An Problema sa Pakanood na Maghalat

AN PAKANOOD na maghalat sa mga bagay na gusto niato seguro saro sa pinakamasakit na leksion na hinagad sa satong mga tawo na akoon. An saradit na aki natural na daing pasensia. Ano man an makaapod sa saindang atension, gusto ninda, asin gusto ninda tolos! Alagad siring sa tibaad naaaraman nindo gikan sa kabatidan, sarong katotoohan sa buhay na bakong gabos makukua tolos. Minsan sa tama man na mga kamawotan, kaipuhan kitang makanood na maghalat sa tamang panahon na mapanigoan iyan. An dakol nanonodan an leksion na ini; an iba noarin man dai.

An mga tawong boot na magkamit kan pag-oyon nin Dios may partikular na mga dahelan na makanood na maghalat. Ini idinoon ni Jeremias, sarong lingkod ni Jehova bago kan panahon nin mga Kristiano: “Marahay na an saro maghalat, na dai naggigirong, para sa pagliligtas ni Jehova.” Dangan, an Kristianong disipulong si Santiago nagsabi: “Kaya magin mapasensia kamo, mga tugang, sagkod sa presensia kan Kagurangnan.”​—Lamentacion 3:​26; Santiago 5:7.

Si Jehova may sadiring iskedyul sa pagtapos sa banal na mga katuyohan. Kun dai kita makahalat sagkod sa saiyang itinalaan na panahon sa paggibo sa nagkapirang bagay, kita magigin dai naninigoan asin diskontento, na makapopogol sa kagayagayahan. Kun mayo nin kagayagayahan an lingkod nin Dios magigin maluya sa espirituwal, arog kan sabi ni Nehemias sa saiyang mga kahimanwa: “An kagayagayahan sa KAGURANGNAN iyo an saindong kakosogan.”​—Nehemias 8:​10, The New English Bible.

An Kadonongan sa Pakanood na Maghalat

Natural na kamawotan na an mga mayong agom magmawot na mag-agom o an mga mag-agom na mayong aki magmawot na magpamilya. Dugang pa, mayo man nin sala sa pagmawot niato na panigoan an tama man na materyal na mga pangangaipo o kamawotan. Minsan siring, huli sa pagtubod na bilang na an mga aldaw kan palakaw na ini nin mga bagay asin na sa maabot na bagong palakaw an Dios ‘bibikladon an saiyang kamot asin paninigoan an mawot nin lambang bagay na may buhay,’ dakol na Kristiano an nagdesisyon na maghalat na otobon an iba sa mga kamawotan na ini sa mas angay na panahon.​—Salmo 145:16.

Pero an mga tawo na mayo kan marigon an pasisikadan na Kristianong paglaom na ini dai nin maheheling na dahelan sa pagdigson. Kulang nin pagtubod ki Jehova, na ginigikanan kan “lambang marahay na balaog asin lambang sangkap na regalo,” pinagdududahan ninda an kadonongan nin pagdigson sa mga bagay para sa maabot na panahon na duda sinda kun baga maabot pa. An sinusunod ninda sa buhay: “Magkarakan asin mag-irinom kita, huli ta sa aga magagadan kita.”​—Santiago 1:17; 1 Corinto 15:32; Isaias 22:13.

Sa mayayaman na nasyon inaaprobetsaran kan kinaban nin pag-anunsio an dai mamamaluan na tendensia sa biglang pagpanigo. An mga tawo sinasadol na sunodsunodon an sadiri. Pinatutubod kita nin komersio na an modernong mga kasangkapan asin luho kaipuhan nanggad. Taano ta magtitios na mayo, an pangangatanosan, nangorogna kun ginigibong posible nin mga credit card, mensuwalan, asin areglong “bumakal ngonyan​—saka na sana bayadan” na kamtan iyan gabos asin kamtan iyan ngonyan? Apuwera kaiyan, ‘Maninigo kang magkamit kan pinakamarahay; magmaboot ka sa saimong sadiri! Girumdoma, magsalang kamtan mo na iyan ngonyan o tibaad nungka!’ Iyan an sabi nin popular na mga sarabihon.

Mientras tanto, manampulong milyon katawo sa mga nasyon na nagtitios an igwa sana kan igo tanganing minsan paano mabuhay​—o kulang pa ngani. Igwa daw nin orog pang makapaheheling kan diperensia asin inhustisya nin politikal asin ekonomikong mga palakaw nin tawo?

An kadonongan sa pakanood na maghalat maririsa sa bagay na an minilyon na habo​—o mayong naheheling na dahelan na gibohon iyan—​nagkautang nin dakol tanganing mapanigoan tolos-tolos an mga mawot. An dai linalaoman na mga pangyayari, arog baga nin helang o pagkawara nin trabaho, puwedeng mangahulogan nin kalamidad. Ipinaliliwanag kan diaryong Aleman na Frankfurter Allgemeine Zeitung kun taano ta may ibinaretang sarong milyon katawo sa Alemania na nawaran nin harong: “Sa kadaklan, an kadaihan nin harong sa parate minasunod sa kadaihan nin trabaho o sobra kadakol na utang.”

Dai na kayang bayadan an saindang mga utang, an dakol sa daing palad na mga tawong iyan makamomondong nawawaran pareho nin harong asin mga rogaring. Parateng marhay, an naggrabeng problema nagdadara nin tension sa pamilya. Nagpopoon na magkaburulag an mga pag-inagoman na bakong marigon. Nagigin uso an mga atake nin depresyon asin iba pang problema sa salud. Para sa mga Kristiano, puwedeng lumuya an espirituwalidad, na nagdadara man sa salang kaisipan asin gawe. An mga tawo na sa kapinonan mangmang na nagmawot kan gabos sa huri nawawaran kan gabos.

Para sa Dakol, Sarong Bagong Angat

Lininaw ni Jesus na maninigo kitang magmaan ta tibaad ‘an mga kahaditan sa palakaw na ini nin mga bagay asin an mapandayang kapangyarihan nin kayamanan patin an mga pagmawot sa iba pang bagay lumaog asin lamoson an tataramon.’ (Marcos 4:19) Maninigo niatong girumdomon na mayo nin politikal na palakaw na nakahale sa mga kahaditan, pati an sa kabuhayan, na sinabi ni Jesus.

An Komunismo na hinaboan na ngonyan kan mga nasyon sa Sirangan na Europa nagprobar na pagpantaypantayon an mga bagay paagi sa ekonomiya na kontrolado kan Estado. Kabaliktaran sa palakaw na libreng pagnenegosyo, an dating palakaw nagtao sa mga tawo duman sa kadagaan na idto nin kadikit na katiwasayan sa ekonomiya na sa parate dai ikinatatao kan kapitalismo. Pero, an mga kahaditan na sinabi ni Jesus yaon sa porma nin mga kakulangan sa mga barakalon asin paglimitar sa personal na libertad.

Sa presente, an dakol sa mga nasyon na iyan nag-iintrodusir nin mga ekonomiyang may komersio, sa siring tinatawan nin bagong angat an saindang mga siudadano. Sabi nin bago pa sanang bareta: “An pagkainosente may kapadis na pagmawot na maabot sa madali an pamantayan sa pamamakal sa solnopan.” Tanganing magibo ini “an nagdadakol na tawo sa bagong Länder sa sirangan na Alemania inaanod pasiring sa ariporos nin pagkakautang.” Idinugang pa kan bareta: “Pakalihis kan masiram na pagmate kan enot huli sa bagong libertad sa ekonomiya naglalakop ngonyan an takot asin pagkadesesperar.” Yaon pa man giraray an mga kahaditan, pero ngonyan iyan may sulot nang kapitalistikong gubing.

An orog na mga libertad sa politika asin ekonomiya nagbukas nin bagong mga posibilidad sa pag-asenso sa ekonomiya. Kaya, an dakol tibaad masugotan na horophoropon nin seryoso an ideya na ponan an sadiri nindang negosyo o bumalyo sa ibang nasyon na mas marahay an mga oportunidad sa trabaho.

Personal na bagay an mga desisyon na arog kaini. Bakong sala sa Kristiano na magmawot na pakarhayon an saiyang kamugtakan sa pagbuhay. Tibaad pinahihiro sia kan kamawotan na atamanon an saiyang pamilya, ta aram nia na “kun an siisay man dai nag-aataman sa mga sadiri nia, asin orog na sa mga miembro kan saiyang harong, sia nagpainda kan pagtubod asin orog pa karaot sa tawong dai nin pagtubod.”​—1 Timoteo 5:8.

Kun siring, bakong maninigo na tatsaran an desisyon nin iba. Kadungan kaiyan, maninigong girumdomon nin mga Kristiano na bakong madonong an paghingoang makaginhawa sa pagbuhay paagi sa pagkakautang nin sobra na puwedeng makasiod sa sainda. Sala man na maghingoang makaginhawa sa pagbuhay sa paagi na kalabot an pagpabaya sa espirituwal na mga obligasyon asin interes.

Pakanood sa Iba

Kan mga taon pakalihis kan Guerra Mundial II, rinibong Aleman an nagbalyo hale sa ginaba nin guerrang Europa pasiring sa ibang nasyon, partikularmente sa Australia asin Canada. Paagi kaiyan an dakol naparahay an saindang pagbuhay, pero mayo sa sainda na biyong nakaligtas sa ekonomikong mga kahaditan na sinabi ni Jesus. An pagresolber sa mga problema sa ekonomiya kun beses nagbubunga nin bagong mga problema​—kapungawan, ibang lenguahe, pagtood sa bagong mga pagkakan, laen man na mga kostumbre, pakikibagay sa bagong mga amigo, o pag-atubang sa laen man na mga kaisipan.

An iba sa mga dayong ini mga Saksi ni Jehova. Sa ikaoomaw ninda, an kadaklan sa sainda nagsayumang togotan na gadanon an saindang espirituwalidad kan mga problema na kalabot sa pagdayo. Alagad may mga napalaen. An iba nabiktima kan mapandayang kapangyarihan nin kayamanan. An saindang teokratikong pag-oswag dai nakadungan sa pagrahay kan pagbuhay ninda.

Tunay na ipinag-iilustrar kaini an kadonongan sa maingat na pag-analisar kan satong kamugtakan bago gumibo nin mga desisyon na tibaad bakong madonong. Papanluluyahon kita nin materyalistikong mga tendensia sa dai na maootrong gibohon na paggibo nin mga disipulo na isinugo sa mga Kristiano. Totoo ini saen man kita nag-iistar, ta mayo nin nasyon na an mga siudadano mayo nin mga kahaditan sa pagbuhay.

Pakikilaban kan Marahay na Pakilaban

Sinadol ni Pablo si Timoteo: “Sunodon mo an katanosan, diosnon na debosyon, pagtubod, pagkamoot, pakatagal, kahoyoan nin boot. Makipaglaban ka kan marahay na pakilaban nin pagtubod, mangapot ka nin marigon sa buhay na daing sagkod na huli kaiyan ika inapod.” Sa mga Kristianong taga-Corinto sia nagsabi: “Magin kamong marigon, dai natatanyog, na danay na dakol an gigibohon sa gibohon kan Kagurangnan.”​—1 Timoteo 6:​11, 12; 1 Corinto 15:58.

An pagkuyog sa marahay na hatol na ini iyo an pinakamarahay na paagi na mapaglabanan an materyalismo, asin tunay na kadakol kan gigibohon nin Kristiano! Sa ibang nasyon na bakong dakol an mga parahulit kan Kahadean, kadakol an limitado sana an pakadangog kan katotoohan. Eksakto an pagkahula ni Jesus: “An anihon mahiwas, alagad an mga paraani kakadikit.”​—Mateo 9:37.

Imbes na togotan na an mga kahaditan sa pagbuhay sa mga nasyon na ini makapasuki sa sainda sa espirituwal na gibohon, inaaprobetsaran kan mga Saksi ni Jehova an situwasyon paagi sa lubos na paggamit sa presenteng mga oportunidad. Kun temporaryong nawawaran nin trabaho, an dakol sa sainda dinudugangan an saindang paghuhulit. An saindang paglilingkod, apuwera sa pagpakosog sa kurahaw nin pag-omaw ki Jehova, nagtatao sainda kan kagayagayahan na kaipuhan tanganing maatubang an saindang mga problema sa pagbuhay.

Ipinaoorog kan mga Saksing ini an gibong paghuhulit asin segunda sana an mga kasakitan sa pagbuhay, na nagpapaheling sa pankinaban na asosasyon nin magturugang na sinda lubos na nananarig ki Jehova na atamanon sinda. An panuga nia: “Kaya padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.”​—Mateo 6:33.

Poon kan ibalik an tunay na pagsamba kan 1919, dai pinabayaan ni Jehova na mapukan an saiyang banwaan. Tinawan nia sinda nin proteksion sa grabeng paglamag asin sa dakol na taon na hilom na aktibidad sa nagkapirang lugar. Determinado an mga Saksi ni Jehova na an dai nahimo kan Diablo paagi sa paglamag, dai nia mahimo paagi sa mas tusong siod nin materyalismo!

Pakanood na Maghalat sa Gabos na Bagay

An mahihiwas na Kingdom Hall, mamahalon na kasangkapan sa sound, mga Assembly Hall, asin magagayon na erokan na Bethel nagtatao nin kamurawayan sa Dios asin nin silensiong patotoo na saiyang binibendisyonan an saiyang banwaan. An mga Saksi ni Jehova sa mga nasyon na haloy na prohibido an gibohon tibaad maghona na sa bagay na ini kadakol pa kan dapat nindang gibohon tanganing makapantay sa ibang nasyon. Alagad an pinakamahalaga iyo na sinda danay na nag-ooswag sa espirituwal. Masunod sa igong panahon an hayag na mga tanda kan bendisyon nin Dios sa materyal na paagi.

An nagdusay na mga lingkod ni Jehova kaipuhan na magbantay ta tibaad, huli sa paghanap nin personal na mga interes, magpoon sindang maghona na igo na an lawig kan pagtios nindang mayo nin pirang materyal na bagay. Natural sana an pagmawot na makaginhawa sa dai pagkakaparantay sa ekonomiko asin sosyal na paagi, pero dai linilingawan kan banwaan ni Jehova na an gabos na lingkod nin Dios nagmamawot na makaginhawa. An buta nagmamawot na makaheling liwat, an dai nahahalean nin helang nagmamawot na makabalik an bagsik, an may depresyon nagmamawot nin maaliwalas na punto-de-vista, asin an mga nagadanan nagmamawot na maheling liwat an saindang gadan na mga namomotan.

Huli sa mga kamugtakan, an kada Kristiano napipiritan na maghalat sa bagong kinaban ni Jehova tanganing maresolberan an saiyang mga problema. Ini maninigong magpahiro sato na hapoton an satong sadiri, ‘Kun igwa na ako nin kakanon asin gubing, bako daw na ako maninigo nang makontento sa mga bagay na ini asin magustong maghalat na makaginhawa sa mga problema sa pagbuhay?’​—1 Timoteo 6:8.

An mga Kristiano na lubos na nananarig ki Jehova makalalaom na kun sinda andam sana na maghalat, an gabos nindang tamang kamawotan asin pangangaipo madali nang mapaninigoan. Mayo nin maghahalat na basang sana. Inootro niato an mga tataramon ni Pablo: “Magin kamong marigon, dai natatanyog, na danay na dakol an gigibohon sa gibohon kan Kagurangnan, sa pakaaram na an saindong pagpapagal bakong daing kapakanan dian sa Kagurangnan.”​—1 Corinto 15:58.

Kaya maninigo daw na magin dakulang problema an pakanood na maghalat?

[Ritrato sa pahina 10]

An pakanood na maghalat puwedeng magligtas kan saindong buhay