Mga Hapot Hale sa mga Parabasa
Mantang an suanoy na saserdote na an ngaran Melquisedec sarong tunay na tawo, taano an Biblia ta nagsasabi na sia “daing ginikanan”?
An pananaram na ini nasusurat sa Hebreo 7:3. Mangnoha an bersikulo sa konteksto kaiyan:
“An Melquisedec na ini, na hade nin Salem, saserdote kan Kaharohalangkaweng Dios, na nagsabat ki Abraham sa pagpuli hale sa paggadan kan mga hade asin nagbendisyon sa saiya asin binangaan ni Abraham nin ikasampulong kabtang kan gabos, enot sa gabos, kun isasalin, ‘Hade nin Katanosan,’ asin hade man kaidto nin Salem, na an boot sabihon, ‘Hade nin Katoninongan.’ Sa pagigin daing ama, daing ina, daing ginikanan, ni kapinonan nin mga aldaw ni katapusan nin buhay, kundi ginibong kabaing kan Aki nin Dios, sia nagdadanay na saserdote sagkod lamang.”—Hebreo 7:1-3.
Siring sa pagkasambit, si Melquisedec sarong tunay na tawo, tunay arog ni Abraham, na sa saiya sia nagkaigwa nin direktang mga pakipag-olay. (Genesis 14:17-20; Hebreo 7:4-10) Mantang siring, si Melquisedec siertong may mga magurang, ama asin ina, asin tibaad nagkaigwa pa sia nin aki. Kun siring, bilang tawo igwa siang ginikanan, o tala nin mga linahe. Nagkaigwa man nin katapusan an saiyang pisikal na buhay. Pag-abot nin panahon si Melquisedec nagadan, kaoyon kan mga tataramon ni apostol Pablo sa Roma 5:12, 14. Pero huling dai niato aram kun kasuarin nagadan si Melquisedec asin sa siring uminontok sa paglilingkod bilang saserdote, sa bagay na iyan sia naglingkod na mayong ano man na aram na katapusan.
Sa Hebreo, si Pablo nagkomento manongod ki Melquisedec kan ipinaliliwanag an katongdan ni Jesus bilang nangongorog na Halangkaw na Saserdote. Sa pagsambit ki Melquisedec bilang tipo, o arogan, ni Jesus sa makasaserdoteng katongdan na ini, si Pablo nagsabi: “Si Jesus . . . nagin halangkaw na saserdote sono sa orden ni Melquisedec.” (Hebreo 6:20) Sa anong sentido?
Seguradong aram ni Pablo na an tala kan Biblia dai nagtatao nin detalye dapit sa linahe ni Melquisedec—an saiyang mga apoon o posibleng mga gikan. An impormasyon na iyan talagang dai sana ibinugtak sa tala kan Biblia. Kun siring, sa punto-de-vista kan aram ni Pablo o aram niato, tamang sabihon na si Melquisedec “daing ginikanan” (New World Translation of the Holy Scriptures; American Standard Version), “mayong tala kan mga ginikanan” (W. J. Conybeare), o “mayo nin tala nin mga linahe.”—J. B. Phillips.
Sa anong paagi na si Jesus siring kaiyan? Totoo na aram niato na si Jehova Dios an Ama ni Jesus asin na si Maria kan tribo ni Juda an ina niang tawo. Minsan siring, igwa nin pagkakaagid si Jesus asin si Melquisedec. Paano? Si Jesus dai namundag sa tribo ni Levi, an tribo para sa mga saserdote sa nasyon nin Israel. Bako, si Jesus dai nagin saserdote paagi sa ginikanan na tawo. Ni si Melquisedec, na dai nagin saserdote “sono sa pagboot nin sarong katogonan na sono sa laman,” an boot sabihon, paagi sa pagkamundag sa makasaserdoteng tribo asin pamilya. (Hebreo 7:15, 16) Imbes na magin saserdote paagi sa tawong ama na nagin mismo saserdote, si Jesus “inapod nin Dios na halangkaw na saserdote sono sa orden ni Melquisedec.”—Hebreo 5:10.
Dugang pa, si Jesus dai man lamang nagkaigwa nin mga gikan o kasalihid sa saiyang pagkasaserdote. Sa sentido man na ini, sia mayong ginikanan. Daing sagkod niang ootobon an saiyang makasaserdoteng paglilingkod bilang matinabang na paratokdo. Si Pablo nagkomento dapit sa daing sagkod na paglilingkod na ini, na nagsasabi:
“[Si Jesus] huli sa padagos na pagkabuhay sagkod lamang igwa kan saiyang pagkasaserdote na mayo nin siisay man na mga kasalihid. Kaya sia man lubos na makapagliligtas duman sa mga minadolok sa Dios paagi sa saiya, huli ta sia danay na buhay tanganing makimaherak para sa sainda.”—Hebreo 7:24, 25.
Kaya an pag-orolay niato sa mga tataramon ni Pablo sa Hebreo 7:3 maninigong bakong kaaraman sana na ilalaog sa satong payo. Maninigo iyan na magparigon kan satong pag-apresyar sa mamomoton na probisyon na ginibo ni Jehova Dios tanganing kamtan niato sagkod lamang an kapatawadan sa satong kasalan asin sa paagi kan pag-areglo nia tanganing akoon niato sagkod lamang an tabang asin paggiya.