Kompetisyon daw an Liyabe sa Kapangganahan?
“AN PANGGAGANA bakong iyo an gabos sa buhay, iyan sana an mahalaga sa buhay.” Ngonyan dakol an namumuhay oyon sa mga tataramon na ini, na parateng iinaatribuwir sa sarong Amerikanong instruktor nin putbol, si Vince Lombardi. Ngonyan, an dating Komunistang mga nasyon nakiiba na sa pag-omaw sa prinsipyo nin kompetisyon. An pag-introdusir nin kompetisyon sa saindang mga negosyo iyo an sinasabing kinakaipuhan sa pagyaman. Sa Oriente kadakol na magurang an ilinalaban an saindang mga aki sa iba asin pinaaadal sinda sa pribadong mga eskuwelahan na nagtatao nin sigido asin hiridalean na pagtotokdo na nagtotokdo sainda kan abilidad sa pagpasar sa mga eksaminasyon sa paglaog. An bangkag na mga magurang kombensido na an paglaog sa midbid na eskuwelahan iyo an liyabe sa prosperidad sa ngapit.
An kompetisyon, dakol an marigon na naniniwala, iyo an liyabe sa kapangganahan. Sono sa saindang paniniwala, nagprogreso an mga tawo paagi sa pagkorompetensiahan. “An kompetisyon para sa promosyon iyo an gikanan kan kosog nin mga korporasyon sa Hapon,” nagsabi an 65.9 porsiento kan mga namamahala sa darakulang korporasyon na sinurbey kan Pederasyon nin mga Organisasyon sa Ekonomiya sa Hapon. Asin garo baga an mga kompaniya sa Hapon nahaloyhaloy nang nagin mapanggana. Minsan siring, kompetisyon daw talaga an liyabe sa kapangganahan?
Tunay daw na Kapakipakinabang?
An mga tawo na nakikipagkompetensia sa iba nagpapaheling nin paslo, ako-ngunang kaisipan. Naoogma sinda kun napapakaraot an iba, na iniimahinar na palalatawon kaiyan na mas marahay an saindang gibo. Para sa saindang paslong pakinabang, tibaad gumibo sinda nin mga taktika na nakakokolog sa iba. Sa ano masagkod an siring na paghihingoa sa kapangganahan paagi sa kompetisyon? Si Yasuo, na idinusay an saiyang sadiri sa paorumbasan na magin importante sa saiyang kompaniya, nagigirumdoman an saiyang nakaaging buhay asin nagsabi: “Pano-pano nin parapakikompetensiang espiritu asin kaisipan na mahilig sa promosyon, ikinomparar ko an sakuyang sadiri sa iba asin nakamateng ako nangongorog. Kun ibinubugtak an mga tawong idto sa katongdan na halangkaw kisa sako, napupungot asin nagrereklamo ako aroaldaw manongod sa namamahala kan tawohan sa kompaniya. Mayo akong mga amigo sa tunay na kahulogan kan termino.”
An parapakikompetensiang espiritu puwede man na gumiya sa amay na pagkagadan. Paano? An Mainichi Daily News sa Hapon ikinokonektar an karoshi, o kagadanan huli sa sobrang kapagalan, sa klaseng-A na paggawe. An klaseng-A paggawe na inaatubang an tension paagi sa paghidale sa panahon, pakikikompetensia, asin pagkaongis. An Amerikanong kardiolohista na si Friedman asin Rosenman ikinokonektar an klaseng-A na paggawe sa helang sa puso. Iyo, an parapakikompetensiang espiritu puwedeng makagadan.
An kompetisyon sa pinagtatrabawohan puwedeng gumiya man sa iba pang pisikal asin mental na helang. An sarong halimbawa iyo si Keinosuke, na pinakamatibay na ahente sa saro kan darakulang parapabakal nin kotse sa Hapon. Nakaestablisar sia nin rekord paagi sa pakapabakal nin total na 1,250 kotse. Ikinuwadro asin isinabit an saiyang retrato sa kuwarto na ginagamit kan junta directiva sa opisina prinsipal kan kompaniya. Minsan ngani ikinauuyam nia an paggamit sa saiyang kairiba bilang tangga sa pagkua nin mga promosyon, itinulod sia kan kompaniya na makikompetensia. Bilang resulta, sa laog sana nin sarong taon naghelang sia nin ulser sa estomago asin sa bituka. Kan iyo man sanang taon, 15 namamahala sa saiyang kompaniya an naospital, asin saro an naghugot.
Sa harong, an kaisipan na makipantay sa kataed nagtutulod sa mga tawo na magpaabaw-abaw kan saindang kaya sa buhay sa daing katapusan na pagriribal. (1 Juan 2:16) An komersialismo sana an nakikinabang kaini, na ibinubugtak an kuwarta sa kamot kan mga parabariwas sa daga.—Ikomparar an Kapahayagan 18:11.
Minsan ngani an pagriribal asin parapakikompetensiang espiritu puwedeng makaprodusir nin kahusayan sa trabaho, bakong makangangalas na si Hadeng Salomon nagsabi: “Naheling ko mismo an gabos na kahigosan asin an gabos na kahusayan sa trabaho, na iyan nangangahulogan nin pagriribal nin saro tumang sa saro; ini man daing kapakanan asin paglapag sa doros.” (Eclesiastes 4:4) Kaya paano niato mapagdadanay an katoninongan nin isip mantang namumuhay sa sarong parapakikompetensiang sosyedad? Tanganing maaraman, helingon ta nguna kun saen nagpoon an ideya nin kompetisyon.