Gurano Kahaloy na Kaipuhan na Maghalat an mga Dukha?
“Kun an demokratikong sosyedad dai kayang tumabang sa dakol na dukha, dai kaiyan kayang iligtas an dikit na mayaman.”—John F. Kennedy.
“GUSTO ko na an ngapit magin maogma para sa gabos—mayo nin kadukhaan, mayo nin siisay man na natotorog sa parke, sarong paraiso!” Iyan an sabi nin sarong 12-anyos na lalaki sa São Paulo, Brazil. Alagad posible daw na haleon an kadukhaan? Gurano kahaloy na kaipuhan na maghalat an mga dukha?
An iba ibinibilang na dukha an saindang sadiri huli ta dai ninda kayang bumakal nin mga bagay na gusto ninda. Pero isip-isipa an mamondong kamugtakan kan talagang mga dukha. Naiimahinar daw nindo an makuring pagsakit asin kamondoan kan siring na mga tawo? An iba kaipuhan na makipag-enotan sa mga tagkaro asin kino, mantang nagsusukay sinda sa mga basura na naghahanap nin makakakan! Gurano kahaloy na pasasakitan kan siring na kadukhaan an katawohan? Angay an pakimaherak ni Federico Mayor, an direktor-heneral kan UNESCO (United Nations Educational, Scientific, and Cultural Organization): “Talikdan ta na an dudosong pagkonsinte na minatogot sa sato na konsintehon an dai puwedeng konsintehon—an kadukhaan, gutom asin pagsakit nin minilyon na tawo.”
Maootob daw an pangatorogan na pankagabsan na prosperidad? Anong paglaom igwa an mga dukha?
Ano an mga Oportunidad Para sa mga Dukha?
An mga namomoon na marahay an motibo nagpoproponer nin dagdag na trabaho, mas halangkaw na suweldo, pinakarhay na mga programa sosyal, asin reporma sa daga. Puwedeng oyon sinda sa dating presidente kan E.U. na si John F. Kennedy: “Kun an demokratikong sosyedad dai kayang tumabang sa dakol na dukha, dai kaiyan kayang iligtas an dikit na mayaman.” Alagad, an marahay na mga intension bakong igo tanganing haleon an kadukhaan. Halimbawa, makakatabang daw sa kadaklan na dukha an pag-oswag sa ekonomiya? Dai man. An dating namomoon sa India na si Jawaharlal Nehru nagsabi: “An mga puwersa sa kapitalistang sosyedad, kun dai babantayan, may tendensia na gibohon na mas mayaman an mga mayaman asin mas dukha an mga dukha.” Alagad, apuwera kan kasakitan asin kakulangan sa ikabubuhay, an pakamate nin kadaihan nin halaga orog na pinagagabatan an mga dukha. Matatabangan daw kan mga namomoon na tawo an mga dukha na mapangganahan an mga pakamate nin kadaihan nin maginibo asin kawaran nin paglaom?
An totoo, an dakol na dukhang marhay nakanood na pangganahan an kadukhaan asin daogon an mga pakamate nin hababang paggalang sa sadiri sa atubangan nin darakulang kasakitan, arog baga kan halangkawon na implasyon asin kadaihan nin trabaho. Saro pa, an gutom, kawaran nin harong, asin kasakitan biyong hahaleon. Ikinabibigla daw nindo ini? Inaagda mi kamo na basahon an sunod na artikulo na: “Dai Na Mahahaloy, Mayo Nang Dukha!”