Katoninongan nin Isip sa Sarong Parapakikompetensiang Sosyedad
“KUN an siisay man boot na maenot,” sinadol ni Jesu-Cristo an saiyang mga apostol, “kaipuhan na sia mahuri sa gabos asin surugoon nin gabos.” Nagpasuruhay an mga apostol manongod sa kun siisay an pinakadakula sa tahaw ninda. Aram ninda na ikinababalde ni Jesus an klaseng iyan nin espiritu. Nungka niang pinagralabanlaban an saiyang mga disipulo bilang paagi na umoswag sa espirituwal.—Marcos 9:33-37.
Bago dumigdi sa daga, nakikabtang si Jesu-Cristo sa paglalang kan enot na tawong mag-agom asin aram nia kun paano sinda linalang. (Colosas 1:15, 16) An enot na mga tawo linalang na may kakayahan na umoswag na dai man maringis na nakikikompetensia sa iba. An mga tawo dai kinakaipuhan na magralabanlaban tanganing madeterminaran kun siisay an saindang payo, ni na nakikompetensia man sinda sa mga hayop tanganing mabuhay.—Genesis 1:26; 2:20-24; 1 Corinto 11:3.
Ginikanan kan Parapakikompetensiang Espiritu
Kun siring, paano an maringis na parapakikompetensiang espiritu nagin siring kanangingibabaw na puwersa sa sosyedad nin tawo? An enot na kaso nin paggadan sa historya nin tawo nagtatao nin ideya. An parapakikompetensiang espiritu sa kabtang ni Cain, an panganay na aki kan enot na tawong mag-agom, naggiya sa trahedya. Ginadan ni Cain an saiyang tugang na si Abel huli ta an atang ni Abel nakapaogma sa Dios, mantang an ki Cain dai. Asin nagsasabi an Biblia na si Cain “naggikan sa maraot asin guminadan sa saiyang tugang.”—1 Juan 3:12; Genesis 4:4-8.
Iyo, an maraot na saro, si Satanas na Diablo, iyo an kagpundar asin promotor kan parapakikompetensiang espiritu. Minsan ngani sia anghel na aki nin Dios na igwa nin halangkaw na mga pribilehiyo, gusto nia nin orog pa. (Ikomparar an Ezequiel 28:14, 15.) Kan dayaon nia si Eva, ihinayag nia an saiyang sadiring pagmawot. Sinabi nia na paagi sa pagkakan kan ipinangangalad na prutas, sia “magigin arog nin Dios.” (Genesis 3:4, 5) An totoo, si Satanas an gusto na magin arog nin Dios, na riniribal si Jehova. An espiritu nin pakikikompetensia tumang sa Dios nagpahiro saiya na magrebelde.—Santiago 1:14, 15.
Nakaoolakit an espiritung ini. Sa irarom kan impluwensia ni Satanas, nawara an katoninongan na itinao nin Dios sa orihinal na areglo nin pamilya. (Genesis 3:6, 16) Poon kan saiyang pagrebelde tumang sa Dios, si Satanas na Diablo pinamahalaan an katawohan, na pinaooswag an espiritu nin kompetisyon, na dinadaya pa ngani an mga lalaki asin babae sa paniniwala na an maringis na kompetisyon iyo an liyabe sa kapangganahan. Alagad, nagpapaliwanag an Biblia: “Kun saen an pag-imon asin pagkamakiiwalon, yaon an karibokan asin gabos na bagay na marigsok.” (Santiago 3:14-16) Kaya hinabon ni Satanas sa tawo an saiyang kaogmahan asin katoninongan nin isip.
Kapangganahan na Mayong Kompetisyon
Kabaliktaran sa pan-aagyat ni Satanas, an Biblia nagtatao nin mga halimbawa nin kapangganahan na mayong kompetisyon. An pinakapangenot iyo an ki Jesu-Cristo. Minsan ngani nag-eksister na kabaing nin Dios, nungka siang nag-isip na makapantay sa Dios kundi buminaing sa sarong oripon asin nagdigdi sa daga. Orog pa kaiyan, sia nagpakumbaba asin nagin makinuyog sagkod sa kagadanan sa hariging pasakitan. An makinuyog na kaisipan na ini, na mayo nin ano man na espiritu nin pakikiribal, guminiya sa saiyang pagkakamit kan pabor nin Dios. “Sa rason mismong ini ilinangkaw sia nin Dios sa superyor na kamugtakan asin may kabootan na itinao saiya an ngaran na halangkaw kisa lambang ibang ngaran.” (Filipos 2:5-9) Anong mas dakulang kapangganahan an kayang kamtan nin siisay man na linalang? Pinaogma nia an saiyang Ama sa sokol na mayo nang ibang linalang an makakakaya, asin ginibo nia ini na mayong ano man na espiritu nin pakikiribal o kompetisyon.—Talinhaga 27:11.
An kadakoldakol na maimbod na anghel sa langit ipinaheheling an kaparehong kaisipan na ini. Dawa ngani si Jesus, na payo kan mga anghel, nagin hababa nin kadikit kisa sainda kan sia magdigdi sa daga, odok sa boot sindang naglingkod sa saiyang mga pangangaipo. Malinaw nanggad, dai sinda nagkaigwa nin kaisipan na aprobetsaran an situwasyon asin probaran na salidahan sia bilang Arkanghel.—Mateo 4:11; 1 Tesalonica 4:16; Hebreo 2:7.
An saindang paghabo sa parapakikompetensiang mga kaisipan orog pa nganing malinaw kun hohorophoropon ta an saindang reaksion sa katuyohan nin Dios na ilangkaw an nagkapirang bakong sangkap na tawo sa inmortal na espiritung buhay, na sa kamugtakan na iyan sinda ‘maghohokom sa mga anghel.’ (1 Corinto 6:3) An mga anghel igwa nin kadakoldakol na eksperyensia sa paglilingkod ki Jehova asin igwa nin orog nanggad na abilidad sa paggibo nin marahay kisa sa bakong sangkap na mga tawo. Pero, an mga anghel maogmang naglilingkod sa mga linahidan digdi sa daga, na nungkang nag-iimon sa aakoon kan mga ini. (Hebreo 1:14) An saindang marahay, bakong parapakikompetensiang kaisipan nagpapangyari sainda na magpadagos sa paglilingkod sa atubangan kan trono kan Soberanong Kagurangnan na Jehova.
Dangan, isip-isipa an suanoy na maimbod na mga lingkod nin Dios na bubuhayon liwat digdi sa daga. Si Abraham ekselenteng halimbawa nin pagtubod asin inapod na an “ama kan gabos na igwa nin pagtubod.” (Roma 4:9, 11) Si Job nagtao nin marahayon na halimbawa nin pakatagal. (Santiago 5:11) Si Moises, “an pinakamahoyo sa gabos na tawo na yaon sa ibabaw kan daga,” pinangenotan an nasyon nin Israel pasiring sa katalingkasan. (Bilang 12:3) Siisay sa bakong sangkap na mga tawo an nakatao nin mas marahay na halimbawa nin pagtubod, pakatagal, asin kahoyoan kisa sa mga lalaking ini? Minsan siring, nakalinya sinda sa pagmana kan daganon na sakop kan Kahadean nin Dios. (Mateo 25:34; Hebreo 11:13-16) Sinda, siring ki Juan na Bautisador, tatawan nin ranggo na hababa sa “saro na sadit sa kahadean kan kalangitan.” (Mateo 11:11) Mag-iisip daw sinda na magreklamo, na ipinipirit na an saindang pagtubod, pakatagal, o kahoyoan kapantay o sa ibang kamugtakan nakalalabi sa mga tinawan nin buhay sa langit? Siertong dai! Sinda magigin maogmang mga sakop sa daga kan Kahadean nin Dios.
Ngonyan man, an mga tawo na mayo nin parapakikompetensiang kaisipan maogmang makaibaiba. Si Yasuo, na nasambitan sa enot na artikulo, nalubog na gayo sa utang huli sa pag-alasuwerte sa pagnegosyo nin bulawan asin nawara an gabos niang rogaring. Binayaan sia kan “mga katood” nia. Mantang an saiyang agom nagpoon nang mag-adal sa Biblia kaiba kan mga Saksi ni Jehova, nagduman sia sa saindang mga pagtiripon huli sa pakamate nin pagbasol sa kasakitan na dinara nia sa saiyang pamilya. Sa katapustapusi, hinale nia sa saiyang sadiri an pagigin parapakikompetensia asin nagin saro sa mga Saksi ni Jehova. Ngonyan maogma sia na mapalibotan nin Kristianong mga katood, an klase na andam na tumabang saiya sa mga panahon nin kasakitan.
Kun Paano Mapagdadanay an Katoninongan nin Isip
Bako perming pasil na papagdanayon an katoninongan nin isip sa sarong mayong herak, parapakikompetensiang sosyedad. Marahay na mangnohon ta na kinokondenar kan Biblia an “pagkaongis, iriwal, pangimon, aranggotan, pagsuruhay, pagkabaranga, mga sekta, mga pagkauri” bilang “mga gibo nin laman” na nag-oolang sa mga tawo sa pagmana kan Kahadean nin Dios. An gabos na gibong ini konektadong marhay sa parapakikompetensiang espiritu. Bakong makangangalas na pinakosog ni apostol Pablo an mga taga-Galacia: “Dai kita magin mapalangkaw, na nagpupukaw nin pagdaraogan, na nagpapauroriorihan.”—Galacia 5:19-21, 26.
Sa kontekstong ini, an surat ni Pablo nagpaheling kan liyabe sa pakapanggana sa mahambog na kompetisyon. Nagsabi sia: “An bunga kan espiritu iyo an pagkamoot, kaogmahan, katoninongan, pakatios, kabootan, karahayan, pagtubod, kahoyoan, pagpopogol sa sadiri. Tumang sa mga siring dai nin pagboot.” (Galacia 5:22, 23) An bunga kan espiritu nakatatabang sato na haleon an pagriribal sa satong isip. Halimbawa, konsiderara an kuwalidad nin pagkamoot. “An pagkamoot bakong maimon,” an paliwanag ni Pablo. Iyan “dai nagpapalangkaw, dai nagpapaabhaw, dai naggigibo kan bakong maninigo, dai naghahanap kan saiyang sadiring kapakanan, dai napaaanggot.” (1 Corinto 13:4-7) Paagi sa pagpatalubo sa pagkamoot, mahahale ta an pag-imon, an nagtutulod na puwersa sa espiritu nin kompetisyon. An iba pang bunga kan espiritu nakatatabang man sato na linigon sa satong puso asin isip an ano man na natatada pang gira nin maringis, parapakikompetensiang espiritu. Tara, paagi sa pagpopogol sa sadiri an ano man na minalataw na pagmawot na makikompetensia sa iba tanganing manggana ano man an resulta madaling mapopogolan!—Talinhaga 17:27.
Alagad, tanganing makultibar an mga kuwalidad na ini, kaipuhan tang togotan an espiritu nin Dios na humiro sa sato. Puwede tang dagkahon an nakapakokosog na paghiro na ini kan banal na espiritu paagi sa pagmamaigot sa pamibi asin paghagad kan espiritu nin Dios na tabangan kita. (Lucas 11:13) Sa pagsimbag sa satong pamibi, ano daw an itatao sato nin Dios? Nagsisimbag an Biblia: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.”—Filipos 4:6, 7.
Naheling ini sa kamugtakan kan mga apostol ni Jesus. Dawa kan maponan na ni Jesus an Pamanggihan kan Kagurangnan sa saiyang huring banggi kaiba kan mga apostol, nagpasuruhay pa sinda kun baga siisay sainda an garo pinakadakula. (Lucas 22:24-27) Sa manlaenlaen na okasyon pinagmaigotan ni Jesus na tabangan sinda na ikatanos an saindang kaisipan, pero an parapakikompetensiang kaisipan na ini hararom nang nakatadom sainda. (Marcos 9:34-37; 10:35-45; Juan 13:12-17) Alagad, kan akoon ninda an banal na espiritu mga 50 aldaw pakalihis kan pasuruhay na iyan, nagbago an saindang kaisipan. Mayo nang argumento kun siisay an magrerepresentar sainda sa pagpahayag sa interesadong kadaklan na nagkatiripon kan aldaw na idto nin Pentecostes.—Gibo 2:14-21.
Mayo nin lugar para sa ano man na pagdominar nin tawo sa Kristianong kongregasyon. Kan kinaipuhan nindang resolberan an problema mapadapit sa pagpaturi, si Santiago, na bako pa nganing disipulo kan panahon na magadan si Jesus, an nangenot sa importanteng miting na iyan. Mayo nin senyal nin pagdiriskutiran kun siisay an mangengenot sa miting na iyan kan namamahalang grupo kan Kristianong kongregasyon. Kanigoan na pagbabago poon kan panahon na an mga apostol igwa pa nin parapakikompetensiang espiritu! Paagi sa tabang kan banal na espiritu, nagirumdoman ninda an mga katokdoan ni Jesus asin nagpoon na masabotan an kahulogan kan saiyang mga leksion.—Juan 14:26.
Puwede man na magin totoo iyan sa sato. Paagi sa tabang kan banal na espiritu, mapanggaganahan niato an ano man na natatada pang pagmawot na makikompetensia sa iba tangani sanang umoswag na isinasakripisyo sinda. Imbes, puwede kitang magkamit kan katoninongan nin isip na minalampas sa gabos na kaisipan. Sinisierto sato kan Biblia na an gikanan kan maringis na kompetisyon, si Satanas na Diablo, iaapon sa bungaw dai na mahahaloy, magigin inaktibo. (Kapahayagan 20:1-3) An pagriribal sa pag-oltanan nin magkataraed mawawara na. An resulta daw sarong sosyedad na mayong ano man na progreso? Bako nanggad! An mga tawo maoswag pasiring sa pagkasangkap, bakong paagi sa ano man na pagkorompetensiahan ninda, kundi paagi sa pag-aplikar kan pantubos na atang ni Jesus para sa sainda.—1 Juan 2:1, 2.
Si Keinosuke, na nasambitan kasubago, na dating naeksperyensiahan an kamurawayan nin kinabanon na kapangganahan paagi sa pakapabakal nin kadakol na kotse, pinagal an saiyang sadiri kapwa sa mental asin pisikal na paagi, alagad sa katapustapusi naghale sia sa saiyang trabaho. “Ngonyan, an sakong buhay pano-pano nin tunay na kagayagayahan,” sabi nia. Nasabotan nia kun taano ta may tunay na kapangganahan an buhay ni Jesus. Nakanonompong na sia ngonyan nin karepreskohan sa ano man na kaya niang gibohon sa pambilog na kinaban na kongregasyon nin Dios. Kaya ipinipreparar na sia para sa bagong kinaban, na mayo nang kompetisyon. Kamo man puwedeng magkaigwa nin patienot na pakamansay kaining sosyedad nin bagong kinaban paagi sa pagdalaw sa saro sa mga Kingdom Hall sa saindong lugar asin pakikiasosyar sa mga Saksi ni Jehova.
[Ritrato sa pahina 7]
An katoninongan asin kooperasyon makakamtan kan sosyedad nin tawo sa bagong kinaban nin Dios