Posible an Pagkamoot sa Kataed

AN ILUSTRASYON ni Jesus manongod sa Samaritano nagpaheling kun ano an talagang kahulogan nin tunay na pagkamoot sa kataed. (Lucas 10:​25-37) Itinokdo man ni Jesus: “‘Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.’ Iyo ini an pinakadakula asin enot na togon. An ikaduwa, na arog kaini, iyo ini, ‘Kamotan mo an saimong kataed nin siring sa saimo man sana.’”​—Mateo 22:​37-39.

Kapareho nin dakol, nadedepisilan daw kamong kamotan an saindong kataed na bako nindong kapareho an rasa? Ini tibaad huli ta may nabaretaan kamo o may naeksperyensiahan mismo kamong pagpalaenlaen asin inhustisya. Kamo o an saindong mga namomotan tibaad nag-agi pa ngani sa madahas na pagtratar nin mga kabilang sa ibang grupo.

Mantang ipinaheling ni Jesus na an saro sa mga togon nin Dios kamotan niato an satong kataed, seguradong posible na mahale an siring kakosog na mga saboot. An paaging magibo iyan helingon an mga tawo kapareho kan pagheling nin Dios asin ni Cristo. Sa bagay na ini horophoropon niato an halimbawa ni Jesus asin kan enot na mga Kristiano.

An Marahay na Halimbawa ni Jesus

An mga Judio kan enot na siglo may makokosog na saboot tumang sa mga Samaritano, mga tawong nag-iistar sa sarong lugar sa pag-oltanan nin Judea asin Galilea. Sarong beses may pagduhaging hinapot si Jesus nin mga nagtutumang na Judio: “Bako daw na tama an sinasabi mi, Ika Samaritano asin igwa ka nin demonyo?” (Juan 8:48) Makosogon an saboot tumang sa mga Samaritano kaya may mga Judio na hayag na isinusumpa an mga Samaritano sa mga sinagoga asin namimibi aroaldaw na dai man logod tawan nin buhay na daing katapusan an mga Samaritano.

Daing duwa-duwa na an pakaaram sa hararomon na pagkaongis na ini iyo an nagpahiro ki Jesus na itao an ilustrasyon manongod sa Samaritano na pinatunayan na sia tunay na kataed paagi sa pag-ataman sa Judio na hinampak nin mga parahabon. Paano daw puwedeng suminimbag si Jesus kan an Judiong madonong sa Pagboot ni Moises maghapot: “Siisay man nanggad an sakuyang kataed?” (Lucas 10:29) Bueno, puwede kutanang direktang nagsimbag si Jesus sa pagsabi: ‘Kabilang sa kataed mo bako sanang an kapwa mo Judio kundi pati an ibang tawo, minsan an sarong Samaritano.’ Pero madedepisilan an mga Judio na akoon iyan. Kaya isinaysay nia an ilustrasyon manongod sa sarong Judio na nag-ako kan pagkaherak nin sarong Samaritano. Kaya natabangan ni Jesus an mga nagdadangog na Judio na makua an konklusyon na an tunay na pagkamoot sa kataed sagkod sa mga bakong Judio.

Si Jesus mayo nin saboot na tumang sa mga Samaritano. Sarong beses kan minaagi sa Samaria, nagpahingalo sia sa sarong bobon mantang nagduman sa haraning siudad an saiyang mga disipulo sa pagkua nin kakanon. Kan umabot an sarong Samaritana sa pagsakdo, sia nagsabi: “Painoma man ako.” Mantang an mga Judio daing pakilabot sa mga Samaritano, an babae naghapot: “Taano ta ika, minsan Judio, naghahagad sa sako nin inomon, mantang ako Samaritana?” Dangan nagpatotoo si Jesus sa saiya, na hayag pa nganing sinabi na sia an Mesiyas. An ginibo kan babae nagduman sa siudad asin inapod an iba na pumaduman asin maghinanyog sa saiya. An resulta? “An dakol na Samaritano sa siudad na idto nagturubod sa saiya.” Kanigoan karahay na resulta huli ta si Jesus dai nagagapos kan lakop na kaisipan kan saiyang katemporanyong mga Judio!​—Juan 4:​4-42.

An Dios Dai Nagpapalaen

Katuyohan nin Dios na si Jesus pangenot na maghulit sa mga Judio, “sa lagalag na mga karnero kan harong ni Israel.” (Mateo 15:24) Kaya, an enot niang mga parasunod may Judiong ginikanan. Pero tolo pa sanang taon pagkabubuan kan banal na espiritu kan Pentecostes 33 C.E., liniwanag ni Jehova na boot niang ipaabot kan mga nagturubod na Judio an paggibo nin mga disipulo sa mga taganasyon, an mga Hentil.

Sa kaisipan nin sarong Judio, masakit nang gayo na kamotan an sarong Samaritano nin siring sa saiya man sana. Orog pang magigin masakit na magpaheling nin pagkamoot sa kataed sa mga Hentil na dai tinuri, mga tawong mas daing pakiaram sa mga Judio kisa mga Samaritano. Sa pagkomento sa kaisipan nin mga Judio sa mga Hentil, an The International Standard Bible Encyclopaedia nagsasabi: “Nanonompongan niato, sa mga panahon kan B[agong] T[ipan], an pinakagrabeng paghabo, pagtuya asin pagkaongis. Sinda [an mga Hentil] ibinilang na maramog, na sa sainda salang magkaigwa nin ano man na makikatood na relasyon. Sinda an mga kaiwal nin Dios asin kan Saiyang banwaan, na dai tinawan kan kaaraman sa Dios apuwera sana kun sinda nagigin mga proselito, asin maski siring sinda dai puwede, arog kan suanoy na mga panahon, na akoon na biyong kabilang. An mga Judio pinangaladan na maghatol sa sainda, asin kun sinda maghapot manongod sa mga bagay may koneksion sa Dios sinda dapat na isumpa.”

Mantang dakol an igwa kan mga opinyon na ini, ipinaheling ni Jehova ki apostol Pedro an sarong bisyon na dian sinabihan siang ‘dai na pag-apodon na maramog an mga lininig na nin Dios.’ Dangan pinaduman sia nin Dios sa harong kan Hentil na si Cornelio. Si Pedro nagpatotoo manongod ki Cristo ki Cornelio, sa saiyang pamilya, asin sa ibang Hentil. “Sa katotoohan,” sabi ni Pedro, “ako nakakaisi na an Dios dai nagpapalaen, kundi sa lambang nasyon an tawo na natatakot sa saiya asin naggigibo nin katanosan saiyang inaako.” Mantang naghuhulit pa si Pedro, an banal na espiritu nagdatong sa bagong mga nagturubod, na nagkabarautismohan asin nagin an enot na Hentil na mga parasunod ni Cristo.​—Gibo, kapitulo 10.

Inako nin Judiong mga parasunod an pangyayaring ini, sa pakaaram na an pagboot ni Jesus na “gumibo kamo nin mga disipulo sa mga tawo kan gabos na nasyon” bako sanang sa mga Judio sa gabos na kadagaan kundi pati sa mga Hentil. (Mateo 28:​19, 20; Gibo 11:​18) Hinale an ano man na tibaad saboot ninda tumang sa mga Hentil, maigot nindang inorganisar an kampanya sa paghuhulit sa paggibo nin mga disipulo sa mga nasyon. Pakalihis nin mayo pang 30 taon, masasabi na an maogmang bareta ikinahulit na “sa gabos na linalang sa sirong nin langit.”​—Colosas 1:23.

Nangengenot sa paghuhulit na ini si apostol Pablo, na mismo sarong Kristiano na may Judiong ginikanan. Bago nagin parasunod ni Cristo, sia dating maigot na miembro kan relihiyosong sekta kan mga Fariseo. Minimenus ninda bako sanang an mga Hentil kundi pati an ordinaryong mga tawo sa sadiri nindang nasyonalidad. (Lucas 18:​11, 12) Pero dai itinogot ni Pablo na an mga opinyon na iyan makapogol sa saiya sa pagpaheling nin sa kataed na pagkamoot sa iba. Imbes, sia nagin “apostol sa mga nasyon [Hentil],” na idinusay an saiyang buhay sa paggibo nin mga disipulo sa gabos na kadagaan sa Mediterraneo.​—Roma 11:13.

Sa panahon kan saiyang ministeryo, si Pablo pinaggapo, hinampak, asin ibinilanggo. (Gibo 14:​19; 16:​22, 23) An siring daw na masakit na mga inagihan nagin dahelan na pumait an saiyang boot asin isipon na sinasayang nia an saiyang panahon sa nagkapirang nasyon asin rasa? Dai man. Aram nia na may mga tawong sadiosan an puso na wararak sa dakol na rasa kan saiyang kaaldawan.

Kan si Pablo makanompong nin mga Hentil na boot na tokdoan kan mga dalan nin Dios, namotan nia sinda. Halimbawa, sa mga taga-Tesalonica sia nagsurat: “Kami nagin maboot sa tahaw nindo, arog kan pagmamahal nin nagpapasusong ina sa saiyang mga aki. Kaya, huli sa pagkaigwa nin pagkamoot sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta kamo nagin mahal sa samo.” (1 Tesalonica 2:​7, 8) An odok sa pusong mga tataramon na ini nagpapaheling na tunay na namotan ni Pablo an Hentil na mga taga-Tesalonica asin dai tinogotan an ano man na raoton an kagayagayahan gikan sa marahay na relasyon sa sainda.

Ginigibo an Pagkamoot sa Kataed

Ngonyan, kapareho kaidtong enot na siglo, an mga minaayon sa Kristianong kongregasyon nagpapatalubo nin pagkamoot sa kataed para sa mga tawo kan gabos na rasa. Paagi sa pagpatalubo sa diosnon na pagmansay sa iba asin sa paghiras sa sainda kan maogmang bareta kan Kahadean, pinahiwas nin tunay na mga Kristiano an pakasabot ninda sa mga tawo na tibaad nungka kutana nindang namidbid. Igwa pa ngani sinda nin sa tugang na pagkamoot para sa sainda. (Juan 13:​34, 35) Ini puwede man na magin eksperyensia nindo.

An siring na pagkamoot yaon sa tahaw kan mga Saksi ni Jehova, minsan sinda nasa 229 kadagaan asin nagrerepresentar sa “gabos na nasyon asin tribo asin banwaan patin tataramon.” (Kapahayagan 7:9) Bilang panglobong asosasyon nin magturugang, sararo sinda sa pagsamba ki Jehova, sa pagsayuma ninda na makikabtang sa mga iriwal asin pagriribal nin rasa, asin sa pagsikwal ninda sa mga daing binabasaran na pagkaanggot na nakahahale kan mainit na relasyon nin mga tawo sa kapwa tawo.

Makiasosyar sa mga Saksi, asin mamamasdan nindo kun paano an mga tawo hale sa gabos na rasa nag-ootob sa kabotan nin Dios. Maheheling nindo na ginigibo an pagkamoot sa kataed mantang ibinabalangibog ninda an maogmang bareta kan Kahadean nin Dios. Iyo, asin sa saindang mga kongregasyon, makanonompong kamo nin maboot, sinserong mga tawo na ipinaheheling paagi sa saindang pamumuhay na tunay na nakanood sindang kamotan an saindang kataed.

[Ritrato sa pahina 6]

Sa mga kongregasyon nin mga Saksi ni Jehova, makanonompong kamo nin maogmang mga tawo hale sa gabos na rasa

[Picture Credit Line sa pahina 4]

Arrival of the Good Samaritan at the Inn/The Doré Bible Illustrations/Dover Publications, Inc.