Ginigibo daw Nindo an Kabotan nin Dios?

SA SAINDANG ministeryo sa harong-harong, duwa sa mga Saksi ni Jehova an nakanompong nin sarong padi kan Iglesya Episcopaliano. Sia garo baga tawong madaling pakiibanan, may barabas, mga 60 anyos, na nakasulot nin T-shirt na nakasurat an ngaran kan saiyang iglesya. Haros dungan niang sinabi: “Kutana an mga miembro sa samong iglesya kapareho nindo kaigot sa pagpalakop kan Tataramon, pero hahagadon ko saindo na dai na kamo sumongko sa sakong harong.”

Iyo, kadakol na tawo an naghahanga sa gibohon kan mga Saksi ni Jehova asin inoomaw sinda sa saindang kaigotan asin entusiasmo. Minsan siring, bako nanggad sindang interesado sa ginigibo kan mga Saksi, ni na hohorophoropon ninda na mismong gumibo kaiyan. Alagad, an malinaw na nagkakakontrahan na kamugtakan na ini nin mga bagay bako nang bago. Narisa iyan ni Jesus kan saiyang kaaldawan, asin idinoon nia an punto paagi sa nakapupukaw sa kaisipan na ilustrasyon.

“Ano sa paghona nindo? An sarong lalaki igwa nin duwang aki. Sa pagduman sa enot, sia nagsabi, ‘Aki ko, paduman asin magtrabaho ka ngonyan sa ubasan.’ Sa pagsimbag nagsabi ini, ‘Maduman po ako,’ pero dai sia nagduman. Sa pagdolok sa ikaduwa, pareho an sinabi nia. Sa pagsimbag nagsabi ini, ‘Dai ako maduman.’ Pakatapos nagsolsol sia asin duminuman. Arin sa duwa an naggibo kan kabotan kan saiyang ama?”​—Mateo 21:​28-31.

Malinaw an simbag. Siring sa kadaklan na nakadangog ki Jesus, masimbag kita, “An ikaduwa.” Alagad sa likod kaiyan, paagi sa ilustrasyon na iyan, inapod ni Jesus sa satong atension na an paggibo kan boot kan ama an mahalaga. Dawa ngani an ikaduwang aki nagsabi na habo niang magduman, nagduman man giraray sia asin inomaw huli kaiyan. An paggibo kan tamang klase nin trabaho siring man kaimportante. An ikaduwang aki huminiro paagi sa pagtrabaho sa ubasan kan saiyang ama; dai sia nagduman asin nagtrabaho sa saiyang sadiring ubasan.

Ano an koneksion kaini gabos sa sato? Ano an hinahagad nin Dios sa mga parasamba ngonyan? Ano an manonodan niato sa buhay ni Jesus na makatatabang sato na gibohon an kabotan kan saiyang Ama? Mahalagang mga hapot ini, asin an satong pakakua kan tamang mga simbag mangangahulogan kan satong daing katapusan na karahayan, huli ta “an naggigibo kan kabotan nin Dios magdadanay sagkod lamang.”​—1 Juan 2:17; Efeso 5:17.

Ano an “Kabotan nin Dios”?

An nombreng “will” (sa Bicol, “kabotan”) nalilista nin labi sa 80 beses sa Comprehensive Concordance of the New World Translation of the Holy Scriptures. Mga 60 kan paglataw na ini (o mga 75 porsiento kan paglataw) an nanonongod sa kabotan nin Dios. An mga tataramon siring baga kan “will of God” (“kabotan nin Dios”), “will of my Father” (“kabotan kan sakong Ama”), asin “God’s will” (“kabotan nin Dios”) minalataw nin labing 20 beses. Gikan digdi maheheling ta na an kabotan nin Dios maninigong magin pangenot an importansia sa sato. An paggibo kan kabotan nin Dios maninigong iyo an magin pangenot sa satong buhay.

Sa Ingles an nombreng “will” (sa Bicol, “kabotan”) nangangahulogan nin ‘kamawotan, kagustohan, determinasyon, bagay na minamawot, espesyalmente an desisyon o determinasyon nin saro na igwa nin autoridad o kapangyarihan.’ Kun siring, si Jehova, an Kadarudakulaing Autoridad, igwa nin kabotan, kamawotan o determinasyon. Ano daw iyan? An Kasuratan nagsasabi sato na sa sarong kabtang “an kabotan [nin Dios] iyo na an gabos na klase nin tawo makaligtas asin makaabot sa tamang kaaraman kan katotoohan.” (1 Timoteo 2:4) Si Jesu-Cristo asin an enot na mga Kristiano naggibo nin bilog na kalag sa pagdara kan tamang kaaraman na ini sa iba.​—Mateo 9:35; Gibo 5:42; Filipos 2:​19, 22.

Siisay an naggigibo kan kabotan nin Dios ngonyan? Sa haros duwang bilyon katawo na naghihingakong mga parasunod ni Jesu-Cristo, pira an arog kan ngohod na aki sa ilustrasyon ni Jesus, na nagduman asin naggibo kan kabotan kan saiyang ama? An simbag bakong depisil hanapon. An tunay na mga parasunod ni Jesu-Cristo gigibohon an trabaho na sinabi niang gibohon ninda: “Sa gabos na nasyon an maogmang bareta kaipuhan na ikahulit nguna.” (Marcos 13:10) An mga Saksi ni Jehova, na may bilang na labi sa apat may kabangang milyon sa bilog na kinaban, aktibong naghuhulit kan maogmang bareta manongod sa Kahadean nin Dios asin nagtotokdo sa iba, na itinotokdo an Kahadean bilang an solamenteng paglaom para sa katoninongan asin katiwasayan. Igwa daw kamo nin bilog na pakikikabtang sa paggibo kan kabotan nin Dios? Naghuhulit daw kamo kan maogmang bareta kan Kahadean arog kan ginibo ni Jesus?​—Gibo 10:42; Hebreo 10:7.

Pakanompong nin Kagayagayahan sa Paggibo kan Kabotan nin Dios

Mantang igwa nin kagayagayahan sa pakanood kan kabotan kan Ama, igwa nin mas dakulang kagayagayahan sa pagtotokdo sa iba kan kabotan nin Dios. Nakanompong si Jesus nin kagayagayahan sa pagtokdo sa mga tawo dapit sa saiyang Ama. Iyan siring sa pagkakan para saiya. (Juan 4:34) Kita man magkakamit nin tunay na kaogmahan kun ginigibo ta an ginibo ni Jesus, arin na baga, an paghulit asin pagtokdo kan mga bagay na itinokdo nia, an mga bagay na inako nia gikan sa saiyang Ama. (Mateo 28:​19, 20) Siring kan ipinanuga ni Jesus, “kun aram nindo an mga bagay na ini, maogma kamo kun gibohon nindo iyan.”​—Juan 13:17.

Sa pag-ilustrar: An sarong ina na naglaog giraray dai pa sana nahaloy sa pambilog na panahon na ministeryo bilang payunir nagsabi: “An pakaheling sa lalauogon kan sarong estudyante sa Biblia na nagliliwanag mantang an manlaenlaen na katotoohan sa Biblia nakaaabot sa puso makaoogmang gayo! Kagayagayahan nanggad para sako na maheling an sarong partikular na estudyante na manual na isinusurat an gabos na teksto bago kan pag-adal asin nagkukua nin nota durante kan pag-adal tanganing makasimbag sia sa ano man na repasong hapot sa huri.” An saro pa sa saiyang mga estudyante sa Biblia nagkaigwa na nin kontak sa katotoohan kan tin-edyer pa sia. Ngonyan na may agom na asin naghahadit manongod sa personal na mga problema, nagmamawot sia na maheling an mga Saksi. Kanigoan an kaogmahan nia kan manompongan sia kan tugang na babae na payunir! Ogmahon an hoben pang misis na ikabalik an saiyang pag-adal sa Biblia.

Pagpapadanay kan Kagayagayahan sa Paggibo kan Kabotan nin Dios

Si Hadeng David sa suanoy na Israel saro na naghingoa na gibohon an kabotan nin Dios sa bilog niang buhay. Sa ibong kan kadakol na kasakitan asin pangigipit na dinara tumang saiya, napahiro sia na magsabing: “An paggibo kan boot mo, O Dios ko, iyo an naoogmahan ko, asin an saimong katogonan nasa kairaroman kan sakong sadiri.” (Salmo 40:8) An paggibo kan kabotan ni Jehova yaon sa mismong kalag ni David, sa saiya mismong pagkatawo. Iyan an sekreto kan saiyang dai nawawarang kagayagayahan sa paglilingkod ki Jehova. Para ki David an paggibo kan kabotan nin Dios bakong kadepisilan. Imbes, iyan kaogmahan, bagay na gikan sa saiyang puso. Sa bilog niang buhay, nagmaigot sia na gibohon an pinakamakakaya nia sa paglingkod sa saiyang Dios, si Jehova, minsan ngani sia nakagibo nin kasalan asin nagkulang paminsanminsan.

Paminsanminsan, an satong kagayagayahan puwedeng lumuya. Puwede kitang mapagal o madisganar. Tibaad riniribok kita kan satong nakaagi, an satong konsensia riniribok kita manongod sa sarong sala na nagibo haloy na an nakaagi. Sa parate, mapanggaganahan ta an mga pagmateng ini paagi sa mas maingat na pag-adal kan Tataramon nin Dios. Puwede tang hingoahon na isurat an pagboot nin Dios sa “kairaroman” niato, siring kan ginibo ni David. Kun pagmamaigotan niato na gibohon an kabotan nin Dios nin bilog na kalag, an boot sabihon, sa pinakamakakaya niato, babalosan nia kita sono dian huli ta sia maimbod.​—Efeso 6:6; Hebreo 6:​10-12; 1 Pedro 4:19.

Interesante nanggad, sa Hebreo 10:​5-7, kinotar ni apostol Pablo an mga tataramon ni David sa Salmo 40:​6-8 asin iinaplikar iyan ki Jesu-Cristo. Sa paggibo kaiyan, idinoon ni Pablo kun gurano kadayupot ni Jesus sa saiyang Ama. An terminong Hebreo para sa “kabotan” igwa kan mga ideya nin ‘kaogmahan, kamawotan, pag-oyon, o kinawiwilihan.’ Kun siring, puwedeng arog kaini an pagkasabi kan Salmo 40:8 manongod kan Cristo: “An paggibo kan kinawiwilihan mo, O Dios ko, iyo an naoogmahan ko.”a Si Jesus boot na gibohon an ikinawiwili kan saiyang Ama. Nalabihan pa ni Jesus an paggibo kan hinahagad sana saiya. Ginibo nia an harani sa puso kan saiyang Ama, asin naogma sia sa paggibo kaiyan.

An bilog na buhay ni Jesus nasesentro sa pagtotokdo sa iba kan kabotan nin Dios asin kun ano an dapat nindang gibohon tanganing magkamit kan bendisyon nin Dios. Pambilog na panahon siang parahulit asin paratokdo saka nakanompong nin dakulang kagayagayahan sa paggibo kan trabahong iyan. Kun siring natural sana na kun orog na ginigibo niato an trabaho ni Jehova, mas dakol man na kagayagayahan an satong aakoon. Makapaglilingkod man daw kamo nin bilog na panahon sa paghuhulit tanganing an saindong kagayagayahan sumopay man?

An saro pang tabang sa pagpapadanay kan kagayagayahan sa paggibo kan kabotan nin Dios iyo na papagdanayon na malinaw an pagmansay sa ngapit. Iyan an ginibo ni Jesus. “Huli kan kagayagayahan na ibinugtak sa atubangan nia tinios nia an pasakitan na kahoy, hinamak an kasopganan.” Para saiya, an kagayagayahan iyo an pagpatunay na maimbod sa Dios sagkod sa katapusan dangan pagkamit kan balos na pagkahade sa toong kamot kan saiyang Ama.​—Hebreo 12:2.

Imahinara an ngapit na kagayagayahan na maabot sa mga nagpapadagos na gibohon an kabotan nin Dios. Maheheling ninda an kalaglagan kan mga ipinipirit an paggibo kan saindang sadiring paslong kabotan minsan ngani ini nagkacausa nin kasakitan sa mga nagmamaigot na gibohon an kabotan nin Dios. (2 Tesalonica 1:​7, 8) Isip-isipa an kagayagayahan kan mga binuhay liwat sa pagkakamit kan oportunidad na makanood asin gumibo kan kabotan nin Dios. O horophoropa an katuyohan nin Dios na ibalik an daga sa pagigin Paraiso. Asin sa katapustapusi, imahinara an katalingkasan na ibubunga kan biyong pagkalaglag ni Satanas, an paratumang sa kabotan ni Jehova.

Iyo, an paggibo kan kabotan nin Dios ngonyan makatatao nin dakol na kagayagayahan ngonyan asin nin daing sagkod na kaogmahan sa ngapit. Ano man an reaksion na inaako niato sa paghuhulit, arogon ta an halimbawa ni Jesus sa pag-ogma sa paggibo kan kabotan kan saiyang Ama.

[Nota sa Ibaba]