Posible Daw an Patas na Sistema nin Ekonomiya?
Sa lain-lain na nasyon, nagpoprotesta sa mga tinampo an mga tawo huling para sa sainda bakong patas an mga kamugtakan sa ekonomiya. Mas naglala pa an mga problema dahil sa COVID-19 na pandemya, na nagresulta sa pagkaigwa nin mga kariribukan huling mas nahiling kan mga tawo an dakulang pagkakaiba kan mayaman saka pobre dahil sa mga lockdown, kakulangan nin mga suplay, asin limitadong serbisyo sa pagpabulong.
Matatapos pa daw an mga problema sa ekonomiya na nagpapasakit na marhay sa mga tawo? Iyo. Sinasabi kan Bibliya kun ano an gigibuhon nin Diyos para resolberan an mga problemang inaatubang ta.
Mga problema sa ekonomiya na reresolberan nin Diyos
Problema: Dai nakagibo an mga tawo nin sarong sistema nin ekonomiya na nakakatao kan mga pangangaipo kan gabos na tawo.
Solusyon: An mga gobyerno nin tawo sasalidahan nin Diyos kan sadiri niyang gobyerno, an Kahadian nin Diyos. Hali sa langit, mamamahala iyan sa enterong daga.—Daniel 2:44; Mateo 6:10.
Resulta: Huling an Kahadian na nin Diyos an mamamahala sa bilog na daga, perpekto kaining mapapamahalaan an bilog na daga. Dai na nuarin man maeeksperyensiyahan kan mga tawo an pagtios o paghadit manungod sa mga pangangaipo ninda sa buhay. (Salmo 9:7-9, 18) Imbes, ikakaugma ninda an mga resulta kan saindang pagpapagal asin magkakaigwa sinda nin kapaki-pakinabang asin nakakakontentong buhay kaiba kan saindang pamilya. Nanunuga an Bibliya: “Matugdok sinda nin mga harong asin maistar sa mga iyan, asin magibo sinda nin mga ubasan asin kakakanon an bunga kan mga iyan. Dai sinda matugdok na iba an maistar, ni matanom sinda na iba an makakan.”—Isaias 65:21, 22.
Problema: Parte na kan buhay nin tawo an pagsakit asin katikapuhan.
Solusyon: Paagi sa saiyang Kahadian, hahalion nin Diyos an gabos na kawsa nin pagkatakot asin paghadit.
Resulta: Sa pangangataman nin Diyos, dai na maeeksperyensiyahan nin tawo an mga pangyayaring nagigin dahilan na mawara sa sainda o sa saindang pamilya an mga kinakaipuhan ninda sa buhay. Halimbawa, dai na magkakaigwa nin mga giyera, kakulangan nin kakanon, asin pandemya. (Salmo 46:9; 72:16; Isaias 33:24) Sinabi nin Diyos: “Maistar an sakong banwaan sa sarong matuninong na permanenteng lugar, sa ligtas na mga istaran asin sa trangkilong mga irukan.”—Isaias 32:18.
Problema: An mga tawo sa parati inaaprobetsaran kan mga makasadiri asin mahanab.
Solusyon: An mga sakop kan Kahadian nin Diyos makakanuod na magpahiling nin tunay na pagkamuot asin inuton an kapakanan kan iba.—Mateo 22:37-39.
Resulta: Sa pamamahala kan Kahadian nin Diyos, an gabos mapahiling nin diyosnon na pagkamuot, na “dai nag-iisip kan sadiri sanang kapakanan.” (1 Corinto 13:4, 5) Sinasabi kan Bibliya: “Dai sinda mandadanyar o mangraraot sa bilog kong banal na bukid, huling an daga mapapano nanggad kan kaaraman manungod ki Jehovaa kun paanong tinatakluban nin tubig an dagat.”—Isaias 11:9.
Ipinapahiling kan Bibliya na nabubuhay na kita sa huring mga aldaw kan sistemang ini nin mga bagay asin na sa dai na mahahaloy uutubon nin Diyos an saiyang panuga na halion an gabos na problema sa ekonomiya.b (Salmo 12:5) Mantang dai pa iyan nangyayari, makakatabang sa saimo an mga prinsipyo sa Bibliya para makayanan an mga problema sa ekonomiya na inaatubang mo ngunyan. Halimbawa, hilingon an mga artikulong “Paano Ka Makakapag-adjust Kapag Nabawasan ang Iyong Kita?” asin “Balanseng Pananaw sa Pera.”
a Jehova an pangaran nin Diyos uyon sa Bibliya.—Salmo 83:18.
b Para maaraman kun taano ta makakapagtiwala ka sa Bibliya, hilingon an artikulong “An Bibliya—Sarong Masasarigan na Gikanan nin Katotoohan.”