyos na babae.
Sa Balkanes asin duman pa sa sirangan, rinibong buhay an nawara sa pagraralaban nin mga rasa. May iba pang nagkagaradan sa pagraralaban nin mga may laen-laen na ginikanan sa Bangladesh, India, asin Pakistan. Asin sa Aprika, may ibang buhay na nawara sa pag-iriwal nin mga tribo asin rasa.
An kadaklan nakukubhanan sa siring na kadahasan asin nungka na magibo nin ikararaot kan saindang kataed. An totoo, kinondenar nin darakulang demonstrasyon sa Alemania an kadahasan duman huli sa rasa. Pero, an The New Encyclopædia Britannica nagsasabi: “An mga miembro nin haros gabos na kultura sa kinaban ibinibilang na mas marahay an saindang pamumuhay sa pamumuhay kan minsan haranihon na kataraed.” An siring na mga pagmansay nakaoolang sa pagkamoot sa kataed. May magigibo daw manongod digdi, nangorogna ta sinabi ni Jesus na an buhay depende sa pagkamoot sa Dios asin sa kataed?
[Picture Credit Line sa pahina 2]
Tutob: Jules Pelcog/Die Heilige Schrift
[Picture Credit Line sa pahina 3]
The Good Samaritan/The Doré Bible Illustrations/Dover Publications, Inc.