“An Ultimong Kaiwal” Dadaogon!
KAN kamo aki pa, seguro natatakot kamo sa diklom. Tibaad pinano kamo nin kahaditan nin mga estoryang makatatakot asin pati nin pirang estorya dapit sa mga engkantada. Nakapakokosog nanggad nin boot kun si nanay o si tatay nindo binabayaan na may ilaw an lampara mantang kamo nagtototorog!
Ikinatatakot man nin dakol an kagadanan. Pero dai man kaipuhan. Taano? Huli sa tunay na kahulogan nin kagadanan.
Midbidon an Saindong Kaiwal
An madonong na si Hadeng Salomon kan suanoy na Israel nagsabi: “An buhay nakaaaram na sinda magagadan; alagad kun dapit sa mga gadan, mayo man lamang sinda nin pakaaram.” (Eclesiastes 9:5) Sono sa ipinasabong nin Dios na puntong ini na yaon mismo sa saindong Biblia, an kagadanan kabaliktaran sana nin buhay. An mga gadan mayo nin may pakaaram na pag-eksister.
Sa pagsambit sa kagadanan sa paaging ilustratibo, an Kristianong apostol na si Pablo nagsurat: “Kagadanan, haen an saimong kapangganahan? Kagadanan, haen an saimong sogod?” Ano an sogod na nagbubunga nin kagadanan? Sabi ni Pablo: “An sogod na nagbubunga nin kagadanan iyo an kasalan.” (1 Corinto 15:55, 56; Oseas 13:14) Kun siring, ano an ginikanan kan nakagagadan na sogod na ini? Sa iba pang kabtang kan Kasuratan, si Pablo nagsasabi: “Kun paanong paagi sa sarong tawo an kasalan naglaog sa kinaban asin an kagadanan huli sa kasalan, asin kaya an kagadanan nakalakop sa gabos na tawo huli ta sinda gabos nagkasala.” (Roma 5:12) Sinisierto kan apostol kun siisay an “sarong tawong” iyan kan sia magsabi: “An gabos nagagadan dian ki Adan.” (1 Corinto 15:22) Iyo, paagi sa pagmasumbikal kan satong enot na apoon, si Adan, kita gabos tinatamaan kan sogod nin kagadanan.—Genesis 3:1-19.
Kun marahay an salud asin may mamomoton na pamilya sa magayon na lugar, mayo sa sato na magugustong magadan. Pero, arog kan sinasabi kan Biblia, puwede kitang mawaran nin buhay huli sa “panahon asin pagkanorongod.” (Eclesiastes 9:11) An totoo, dai niato aram kun ano an mangyayari sa satong buhay sa aga. (Santiago 4:14) Sarong bagay an segurado—kita gabos nakamana nin kasalan asin kagadanan. Kun siring, an kagadanan nagsusunodsunod sa sato asin minasalakay bilang kaiwal.
Pagkaya sa Kagadanan nin Sarong Namomotan
An kagadanan nangorognang sarong kaiwal kun iyan minasalakay sa sarong namomotan. “Iyan magigin mas grabe para sa saimo,” an sabi sa saiyang agom nin sarong agom na babae na may talaan na an buhay huli sa helang mantang hinohorophorop nia an kagadanan. Taano ta nasabi nia iyan? Huli ta sinasabi kan Biblia: “An gabos na makua kan saimong kamot na gibohon, gibohon iyan sa bilog mong kakayahan, huli ta mayo nin gibohon ni pagplano ni kaaraman ni kadonongan sa Sheol [an pankagabsan na lolobngan nin katawohan], an lugar na saimong padudumanan.” (Eclesiastes 9:10) An gadan dai na nagsasakit. Pero an gabat nin kapungawan namumugtak sa nawalat na mga paryentes asin katood. May magigibo daw sa siring na kasakitan?
An mga pahina kan Tataramon nin Dios, an Biblia, kadakol kan tataramon nin pagranga. Halimbawa, an pagbasa asin paghorophorop sa mga salmo tunay na sarong gikanan nin karangahan. Nakararanga nanggad an mga tataramon na arog kaini: “Pag-omawon si Jehova, na sa aroaldaw dinadara an pasan para sa sato, an tunay na Dios kan satong kaligtasan.”—Salmo 68:19.
An saro pang gikanan nin karangahan iyo an Kristianong kongregasyon. Kan enot na siglo C.E., si apostol Pablo nagsurat: “Tawan mo nin onra an mga babaeng balo na balo man nanggad. Pero kun an siisay man na balo igwa nin mga aki o makoapo [na kayang mag-ataman sa saiya sa materyal], pabayaan nguna an mga ini na makanood na maggibo nin diosnon na debosyon sa saindang sadiring pamilya asin padagos na magbalos sa saindang mga magurang asin apoon, huli ta ini an marahay sa pagheling nin Dios. Ilista sana an balo na anom na polong taon na an edad, nagin agom nin sarong lalaki, na may nagpapatotoo sa saiyang marahay na mga gibo, kun sia nag-ataman nin mga aki, kun sia nag-istimar sa mga estranyo, kun sia naghanaw sa mga bitis nin mga banal, kun sia nakapaginhawa sa mga nagsasakit, kun sia mahigos na nagsunod sa lambang marahay na gibo.” (1 Timoteo 5:3, 4, 9, 10) An mga Saksi ni Jehova ngonyan nagtatabang man asin nagraranga sa siring na mga kapagtubod.
Sa parate an pinakadakulang pag-adaptar na kaipuhan na gibohon kan nabayaan iyo an sa emosyon. “Namomotan kong marhay an sakong agom,” an isinurat nin sarong lalaki na duwang taon nang nagadan an agom. “Ini an pinakamamondong pangyayari sa buhay ko, asin nadedepisilan akong magtagal.” An saro na nahaloyhaloy nang may agom ihiniras an saiyang buhay sa pinakadayupot na relasyon nin tawo. Kun nagagadan an agom, natural sanang makamate nin dakulang kapierdihan an nawalat na agom. Kiisay makadodolok para sa tabang an sarong iyan?
Sa siring na mga kamugtakan, puwedeng makapakosog an marahay na Kristianong kairiba. “An tunay na katood mamomoton sa gabos na panahon, asin tugang na namundag manongod sa panahon nin kasakitan,” sabi nin sarong madonong na talinhaga. (Talinhaga 17:17) An sarong balo nagkakaipo nin tabang—kairiba na nagtatao nin tunay na pagsuportar. Dinadagka nin madonong na mga katood na magtaram an nagmomondo, dawa kun iyan nakapagpapaluha. Tibaad makatao nin maboot na tabang an sarong Kristiano na nakaeksperyensia na kan kolog asin kamondoan sa puso sa pagkagadan nin agom. “Rangahon an mga . . . nagmomondo,” an hatol kan Biblia. (1 Tesalonica 5:14) Pero girumdomon na an mga balo napupungaw sa saindang agom. Kun siring, an nagadanan maninigong magtuga sa iba kan mga nasa boot nia sa mga kamugtakan sana na minatogot na an gabos magdanay na malinig an gawe.—1 Pedro 2:12.
An pinakamarahay na panlaban sa kolog na itinatao nin kagadanan iyo an pagdanay na sibot sa pagtabang sa iba—na bakong madaling gibohon para sa mga naniniwala na sinda an nagkakaipo nin tabang! Digdi minalaog an kadaihan nin kapasloan. An daing kapasloan na pagtabang sa iba nakatatabang na mawara an kamondoan asin kapungawan, ta si Jesus nagsabi: “Igwang orog na kaogmahan sa pagtao kisa pag-ako.”—Gibo 20:35.
Panggana sa Kagadanan
An sogod nin alimbubuyog puwedeng magin makologon, nakagagadan pa ngani. Pero sa parate, an paghale sa pansogod kan insekto na natatadok sa saindong kublit makatatabang na kamo makaginhawa. Pero ano an paglaom na makaginhawa sa sogod na nagbubunga nin kagadanan?
Pakapaliwanag na an kasalan iyo an sogod na nagbubunga nin kagadanan, si Pablo nagkagsing: “Salamat sa Dios, huli ta tinatawan nia kita kan kapangganahan paagi sa satong Kagurangnan na si Jesu-Cristo!” (1 Corinto 15:57) Paano na konektado ki Cristo an kapangganahan sa kagadanan? Ipinaheling ni Jesus na ini totoo kan sia magsabi manongod sa saiya man sana: “An Aki nin tawo nagdigdi, bakong tanganing paglingkodan, kundi tanganing maglingkod asin magtao kan saiyang kalag bilang pantubos na karibay nin dakol.” (Mateo 20:28) Iyo, para sa mga nagtutubod sa Aki nin Dios, si Jesu-Cristo, asin sa pantubos na atang na itinao ni Jehova paagi sa saiya, an kagadanan na namana ki Adan dai magbubunga nin permanenteng kadaihan nin buhay.—Juan 3:16.
Nakapakokosog nanggad an mga tataramon ni Jesus: “An oras maabot na an gabos na nasa mga lolobngan nin girumdoman makadadangog kan saiyang tingog asin maruluwas, idtong naggiribo nin marahay sa pagkabuhay liwat sa buhay, idtong naggiribo nin maraot sa pagkabuhay liwat sa paghokom.”—Juan 5:28, 29.
Mga siglo bago kaini, an propeta nin Dios na si Isaias naghula: “Hahalonon nia [ni Jehova Dios] an kagadanan sagkod lamang, asin papahidon kan Soberanong Kagurangnan na si Jehova an mga luha sa gabos na lalauogon.” (Isaias 25:8) Liwat, sa Kapahayagan 21:4, itinatao kan Biblia an makangangalas na paglaom na ini: “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” Huling napakosog kan paglaom na ini sa Biblia para sa mga natotorog sa kagadanan, an mga nagadanan dai kaipuhan na “magmondo siring kan iba na dai nin paglaom.”—1 Tesalonica 4:13.
Pagmaigotan na imahinaron an itinatagama nin Dios sa katawohan, na sinasabi sa Biblia. An nagdadangadang na “dakulang kahorasaan” nangangahulogan nin kalaglagan para sa presenteng maraot na palakaw nin mga bagay. (Kapahayagan 7:14) An mga naggigibo nin falsong relihiyon lalaglagon. Mawawara na an paslong mga elemento sa politika asin komersio na nakakokontribuwir sa gutom asin guerra. Ihoholog ni Jesu-Cristo sa bungaw si Satanas na Diablo, na nagpangyari sa kadakol na pagkagadan nin tawo. Dangan poponan ni Cristo an saiyang Milenyal na Paghade, na sa panahon na iyan iaaplikar nia an halaga kan saiyang pantubos na atang sa katawohan. An mga gadan mabuwelta sa linalaoman na pagkabuhay liwat, asin masirang nin maliwanagon an liwanag hale sa Tataramon nin Dios kaya an superstisyosong mga opinyon manongod sa kagadanan, an kaiwal nin tawo, mayo na. An gabos na nabubuhay sa panahon na iyan magkakaigwa kan oportunidad na manodan an mga dalan nin Dios asin makaoyon sa saiyang matanos na mga pamantayan.—Talinhaga 4:18; Gibo 24:15; Hebreo 2:14, 15; Kapahayagan 18:4-8; 19:19-21; 20:1-3.
‘Masunod, an katapusan,’ sabi ni Pablo, ‘kun itao na ni Cristo Jesus an kahadean sa saiyang Dios asin Ama. Huli ta sia kaipuhan na maghade sagkod na ikinabugtak na nin Dios an gabos na kaiwal sa irarom kan saiyang mga bitis. Bilang an ultimong kaiwal, an kagadanan paparaon.’ (1 Corinto 15:24-26) Mayo na an gabos na diperensiang bunga kan kasalan ni Adan. Mangyayari an ultimong pagbalo, asin makapapasar dian na may kaimbodan an mga namomoot sa Dios. (Kapahayagan 20:4-10) Ikinabalik sa pagkasangkap, an makinuyog na mga tawong ini mabubuhay, bako sanang sa laog nin pitong polo o sanggatos may sampulo, kundi sagkod lamang. Kanigoan kadakulang balaog gikan sa Dios paagi sa saiyang namomotan na Aki!—Roma 6:23.
Kun siring, gurano kalawig na kamo puwedeng mabuhay? An lawig kan saindong buhay puwedeng magin sagkod lamang. Mantang kamo nabubuhay sa “panahon kan katapusan” kaining kinaban, tibaad dai na kamo magadan. (Daniel 12:4; Juan 11:25, 26; 17:3) Kun inootob nindo an kabotan nin Dios, tibaad magpadagos kamong buhay palaog sa ipinanugang bagong kinaban nin Dios.—2 Pedro 3:13.
Pero kun kamo gurang na, kaipuhan na realistiko nindong konsideraron an posibilidad na magadan. Tunay na nagtatao nin kagayagayahan an paglaom sa pagkabuhay liwat. Pero tibaad iniisip-isip nindo kun paano aareglaron ni Jehova an buhay nin pamilya sa bagong palakaw na iyan nin mga bagay. Dai kamo maghadit sa siring na mga bagay, ta seseguradohon ni Jehova an padagos na kaogmahan kan mga maimbod sa saiya sagkod lamang.
Mantang nagpapadagos an dalagan kan delikadong “huring mga aldaw” na ini kan maraot na palakaw ni Satanas, dai nindo itogot na huli sa takot sa kagadanan mawara sa saindo an pribilehiyo na maglingkod ki Jehova ngonyan. (2 Timoteo 3:1) Kun mawara sa saindo an sarong namomotan sa kagadanan, rangahon an saindong sadiri kan pagigin temporaryo sana kan kapangyarihan kaiyan. (Kapahayagan 20:13, 14) Manarig sa paglaom sa pagkabuhay liwat. Dangan, baga man kamo makalaog sa bagong kinaban paagi sa pagkaligtas na buhay sa dakulang kahorasaan o paagi sa pagkabuhay liwat, manarig kamo sa ipinasabong na garantiya na an kagadanan, an ultimong kaiwal, talagang paparaon.—Kapahayagan 7:9, 14.
[Ritrato sa pahina 5]
An marahay na Kristianong kairiba makapakokosog sa nagadanan sa espirituwal
[Ritrato sa pahina 7]
An pagdadanay na sibot sa pagtabang sa iba nakaiina sa kamondoan gikan sa pagkagadan nin sarong namomotan