Dai Na Mahahaloy, Mayo Nang Dukha!

“DAI kamo matakot, huli ta, uya! ipinahahayag ko sa saindo an maogmang bareta nin dakulang kagayagayahan na kakamtan nin gabos na tawo.” (Lucas 2:10) An nakaoogmang mga tataramon na ini nadangog kan namungnan na mga pastor harani sa Betlehem kan bangging mamundag si Jesus. Kaoyon sa kapahayagan na iyan, idinoon na marhay ni Jesus an “maogmang bareta” durante kan saiyang ministeryo digdi sa daga. Ngonyan, na kita minadependeng marhay sa kuwarta tanganing asikasohon an satong mga pangangaipo, paano kita makikinabang sa maogmang bareta manongod ki Jesus?

Ipinahayag ni Jesu-Cristo an “maogmang bareta sa mga dukha.” (Lucas 4:18) Sono sa Mateo 9:​35, “Si Jesus naglibot sa gabos na siudad asin baryo, na nagtotokdo sa saindang mga sinagoga asin naghuhulit kan maogmang bareta kan kahadean.” An saiyang mensahe nangorognang nakakapakosog sa mga dukha. “Kan maheling nia an kadaklan naherak sia sainda, huli ta sinda naanitan asin nagkakaralagalag siring sa mga karnero na mayong pastor.” (Mateo 9:36) Totoo, si Jesus nagsabi, “An mga dukha perming kaiba nindo,” pero dai kita maninigong magkonklusyon gikan sa mga tataramon na ini na mayo na nin paglaom para sa mga nagtitios. (Juan 12:8) Sagkod na nagdadanay an maraot na palakaw na ini, magkakaigwa nin mga dukha, ano man an dahelan kan saindang makaheherak na kamugtakan. Dai iniignoro kan Tataramon nin Dios an katunayan nin kadukhaan, alagad dai iyan nin dakol na sinasabi dapit sa negatibong mga kabtang kaiyan. Imbes, nag-aalok iyan nin tabang sa dukha na mapangganahan an mga kahaditan sa buhay.

Tabang Para sa mga Dukha

Partikularmente, may nagsabi: “Mayo nin mas dakulang pagabat na puwedeng pasanon nin sarong indibiduwal kisa an maaraman na mayo ni saro na nagmamakolog o nakakasabot.” Minsan siring, apesar kan kadaihan nin pagdamay kan mayoriya, igwa pang maogmang bareta para sa mga dukha​—kapwa para sa presente asin sa ngapit.

Makamomondo, an dakol dikit an interes sa pagtabang sa mga dukha. Sono sa The World Book Encyclopedia, an iba naniniwala na “an mga tawo sa sosyedad nagdidinaogan tanganing mabuhay asin . . . an mas matibay na mga indibiduwal nagigin makapangyarihan asin mayaman.” An mga naniniwala sa teoriyang ini, na inaapod na sosyal na Darwinismo, tibaad an pagheling sa mga dukha hugakon sanang mga tawo o mga gastador. Pero, an mga trabahador sa mga baryo, mga trabahador na buminalyo sa ibang lugar, asin iba pa, minsan ngani hababa an suweldo, parateng nagkakayod na marhay tanganing pakakanon an saindang pamilya.

Sa dakol na kadagaan lakop nanggad an kadukhaan. Kaya, an mga dukha​—an mayoriya—​dai nakakamate na sinda bakong mapanggana. Minsan siring, sa mga kadagaan na iyan igwa nin mga tawo na namumuhay sa labi-labing luho sa tahaw kan kadukhaan. Igwa nin komportable, labi-labi kamahal na mga harong karaya nin surusuan, maating mga barongbarong. An halangkaw an suweldong mga tawo nagmamaneho kan saindang mamahalon na mga kotse sa mga tinampo na surusuan an mga nagtitios asin daing trabaho. Sa siring na mga kadagaan makolog na namamatean kan mga dukha an saindang makaheherak na kamugtakan. Tunay nanggad, “an mga dukha nagsasakit bako sanang huli sa maluyang nutrisyon, raot na mga harong, asin kulang na medikal na pag-ataman, kundi siring man huli sa danay na paghadit manongod sa saindang kamugtakan,” an sabi kan The World Book Encyclopedia. “Dai nakakakua nin asin nagdadanay sa marahay na trabaho, nawawaran sinda kan gabos na pakamate nin dignidad asin paggalang sa sadiri.” Kaya, paano an iba na dukhang marhay nakakapanggana sa saindang situwasyon? Ano an koneksion kan maogmang bareta manongod ki Jesus sa pakapanggana?

Enot, girumdomon na an kadukhaan puwedeng pagrabehon nin bakong madonong na mga bisyo. Horophoropa an pirang halimbawa. Inaako ni Valdecir na minsan ngani an saiyang agom asin saradit na aki, sa Brazil, dikit an kinakakan, nagsayang sia nin kuwarta sa pagpapadagos sa inmoral na estilo nin buhay. Sia nagsabi: “Minsan ngani may trabaho, nungka akong may kuwarta pero permi akong may laen-laen na tiket sa loteriya sa sakong bulsa.” Si Milton, huli sa labi-labing pag-inom asin pagsigarilyo, nalugi sa negosyo na may 23 na empleyado. Sia nagsabi: “Nagtotorog ako kun banggi sa tinampo, na dai nakakapuli sa harong, asin an sakong pamilya nagtios na marhay huli sa sako.”

Sinayang man ni João an saiyang suweldo sa mga bisyo. “Dai ako nagtotorog sa harong. An gabos kong ginaganar kulang pa sa sakong mga bisyo asin pambababae. Nagin masakit an situwasyon, asin gusto nang makipagbulag an sakong agom.” Apuwera sa saiyang mga problema sa pinansial asin sa agom, igwa nin iba pang problema. Sia nagsabi: “Nagcausa ako nin mga problema sa sakong mga paryentes asin kataraed, asin nangorognang nagkaproblema ako sa sakong trabaho. Bilang resulta, parate akong daing trabaho.” Si Julio dating adikto sa droga. Alagad, sia nagpaliwanag: “Huli ta nungkang nagkanigo an sakong suweldo tanganing sustentohan an sakong bisyo sa droga, nagpoon akong magtrabaho bilang parapabakal nin narkotiko tanganing dai na ako kaipuhan na bumakal nin droga.”

Nagdakula sa sarong dukhang pamilya na may walong aki, gusto ni Jose na magkaigwa man nin sadiri. Naghohona na mayo man nin mawawara sa saiya, pinonan niang maghabon sa mga tawo kaiba an iba pang hobenes. Sa pagkadesesperar, saro pang hoben an nagin miembro nin sarong gang na inaapod na Headbangers (sa Bicol, “Mga Parapukpok sa Payo”). Sia nagpaliwanag: “Mantang an kadaklan sa samo dukhang marhay, nakamate kami nin satispaksion sa pagpasa nin mga bagay asin pagsalakay sa mga tawo.”

Pero, ngonyan an mga lalaking ini asin an saindang pamilya mayo nang grabeng kakulangan sa ikabubuhay o mga pagmate nin kapaitan asin paghinanakit. Bako na sindang daing maginibo o daing paglaom. Taano ta bako? Huli ta pinag-adalan ninda an maogmang bareta na ihinulit ni Jesus. Iinaplikar ninda an hatol kan Biblia asin nakiasosyar sa kapareho ninda an kaisipan na mga indibiduwal sa mga kongregasyon kan mga Saksi ni Jehova. Asin may nanodan sinda na mahahalagang marhay manongod sa kayamanan asin kadukhaan.

Tabang Tanganing Mapangganahan an Kadukhaan

Enot, nanodan ninda na kun iinaaplikar an mga prinsipyo sa Biblia, puwedeng mainaan an maraot na mga epekto nin kadukhaan. Kinokondenar kan Biblia an inmoralidad, pagburat, pagsugal, asin pag-abuso sa droga. (1 Corinto 6:​9, 10) Magastos an siring na mga bagay. Puwedeng gibohon kaiyan na dukha an mayaman, asin mas dukha an dukha. An pagbaya sa mga bisyong ini asin iba pang kaagid kaiyan dakula an nagigibo na mapakarhay an kamugtakan sa pagbuhay nin sarong pamilya.

Ikaduwa, naaraman ninda na igwa nin mas mahalagang mga bagay sa buhay kisa kayamanan. An timbang na pagmansay ipinahahayag sa ipinasabong na mga tataramon na ini: “An kadonongan para sa proteksion kun paanong an kuwarta para sa proteksion; alagad an bentaha nin kaaraman iyo na an kadonongan mismo nagpapadanay na buhay sa mga nakasasadiri kaiyan.” (Eclesiastes 7:12) Iyo, kaipuhan an kuwarta. Alagad an kadonongan na basado sa Biblia asin an kaaraman dapit sa mga katuyohan nin Dios orog na kapakipakinabang. Tunay nanggad, sa saro na mayo nin kadonongan, an pagkaigwa nin dakolon na kuwarta puwedeng magin problema arog kan pagkaigwa nin kakadikit. An kagsurat kan Biblia madonong na namibi: “Dai mo ako pagtawan nin kadukhaan ni kayamanan. Ipakakan mo sa sakuya an kakanon na maninigo sa sako, ta nama ako mabasog asin nigaran taka patin magsabi: ‘Siisay man si Jehova?’ asin dai ako magin dukha asin maghabon ako patin magduhagi sa ngaran kan sakuyang Dios.”​—Talinhaga 30:​8, 9.

Ikatolo, nadiskobre ninda na kun an saro namumuhay sono sa maogmang bareta na ihinulit ni Jesus, dai sia noarin man kaipuhan na makamateng pinabayaan. Kalabot sa maogmang bareta an Kahadean nin Dios. An mensahe inaapod na “maogmang bareta kan kahadean,” asin sa satong aldaw iyan ihinuhulit sa bilog na ineerokan na daga. (Mateo 24:14) Sinabihan kita ni Jesus na kita susuportaran kun ibubugtak ta an satong paglaom sa Kahadean na iyan. Sia nagsabi: “Kaya padagos na hanapon nguna an kahadean asin an . . . katanosan [nin Dios], asin ini gabos na ibang bagay idadagdag na sana sa saindo.” (Mateo 6:33) An Dios dai nanunuga nin magayonon na mga kotse o maluhong mga harong. Si Jesus nagtataram dapit sa mga kinakaipuhan sa buhay, mga bagay na arog kan kakanon asin gubing. (Mateo 6:31) Alagad minilyon ngonyan an puwedeng magpatunay na an panuga ni Jesus mapapanarigan. An sarong indibiduwal, dawa dukhang marhay na indibiduwal, dai biyong pinababayaan kun ineenot nia an Kahadean.

Ikaapat, nanompongan ninda na an saro na ineenot an Kahadean nin Dios dai nakamamate nin kapaitan sa boot huli sa kasakitan sa pagbuhay. Iyo, an sarong dukha dapat na magtrabaho nin maigot. Pero kun sia naglilingkod sa Dios, igwa sia nin pano nin onrang relasyon sa saiyang Kaglalang, na dapit sa saiya an Biblia nagsasabi: “Dai nia dinuhagi ni ikinaongis an kasakitan kan nagsasakit; asin dai nia sa saiya itinago an saiyang lalauogon, asin dinangog nia kan sia nagkurahaw sa saiya para sa tabang.” (Salmo 22:24) Dugang pa, an sarong dukha igwa nin tabang sa pagpanggana sa mga problema sa buhay. Igwa sia nin maogmang pakiibaiba sa mga kapwa Kristiano asin nin kaaraman dapit sa asin pagsarig sa ihinayag na kabotan ni Jehova. An mga bagay na arog kaini “orog na dapat mawoton kisa bulawan, iyo, kisa dakol na pinong bulawan.”​—Salmo 19:10.

Sa Katapustapusi, Mayo Nang Kadukhaan!

Sa kahurihurihi, nanonodan kan mga indibiduwal na naghihimate sa maogmang bareta na katuyohan ni Jehova Dios na permanenteng resolberan an problema sa kadukhaan paagi sa saiyang Kahadean. An Biblia nanunuga: “Bakong permi na lilingawan an mga dukha, ni na mapapara an paglaom kan mga mahoyo.” (Salmo 9:18) An Kahadean sarong tunay na gobyerno, na inestablisar sa langit na si Jesu-Cristo an Hade. Sa dai na mahahaloy, an Kahadean na iyan an masalida sa mga gobyerno nin tawo sa pamamahala sa mga aktibidad nin tawo. (Daniel 2:44) Dangan, bilang natutukaw na sa tronong Hade, si Jesus “maheherak . . . sa hababa asin sa dukha, asin an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag, asin an saindang dugo magigin mahalaga sa saiyang mga mata.”​—Salmo 72:​13, 14.

Inaantisipar an panahon na iyan, an Miqueas 4:​3, 4 nagsasabi: “Sinda magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda; huli ta an mismong ngoso ni Jehova nin mga hukbo iyo an nagtaram kaiyan.” Siisay an nasasambitan digdi? Tara, an gabos na nagpapasakop sa Kahadean nin Dios. Reresolberan kan Kahadean na iyan an gabos na problema na nagpapasakit sa katawohan​—pati an problema sa helang asin kagadanan. “Hahalonon nanggad nia an kagadanan sagkod lamang, asin papahidon kan Soberanong Kagurangnan na si Jehova an mga luha sa gabos na lalauogon.” (Isaias 25:8; 33:24) Laen nanggad na kinaban iyan! Asin girumdomon, puwede tang tubodon an mga panugang ini huli ta iyan ipinasabong mismo nin Dios. Sia nagsasabi: “An sakuyang banwaan kaipuhan na mag-erok sa matoninong na mga erokan asin sa mga harong na may lubos na kompiansa patin sa trangkilong mga pahingaloan.”​—Isaias 32:18.

Pinapangganahan kan pagsarig sa Kahadean nin Dios an kakulangan nin paggalang sa sadiri na sa parate bunga nin kadukhaan. An sarong dukhang Kristiano nakakaaram na sia mahalaga man sa mga mata nin Dios arog nin sarong Kristiano na mayaman. Pantay an pagkamoot nin Dios sa sainda, asin pareho an paglaom nindang duwa. Kapwa sinda galagang nag-aantisipar sa panahon na, sa pagsakop kan Kahadean nin Dios, an kadukhaan magigin bagay na nakalihis na. Kanigoan kamamuraway na panahon iyan! Sa katapustapusi, mayo nang dukha!

[Ritrato sa pahina 5]

Taano ta magsasayang nin kuwarta sa pagsugal, pagsigarilyo, labi-labing pag-inom, pag-abuso sa droga, o sa inmoral na estilo nin buhay?

[Ritrato sa pahina 7]

Reresolberan ni Jehova Dios an mga problema nin kadukhaan nin tawo paagi sa saiyang Kahadean