Magtao nin Paglaom sa mga Dukha
1 Nagpaheling si Jesus nin espesyal na interes sa mga dukha. May mga pangyayari na milagroso siang nagtao nin materyal na tabang asin nagpaomay sa mga may helang, alagad nagkonsentrar sia sa pagpahayag kan “maogmang bareta” sa mga dukha. (Mat. 11:5) An Kristianong ministeryo ngonyan padagos na nagtatao nin pakinabang sa mga dukha saka sa iba pa.—Mat. 24:14; 28:19, 20.
2 Tunay na Paglaom: An mga ministro kan Kakristianohan parateng nanunuga sa mga dukha na maasenso an mga ini kun magigin matinao sinda sa simbahan. Minsan siring, itinotokdo kan Biblia na an Kahadean nin Dios sana an matapos sa kadukhaan asin maresolber sa gabos na problema nin katawohan. (Sal. 9:18; 145:16; Isa. 65:21-23) Paagi sa pagtabang sa mga dukha na maaraman kun ano man nanggad an itinotokdo kan Biblia, kita nagtatao nin paglaom asin nagtatabang sa sainda na mapanigoan an saindang espirituwal na pangangaipo.—Mat. 5:3.
3 Minenos kan mga Fariseo kan panahon ni Jesus an mga dukha, na mapagduhaging inaapod sinda na ‘am-ha·’aʹrets, o “mga tawo kan daga.” Minsan siring, minansay ni Jesus “an saindang dugo,” o an saindang buhay, na “mahalagang marhay.” (Sal. 72:13, 14) Puede kitang mag-arog ki Jesus asin ‘magpaheling nin pabor’ sa siring na mga dukha paagi sa pagigin maboot asin maduminamay. (Tal. 14:31) Nungka na gugustohon niatong magtaram na may pagmenos manongod sa mga tawo na nag-eerok sa pobreng mga pagtaraed o magpaheling nin pag-alangan na magpatotoo sa sainda. Mga dukha an dakol sa mga naghihimate sa mensahe kan Kahadean.
4 Tumabang Ngonyan: An pagtotokdo niato nin mga prinsipyo sa Biblia sa mga dukha sa teritoryo nakakatabang man sa sainda na mainaan an mga epekto nin kadukhaan ngonyan mismo. Halimbawa, kinokondenar kan Biblia an pagbuburat, pagsugal, kahugakan, paggamit nin tabako, asin iba pang gibohon na nagreresulta sa kadukhaan. (Tal. 6:10, 11; 23:21; 2 Cor. 7:1; Efe. 5:5) Dinadagka kan Kasuratan an pagkasadiosan asin an “bilog na kalag” na pagtrabaho, mga kualidad na hinahanap sa mga empleyado. (Col. 3:22, 23; Heb. 13:18) Sa katunayan, sa sarong surbey an mayoriya kan mga among ilinista an pagkasadiosan asin integridad bilang mga kualidad na pinakahinahangaan ninda sa mga naghahanap nin trabaho.
5 Si Jehova bakong bagol sa pagdusa nin mga dukha. Dai na mahahaloy ililigtas ni Jesu-Cristo “an dukha na naghahagad nin tabang.” (Sal. 72:12) Sagkod sa panahon na iyan, igwa kita nin pribilehio na rangahon an iba, pati na an mga dukha, paagi sa mensahe nin paglaom na nasa Biblia.